Japta 81

Oli Traem Bakegen Blong Kilim Jisas i Ded

HEMIA i koltaem, taswe Jisas i stap wokbaot aninit long wan vranda blong haos blong God, we nem blong hem Vranda blong Solomon. Nao ol man Isrel oli kam plante, oli raon long hem, nao oli talem long hem se: “Yu yu stap mekem mifala i wet, wet, wet, we mifala i no savegud yu yet. ?Bambae mifala i mas stap wet olsem hamas dei moa? Sipos yu yu Mesaea ya, yu talemaot i klia long mifala.”

Jisas i ansa long olgeta, i se: “Mi mi talem long yufala finis, be yufala i no save bilif long mi.” Jisas i no talem stret long olgeta se hem i Mesaea no Kraes, olsem hem i bin talem long woman Sameria taem hem i storeyan wetem hem long wel. Be hem i bin eksplenem long olgeta se hem i kamaot long heven mo hem i laef fastaem long Ebraham. From ol samting ya, oli save luksave se hem i Mesaea.

Jisas i wantem se ol man oli skelem ol wok blong hem wetem ol profet tok blong Baebol long saed blong Mesaea no Kraes. From samting ya olgeta oli save luksave se hem nao hem i Kraes. Taswe hem i bin talem long ol disaepol blong hem se oli no mas talemaot hem long ol man. Mo taswe nao hem i talem long ol enemi blong hem se: “Ol wok ya we mi stap mekem long nem blong Papa blong mi oli stap talemaot mi. Be yufala i no save bilif long mi.”

?From wanem oli no save bilif long hem? ?From we Jisas i no mekem plante samting blong soemaot se hem i Kraes? No gat. Jisas i talem risen from wanem oli no save bilif long hem, i se: “From we yufala i no sipsip blong mi. Ol sipsip blong mi oli save harem voes blong mi. Mi mi savegud olgeta, mo olgeta oli save biaen long mi. Mo mi mi givim laef ya long olgeta we i no save finis. Olgeta ya oli no save ded samtaem, mo i no gat man i save pulumaot olgeta long han blong mi. Papa blong mi, hem i givim olgeta ya long mi, mo hem i strong moa, i winim ol narafala man. Nao i no gat wan i save pulumaot olgeta long han blong Papa blong mi.”

Nao Jisas i soemaot olsem wanem hem i fren gud wetem Papa blong hem, i se: “Mi ya wetem Papa blong mi, mitufala i wan nomo.” Jisas i stap long wol, mo Papa blong hem i stap long heven. Taswe i klia nomo we Jisas i no stap talem se hem wetem Papa blong hem tufala i wan bodi. No, be hem i stap talem se tufala i gat wan plan no wan tingting nomo.

Nao ol man Jyu oli kros tumas, oli tekem ol ston blong oli stonem hem bakegen, olsem oli bin mekem bifo, long Lafet blong Wokem ol Wansaed Haos. Jisas i no fraet long olgeta ya we oli wantem kilim hem i ded, be hem i talem long olgeta se: “Mi mi mekem plante gudfala wok finis long fes blong yufala. Hemia ol wok ya we Papa blong mi i givim long mi blong mi mekem. ?Wanem wok ya long olgeta we yufala i wantem stonem mi from?”

Oli ansa long hem, se: “I no from gudfala wok we mifala i wantem stonem yu. Mifala i wantem stonem yu from we yu stap tok nogud long God ya. Yu yu man nomo, be yu stap traem talem se yu yu God.” !Oli stap gyaman! !Jisas i neva talem olsem! ?From wanem ol man Jyu oli talem samting ya?

From we Jisas i stap tokbaot bigfala paoa we hem i gat blong mekem ol wok blong hem. Be ol man Jyu oli ting se ol paoa ya oli blong God nomo. Wan eksampel: Jisas i jes tokbaot “ol sipsip blong hem,” i se: “Mi mi givim laef ya long olgeta we i no save finis.” Hemia wan samting we ol narafala man oli no save mekem. Be ol man Jyu oli fogetem we Jisas i bin talem se Papa blong hem i givim paoa long hem blong hem i save mekem olsem.

Jisas i no traem talem se hem i God. Hem i save se God i hae moa long hem. Taswe hem i talem long olgeta se: “Olgeta bifo oli bin raetem long Baebol ya we yufala i stap holem [long Sam 82:6], we God i talem se ‘Yufala i god.’ . . . Nao olgeta ya we God i talem long olgeta se ‘yufala i god,’ olgeta ya oli man we God i givim tok blong hem long olgeta. Be mi, Papa blong mi i putumap mi, i sanem mi mi kam long wol ya. ?Nao weswe yufala i stap talem se ‘Yu stap tok nogud long God ya,’ taem mi talem se ‘Mi mi Pikinini blong God’?”

Oraet, Baebol i talem se sam man we oli stap jajem ol narafala man, be oli no gat stret fasin nating, oli olsem “ol god.” ?Nao weswe ol man Jyu oli save agensem Jisas taem hem i talem se: “Mi mi Pikinini blong God”? Nao Jisas i gohed long tok blong hem, i se: “Sipos mi no mekem ol wok we Papa blong mi i wantem, i nogud yufala i bilif long mi. Be sipos mi stap mekem ol wok ya, nating we yufala i no save bilif long ol tok blong mi, be yufala i mas bilif long ol wok ya blong mi. Nao long fasin ya, bambae yufala i save, we yufala i save gud, se laef blong Papa blong mi i stap joen long laef blong mi mo laef blong mi i stap joen long laef blong Papa blong mi.”

Nao oli traem holem hem. Be hem i aot long olgeta, i ronwe, olsem hem i bin mekem bifo long Lafet blong Wokem ol Wansaed Haos. Nao hem i aot long Jerusalem, i go longwe, long narasaed Jodan Reva i go, long ples ya we kolosap fo yia bifo Jon Baptaes i stap mekem baptaes long hem. Ples ya i stap long saed long saot blong bigfala lugun blong Galili. Taem man i aot long Jerusalem, hem i mas wokbaot i go tu dei blong kasem ples ya.

Nao plante man oli stap kam long Jisas long ples ya, mo oli stap talem se: “Jon i no mekem wan saen long paoa blong God. Be olgeta tok we Jon i talem blong talemaot man ya oli tru nomo.” Ale, long ples ya plante man oli bilif long Jisas. Jon 10:22-42; 4:26; 8:23, 58; Matyu 16:20.

▪ ?Jisas i wantem se ol man oli luksave hem long wanem rod?

▪ ?Olsem wanem Jisas wetem Papa blong hem, tufala i wan nomo?

▪ ?From wanem ol man Jyu oli talem se Jisas i stap traem talem se hem i God?

▪ ?Jisas i talem wanem tok blong Ol Sam blong soemaot se hem i no gat bigfala paoa olsem God?