Fasin ya we man i pleplei wetem samting blong hem i no givhan nating long hem blong fren wetem God. Fasin ya i pulum man blong tingbaot samting we hem nomo i wantem, mo blong tingting long ol samting we oli nogud. Man no woman we i pleplei wetem samting blong hem i save kam olsem we hem i no tinghae long ol narafala, from we long tingting blong hem, hem i slip wetem olgeta nomo. Hem i no moa luk se lav i joen wetem fasin blong slip wetem narafala, be hem i daonem fasin ya i kam wan samting we hem i mekem blong harem gud blong smoltaem, mo blong mekem ol filing blong seks oli godaon. Be fasin ya we hem i pleplei wetem samting blong hem i mekem filing blong seks i godaon blong smoltaem nomo. Fasin ya i no save givhan long hem blong “kilimaot ol fasin” nogud olsem olgeta ya: “mekem nogud wetem [man no] woman,” mo “mekem ol samting blong sem,” mo “wantem woman [no man] tumas.” Nogat. Defren olgeta, fasin ya we man i pleplei wetem samting blong hem i wekemap ol haf blong bodi blong hem blong mekem ol rabis fasin ya.—Kolosi 3:5.

Aposol Pol i raetem se: “Ol fren . . . yumi mas mekem yumi klin. Olgeta samting long bodi blong yumi mo long tingting blong yumi we oli stap mekem yumi doti long fes blong God, yumi mas sakemaot olgeta evriwan. Mo yumi mas traehad blong mekem fasin blong yumi i klin, i tabu, from we yumi stap ona gud long God, mo yumi man blong hem nomo.” (2 Korin 7:1) Sipos yu stap faenem i hadwok blong folem ol advaes ya, yu no mas letem tingting blong yu i foldaon. Jeova i rere oltaem blong ‘fogivim man’ mo blong givhan long hem. (Ol Sam 86:5; Luk 11:9-13) From we hat blong yu i stap jajem yu, mo from we yu stap traehad blong winim fasin ya, yu yu soemaot se yu gat wan tingting we i stret, nating se yu foldaon wanwan taem bakegen. Mo tu, yu no mas fogetem se “God i hae moa long tingting [“hat,” NW] blong yumi, mo hem i save evri samting.” (1 Jon 3:20) God i no luk ol sin nomo we yumi mekem. Hem i luk yumi fulwan. Samting ya i mekem se hem i lesin wetem sore, taem yumi prea long hem wetem fulhat blong yumi blong askem hem blong fogivim yumi. Taswe yu no mas kam taed blong prea long God wetem fulhat blong yu we tingting blong yu i stap daon, olsem wan pikinini we i kam long papa blong hem taem hem i kasem trabol. Jeova bambae i blesem yu, i givim wan tingting long yu we i klingud. (Ol Sam 51:1-12, 17; Aesea 1:18) Be yu mas mekem ol samting tu we oli stret long ol prea blong yu. Olsem nao, yu mas traehad blong blokem olkaen rabis pija mo ol rabis fren tu.a

Sipos fasin ya i gohed blong mekem trabol long yu, plis storian wetem Kristin papa mo mama blong yu, no maet wetem wan fren we hem i bigman long ol Kristin fasin mo i rili kea long yu.b—Ol Proveb 1:8, 9; 1 Tesalonaeka 5:14; Taetas 2:3-5.

Jeova i wantem se olgeta we oli mared oli holem promes we oli mekem finis. Taem Jeova i mekem mared blong faswan man mo woman, hem i talem se: “Man . . . i mas go joen wetem woman blong hem, nao tufala bambae i kam olsem wan bodi nomo.” Jisas Kraes i talem tok ya bakegen, mo hem i ademap smol moa, i se: “From we God i joenem tufala olsem, man i no mas brekem mared blong tufala.” (Jenesis 2:24; Matiu 19:3-6) Taswe, long tingting blong Jeova mo Jisas, mared i wan promes we i stap oltaem, gogo kasem we wan long tufala i ded. (1 Korin 7:39) From we mared i wan tabu plan we Jeova i stanemap, divos i no wan smol samting nomo. Blong talem stret, Jeova i no laekem nating divos we i no stanap long stret risen we Baebol i givim.—Malakae 2:15, 16.

?Wanem risen we Baebol i talem se man mo woman i save divos from? Jeova i no laekem nating fasin blong mekem i krangke long waef no long hasban blong hem, mo fasin blong slip olbaot tu. (Jenesis 39:9; 2 Samuel 11:26, 27; Ol Sam 51:4) Tru ya, hem i luk se ol nogud fasin ya oli doti we oli doti bitim mak, taswe hem i letem se man mo woman tufala i save divos from samting ya. (Blong save wanem nao ol nogud fasin ya, lukluk Japta 9, haf 7 long buk ya.) Jeova i givim raet long hemia we i no mekem rong, blong i jusum sipos bambae hem i stap wetem hasban no waef blong hem we i mekem nogud, no sipos bambae hem i mekem divos long hem. (Matiu 19:9) Taswe, sipos hemia we i no mekem rong i jusum blong mekem divos, hem i no mekem wan samting we Jeova i agensem. Be Kristin kongregesen bambae i no pulum man ya no woman ya blong mekem divos. Nogat. Maet from sam risen, hemia we i no mekem rong bambae i jusum blong stap wetem narawan we i mekem nogud, antap moa sipos narawan ya i rili tanem tingting blong hem from sin we hem i bin mekem. Nomata se i olsem wanem, ol wanwan man mo woman oli mas mekem prapa desisen blong olgeta, sipos bambae oli mekem divos from risen we Baebol i talem no nogat. Mo biaen, oli mas akseptem frut we i kamaot from.—Galesia 6:5.

Sam Kristin we oli stap kasem trabol we i strong bitim mak, oli tekem desisen blong seraot no mekem divos long hasban no waef blong olgeta, nating se hasban no waef ya i no mekem nogud wetem narafala. Sipos i olsem, Baebol i talem se, “hem i mas stap olsem nomo, i no mared bakegen. No sipos no, bambae i mas kambak blong joen gud bakegen” long man no long woman blong hem. (1 Korin 7:11) Kristin ya i no gat raet blong lukaot wan narafala blong mared wetem. (Matiu 5:32) Traem tingbaot wanem ol bigfala trabol we samfala oli save seraot from.

Man i no wantem givim samting we famle blong hem i nidim. Sipos hasban i no wantem givim ol samting we famle blong hem i nidim, nating se hem i naf blong wok, famle i save kam pua tumas mo i sot long plante samting. Baebol i talem se: ‘Man we i no wantem lukaot long famle blong hem, hem i soemaot we hem i no moa holem fasin blong bilif. Hem i stap longwe moa long God, i winim man we i no bilif nating.’ (1 Timoti 5:8) Sipos man olsem i no wantem jenisim fasin blong hem, woman blong hem i mas mekem desisen sipos bambae hem i go long kot blong seraot, blong bambae hem i save lukaot gud long hem wan mo ol pikinini blong hem. Mo tu, sipos man ya i Kristin, ol elda bambae oli lukluk gud long fasin blong man ya we i no wantem givim ol samting we famle blong hem i nidim. Kongregesen i save putumaot wan man we i no wantem lukaot long famle blong hem.

Raf fasin bitim mak. Maet wan man i kilim nogud woman blong hem gogo helt blong woman ya i kam nogud mo laef blong hem i stap long denja. No maet woman i mekem olsem. Sipos hemia we i mekem nogud i wan Kristin, ol elda long kongregesen oli mas lukluk long bisnes ya. Kongregesen i save putumaot wan man no wan woman we oltaem i faerap long kros mo i stap kilim hasban no waef blong hem.—Galesia 5:19-21.

Blokem wosip fulwan. Maet hasban no waef i traehad oltaem blong blokem narawan fulwan blong i no mekem trufala wosip, mo maet i traem blong fosem hem tu blong brekem loa blong God. Taem samting ya i hapen, narawan i mas skelem sipos rod blong ‘obei long God fastaem long man’ i blong mekem wan samting folem loa blong seraot.—Ol Wok 5:29.

Sipos wan mared man no woman i fesem wan long ol bigfala trabol ya antap, i no mas gat wan long yumi we i tok long hem, blong i seraot long hasban no waef blong hem we i mekem i rong. Ol Kristin fren we oli gat tingting blong God, mo ol elda, oli save givim help mo advaes we i stanap long Baebol, be olgeta tu oli no save evri smosmol samting long laef blong wan hasban mo waef blong hem. Jeova nomo i save luk ol samting ya. Sipos wan Kristin waef i kasem wan smol problem long famle, nao i giaman se hem i wan bigfala trabol from we hem i wantem seraot long man blong hem, woman ya i no stap ona long God mo long plan blong mared. Sem mak long wan Kristin hasban we i mekem fasin olsem. Jeova i save sipos wan long tufala i wokem plan ya from we hem i wantem seraot nomo long narawan, nating se hem i traem haedem tingting blong hem. Yes, ‘olgeta samting oli stap long klia ples nomo, stret long fes blong God. Mo long fes blong hem nomo, yumi evriwan i mas talemaot ol fasin blong laef blong yumi.’ (Hibrus 4:13) Be sipos i tru se i gat wan trabol we i denja tumas mo i stap gohed nomo, i no mas gat wan long yumi we i tok agens long desisen blong wan Kristin blong seraot long man no woman blong hem, sipos hem i luk se i no gat narafala rod. Long en blong bisnes ya, “yumi evriwan i mas stanap long fes blong God, blong hem i jajem yumi.”—Rom 14:10-12.