Ol Refrens Blong Kristin Wok Mo Laef—Buk Blong Miting

3-9 EPREL

OL GUDGUDFALA SAMTING LONG BAEBOL | JEREMAEA 17-21

“Letem Jehova i Jenisim Tingting Mo Fasin Blong Yu”

(Jeremaea 18:​5-10) Nao mi talemaot long ol man Jerusalem mo ol narafala man Juda we Hae God i talem se, ⁶ ‘Olgeta. ?Weswe? ?Yufala i ting se mi mi no gat raet blong mekem long yufala olsem we man blong wokem graonpot ya i mekem long graon ya blong hem? Yufala i stap long han blong mi, stret olsem we graon blong wokem graonpot i stap long han blong man blong wokem graonpot. ⁷ Sipos samtaem mi mi talemaot long king blong wan narafala kantri, wetem ol haeman blong hem, mo ol narafala man blong hem, se mi bambae mi pulumaot olgeta long kantri blong olgeta, mo bambae mi brebrekemdaon ol taon blong olgeta, mo bambae mi spolem paoa blong olgeta, ⁸ be ol man blong kantri ya oli tanem tingting blong olgeta from ol rabis fasin blong olgeta, mi bambae mi no save mekem olsem we mi talem fastaem. ⁹ Mo bakegen, sipos mi mi talem long wan king blong narafala kantri, wetem ol haeman blong hem, mo ol narafala man blong hem, we bambae mi wokemgud olgeta, mo mi stanemap olgeta blong oli kam strong bakegen, ¹⁰ be biaen, olgeta blong ples ya oli no moa save obei long mi, mo oli mekem ol rabis fasin bakegen, mi bambae mi no moa save mekem olsem we mi mi talem.’

it-2 pej 776 haf 4

Tanem tingting

Wan man blong wokem graonpot i save jenisim tingting blong hem long wan graonpot sipos graonpot ya i “kam nogud long han blong hem.” (Jer 18:​3, 4) Folem pijatok ya, Jehova i wantem soemaot se, hem i no olsem wan man blong wokem graonpot we i mekem se graonpot i ‘nogud long han blong hem,’ be hem i wantem soemaot se hem i gat raet blong jenisim tingting blong hem long wan man, sipos man ya i no letem Jehova i stretem hem no i sore long hem. (Skelem wetem Aes 45:9; Ro 9:​19-21.) Samtaem hem i “no save mekem olsem we hem i talem fastaem” long wan neson. O samtaem hem i no moa mekem ol gudfala samting we hem i bin mekem long wan neson. Hem i jenisim tingting blong hem nomo, from we ol man ya oli no obei long hem. (Jer 18:​5-10) I no Jehova we i mestem, be defren olgeta man o “graon” nomo i “jenis” from we hat blong hem i lidim hem i go rong, nao i mekem se Jehova i tingtingbak o i jenisim filing blong hem.

17-23 EPREL

OL GUDGUDFALA SAMTING LONG BAEBOL | JEREMAEA 25-28

“Yu Mas Gat Strong Tingting Olsem Jeremaea”

(Jeremaea 26:​2-6) “Hae God i toktok long Profet Jeremaea, i talem se, “Jeremaea. Yu go stanap long yad blong tempol blong mi, yu talemaot tok blong mi long olgeta man we oli aot long ol taon blong Juda, oli kam blong mekem wosip long ples ya. Yu mas talemaot olgeta samting we mi bambae mi talem long yu, we yu no mestem wan. ³ Maet bambae oli harem tok blong yu, mo oli tanem tingting blong olgeta from ol rabis fasin blong olgeta. Sipos oli mekem olsem, bambae mi jenisim tingting blong mi, nao mi no moa spolem olgeta from ol fasin ya, olsem we mi tingbaot finis blong mekem.” ⁴ Nao profet i go talemaot long olgeta we Hae God i talem se, “Olgeta. Mi mi talem finis long yufala se yufala i mas obei long mi, we yufala i folemgud ol tok blong mi we mi mi bin talem long yufala. ⁵ Ol profet oli man blong wok blong mi, we mi mi stap sanem olgeta oli kam long yufala, be yufala i no obei nating long ol samting ya we oli talem. Yufala i mas lesin gud long tok blong olgeta. ⁶ Sipos yufala i stap gohed long fasin ya we yufala i no obei long mi, bambae mi spolemgud haos ya, olsem we mi bin spolem taon ya Silo bifo, wetem haos tapolen blong mi we i stap long ples ya, mo olgeta man long wol bambae oli stap yusum nem blong taon ya Jerusalem blong singaot trabol i kam long man.”

w09 12/1 pej 24 haf 6

Jeremaea i No Lego

Jehova i talem long Jeremaea blong i givim woning long ol man se, Hem bambae i spolemgud Jerusalem sipos olgeta oli no lego ol nogud fasin blong olgeta. Taem Jeremaea i talemaot woning ya, ol man oli kam kros tumas mo oli talem se: “Olgeta. Man ya, hem i mas ded ya.” Be Jeremaea i askem strong long olgeta blong oli “mas obei long Hae God.” Mo hem i talem se: ‘Sipos yufala i kilim mi mi ded, yufala evriwan i mekem i no stret, from we mi mi wan stret man nomo. Mi talem stret long yufala, i no man we i sanem mi, Hae God nomo i sanem mi, blong mi kam talemaot ol tok ya long yufala.’ ?Yu save wanem i hapen biaen?

(Jeremaea 26:​8, 9) Mo taem hem i talemaot ol toktok ya finis we Hae God i talem long hem, wantaem nomo, olgeta evriwan oli girap, oli holem hem, oli singaot bigwan se, “!Yu mas ded from tok ya! ⁹ ?From wanem yu stap tok long nem blong Hae God, se haos ya blong hem bambae i kam olsem ples ya Silo bifo? ?Mo from wanem yu talem se bambae hem i spolem taon ya, we bambae i no moa gat man i stap long hem?” Nao ol man ya oli kam hivap raon long hem.

(Jeremaea 26:​12, 13) Nao profet i talem se, “Olgeta. Hae God nomo i sanem mi, blong mi kam talemaot olgeta samting ya we yufala i harem, we mi stap talemaot agens long haos ya, mo agens long taon ya. ¹³ Nao from samting ya, yufala i mas jenisim fasin ya we yufala i stap long hem naoia, mo yufala i mas lego ol samting ya we yufala i stap mekem, mo yufala i mas obei long Hae God ya nomo we hem i God blong yumi. Sipos yufala i mekem olsem, hem bambae i jenisim tingting blong hem, nao i no letem ol trabol ya i kam kasem yufala, olsem we hem i talem.

jr pej 21 haf 13

Mekem Wok “Long Ol Laswan Haf Blong Dei”

¹³ ?Taem ol lida blong skul mo politik long Juda oli harem tok blong Jeremaea, oli mekem wanem? Jeremaea hem wan i talem se, “olgeta evriwan oli girap, oli holem [mi], oli singaot bigwan se, “!Yu mas ded from tok ya!” Oli kros tumas, nao oli se: “Olgeta. Man ya, hem i mas ded ya.” (Ridim Jeremaea 26:​8-11.) Be ol enemi blong Jeremaea oli no win. Jehova i stap wetem profet blong hem blong givhan long hem. Jeremaea hem wan i no letem ol enemi blong hem oli mekem hem i fraet, nating se oli raf tumas o oli plante moa long hem. Yu tu yu no mas fraet long olgeta we oli agensem yu.

(Jeremaea 26:16) Nao ol lida ya wetem olgeta man oli talem long ol pris mo ol profet se, “Man ya, hem i stap toktok long yumi long nem blong Hae God ya, we i God blong yumi. I nogud yumi kilim hem i ded.”

(Jeremaea 26:24) Be from we Ahikam, pikinini blong Safan i givhan gud long Profet Jeremaea, ol lida ya oli no putum hem long han blong ol man ya, blong oli kilim hem i ded.

w09 12/1 pej 25 haf 1

Jeremaea i No Lego

Baebol i talem se: “Nao ol lida ya wetem olgeta man oli talem long ol pris mo ol profet se, ‘Man ya, hem i stap toktok long yumi long nem blong Hae God ya, we i God blong yumi. I nogud yumi kilim hem i ded.’ ” Jeremaea i no letem fasin fraet i stopem wok we hem i mekem, ale from samting ya, Jehova i lukaot gud long hem. Naoia bambae yumi luk wanem i hapen long Uria, wan narafala profet blong Jehova we hem i mekem samting we i defren long Jeremaea.

Traem Faenem Ol Gudfala Samting Ya

(Jeremaea 27:​2, 3) Hae God i talem se, “Jeremaea. Yu wokem wan yok long wud, mo yu wokem ol strap blong hem long skin blong buluk, nao bambae yu putum long nek blong yu. ³ Nao yu givim tok blong mi long ol ambasada ya we oli kam long Jerusalem blong luk King Jedekia, blong oli go talemaot long ol king blong olgeta. Ol king ya, i gat king blong Edom, mo king blong Moab, mo king blong Amon, mo king blong Taea, mo king blong Saedon.”

jr pej 27 haf 21

Mekem Wok “Long Ol Laswan Haf Blong Dei”

²¹ Taem King Jedekia i stat blong rul, ol man blong karem tok blong ol king blong Edom, Moab, Amon, Taea mo Saedon oli kam long Jerusalem. Maet oli kam blong pulum Jedekia blong i joenem olgeta blong faet agensem Nebukadnesa. Be Jeremaea i askem strong long Jedekia blong i sarenda long Babilon. Hem i soem wan yok long ol mesenja ya blong soemaot long olgeta se neson blong olgeta tu i mas sarenda long ol man Babilon. (Jer. 27:​1-3, 14) Samting we Jeremaea i mekem mo mesej we hem i talemaot i mekem se ol man oli kros, antap moa Hanania. Hem i wan giaman profet we i stap talemaot long ol man se yok blong Babilon bambae i brok. Be Jehova i talem long Jeremaea se long sem yia nomo giaman profet ya Hanania bambae i ded. Mo hemia nao samting we i hapen.​—Jer. 28:​1-3, 16, 17.

(Jeremaea 28:11) Mo i talemaot long fes blong ol man ya se, “Olgeta. Hae God i talem se long fasin ya nao, bambae hem i brekem yok ya we King Nebukadnesa i stap fosem ol kantri blong oli karem. Mo bambae i no kasem tu yia yet, be samting ya bambae i kamtru.” Nao taem Profet Hanania i talemaot tok ya finis, Profet Jeremaea i girap, i go.

jr pej 187-188 haf 11-12

“Mi No Save Stap Kwaet”

¹¹ I gud blong tingbaot se Jeremaea i lukaotgud tu. Hem i yusum hed blong hem taem ol enemi blong hem oli agensem hem. Hem i save stret taem blong ronwe. Eksampol, yu traem tingbaot samting we i hapen long hem mo Hanania. Afta we Hanania i tok agensem ol profet tok blong Jehova, Jeremaea i stretem hem, mo i eksplenem long hem olsem wanem blong luksave wan trufala profet. Long taem ya, Jeremaea i stap karem wan yok we oli wokem long wud blong soemaot se oli mas sarenda long Babilon; Hanania i kros nao i brekem yok ya. Jeremaea i no save samting we Hanania bambae i mekem biaen. ?Ale hem i mekem wanem? Baebol i talem se: “Profet Jeremaea i girap, i go.” Yes, Jeremaea i ronwe. Biaen, Jehova i talem long hem blong i gobak long Hanania mo i talemaot se bambae Hem i mekem ol man Jiu oli go wok slef long Babilon mo i talem tu se Hanania bambae i ded.​—Jer. 28:​1-17.

¹² Eksampol blong Jeremaea i soemaot klia se long wok blong prij, yumi mas lukaotgud blong mekem samting we i stret. Sipos long wan haos, wan man i no wantem lesin mo i kros mo i wantem kilim yumi, yumi mas aot gud nomo long haos blong hem wetem respek mo muv i go long narafala haos. I no nid blong rao wetem wan man from gud nius blong Kingdom. Taem yumi “bos long tingting” mo yumi no rao wetem man blong haos, bambae hem i save lesin bakegen nekis taem we wan brata o sista i pas.​—Ridim 2 Timoti 2:​23-25; Prov. 17:14.

24-30 EPREL

OL GUDGUDFALA SAMTING LONG BAEBOL | JEREMAEA 29-31

“Jehova i Talemaot Wan Niufala Kontrak”

(Jeremaea 31:​31, NW) ‘!Yufala i luk! Long ol dei we oli stap kam, bambae mi mi mekem wan niufala kontrak wetem laen blong Isrel mo laen blong Juda.’

it-1 pej 524 haf 3-4

Kontrak

Niufala Kontrak. Long yia 600 Bifo Kraes, Jehova i yusum profet Jeremaea blong i talemaot wan niufala kontrak o niufala promes. Hem i talem se kontrak ya bambae i no olsem Kontrak blong Loa we ol man Isrel oli brekem. (Jer 31:​31-34) Long naet bifo we Jisas i ded long Nisan 14 long yia 33 Kristin Taem, hem i mekem lafet blong Kakae Blong Masta wetem ol disaepol blong hem mo hem i talemaot niufala kontrak, we sakrefaes blong hem i mekem i stanap. (Lu 22:20) Fifti dei afta we Jisas i laef bakegen, mo 10 dei afta we hem i go luk Papa blong hem long heven, hem i sanem tabu spirit we Jehova i givim long hem, long ol disaepol blong hem, taem oli joen tugeta long Jerusalem long wan rum antap.​—Wok 2:​1-4, 17, 33; 2Ko 3:​6, 8, 9; Hib 2:​3, 4.

Jehova i mekem niufala kontrak wetem “Isrel blong God,” hemia ol tabu Kristin we oli joen wetem Kraes blong mekemap wan kongregesen o bodi. (Hib 8:10; 12:​22-24; Ga 6:​15, 16; 3:​26-28; Ro 2:​28, 29) Niufala kontrak i wok from we blad (sakrefaes blong man) blong Jisas Kraes i ron. Jisas i givim praes ya i go long Jehova afta we hem i go antap long heven. (Mt 26:28) Taem God i jusum wan man blong i go long heven (Hib 3:1), God i tekem man ya i go long kontrak blong hem tru long sakrefaes blong Kraes. (Sam 50:5; Hib 9:​14, 15, 26) Jisas Kraes i tekem niufala kontrak i kamtru (Hib 8:6; 9:15) mo hem nao i pikinini blong Ebraham. (Ga 3:16) Taem Jisas i tekem niufala kontrak i kamtru, hem i givhan long olgeta we oli stap long kontrak ya blong oli kam stret pikinini blong Ebraham, (Hib 2:16; Ga 3:29) from we hem i fogivim ol sin blong olgeta. Nao Jehova i talemaot se oli stret man.​—Ro 5:​1, 2; 8:33; Hib 10:​16, 17.

(Jeremaea 31:​32, 33) Promes ya bambae i no olsem olfala promes ya we mi mekem wetem ol bubu blong yufala bifo, long taem ya we mi holem han blong olgeta, mi lidim olgeta oli kamaot long Ijip. I nating we long taem ya, mi mi Masta blong olgeta, be oli no holem promes ya nating. ³³ Long taem ya we i stap kam, niufala promes ya we bambae mi mekem wetem yufala i olsem. Mi bambae mi putum loa blong mi long tingting blong yufala, mo bambae mi raetemdaon long hat blong yufala. Mo mi bambae mi God blong yufala, mo yufala bambae i man blong mi.

jr pej 173-174 haf 11-12

Yu Save Kasem Blesing From Niufala Kontrak

¹¹ ?Yu wantem save moa long saed blong niufala kontrak? Wan bigfala samting we i mekem se niufala kontrak i defren long kontrak blong Loa, hemia samting we oli raetem tufala kontrak ya long hem. (Ridim Jeremaea 31:33.) Ten komanmen we i stap long kontrak blong Loa oli raetem long ston, we biaen i lus. Long saed blong niufala kontrak, Jeremaea i talem long wan profet tok se bambae Jehova i raetem niufala kontrak long hat blong man, mo bambae i stap blong olwe. Olgeta we oli stap insaed long niufala kontrak, hemia ol tabu Kristin. Oli glad tumas long loa ya. ?Be olsem wanem long olgeta we oli no insaed long niufala kontrak, hemia “ol narafala sipsip,” we oli gat hop blong laef olwe long wol? (Jon 10:16) Olgeta tu oli glad long loa blong God. Long wan fasin, olgeta oli olsem ol man blong narafala kantri we oli laef long Isrel, ol man ya tu oli glad blong folem Loa blong Moses mo oli stap kasem ol gudfala samting we i kamaot from loa ya.​—Lev. 24:22; Nam. 15:15.

¹² Bambae yu ansa olsem wanem sipos wan man i askem long yu se, ‘?Wanem loa ya we oli raetem long hat blong ol tabu Kristin?’ Loa ya oli singaotem se “loa blong Kraes.” Loa ya i go long Isrel blong God fastaem, hemia olgeta we oli stap insaed long niufala kontrak. (Gal. 6:2; Rom 2:​28, 29) Blong talem long wan toktok nomo “loa blong Kraes” hem i: lav. (Mat. 22:​36-39) ?Olsem wanem oli raetem loa ya long hat blong ol tabu Kristin? Hemia taem oli stadi long Tok blong God mo oli toktok long Jehova tru long prea. Be i no olgeta nomo we oli stap insaed long niufala kontrak oli mas stadi Baebol mo prea, evri Kristin oli mas mekem olsem, nating se oli no stap insaed long niufala kontrak. Evriwan i mas mekem olsem tu sipos oli wantem kasem blesing we kamaot from niufala kontrak.

(Jeremaea 31:34) Bambae i no moa gat wan long yufala we i save go tijim man ples blong hem se, ‘Yu mas save Hae God,’ mo bambae i no gat man we i save go talem tok ya long brata blong hem, from we yufala evriwan bambae i save mi, i stat long ol haeman, gogo kasem olgeta we oli no gat nem. Nao mi bambae mi fogivim yufala, mi tekemaot ol sin blong yufala, mo bambae mi no moa save tingbaot olgeta bakegen. Mi mi Hae God, mo hemia tok blong mi.

jr pej 177 haf 18

Yu Save Kasem Blesing From Niufala Kontrak

¹⁸ Niufala kontrak ya i soemaot nambawan fasin blong Jehova we hem i mekem long ol sinman, olsem ol tabu Kristin we oli stap long niufala kontrak, wetem olgeta we bambae oli gat hop blong laef long wol ya. Yu save trastem Jehova se, taem hem i karemaot sin blong yu, bambae hem i no moa save tingbaot bakegen. Promes blong God long saed blong niufala kontrak i tijim wan lesen long yumi evriwan. I gud yu askem se, ‘?Mi mi traem folem fasin blong Jehova blong no tingbaot ol rabis fasin we narafala i mekem long mi, we mi bin fogivim hem from?’ (Mat. 6:​14, 15) Hemia i minim ol smosmol sin mo ol bigfala sin olsem, taem wan Kristin i mekem rabis fasin blong seks. Sipos hemia we i mekem i stret nomo i agri blong fogivim narafala we i mekem rabis fasin, ?i no stret blong ‘tingbaot sin ya bakegen’? I no isi blong lego ol mastik blong yumi biaen, be yet hemia nao wan rod blong folem fasin blong Jehova.