‘Walk by Faith, Not by Sight’

Bifo we bigfala trabol long Jerusalem i stat, aposol Pol i raet i go long ol Kristin, we oli olsem ol prapa soldia blong Kraes, se bambae oli kasem trabol mo oli mas lego ol samting we olgeta nomo oli wantem. (2 Tim. 2:3, 4) Tede ol trabol oli stap kam antap bigwan, taswe yumi mas gat strong bilif we i save givhan long yumi blong gohed blong mekem ol samting we Jehova i wantem. (2 Kor. 4:18; 5:7) I gud yu wajem video ya ‘Walk by Faith, Not by Sight.’ (Yu go long jw.org, mo luk aninit long haf ya PUBLICATIONS > VIDEOS.) Yu makemgud olsem wanem Naham mo Abital i foldaon long trap ya blong wantem tumas ol samting blong bodi, nao tufala i lusum laef blong tufala from. Biaen, yu tokbaot ol kwestin ya.

(1) ?Wanem ‘rabis god ya we oli stanemap insaed long haos blong God’ long taem blong ol Kristin bifo? ?Ol Kristin long Jerusalem oli mas mekem wanem desisen kwiktaem? (Mat. 24:15, 16) (2) ?From wanem oli nidim strong bilif blong ronwe? (3) ?Wanem sam samting we oli mas lego? (4) ?From wanem Naham mo Abital i tektaem tumas blong aot long Jerusalem? (Mat. 24:17, 18) (5) ?Taem Rachel i rere blong aot long Jerusalem, wanem wan narafala samting we i kam traem bilif blong hem? (Mat. 10:34-37; Mak 10:29, 30) (6) ?Olsem wanem Ethan i soemaot wan gudfala eksampol long fasin ya blong trastem Jehova fulwan? (7) ?Wanem ol trabol we ol Kristin oli fesem long Pela? (8) ?Wanem i mekem se bilif blong Naham mo Abital i no moa strong? (9) ?Jehova i lukaotgud long ol Kristin long Pela olsem wanem? (Mat. 6:33; 1 Tim. 6:6-8) (10) ?Olsem wanem yumi save folem fasin blong Ebraham mo Sera taem yumi stap laef long ol las dei? (Hib. 11:8-10) (11) ?Wanem i mekem se Naham mo Abital tufala i wantem tumas blong gobak long Jerusalem? ?From wanem tingting ya i no waes nating? (Luk 21:21) (12) ?Laef long Jerusalem i olsem wanem taem Naham mo Abital i gobak? (13) ?From wanem naoia yumi mas mekem bilif blong yumi i strong moa bifo we en i kam?—Luk 17:31, 32; 21:34-36.

Wokbaot folem bilif i min se (1) yumi trastem oltaem ol advaes blong Jehova, (2) yumi letem ol advaes ya oli lidim yumi, mo (3) yumi soemaot long laef blong yumi se yumi tinghae long ol samting we Jehova i givim, be i no ol samting blong wol ya. I gud we yumi gat strong tingting oltaem blong wokbaot folem bilif, from we “wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem bambae i no save lus samtaem.”—1 Jon 2:17.