JAPTA 20

Yumi Givhan Long Ol Brata Long Taem Blong Trabol

?JAPTA YA I TOKBAOT WANEM?

Ol tru Kristin oli lavlavem olgeta, taswe oli givgivhan long olgeta long taem blong disasta

1, 2. (1) ?Ol Kristin long Judia oli kasem wanem trabol? (2) ?Ol Kristin long Antiok oli mekem wanem, we i soemaot se oli lavem ol brata blong olgeta?

LONG yia 46, kakae i sot long kantri blong Judia. Smol kakae we i stap, hem i sas bitim mak. Ol disaepol blong Jisas oli no gat mane blong pem. Oli hanggri, mo bambae oli ded sipos oli no kasem kakae. Be han blong Jehova i no sot. Hem i givhan long olgeta, long fasin we neva hem i givhan long ol narafala disaepol blong Kraes bifo. ?Wanem i hapen?

² Ol Kristin long Antiok long Siria, we sam oli man Isrel mo sam oli blong ol narafala laen, oli sore long ol Kristin brata mo sista blong olgeta long Jerusalem mo Judia. Ale oli saksakem mane blong givhan long olgeta. Biaen, oli jusum Banabas mo Sol, blong tufala i karem mane ya i go long ol elda blong kongregesen long Jerusalem. (Ridim Ol Wok 11:27-30; 12:25.) !Yu traem tingbaot olsem wanem samting ya i tajem hat blong ol brata long Judia! !Oli luksave se ol brata long Antiok oli lavem olgeta tumas!

3. (1) ?Ol man blong God tede oli mekem wanem blong folem fasin blong ol Kristin long Antiok bifo? Yu talem wan eksampol. (Yu luk pej ya tu, “Fas Bigfala Wok We Yumi Mekem Blong Givhan Long Taem Blong Trabol.”) (2) ?Wanem ol kwestin we bambae yumi tokbaot long japta ya?

³ Hemia fas taem we Baebol i talem se ol Kristin oli sanem mane mo olting i go long ol narafala Kristin we oli sot long plante samting. Tede, yumi folem sem fasin. Taem yumi harem se ol brata long narafala ples oli kasem trabol from disasta no oli kasem wan narafala trabol, yumi givhan long olgeta.a I gud yumi luksave olsem wanem wok ya blong givhan long taem blong trabol i wan wok we yumi mekem i go long God. Bambae yumi tokbaot trifala kwestin ya: ?Olsem wanem wok ya i wan tabu wok? ?Wanem trifala samting we wok ya i mekem? ?Yumi kasem wanem blesing from wok ya?

Wok Ya i Wan “Tabu” Wok

4. Taem Pol i raetem leta i go long ol Kristin long Korin bifo, ?hem i tokbaot wanem tufala wok?

⁴ Pol i raetem leta blong Seken Korin i go long ol Kristin we tabu spirit i makemaot olgeta. Be ol tok blong hem i stret tu long “ol narafala sipsip” tede. (Jon 10:16) Long leta ya, hem i eksplenem se ol Kristin oli gat tu wok. Wan wok i blong prij mo tijim ol man, ‘blong pulum olgeta oli kam fren blong God.’ (2 Kor. 5:18-20; 1 Tim. 2:3-6) Narafala wok i blong givhan long ol Kristin brata mo sista we oli kasem trabol, nao oli sot long plante samting. (2 Kor. 8:4) Pol i yusum sem Grik wod (di·a·ko·niʹa) blong tokbaot tufala wok ya. ?From wanem yumi wantem save long samting ya?

5. ?From wanem i stret blong talem se wok ya blong givim ol samting long ol brata we oli trabol, i wan wok blong ol Kristin?

⁵ Taem Pol i yusum sem Grik wod blong tokbaot tufala wok ya, hem i wantem soemaot se tufala wok ya tugeta, oli wok blong ol Kristin. Hem i talem bifo finis se: ‘I gat ol defdefren kaen wok we yumi stap mekem, be i gat wan Masta nomo. I gat ol defdefren kaen fasin blong mekem ol wok ya. Be sem Spirit nomo i stap mekem ol wok ya.’ (1 Kor. 12:4-6, 11) Mo Pol i soemaot se defdefren wok ya we yumi mekem long kongregesen, evriwan oli “tabu” wok we oli joen wetem wosip blong yumi.b (Rom 12:1, 6-8) Taswe, Pol i luk se i stret nomo we hem i yusum taem blong hem, blong givhan long ol Kristin ya we oli trabol.—Rom 15:25, 26.

6. (1) ?Pol i eksplenem olsem wanem se wok blong givhan long ol brata we oli trabol i joen wetem wosip blong yumi? (2) Yu tokbaot plan we yumi folem long fulwol taem i gat disasta. (Yu luk pej 214, “!Taem Disasta i Kasem Yumi!”)

⁶ Pol i givhan long ol Kristin long Korin, blong oli kasem save olsem wanem wok blong givhan long ol brata we oli trabol, i joen wetem wosip blong olgeta. Hem i eksplenem olsem: Taem ol Kristin oli givim samting long ol brata blong olgeta we oli trabol, oli stap “holemstrong gud nius ya blong Kraes.” (2 Kor. 9:13) Oli wantem folem ol tijing blong Kraes, taswe oli givhan long ol brata. Taem oli kaen olsem, hemia i soemaot se ‘God i stap givhan bigwan long olgeta long gladhat blong hem.’ (2 Kor. 9:14; 1 Pita 4:10) Taswe, Wajtaoa blong namba 1 Disemba 1975, i tokbaot wok ya blong givim samting we ol brata oli sot long hem, se: “Jehova God mo Pikinini blong hem Jisas Kraes, tufala i ting se wok ya i impoten tumas. !Yumi no mas gat tu tingting long saed ya!” Yes, wok ya i wan tabu wok we yumi mas tinghevi long hem.—Rom 12:1, 7; 2 Kor. 8:7; Hib. 13:16.

Tri Samting We Wok Ya i Mekem

7, 8. ?Wanem fas samting we wok ya blong givhan long ol brata i mekem? Yu eksplenem.

⁷ ?Wok ya i mekem wanem? Pol i ansa long kwestin ya long seken leta we hem i raetem long ol Kristin long Korin. (Ridim 2 Korin 9:11-15.) Pol i tokbaot tri bigfala samting we ‘wok ya blong givhan long ol man blong God’ i mekem. Bambae yumi tokbaot olgeta wanwan.

⁸ Fas samting, wok ya i leftemap nem blong God. Long 2 Korin 9:11-15, plante taem Pol i pulum tingting blong ol brata i go long Jehova God. Long vas 11 mo 12, hem i talem 2 taem se oli mas “talem tangkiu long God.” Long vas 13 mo 14, hem i talem se wok blong givhan long ol brata long taem blong trabol, i “leftemap nem blong God.” Mo wok ya i mekem se ol Kristin oli presem God, from we ‘hem i stap givhan bigwan long olgeta long gladhat blong hem.’ Long vas 15, Pol i finisim toktok blong hem se: “Yumi mas talem tangkiu long God.”—1 Pita 4:11.

9. ?Wok ya blong givhan long ol brata long taem blong trabol, i mekem wanem long sam man? Yu talem wan eksampol.

⁹ Ol man blong God tede oli gat sem tingting olsem Pol. Oli luk wok ya blong givhan long ol brata long taem blong trabol, olsem wan janis blong leftemap nem blong Jehova mo ol tijing blong hem. (1 Kor. 10:31; Taet. 2:10) Blong talem stret, wok ya i jenisim tingting blong sam man we oli no laekem Jehova mo ol Witnes blong hem. Wan woman i putum saen long doa blong hem se: “Ol Witnes Blong Jehova, Yufala i No Kam Long Haos Ya.” Be wan dei, i gat wan bigfala hariken i kilim taon ya. Nao sam man oli kam wokem bakegen wan haos klosap long haos blong woman ya. Hem i wajem olgeta blong plante dei, mo i luk se oli fren gud mo oli glad. Ale hem i go blong faenemaot se hu nao ol man ya. Taem oli talem se oli Witnes blong Jehova we oli stap wok fri nomo, hem i sapraes, mo i talem se: “Bifo, mi mi no laekem yufala. Be mi mi rong ya.” ?Wanem i hapen biaen? Hem i karemaot saen we i stap long doa blong hem.

10, 11. (1) ?Wanem nambatu samting we wok ya blong givhan long ol brata long taem blong trabol, i mekem? Yu talem sam eksampol. (2) ?Wanem smol buk i givhan long olgeta we oli mekem wok ya? (Yu luk haf ya, “Smol Buk We i Givim Save.”)

¹⁰ Nambatu samting, yumi ‘givhan long ol man blong God long ol samting we oli sot long hem.’ (2 Kor. 9:12, fas haf blong vas) Yumi wantem givim ol samting we ol brata mo sista oli nidim kwiktaem, mo yumi wantem mekem olgeta oli harem gud. ?From wanem? From we Kristin kongregesen i olsem ‘bodi blong yumi.’ Mo ‘sipos wan haf blong bodi i harem nogud, be bambae olgeta bodi i mas harem nogud.’ (1 Kor. 12:20, 26) Taswe ol brata mo sista oli sore tumas, taem oli harem we plante brata blong olgeta oli kasem trabol from wan disasta. From we oli lavem ol brata ya, oli lego evri samting, oli karem ol tul blong olgeta, mo oli go kwiktaem blong givhan long olgeta. (Jem. 2:15, 16) Samting ya i hapen long Japan long yia 2011, taem wan taetel wef i spolem ples ya. Branj ofis long Amerika i sanem wan leta i go long olgeta Komiti Blong Bildim Ol Haos Wosip long Amerika. Hem i askem sipos “sam brata we oli save gud wok ya blong bildim ol haos,” oli save go long Japan blong wokem bakegen sam Haos Kingdom. !Sam wik nomo afta, 600 brata mo sista oli putum nem blong olgeta blong go! !Mo oli talem tu se olgeta nomo bambae oli pem rod blong olgeta! Branj ofis long Amerika i talem se: “Mifala i sapraes long bigfala namba blong ol brata we oli wantem givhan.” Taem oli stap wok, wan brata blong Japan i askem long wan brata we i kam ovasi, from wanem hem i wantem kam givhan. Brata ya i ansa se: “Ol brata long Japan oli haf ‘bodi blong mifala.’ Taem oli harem nogud, mifala tu i harem nogud.” !Tru ya, ol brata we oli givhan long taem blong trabol oli lavem ol brata blong olgeta, taswe oli rere blong lego evri samting blong halpem olgeta! !Samfala, klosap oli lusum laef blong olgeta, blong givhan long ol brata blong olgeta!c—1 Jon 3:16.

Swiselan, long yia 1946

FAS BIGFALA WOK WE YUMI MEKEM BLONG GIVHAN LONG TAEM BLONG TRABOL

LONG Septemba 1945, hemia sam manis nomo afta we Wol Wo Tu i finis long Yurop, Brata Knorr i talem se bambae yumi mekem wan bigfala wok blong sanem “ol samting we ol brata blong yumi long Sentrol Yurop oli nidim.”

Long sam wik nomo, ol Witnes long Kanada mo Amerika mo sam narafala kantri, oli hivimap klos mo kakae, mo oli fulumap long ol bokis. Long Jenuware 1946, oli sanem ol samting ya i go long ol brata long Beljiom, Bulgaria, Denmak, Filipin, Finlan, Franis, Gris, Hangari, Inglan, Itali, Jaena, Jekoslavakia, Jemani, Netalan, Nowei, Ostria, Polan, mo Romania.

Be oli no sanem wan taem nomo. !Oli gohed tu yia haf blong sanem ol samting we ol brata mo sista oli nidim! I gat 85,000 brata mo sista we oli joen blong sanem bitim 300,000 kilo kakae, mo bitim 450,000 kilo klos, mo bitim 124,000 sus, oli go long ol brata mo sista long ol kantri we faet i spolem. Bigfala wok ya i finis long Ogis 1948. Long yia 1949, Wajtaoa i talem se: “Wok ya i soemaot se yumi lavlavem yumi. Ol brata mo sista we oli mekem wok ya, oli wantem ona long Masta. Mo oli save se ol samting we oli sanem, bambae i givhan long ol brata blong oli gohed blong mekem tru wosip. Oli ting se i wan bigfala blesing blong mekem wok olsem blong givhan long ol brata.” Wok ya i leftemap nem blong Jehova, i givim samting we ol brata mo sista oli nidim, mo i mekem se ol brata long ol defdefren ples long wol oli joen gud.

¹¹ Plante man we oli no Witnes, olgeta tu oli presem wok we ol Witnes oli mekem long taem blong disasta. Samting ya i hapen long Arkansas long Amerika long yia 2013, taem wan disasta i kasem ples ya. Niuspepa i tokbaot ol Witnes we oli kwik blong givhan, i se: “Taem i gat wan disasta, ol Witnes blong Jehova oli folem wan gudfala plan. Oli tekem aksen kwiktaem, oli givim samting we ol man oli nidim, mo oli mekem samting blong givhan long olgeta.” Yes, tok blong aposol Pol i tru nomo, se yumi givim ‘plante samting’ we ol brata oli sot long hem.

12-14. (1) ?Wanem nambatri samting we wok ya blong givhan long ol brata long taem blong trabol, i mekem? ?From wanem samting ya i impoten? (2) ?Wanem toktok blong ol brata mo sista we i soemaot se i impoten blong folem bakegen program blong mekem wosip?

¹² Nambatri samting, yumi givhan long olgeta we oli kasem trabol, blong oli folem bakegen program blong mekem wosip. ?From wanem samting ya i impoten? Pol i talem se olgeta we oli kasem help bambae oli “talem tangkiu long God.” (2 Kor. 9:12, las haf blong vas) Rod we i beswan blong talem tangkiu long Jehova, hemia se oli mas kwik blong folem bakegen program blong mekem wosip. (Fil. 1:10) Long yia 1945, Wajtaoa i talem se: “Pol i agri long plan ya . . . blong mekem kleksin, from we i save givhan . . . long ol Kristin we oli sot long plante samting, nao oli gat taem mo paoa blong mekem wosip long Jehova mo blong joen bakegen long wok blong prij.” Tede, tingting blong yumi i sem mak. Taem ol brata oli joen bakegen long wok blong prij, oli leftemap tingting blong ol man raonabaot long olgeta we oli harem nogud, mo samting ya i mekem tingting blong olgeta tu i kam strong.—Ridim 2 Korin 1:3, 4.

¹³ Sam long olgeta we oli kasem paoa taem oli joen bakegen long wok blong prij, oli talemaot tingting blong olgeta. Wan brata i talem se: “Mi mo famle blong mi, mifala i harem se i wan bigfala blesing blong joen bakegen long wok blong prij. Taem mifala i givhan long ol narafala we oli harem nogud, mifala i no tingting tumas long ol trabol blong mifala.” Wan sista i talem se: “Taem mi putum tingting blong mi fulwan long wosip blong mi, mi no moa tingbaot ol trabol we disasta i mekem. Mi harem se mi no moa fraet.” Wan narafala sista i talem se: “Plante samting we i hapen, mi mo famle blong mi i no naf blong fiksimap. Be taem mifala i prij, mifala i putum tingting blong mifala i stap nomo long ol nambawan blesing blong niufala wol. Taem mifala i storian wetem ol narafala long ol blesing ya, tingting blong mifala i strong moa se olgeta samting bambae i kam gud.”

¹⁴ Ol brata mo sista we oli kasem trabol from disasta, oli mas kwik blong gobak long ol miting. Wan sista we i gat klosap 60 yia, nem blong hem Kiyoko, i lusum evri samting long wan taetel wef. Hem i gat klos mo sus nomo we hem i stap werem. Hem i no save se bambae i mekem wanem. Nao wan elda i talem long hem se bambae oli mekem miting long trak blong hem nomo. Kiyoko i talem se: “Mi mo wan narafala sista i sidaon long trak wetem elda mo woman blong hem. Miting ya i no dip tumas, be i olsem we i mekem merikel long mi. Mi no moa wari long taetel wef ya, mi harem se mi gat pis long tingting blong mi. Miting ya i soemaot long mi se taem yumi kampani wetem ol brata mo sista, samting ya i gat bigfala paoa.” Wan narafala sista i tokbaot ol miting we hem i joen long olgeta afta long wan disasta, i se: “!Oli givhan long mi blong mi stanap strong!”—Rom 1:11, 12; 12:12.

Wok Ya i Givim Blesing We i Stap Olwe

15, 16. (1) ?Ol Kristin long Korin mo ol narafala ples, oli kasem wanem blesing taem oli givhan long olgeta we oli trabol? (2) ?Tede tu, yumi kasem wanem blesing?

¹⁵ Pol i talem long ol Kristin long Korin wanem blesing we olgeta we oli mekem wok ya blong givhan long taem blong trabol bambae oli kasem, mo wanem blesing ol narafala Kristin tu bambae oli kasem. Hem i talem se: “Ol man ya (ol Kristin long Jerusalem we oli kasem help) bambae oli stap prea from yufala, mo oli lavem yufala, from we oli luk we God i stap givhan bigwan long yufala long gladhat blong hem.” (2 Kor. 9:14) Yes, taem ol Kristin long Judia oli kasem ol presen long ol Kristin long Korin, we sam long olgeta oli no man Isrel, oli lavem olgeta tumas mo oli prea from olgeta.

¹⁶ Wajtaoa blong namba 1 Disemba 1945, i tokbaot blesing we wok ya i givim, i se: “!Taem ol man blong God long wan ples oli givim samting we ol man blong God long narafala ples oli nidim, samting ya i mekem se oli joen gud!” Tok ya i tru tumas. Wan elda we i go long wan ples we bigfala ren i spolem, i talem se: “Taem mi givhan long ol brata mo sista long ples ya, mi harem se mi lavem olgeta moa i bitim bifo.” Wan sista we i kasem help, i talem bigfala tangkiu, i se: “Taem yumi luk we ol brata long fulwol oli lavlavem olgeta olsem, yumi harem se yumi stap long Paradaes finis.”—Ridim Ol Proveb 17:17.

17. (1) ?Tok blong Aesea 41:13 i stret olsem wanem long taem blong disasta? (2) Yu talem sam eksampol we oli soemaot se wok ya i leftemap nem blong Jehova mo i mekem ol brata oli joen gud. (Yu luk ol pej ya tu, “Ol Volontia Oli Wok Long Plante Ples Long Wol.”)

¹⁷ Taem ol brata long ples blong disasta oli kasem help, oli luk se promes blong Jehova i kamtru long olgeta, se: “!Mi Jehova mi God blong yu! !Mi stap holemtaet raethan blong yu! Mi mi talem long yu se, ‘!Yu no fraet! !Bambae mi givhan long yu!’” (Aes. 41:13, NW) Wan sista we i kasem trabol from wan disasta, i talem se: “Taem mi luk we disasta i spolem evri samting, mi harem se i no gat rod blong kamaot long trabol ya. Be i olsem we Jehova i pusum han blong hem i kam long mi. I no gat tok we i naf blong eksplenem help we ol brata oli givim.” Long wan eria we disasta i spolem, tu elda i raetem leta blong talemaot tingting blong evriwan long kongregesen, se: “Ol trabol we mifala i kasem taem graon i seksek, i mekem mifala i harem nogud tumas. Be mifala i luk olsem wanem Jehova i yusum ol brata blong givhan long mifala. Mifala i ridim ol stori finis blong ol wok we ol brata ya oli mekem long taem blong disasta, be naoia mifala i luk wetem prapa ae blong mifala.”

“WOK YA I JENISIM LAEF BLONG MI”

?WOK ya blong givhan long taem blong disasta, i save mekem wanem long ol yangfala? Yu tingbaot Peter Johnson, we hem i stat blong mekem wok ya taem hem i gat 18 yia. Hem i tingtingbak, i se: “Mi luk we ol brata we mifala i givhan long olgeta, oli glad mo oli talem bigfala tangkiu. Samting ya i tajem hat blong mi. Mo mi tu mi kasem bigfala glad taem mi givhan long olgeta. Wok ya i mekem se mi mi strong moa blong folem desisen blong mi, blong yusum laef blong mi fulwan long wok blong Jehova.” Afta, Peter i stat long wok blong paenia. Hem i wok long Betel tu, mo biaen, hem i joen long Komiti We i Bildim Ol Haos Wosip. Peter i talem se: “Long yia 1974, taem mi givhan long ol brata we oli kasem trabol from disasta, samting ya i jenisim laef blong mi.” ?Olsem wanem? ?Yu yu wan yangfala? ?Yu save folem sem rod we Peter i folem? !Hu i save, maet samting ya i jenisim laef blong yu tu!

?Yu Yu Wantem Joen Long Wok Ya?

18. ?Sipos yu wantem joen long wok ya, yu mas mekem wanem? (Yu luk haf ya, “Wok Ya i Jenisim Laef Blong Mi.”)

¹⁸ ?Olsem wanem? ?Yu yu wantem kasem glad ya we plante narafala oli kasem taem oli givhan long ol brata mo sista we oli trabol? Sipos yes, i gud yu tingbaot we plante taem, olgeta we ol brata oli jusum blong mekem wok ya, hemia olgeta we oli stap wok oltaem wetem ol tim blong bildim ol Haos Kingdom. Yu save talem long ol elda long kongregesen blong yu, se yu wantem fulumap wan pepa blong joen long wok ya. Wan elda we i wok longtaem finis blong givhan long ol brata long taem blong trabol, i givim advaes ya: “Taem wan disasta i hapen, yu no mas folem prapa tingting blong yu. Yu wet fastaem blong Komiti We i Givhan Long Taem Blong Disasta i askem long yu, nao yu jes go.” Sipos evriwan oli folem advaes ya, wok bambae i ron gud, i no olbaot.

19. ?Ol brata we oli givhan long ol narafala long taem blong trabol, oli soemaot olsem wanem se yumi tru disaepol blong Kraes?

¹⁹ Wok ya blong givhan long ol brata long taem blong trabol, i wan nambawan rod blong obei long tok blong Jisas se: “Yufala i mas lavlavem yufala.” Taem yumi lavlavem yumi, yumi soemaot se yumi tru disaepol blong Kraes. (Jon 13:34, 35) Ol brata mo sista we oli glad blong givhan long ol narafala we oli obei long Kingdom blong God, oli leftemap nem blong God. !I wan bigfala blesing blong gat ol brata mo sista olsem!

a Japta ya i tokbaot wok we yumi mekem blong givhan long ol Kristin brata mo sista blong yumi. Be plante taem wok ya i givhan tu long ol man we oli no Witnes.—Gal. 6:10.

b Pol i yusum sem Grik tok ya (di·aʹko·nos) blong tokbaot ‘ol man blong givhan.’—1 Tim. 3:12 (Yu luk “Dikon” long Diksonari long Baebol Long Bislama).

c Yu luk pej 23 kasem 27 blong Wajtaoa 1 Novemba 1994, “Halpem Famle Blong Yumi Long Saed Blong Bilif Long Bosnia.”

OL VOLONTIA OLI WOK LONG PLANTE PLES LONG WOL

SENTROL MO WES AFRIKA

Long yia 1994, bitim 800,000 man oli ded long Rwanda, long faet we wan laen i mekem long narafala laen. Afta, trabol i kamaot long sam narafala kantri long Sentrol Afrika. Samting ya i mekem se ol kamp blong refuji oli fulap bitim mak. Ale, ol Witnes blong Jehova long Beljiom, mo Franis, mo Swiselan oli sanem klos, mo meresin, mo haos tapolen, mo kakae, mo plante narafala samting we ol brata oli nidim. Ol samting ya oli hevi olsem 300 tan. Sam wik nomo afta long trabol ya, ol brata oli kasem ol presen ya.

Mo tu, wan tim blong 10 dokta mo nes we oli Witnes, oli aot long Franis oli go long Afrika, blong givhan long ol brata we oli kasem trabol from faet, mo hanggri, mo ol defdefren sik. Long tu yia, i gat 10,000 man oli kam luk tim ya blong kasem tritmen mo meresin. Wok ya i leftemap nem blong Jehova mo ogenaesesen blong hem. Wan nes i talem se: “Taem mifala i go long wan eria blong givhan long ol brata mo sista, ol man oli gat respek, oli talem se, ‘Hemia ol Witnes blong Jehova, oli kam blong givhan long ol brata blong olgeta.’” Wan Witnes we nes i givhan long hem, i talem se: “!Tangkiu sista! !Tangkiu Jehova!”

Samtaem i gat bigfala aksiden, nao ol brata oli givhan long olgeta we oli kasem kil. Long yia 2012, i gat wan bigfala aksiden olsem long Naejeria. Totin Witnes we evriwan oli blong sem kongregesen, oli ded, mo 54 narafala oli kasem bigfala kil. Komiti we i givhan long ol man long taem blong trabol, i mekem wan program blong ol brata mo sista oli lukaot long ol sikman ya wanwan long hospital. Wan narafala woman we i slip long hospital i luk samting ya, nao i ring long pasta blong hem, i se: “I no gat wan long jos blong yumi we i kam luk mi. !I gud yu kam long hospital, mo yu luk olsem wanem ol Witnes blong Jehova oli lavlavem olgeta!”

Olgeta long kongregesen ya oli harem nogud tumas blong lusum 13 brata mo sista blong olgeta. Be ol gudfala toktok mo wok blong ol narafala brata mo sista, i leftemap tingting blong olgeta. Mo taem oli luk olsem wanem ol brata we oli kam blong givhan oli lavem olgeta, plante oli spenem moa taem long wok blong prij. Bifo long aksiden ya, i gat 35 pablisa nomo long kongregesen, be wan yia biaen, i gat 60.

OSTRELIA

Long yia 2013, bigfala wota i ron long sam ples long Kwinslan, mo i spolem haos blong 70 Witnes. Mark mo Rhonda wetem gel blong tufala, trifala i ronwe i go long wan strong haos we plante man oli stap haed long hem. Haos ya i fulap gud. Rhonda i talem se: “I no gat ples blong sidaon, mitrifala i stanap nomo.” Ol helikopta oli stap karem ol man i kam, mo noes blong olgeta tu i mekem ol man oli harem nogud. Rhonda i wari, ale hem i askem long man blong hem se: “?Bambae yumi mekem wanem?” Mark i prea wetem fulhat blong hem, i askem long Jehova blong i givhan long olgeta. Rhonda i gohed se: “Haf aoa afta, wan trak i stop, nao tri brata oli kamaot. Trifala i talem se: ‘Yufala i kam, bambae mifala i tekem yufala i go long haos blong wan brata.’” Rhonda i talem se: “Mi no save eksplenem filing blong mifala long taem ya. Ol samting we ogenaesesen blong Jehova i mekem blong soemaot se i lavem mifala mo blong lukaot long mifala, i tajem hat blong mifala.”

Bitim 250 volontia oli spid i kam blong givhan long ol brata long ples ya. Wan olfala brata i talem se: “Wantaem nomo, wan grup blong ol Witnes oli kamtru blong klinim haos blong mi. Oli wok olsem ol anis. Mi mo woman blong mi, mitufala i no save fogetem bigfala help we oli givim.”

BRASIL

Long yia 2008, bigfala ren i foldaon long Santa Catarina, ol hil oli brobrok, nao sofmad i berem ol haos. Samwe long 80,000 man oli ronwe long haos blong olgeta. Wan man i talem se: “I olsem wan taetel wef blong sofmad we i miks wetem wud.” Sam brata oli go haed long Haos Asembli. Brata we i lukaot long Haos Asembli, nem blong hem Márcio, i talem se: “Oli kam we oli no karem wan samting, klos nomo we oli werem, we sofmad i kavremap olgeta.” Wan sista i talem se: “Sofmad i smasem gud haos blong mifala. Mi mi harem nogud tumas, be mi no save fogetem ol gudfala toktok blong ol brata mo sista, mo ol samting we oli mekem blong givhan long mifala. !I klia se oli lavem mifala! Trabol ya i tijim mi se i waes moa blong tinghae long ol samting we Jehova i givim.”

Long yia 2009, Haos Asembli long Santa Catarina long Brasil, i kam stamba ples blong putum ol samting we ol brata oli nidim

Klosap long taon ya Rio de Janeiro, plante taem graon i brok mo sofmad i berem ol vilej. From samting ya, ol brata oli putumap wan Komiti Blong Givhan Long Taem Blong Disasta, we i stap oltaem nomo. Oli jusumaot sam brata we oli stap long eria ya blong oli talemaot hareap, taem graon i brok. Nao ol volontia oli kam long ol trak we i gat saen long olgeta se: “Ol Witnes blong Jehova—Oli Kam Blong Halpem Ol Man.” Evriwan long ol tim ya, oli save finis wok we oli mas mekem. I gat wan saen long ol sot blong olgeta se Witnes blong Jehova. Olgeta ya wetem ol brata long Komiti We i Toktok Wetem Ol Dokta, oli wok wanples blong givhan long ol brata mo sista we oli kasem kil. Sam narafala brata oli karem kakae, mo wota, mo meresin, mo klos, mo ol samting blong klinim haos. I wan bigfala wok blong klinim ol haos we sofmad i spolem olgeta. !Wan tim blong 60 volontia i karemaot 4 kameong sofmad long wan haos nomo!

!TAEM DISASTA I KASEM YUMI!

Ol elda oli toktok i go long ol pablisa
Ol elda oli givim ripot long kodineta
Kodineta i givim ripot long eria elda mo long sam narafala brata we oli stap toktok i go long branj ofis
Ol brata bambae oli wok kwik blong givim kakae, wota, ples blong slip, mo meresin long yumi. Mo tu, bambae samfala oli leftemap tingting blong yumi, mo oli talem ol gudfala toktok blong Baebol blong mekem yumi strong
Branj ofis i sanem ripot i go long Komiti Blong Ol Kodineta long Hed Kampani, blong tokbaot disasta mo ol samting we ol brata oli nidim
Komiti We i Givhan Long Taem Blong Disasta i mekem plan blong givim ol samting we ol brata oli nidim, mo bambae i gohed olsem gogo ol samting i kam gud
Komiti Blong Ol Kodineta i tokbaot ol samting we ol brata oli nidim. Maet bambae Komiti ya i agri blong sanem sam volontia blong narafala kantri oli go blong givhan

SMOL BUK WE I GIVIM SAVE

LONG Jun 2013, wan smol buk i kamaot, nem blong hem Jehovah’s Witnesses and Disaster Relief (Ol Witnes Blong Jehova Oli Givhan Long Taem Blong Disasta). Oli wokem smol buk ya blong ol man blong gavman long Amerika, we oli lukaot long wok blong givhan long ol man long taem blong trabol. Buk ya i tokbaot sam wok we ol Witnes oli mekem, stat long yia 1945. I gat wan map tu, blong soemaot ol defdefren ples long wol we yumi mekem wok ya. Wan elda we i lukaot long wok blong givhan long taem blong disasta, i talem se: “Bifo we i gat wan disasta, Komiti We i Givhan Long Taem Blong Disasta i sanem smol buk ya i go long ol man blong gavman, long ol ples we plante disasta oli stap kasem olgeta. Buk ya i givim save long olgeta long wok we yumi mekem finis, nao taem i gat wan disasta, oli glad blong letem yumi go kwiktaem long ples blong disasta.”