Stori 99

Long Wan Bigfala Rum Antap

NAOIA tu dei i pas bakegen, mo hemia Tasde naet. Jisas mo ol 12 aposol blong hem oli kam wanples long bigfala rum ya antap, blong oli kakae Pasova. Man ya we i stap goaot, hem i Judas Iskariot. Hem i stap go blong toktok wetem ol jif pris, blong mekem rod blong letem Jisas i go long han blong olgeta.

Yestede finis, Judas i go luk olgeta mo i askem long olgeta se: ‘?Sipos mi mi letem Jisas i go long han blong yufala, bambae yufala i givim wanem long mi?’ Oli talem se: ‘Toti silva mane.’ Ale naoia Judas i stap go blong mitim ol man ya blong i lidim olgeta oli go long Jisas. !Judas ya i nogud we i nogud!

Kakae blong Pasova i finis, nao Jisas i statem wan narafala kakae we i spesel. Hem i givim bred long ol aposol blong hem, mo i talem se: ‘Yufala i kakae, from we hemia i minim bodi blong mi, we bambae mi givim from yufala.’ Mo hem i givim glas waen long olgeta, nao hem i talem se: ‘Yufala i dring, from we waen ya i minim blad blong mi, we bambae i ron from yufala.’ Baebol i putum nem blong kakae ya se ‘Kakae blong Masta,’ no ‘Lodsapa.’

Ol man Isrel bifo, oli mekem kakae blong Pasova blong tingbaot taem ya we oli stap long Ijip, nao enjel blong God i ‘pas ova’ long haos blong olgeta, be i kilim i ded ol fasbon long haos blong ol man Ijip. Be naoia, Jisas i wantem se ol man blong hem oli mas tingbaot hem, mo laef blong hem we bambae i givim blong sevem olgeta. From samting ya, hem i talem long olgeta blong mekem spesel kakae ya evri yia.

Afta we oli kakae Lodsapa, Jisas i talem long ol aposol blong hem se oli no mas fraet mo oli mas gat strong bilif. Nao oli singsing presem God mo biaen oli goaot. Ating i bitim medel naet finis. Bambae yumi luk weples oli go long hem.

Matiu 26⁠:​14-30; Luk 22⁠:​1-39; Jon japta 13 kasem 17; 1 Korin 11⁠:20.

Stori 100

Jisas Long Garen Blong Getsemane

AFTA we Jisas mo ol aposol blong hem oli aot long bigfala rum antap, oli go long garen blong Getsemane. Oli kam plante taem finis long ples ya. Jisas i talem long olgeta blong oli stap wekap mo prea. Nao hem i wokbaot i go longwe lelebet, i bodaon we fes blong hem i kasem graon.

Biaen, Jisas i kambak long ol aposol blong hem. ?Yu ting se olgeta ya oli stap mekem wanem? !Oli stap slip! Tri taem Jisas i talem long olgeta blong stap wekap, mo tri taem hem i faenem olgeta oli stap slip. Long namba tri taem, Jisas i talem long olgeta se: ‘?Weswe? ?Yufala i stap slip yet? Taem i kam finis blong man ya i letem mi, mi go long han blong ol man nogud.’

Taem Jisas i stap toktok yet, oli harem noes blong wan bigfala hip blong man we oli stap kam. !Yu luk! !Oli stap kam wetem ol naef blong faet mo ol nalnal blong olgeta! Mo oli stap karem ol stik faea blong oli save luklukgud. Taem oli kam klosap, wan long olgeta i wokbaot i kam long Jisas. Hem i kis long Jisas, olsem pija ya i soem. !Man ya, hem i Judas Iskariot! ?From wanem hem i kis long Jisas?

Jisas i askem long hem se: ‘Judas, ?Yu yu kam blong kis long mi, blong letem mi mi go long han blong ol enemi blong mi?’ Yes, kis ya i wan saen. Judas i stap soem long ol man ya, hu nao Jisas we oli mas holem hem. Ale, ol enemi blong Jisas oli kam holem hem. Be Pita i no wantem se oli holem Jisas, hem i rere blong faetem ol man ya. Hem i pulumaot naef blong faet we hem i stap karem, mo i traem blong katem man ya we i stanap klosap long hem. Naef ya i jes mestem hed blong man ya, i katemaot raetsaed sora blong hem. Be Jisas i tajem sora blong man ya mo i mekem i gud bakegen.

Jisas i talem long Pita se: ‘Yu putumgud naef ya i gobak long paos blong hem bakegen. ?Yufala i ting se mi no save singaot long Papa blong mi blong i sanem plante taosen enjel, oli kam lukaot long mi?’ !Yes, Jisas i save mekem olsem! Be hem i no askem long God blong sanem ol enjel, from we hem i save se hemia stret taem blong ol enemi blong hem oli holem hem. Ale, hem i letem olgeta oli tekem hem i go. Bambae yumi luk wanem i hapen long Jisas biaen.

Matiu 26⁠:​36-56; Luk 22⁠:​39-53; Jon 18⁠:​1-12.