Stori 111

Boe We i Slip

!MAEWAD! ?Wanem i stap hapen long ples ya? ?Boe ya we i stap slip long graon, hem i karem kil? !Yu luk! !Wan long ol man ya we oli stap kamaot long haos ya, hem i Pol! ?Yu yu save faenem Timoti? ?Olsem wanem? ?Ating boe ya i foldaon long windo antap, i go kasem graon?

Yes, hemia nao samting we i hapen. Pol i stap long Troas, i stap toktok long ol disaepol blong Jisas long ples ya. Long nekis dei, hem i mas aot long sip, ale hem i save se bambae hem i no moa luk olgeta blong longtaem. From samting ya, hem i gohed blong toktok go kasem medel naet.

Nao boe ya we nem blong hem Yutikas, hem i stap sidaon long windo. Mo taem Pol i stap prij olsem, bodi blong Yutikas i stap kam hevi we i hevi, nao hem i slip, mo i foldaon long windo ya, i kasem graon. !Rum ya i stap antap long namba tri stori blong haos ya! Yumi save se ol man ya oli mas wari bigwan. !Taem oli godaon blong luk boe ya, oli luksave se hem i ded finis!

Taem Pol i luk se boe ya i ded, hem i slip antap long hem, mo i putum han blong hem i goraon long hem. Nao hem i talem long ol man se: ‘Yufala i no harem nogud, hem i laef bakegen.’ !Tru ya, hemia wan merikel ya! !Pol i mekem boe ya i laef bakegen! Ol man oli glad tumas.

Nao olgeta oli go antap bakegen, mo oli kakae wanples. Pol i gohed blong toktok gogo i brok delaet. !Yumi save se, Yutikas i no save slip bakegen! Nao Pol mo Timoti wetem olgeta we oli wokbaot long kampani blong tufala, oli aot long wan sip. ?Yu save se oli stap go wea?

Pol i jes finisim namba tri trip blong hem blong prij, nao hem i stap gohom. Long trip ya, Pol i stap tri yia long taon ya Efesas. Taswe, trip ya i tekem longtaem moa i bitim namba tu trip.

Afta we oli aot long Troas, sip i stop smol long Maelitas. Efesas i klosap nomo long Maelitas, ale Pol i sanem toktok i go long ol elda blong kongregesen blong Efesas se oli mas kam luk hem long Maelitas, blong hem i save toktok long olgeta laswan. !Taem sip i aot, olgeta oli harem nogud bitim mak, from we oli save se bambae oli no moa luk Pol bakegen!

Biaen, sip ya i kamtru long Sisaria bakegen. Pol i stap smoltaem long haos blong disaepol ya Filip. Nao long ples ya, profet Agabus i givim woning long Pol se, taem hem i kamtru long Jerusalem, bambae ol man oli holem hem, bambae oli sakem hem long kalabus. Mo hemia nao samting we i hapen. Afta we Pol i stap kalabus tu yia long Sisaria, oli sanem hem i go long Rom, blong hedgavman blong Rom we nem blong hem Sisa, bambae i jajem hem. Bambae yumi luk wanem i hapen long trip ya blong go long Rom.

Ol Wok japta 19 kasem 26.

Stori 112

Sip i Rek Klosap Long Wan Aelan

!YU LUK! !Sip ya i stap long trabol! !Hem i stap brobrok! ?Yu luk ol man we oli jamaot long sip ya, oli stap swimso? Samfala oli kasem so finis. Hemia Pol long medel blong pija ya. Bambae yumi luk wanem i bin hapen long hem.

Ating yu rimemba se, Pol i stap kalabus tu yia long Sisaria. Nao oli putum hem long wan sip wetem sam narafala prisena, blong oli go long Rom. Taem sip i pas long aelan blong Krit, wan bigfala win i girap. Win ya i strong we i strong olsem hariken, nao ol boskru oli no moa save stiarem sip ya. Long dei, oli no save luk san, mo long naet, oli no save luk ol sta. Afta we plante dei i pas, ol man ya oli ting se bambae oli mas ded.

Nao Pol i stanap long fes blong olgeta, i talem se: ‘Bambae i no gat wan long yumi we i save lusum laef blong hem; sip ya nomo bambae i lus. Las naet, wan enjel blong God i kamtru long mi, i talem se: “Pol, yu no fraet. Bambae yu yu mas go stanap long fes blong Sisa, long Rom. Mo God bambae i sevem ol man ya we oli stap wetem yu long sip.” ’

Long namba 14 dei afta we hariken ya i stat, klosap long medel naet, ol boskru oli ting se oli stap kam klosap long so samples. Oli fraet se sip ya bambae i brok long ol ston, ale oli sakem angka. Long nekis moning, oli luk wan pasis we i gat sanbij long hem. Mo oli ting se sipos oli save mekem, bambae oli putum sip i goso long ples ya.

Be i gat wan ples we solwota i no dip, nao sip i fas long sanbij, i no moa save muf. Ol bigbigfala wef oli brekemaot ol timba blong hem. Kapten blong ol soldia we oli gad long Pol olgeta, i talem se: ‘Yufala we i save swim, yufala i jamdaon, yufala i swimso. Ol narafala man, yufala i holem sam plang, no sam pis blong sip we solwota i brekemaot finis, nao yufala i swim i kam biaen.’ Ale, oli mekem olsem. Mo long fasin ya, ol 276 man long sip ya oli kasem sanbij, i no gat wan i lus, olsem enjel i bin promes.

Nem blong aelan ya, hemia Molta. Ol man long ples ya oli mekem i gud tumas long olgeta. Taem win i godaon mo solwota i kwaet, oli putum Pol long wan narafala sip, we i karem hem i go long Rom.

Ol Wok 27:​1-44; 28:​1-14.