Refrens Blong Kristin Wok Mo Laef Buk Blong Miting
2-8 DISEMBA
OL GUDGUDFALA SAMTING LONG BAEBOL | REVELESEN 7-9
“Jehova i Blesem Wan Bigfala Hip Blong Ol Man”
it-1 pej 997 haf 1
Bigfala Hip Blong Ol Man
Hemia i mekem yumi wantem save se: Sipos “bigfala hip blong ol man,” oli ol man we oli kasem laef mo oli stap long wol, ?olsem wanem oli ‘stap stanap long fored blong bigfala jea blong God mo long fored blong Smol Sipsip’? (Re 7:9) Samtaem Baebol i yusum fasin ya blong ‘stanap,’ blong soemaot wan man we i glad o i agri long wan man o grup we i stanap long fored blong hem. (Sam 1:5; 5:5; Pro 22:29, AT; Lu 1:19) Be long japta 6 blong Revelesen, “ol king blong wol, wetem ol haeman mo ol komanda blong ol soldia, wetem ol rijman mo ol strong man, wetem evri slef mo evri man we oli fri,” oli stap traem blong haedem olgeta wan ‘long fes blong Man ya we i stap sidaon long bigfala jea blong king, mo long kros blong Smol Sipsip ya, from we bigfala dei blong kros blong tufala i kam, mo ?hu i naf blong stanap long dei ya?’ (Re 6:15-17; skelem wetem Lu 21:36.) Taswe i luk olsem se “bigfala hip blong ol man” ya, hem i ol man we oli laef tru long bigfala dei blong kros mo oli bin naf blong “stanap” from we God mo Smol Sipsip i glad long olgeta.
it-2 pej 1127 haf 4
Bigfala Trabol
Samwe 30 yia afta we Jerusalem i lus, aposol Jon i tokbaot bigfala hip blong ol man ya we oli kamaot long olgeta nesen, laen, mo kala. Hem i se: “Hemia ol man ya we oli pastru long bigfala trabol.” (Re 7:13, 14) Save ya se bigfala hip blong ol man ya we “oli pastru long bigfala trabol,” i soemaot se oli laef tru long taem blong bigfala trabol. Tingting ya i stret wetem tok blong Ol Wok 7:9, 10 we i se: “God i stap wetem [Josef], mo i tekemaot hem long ol trabol blong hem.” Taem God i tekemaot Josef long ol trabol blong hem, hemia i no minim nomo se Josef i naf blong stanap strong, be i minim tu se hem i laef tru long ol samting we oli spolem hem.
it-1 pej 996-997
Bigfala Hip Blong Ol Man
Samting We i Makemaot Olgeta. Rod blong luksave “bigfala hip blong ol man” ya, i stap long ol vas blong Revelesen japta 7 mo long ol narafala vas we oli tokbaot sem samting. Revelesen 7:15-17 i tokbaot se God i “pulum haos tapolen blong hem antap long olgeta,” i lidim olgeta i go long “springwota blong laef,” mo i ravemaot “evri wota blong ae blong olgeta.” Long Revelesen 21:2-4 yumi faenem ol semfala tok we i se: “Haos tapolen blong God i stap wetem ol man,” hem i “ravemaot wota blong ae blong olgeta,” mo “bambae i no moa gat man i ded.” Vison ya i no stap tokbaot ol man we oli stap long heven, long ples we ‘Niufala Jerusalem i aot long hem i kamdaon,’ be hem i stap tokbaot ol man we bambae oli laef long wol ya.
Traem Faenem Ol Gudfala Samting Ya
Wok Blong Makem Isrel Blong God
4 I klia se ol fo enjel ya oli minim fo grup blong enjel we Jehova i yusum olgeta blong blokem jajmen blong hem gogo stret taem blong hem. Taem ol enjel ya oli lego ol waelwin ya we i minim kros blong God, nao oli blu wantaem long not, long saot, long is, mo long wes, bambae oli spolemgud olgeta samting we oli kasem. Bambae i klosap sem mak long taem we Jehova i bin yusum fo win blong ronem ol man Elam wanwan, mo blong smasem mo kilimaot olgeta. Be win ya long fiuja, hem i bigwan moa bakegen. (Jeremaea 49:36-38) Hem i wan bigbigfala win we i moa strong i bitim “win” we Jehova i yusum blong kilim i ded nesen blong Amon bifo. (Amos 1:13-15) I no gat wan haf blong oganaesesen blong Setan long wol we hem i naf blong stanap long dei ya blong kros blong Jehova. Long dei ya, Jehova bambae i soemaot blong olwe we rul blong hem i stret.—Ol Sam 83:15, 18; Aesea 29:5, 6.
it-1 pej 12
Abadon
Abadon, enjel ya we i lukaot long bigfala hol ya we i godaon we i godaon—?Hem i hu?
Be long Revelesen 9:11, tok ya “Abadon” hem i yusum olsem nem blong “enjel ya we i lukaot long bigfala hol ya we i godaon we i godaon.” Mo semfala nem ya long Grik lanwis hemia Apolion, we i minim “Man We i Spolem Gud.” Long ol yia 1800, ol man oli traehad blong soemaot se profet tok long vas ya i blong tokbaot ol man olsem Empera Vespasian, Muhammad, mo Napoleon tu, mo se enjel ya hem i “Setan.” Be, i gud blong makem we Revelesen 20:1-3 i tokbaot enjel ya we i holem “ki blong bigfala hol ya we i godaon we i godaon” se hem i wan representetif blong God we i kamaot long heven, be i no “Setan,” mo hem i kam blong fasem mo slingim Setan i go long bigfala hol ya we i godaon we i godaon. Buk ya The Interpreter’s Bible i tokbaot Revelesen 9:11, se: “Abadon, i no wan enjel blong Setan be i blong God, mo hem i wok folem oda we God i givim long hem blong i spolem ol samting.”
Olsem we yumi luk long ol vas long Hibru haf, i klia se ʼavad·dohnʹ i sem mak long Seol mo ded. Long Revelesen 1:18 yumi luk ol tok blong Kraes Jisas we i se: “Mi laef oltaem gogo i no save finis, mo mi mi holem ol ki blong ded mo blong Beregraon.” Luk 8:31 i soemaot klia bigfala paoa we Jisas i gat long hol ya we i godaon we i godaon. Hem i gat paoa blong spolem ol samting, we hemia i minim tu se hem i gat paoa blong finisim Setan, olsem we Hibrus 2:14 i soemaot, vas ya i soemaot tu se Jisas i kam olsem man we i gat mit mo blad blong hem i save ded, nao “ded blong hem bambae i save finisim Setan, hemia man ya we i gat paoa blong mekem man i ded.” Revelesen 19:11-16 i soemaot klia se Jisas i man ya we God i putumap hem olsem Man We i Spolem Gud o Man Blong Givim Panis.—Yu luk APOLION.
9-15 DISEMBA
OL GUDGUDFALA SAMTING LONG BAEBOL | REVELESEN 10-12
“‘Tu Witnes’ i Ded Mo Tufala i Laef Bakegen”
w14 15/11 pej 30
Kwestin
?Hu ya tufala witnes ya we Revelesen japta 11 i tokbaot?
Revelesen 11:3 i tokbaot tu witnes we bambae tufala i talemaot ol profet tok blong 1,260 dei. Japta ya i gohed se bigfala wael animol bambae i “winim tufala, mo i kilim tufala i ded.” Be afta long “tri dei haf,” tufala witnes ya i laef bakegen, mo olgeta man we oli luk tufala oli sapraes tumas.—Rev. 11:7, 11.
?Hu ya tufala witnes ya? Ol save we oli stap long ol vas ya oli givhan long yumi blong faenemaot ansa. Faswan, Baebol i talem se “tufala ya i minim tufala oliftri, mo tufala ples blong putum laet.” (Rev. 11:4) Hemia i mekem yumi tingbaot ples blong putum laet mo tu oliftri we profet tok blong Sekaraea i tokbaot. Mo i talem se tufala oliftri ya oli pija blong “tufala man we God i makemaot,” we hemia, Hedgavman Serubabel mo Hae Pris Josua, “we tufala i stanap klosap long Masta blong olgeta wol.” (Sek. 4:1-3, 14, NW) Nambatu, Baebol i talem se tufala witnes ya i mekem ol semfala merikel olsem hemia blong Moses mo Elaeja.—Skelem Revelesen 11:5, 6 wetem Namba 16:1-7, 28-35 mo 1 King 17:1; 18:41-45.
?Wanem i sem mak long tufala vas ya we i mekem se tufala i joen? Long tufala taem ya, Baebol i stap tokbaot ol tabu man blong God we oli stap lidim ol man blong God long taem we oli kasem fasin agens. Taswe blong mekem tok blong Revelesen japta 11 i kamtru, ol tabu brata we oli lidim ol man blong God taem Kingdom blong God i stat rul long heven long 1914, oli stap prij we oli “putum ol klos we oli wokem long selbag” blong tri yia haf.
Taem oli finis blong prij wetem ol klos we oli wokem long selbag, ol man oli kilim ol tabu man ya oli ded, hemia pija blong taem ya we ol man oli putum ol tabu Kristin long kalabus, mo oli stap long kalabus blong tri dei haf we i minim blong smoltaem. Long lukluk blong ol enemi blong ol man blong God, oli ting se oli stopem fulwan wok blong prij, mo hemia i mekem oli glad tumas from.—Rev. 11:8-10.
Nating se i olsem, profet tok i talemaot se long en blong tri dei haf, tufala witnes ya bambae i laef bakegen. Taswe afta we ol tabu Kristin ya oli kamaot long kalabus, Jehova i yusum Jisas Kraes blong putumap olgeta, wetem ol narafala Kristin we oli holemstrong, blong oli mekem wan spesel wok. Long 1919, olgeta oli joen wetem olgeta we oli mekem wok ya olsem “gudfala slef we i waes” blong givim kakae long saed blong spirit long ol man blong God long ol las dei.—Mat. 24:45-47; Rev. 11:11, 12.
I gud blong makem se, Revelesen 11:1, 2 i joen wetem taem ya we Jehova i kam blong makem o jekem tempol long saed blong spirit. Malakae japta 3 tu i tokbaot se God bambae i kam blong jekem mo i klinim tempol long saed blong spirit. (Mal. 3:1-4) ?Wok ya blong jekem mo klinim tempol long saed blong spirit i longfala olsem wanem? Wok ya i stat long 1914 mo i gohed kasem stat blong 1919. Taem ya i hapen insaed long ol 1,260 dei (42 manis) mo tri dei haf olsem we profet tok blong Revelesen japta 11 i tokbaot.
!Yumi glad tumas se Jehova i mekem wok ya blong mekem ol man blong hem oli kam klin mo oli naf blong mekem ol gudfala wok! (Taetas 2:14) Mo tu, yumi glad tumas long gudfala eksampol blong ol tabu Kristin we oli pijarem tufala witnes ya mo oli lidim ol man blong God blong oli go tru long ol hadtaem ya.
Traem Faenem Ol Gudfala Samting Ya
it-2 pej 880-881
Skrol, Rol
Samting We i Pijarem. Long Baebol i gat plante eksampol we oli yusum tok ya “skrol” blong pijarem ol defren samting. Esikel mo Sekaraea tufala tugeta i luk wan skrol we oli raet long tugeta saed blong hem. From we plante taem ol man oli stap raet long wansaed blong skrol nomo, be taem oli raet long tugeta saed blong skrol, maet hemia i save minim hevi blong samting ya, saes blong hem, mo ol strong tok blong jajmen we oli raetem long ol skrol ya. (Esi 2:9–3:3; Sek 5:1-4) Long vison blong Revelesen, Man ya we i sidaon long bigfala jea blong king i holem wan skrol long raethan blong hem mo we oli putum gris blong kandel long seven ples long en blong holemtaet, blong i no gat man i save samting we oli raetem kasem we Smol Sipsip blong God i openem olgeta. (Re 5:1, 12; 6:1, 12-14) Biaen, long vison ya, wan enjel i givim wan skrol long Jon mo i talem long hem blong i kakae. Skrol ya i swit taem Jon i kakae be long bel blong hem i konkon. From we skrol ya i open nomo mo oli no fasemtaet, hemia i min se man i mas kasemsave long hem. Mesej we Jon i kasem i “swit” be i gat sam tok long hem we oli konkon we hem i mas talemaot, olsem we oli askem hem blong i mekem. (Re 10:1-11) Esikel tu i kasem wan skrol we i klosap sem mak, we insaed long hem i gat “krae blong ol man we oli sore, mo krae blong olgeta we oli krae bigwan, mo krae blong olgeta we oli stap harem nogud tumas long bodi blong olgeta.”—Esi 2:10.
it-2 pej 187 haf 7-9
Soa We Woman i Harem Taem i Bonem Pikinini
Long vison blong aposol Jon long Revelesen, hem i luk wan woman long heven we i rere blong bonem pikinini mo i stap krae bigwan “from we hem i stap harem nogud tumas.” Nao woman ya i bonem “wan pikinini boe. Pikinini ya bambae i olsem man blong lukaot long sipsip, bambae hem i yusum wan stik we oli wokem long aean blong i rul long olgeta nesen.” Mo nating we bigfala algita ya i traehad blong kakae pikinini ya, “be taem pikinini ya i bon, wantaem nomo oli tekem hem i go long God we i stap long bigfala jea blong hem.” (Re 12:1, 2, 4-6) Taem God i tekemaot pikinini ya, hemia i soemaot se God i akseptem hem olsem stret pikinini blong hem, sem mak olsem kastom blong ol man bifo we oli tekem pikinini we i jes bon i kam long papa blong hem blong i akseptem hem. (Yu luk haf ya BON.) Taswe “woman” ya hem i “woman” blong God, we i “Jerusalem blong heven,” we i “mama” blong Kraes mo ol brata blong hem long saed blong spirit.—Ga 4:26; Hib 2:11, 12, 17.
“Woman” blong God antap long heven i stret gud olgeta, mo taem hem i bonem pikinini, bambae hem i no save harem nogud from soa. Taswe tok ya se woman ya i stap krae bigwan from we hem i harem nogud tumas, i jes wantem minim nomo se “woman” ya bambae i luksave se klosap nao bambae hem i bonem pikinini mo bambae hem i wet smoltaem nomo.—Re 12:2.
?“Pikinini boe” ya hem i hu? Bambae hem i ‘man blong lukaot long sipsip, we bambae i yusum wan stik we oli wokem long aean blong i rul long olgeta nesen.” Hemia nao profet tok we Ol Sam 2:6-9 i talemaot long saed blong Mesaea we God i putumap hem olsem King. Be Jon i luk vison ya plante yia afta we Kraes i bon long wol ya, i ded, mo i laef bakegen. Taswe vison ya i blong soemaot se Kingdom blong Mesaea i bon, mo i stap long han blong Jisas Kraes, pikinini ya blong God, we i bin laef bakegen mo i “sidaon long raet saed blong God, mo stat long taem ya, hem i wet gogo kasem we ol enemi blong hem bambae oli stap olsem wan stul aninit long leg blong hem.”—Hib 10:12, 13; Sam 110:1; Re 12:10.
16-22 DISEMBA
OL GUDGUDFALA SAMTING LONG BAEBOL | REVELESEN 13-16
“No Fraet Long Ol Wael Animol Ya”
w12 1/6 pej 10 haf 6
Jehova i “Save Soemaot Olgeta Samting We i Haed”
6 Bifo long yia 100, Jisas i soemaot sam vison long aposol Jon we i mekem hem i sek. (Rev. 1:1) Long wan vison, Jon i luk wan bigfala algita i stanap long sanbij, klosap long solwota. Algita ya hem i Setan. (Ridim Revelesen 13:1,2.) Jon i luk wan narafala animol tu i kamaot long solwota. Animol ya i wael mo i narakaen. Hem i gat seven hed blong hem mo Setan i givim bigfala paoa long hem. Biaen, Jon i luk wan wael animol we i red we i red. Animol ya tu i gat seven hed. Hem i pija blong fas wael animol ya long Revelesen 13:1. Wan enjel i talem long Jon se ol seven hed blong wael animol ya we i red, i minim “seven king” no gavman. (Rev. 13:14, 15; 17:3, 9, 10) Long taem ya we Jon i raetem Revelesen, faef long ol king ya i foldaon finis, wan i stap holem nem blong king, mo i gat wan “we i no kamtru yet.” ?Hu ol gavman ya we oli gat bigfala paoa long wol? Bambae yumi tokbaot ol seven hed blong wael animol ya we Revelesen japta 13 i tokbaot. Mo bambae yumi luk long buk blong Daniel, blong save moa long ol gavman ya. Sam long ol gavman ya oli kasem paoa plante handred yia afta we Daniel i raetem buk blong hem.
Oli Mas Agensem Tufala Wael Animol
26 ?Oraet, wael animol ya i minim wanem? Hem i minim Inglan mo Amerika we tufala i joen tugeta olsem wan bigfala politik paoa long wol. !Hem i olsem namba seven hed blong faswan wael animol, be naoia i gat wan spesel wok! I gud we Jon i luk wael animol ya hem wan long vison, from we samting ya i halpem yumi blong lukluk klia wanem wok we animol ya hem wan i mekem long wol. Wael animol ya we i gat tu hon blong hem, i minim tu defren politik paoa blong wol we tufala i stanap long semtaem, mo tufala i wok tugeta. Tu hon blong hem we i “olsem hon blong smol sipsip,” i min se hem i mekem olsem we hem i gat kwaet fasin, i no save faetem narafala, mo we hem i wan waes gavman we olgeta man long wol oli save trastem. Be hem i tok “olsem bigfala algita.” Hem i yusum ol tok nogud mo raf fasin blong traem fosem ol man we oli no wantem rul blong hem. Hem i no pulum ol man blong obei long Kingdom blong God long han blong Smol Sipsip blong God. Long defren fasin olgeta, hem i pulum ol man blong folem bigfala algita ya, Setan. Mo hem i pulum olgeta blong seraot long ol nesen wanwan, mo blong no laekem nating ol man long narafala nesen. I olsem we hem i pulum olgeta blong wosip long faswan wael animol.
Oli Mas Agensem Tufala Wael Animol
30 Ol samting we i kamaot long histri i pruvum se pija ya i wan oganaesesen we Inglan mo Amerika i stanemap mo tufala i sapotem. Fastaem oli putum nem Ligofnesen long oganaesesen ya. Long Revelesen japta 17, bambae yumi luk we wan narafala animol bakegen i olsem saen blong hem. Hemia wan laef wael animol we i red we i red, mo i no dipen long narafala blong stap laef. Oganaesesen ya blong olgeta nesen blong wol i “gat paoa blong tok.” Hem i stap tok flas se hem nomo i save givim pis mo seftaem long ol man. Be rili hem i olsem wan miting nomo, blong ol nesen oli mekem plante toktok tugeta mo blong oli sakem plante nogud toktok long olgeta tu. Hem i talem se ol nesen no ol man we oli no ona long hem, bambae hem i no givhan nating long olgeta, hem i mekem olsem oli ded nomo. Hem i givim woning long sam nesen se bambae hem i sakemaot olgeta, oli no moa stap insaed long oganaesesen ya, sipos oli no obei long ol tingting blong hem. Taem bambae bigfala trabol i kamtru long wol, ol “hon” blong pija ya blong faswan wael animol, bambae oli faet, mo bambae oli spolem plante samting.—Revelesen 7:14; 17:8, 16.
31 I stat long Namba Tu Bigfala Faet Blong Wol, pija blong faswan wael animol—we naoia i minim Yunaeted Nesen—hem i kilim plante man i ded. Eksampol, long 1950 wan ami blong Yunaeted Nesen i joen long faet we i kamaot bitwin Not Koria mo Saot Koria. Ami blong Yunaeted Nesen wetem ami blong Saot Koria, oli kilim i ded samwe long 1,420,000 man blong Not Koria mo Jaena. Sem mak long 1960 kasem 1964, ol ami blong Yunaeted Nesen oli faet long Kongo (naoia Sair). Mo tu, fulap lida blong wol wetem pop Pol 6 mo pop Jon Pol 2, oli gohed blong talem se pija ya i laswan janis mo i beswan hop blong givim pis long ol man. Oli talem strong se sipos ol man oli no ona long pija ya, bambae ol man nomo oli stap kilkilim olgeta gogo i no moa gat man long wol. Long fasin ya i olsem we oli kilim i ded ol man we oli no wantem agri wetem pija ya mo mekem wosip long hem.—Ridim Dutronome 5:8, 9.
w09 1/2 pej 30 haf 3
Ol Bigfala Poen Long Buk Blong Revelesen—Haf 2
Revelesen 13:16, 17. Nomata ol hadtaem we yumi fesem long ol wok blong yumi evri dei, olsem maet taem yumi ‘pem samting no yumi salem samting,’ be yumi no mas letem wael animol i fosem yumi mo i bos long laef blong yumi. Sipos yumi letem wael animol ya i putum ‘mak long raet han blong yumi mo long fored blong yumi,’ yumi agri blong letem hem i kontrolem ol aksen blong yumi, mo i gat paoa long ol tingting blong yumi.
Traem Faenem Ol Gudfala Samting Ya
w09 1/2 pej 30 haf 6
Ol Bigfala Poen Long Buk Blong Revelesen—Haf 2
Revelesen 16:13-16. Ol “rabis devel” oli pija blong ol giaman tok blong ol rabis enjel, we oli wantem mekem se ol seven besin ya, we oli fulap long kros blong God, oli no gat paoa long ol king blong wol ya taem enjel i kafsaedem olgeta. Long defren fasin, oli fosem ol king ya blong go long wan rod we i agensem Jehova.—Mat. 24:42, 44.
w15 15/7 pej 11-12 haf 9
!‘Bambae i No Longtaem Yufala i Fri’!
9 Long taem blong bigfala trabol, hem i no taem blong “talemaot gud nius blong Kingdom.” Taem blong talemaot mesej ya i pas finis. !Naoia hem i taem we “en” (NW) bambae i kamtru! (Matiu 24:14) Ol man blong God bambae oli talemaot wan strong mesej blong jajmen, we bambae i mekem evri man bambae oli fraet. Maet mesej ya, hemia se rabis wol ya blong Setan bambae i lus blong olwe. Baebol i tokbaot mesej ya olsem ol ston blong aes we oli folfoldaon olsem ren. Hem i talem se: “Ol ston blong aes oli folfoldaon olsem ren. Ol ston ya, oli bigbigwan, we sipos man i skelem, bambae hevi blong wan i samwe long fifti kilo. Nao ol man oli stap tok nogud long God, from we hem i sanem ol ston ya blong aes i kam long olgeta, mo trabol ya i nogud we i nogud olgeta.”—Revelesen 16:21.
23-29 DISEMBA
OL GUDGUDFALA SAMTING LONG BAEBOL | REVELESEN 17-19
“Faet Blong God i Finisim Olgeta Faet”
w08 1/5 pej 6 haf 5; pej 7 haf 1
Amagedon Faet Blong God Blong Finisim Olgeta Faet
Taem ol rabis man oli rul, ol stret man oli no gat pis mo seftaem. (Ol Proveb 29:2; Prija 8:9) Yumi no save seraotem ol kruked mo rabis fasin long ol man we oli stap mekem ol fasin ya. Taswe, trufala pis mo stret fasin bambae i kamtru nomo afta we ol rabis man oli lus. King Solomon i raetem se: “Oltaem ol man nogud oli stap traem blong mekem ol gudfala man oli kasem trabol be trabol ya i stap kasem olgeta bakegen nomo.”—Ol Proveb 21:18.
From we God nomo bambae i jajem ol man, yumi suagud se olgeta jajmen we hem i mekem long ol rabis man bambae oli stret nomo. Ebraham i talem long God se: “Yu yu man blong jajem olgeta man blong wol. !Yu yu stap jajem man long stret fasin nomo!” Ebraham i lanem se oltaem Jehova i stap mekem i stret nomo. (Jenesis 18:25) Mo Baebol i talem tu se, Jehova i no haremgud nating blong spolem ol rabis man, be hem i mas mekem olsem blong finisim olgeta trabol.—Esikel 18:32; 2 Pita 3:9.
it-1 pej 1146 haf 1
Hos
Long vison we aposol Jon i luk, hem i luk we Jisas Kraes i stap ron long wan waet hos mo ol ami blong hem oli biaenem hem, we olgeta tu oli sidaon long ol waet hos. Vison ya we Jon i luk i soemaot faet we Kraes bambae i mekem agensem olgeta enemi blong God mo Papa blong hem, Jehova. Mo Kraes bambae i faet long stret fasin mo jastis. (Re 19:11, 14) Be long ol taem we i pas, Kraes i tekem aksen olsem wan king, mo ol nogud samting we oli kam biaen oli pijarem olgeta olsem ol defren man we oli ron long hos wetem ol trabol we oli mekem.—Re 6:2-8.
King Ya Bambae i Faet Mo i Win Long Amagedon
24 Wael animol we i kamaot long solwota we i gat seven hed mo ten hon, hem i minim ful politik oganaesesen blong Setan long wol. Be naoia hem i lus wetem giaman profet ya, we hem i namba seven bigfala nesen blong rul long wol. (Revelesen 13:1, 11-13; 16:13) Taem tufala i “laef yet,” no taem tufala i stap joen yet blong agensem ol man blong God long wol, oli sakem tufala i go long “bigfala hol blong faea.” ?Hemia i minim ples we prapa faea i laet long hem? No gat, hemia i olsem wan saen nomo, olsem we wael animol mo giaman profet oli saen nomo oli no prapa animol. Hol ya blong faea i min se oli ded blong olwe, neva oli save stanap bakegen. Biaen, bambae ded mo Hades (beregraon) wetem Setan hem wan, olgeta tu oli go insaed long bigfala hol ya. (Revelesen 20:10, 14) Hemia i no wan faea we ol rabis man oli harem nogud long hem blong olwe, no gat, from we ples olsem i no save stap long tingting blong Jehova, Jehova i no laekem nating.—Jeremaea 19:5; 32:35; 1 Jon 4:8, 16.
King Ya Bambae i Faet Mo i Win Long Amagedon
25 Ol narafala we oli no haf long gavman be oli man nogud we oli joen long rabis wol ya, “man ya we i stap sidaon long hos, hem i kilim olgeta oli ded long naef blong faet ya we i stap long maot blong hem.” Jisas bambae i talemaot se i stret blong oli ded. Be vas ya i no talem se olgeta ya bambae oli go long bigfala hol blong faea. From samting ya, ?yumi save ting se olgeta ya bambae oli laef bakegen? I no gat ples long Baebol we i talem se ol man we Jaj blong Jehova bambae i kilim olgeta oli ded, oli save laef bakegen. No gat. Olsem Jisas hem wan i talem, olgeta we oli no joen wetem ol “sipsip” bambae oli go long “faea ya we bambae i no save ded samtaem, we oli mekem i rere finis blong Setan wetem ol enjel blong hem.” Hemia i min se bambae oli “go blong lus blong olwe.” (NW) (Matiu 25:33, 41, 46) Hemia nao en blong “bigfala Dei we God bambae i jajem ol man we oli no obei long hem, nao oli lus.”—2 Pita 3:7; Neham 1:2, 7-9; Malakae 4:1.
Traem Faenem Ol Gudfala Samting Ya
Wan Bigfala Tok Haed i Kam Klia
5 “Animol ya . . . fastaem hem i laef.” Yes, long Jenuware 10, 1920, hem i laef, taem Ligofnesen i stanap. 63 nesen oli joen long Ligofnesen. Be afta, Japan, Jemani, mo Itali oli aot long hem, mo Rasia tu i aot long Ligofnesen. Long Septemba 1939, strong rula blong Nasi gavman blong Jemani i statem Namba Tu Bigfala Faet Blong Wol. Ligofnesen i no mekem pis i kamaot long wol. Taswe long taem ya i olsem hem i go long wan hol we i godaon we i godaon. Hem i no moa gat paoa. Long 1942, hem i ded olgeta. !I no bifo long taem ya mo i no afta long taem ya, be stret long impoten taem ya, Jehova i talemaot ful mining blong vison ya long ol man blong hem! Long Niu Wol Tiokratik Asembli, Presiden Knorr i talemaot, stret long profet tok ya, se “animol ya . . . hem i no moa laef naoia.” Biaen hem i askem wan kwestin se: “?Bambae Ligofnesen i stap blong olwe long bigfala hol ya?” Hem i talemaot Revelesen 17:8 blong ansa long kwestin ya, nao hem i se: “Oganaesesen ya bambae i kamaot long hol ya.” !Mo tok blong hem i kamaot tru—profet tok blong Jehova i tru!
Hem i Kamaot Long Bigfala Hol
6 Yes, i tru wael animol ya we i red we i red hem i kamaot long bigfala hol ya. Long Jun 26, 1945, i gat bigfala selebresen long San Fransisko, Amerika, from we 50 nesen oli vot blong akseptem kontrak blong oganaesesen ya, Yunaeted Nesen. Oganaesesen ya i mas “holem pis mo seftaem long olgeta kantri long wol.” Plante samting long saed blong Yunaeted Nesen mo Ligofnesen oli sem mak. The World Book Encyclopedia i talem se: “Long plante fasin, Yunaeted Nesen i sem mak long Ligofnesen, we i stanap afta long Faswan Bigfala Faet Blong Wol . . . Plante nesen we oli givhan blong stanemap Yunaeted Nesen, oli bin givhan blong stanemap Ligofnesen bifo. Olsem Ligofnesen, oli stanemap Yunaeted Nesen blong holem pis long olgeta nesen. Yunaeted Nesen i stap folem fasin blong Ligofnesen tu.” Taswe Yunaeted Nesen hem i rili olsem wael animol we i red we i red, we i kamaot long bigfala hol. Hem i gat bitim 150 nesen i joen long hem, hem i moa long Ligofnesen we i gat 63 nomo. Mo hem i mekem wok we i bigwan moa long Ligofnesen.
w12 1/6 pej 20 haf 17
Ol Samting We Oli Mas Kamtru “i No Longtaem”
17 Paoa blong ol giaman skul bambae i no godaon sloslo, nao i lus. Woman blong rod bambae i gat paoa mo i traem pulum ol gavman blong mekem samting we hem i wantem. Be bambae God i putum long tingting blong ol man blong gavman, blong oli mekem samting we hem i wantem. (Ridim Revelesen 17:16, 17.) I no longtaem, bambae Jehova i mekem ol gavman oli agensem ol giaman skul. Bambae woman blong rod i no save bos long ol gavman, mo bambae oli tekemaot olgeta gudfala samting blong hem. Long ol yia we i pas, ol man oli tinghevi long ol skul mo oli ting se bambae ol skul oli gat paoa olwe. Be naoia ol man oli no moa tingting olsem. Woman blong rod i stap traem sidaon gud long baksaed blong animol ya we i red, be bambae hem i sek se wantaem nomo hem i foldaon, we hem i no moa gat paoa.—Rev. 18:7, 8, 15-19.
30 DISEMBA–5 JENUWARE
OL GUDGUDFALA SAMTING LONG BAEBOL | REVELESEN 20-22
“!Yu Luk! Mi Mekem Olgeta Samting Oli Kam Niuwan”
Niufala Heven Mo Niufala Wol
2 Plante handred yia bifo long taem blong Jon, Jehova i talem long Aesea se: “Mi mi wokem niufala heven mo niufala wol. Mo bambae yufala i no moa tingtingbak long ol olfala samting, mo bambae oli no moa girap long hat blong yufala.” (Aesea 65:17; 66:22) Profet tok ya i kamtru fastaem long 537 B.K.T., taem ol man Isrel we oli stap tru long God oli kambak long Jerusalem, afta we oli stap kalabus blong 70 yia long Babilon. Taem oli kambak long ples blong olgeta, oli mekem wan klin kampani, “wan niufala wol,” aninit long rul blong wan niufala gavman, hemia “niufala heven.” Be aposol Pita i soemaot se profet tok ya bambae i kamtru long wan bigfala fasin, i se: “Be God i promes finis blong putum niufala skae mo niufala wol, we stret fasin nomo bambae i stap long hem. Mo yumi stap wet blong ol niufala samting ya.” (2 Pita 3:13) Nao Jon i soemaot se promes ya bambae i kamtru long dei blong Masta. “Heven mo wol we tufala i stap fastaem,” bambae tufala i lus. Hemia i min se wol blong Setan wetem ol gavman we Setan mo ol rabis enjel blong hem oli gat paoa long olgeta bambae oli finis. Samting olsem “solwota,” hemia ol nogud stronghed man, bambae i no moa stap. Bambae i gat “niufala heven wetem niufala wol”—hemia niufala kampani blong olgeta man long wol aninit long wan niufala gavman, Kingdom blong God.—Ridim Revelesen 20:11.
“!Yu Luk! Mi Mi Stap Mekem Olgeta Samting Oli Kam Niuwan.”
“[God] bambae i ravemaot wota blong ae blong olgeta.” (Revelesen 21:4) ?God bambae i ravemaot wanem kaen wota blong ae? Vas ya i no stap tokbaot wota blong ae we i ron from glad o hemia we i protektem ae blong yumi. Promes ya blong God i stap tokbaot wota blong ae we i ron from man i safa mo i harem nogud. God bambae i no jes waepem ol wota blong ae, be bambae hem i ravemaot fulwan, taem hem i finisim olgeta fasin safa mo ol harem nogud we i mekem wota blong ae blong ol man i ron.
“Bambae i no moa gat man i ded.” (Revelesen 21:4) ?Wanem i mekem se ol man oli stap krae moa i winim enemi ya ded? Jehova bambae i tekemaot ol man we oli obei long hem, oli aot long han blong ded. ?Bambae hem i mekem samting ya olsem wanem? Bambae hem i mekem samting ya taem hem i rutumaot stamba blong ded, hemia sin, we i kamaot from Adam. (Rom 5:12) Tru long ransom sakrefaes blong Jisas, Jehova bambae i mekem se ol man we oli obei long hem oli kam stretgud olgeta. Mo biaen, bambae hem i “winim” laswan enemi ya, ded. (1 Korin 15:26) Ol man we oli holemstrong long God bambae oli kasem laef ya we God i bin promes blong givim—bambae oli laef olwe we oli gat gudfala helt.
“Bambae man i no moa harem nogud.” (Revelesen 21:4) ?Wanem kaen harem nogud ya we bambae i no moa stap? Hemia harem nogud long tingting, filing, mo long bodi we oli kamaot from sin, mo i stap spolemgud laef blong plante milian man. Long niufala wol, olgeta harem nogud ya bambae oli finis.
Jehova, God Blong Trutok
14 Yumi mas tinghevi long ol samting we Jehova i talem long yumi long Tok blong Hem. Taem hem i tokbaot ol fasin blong hem, hem i tok tru. Ol samting we hem i talem se bambae hem i mekem, be bambae hem i mekem. Taswe, yumi save trastem hem fulwan. Yumi save bilif long tok blong Jehova se bambae hem i “givim panis long olgeta we oli no save ona long [Hem], mo long olgeta we oli no save obei long gud nius blong Jisas, Masta blong yumi.” (2 Tesalonaeka 1:8) Mo tu, yumi save trastem tok blong Jehova se hem i lavem ol man we oli mekem stret fasin, mo se bambae hem i givim laef we i no save finis long olgeta we oli soemaot bilif. Mo yumi save trastem promes ya se bambae hem i tekemaot soa, krae, mo ded. Jehova i makemgud se promes ya i tru taem hem i givim oda ya long aposol Jon se: “Yu raetem tok ya, from we tok blong mi i tru, mo ol man oli save bilif long hem.”—Revelesen 21:4, 5; Ol Proveb 15:9; Jon 3:36.
Traem Faenem Ol Gudfala Samting Ya
it-2 pej 249 haf 2
Laef
God i talem long Adam se sipos hem i obei, bambae hem i no save ded. (Je 2:17) Taswe taem God bambae i finisim laswan enemi ya ded, ol man we oli obei long God bambae oli no moa gat sin, we i save mekem olgeta i ded. Bambae oli save laef olwe we oli no nid blong ded. (1Ko 15:26) Ded bambae i lus olwe, samting ya bambae i hapen long en blong taem we Kraes i rul, we buk blong Revelesen i soem se hem i blong 1,000 yia. Revelesen i tokbaot tu se olgeta we bambae oli rul wetem Kraes olsem ol king mo ol pris, bambae “oli kasem laef, oli kam king mo oli rul wetem Kraes blong wan taosen yia.” “Ol narafala dedman” we oli no laef “gogo wan taosen yia ya i pas,” oli mas laef bakegen long en blong 1,000 yia, be bifo we oli letem Setan i kamaot long bigfala hol ya we i godaon we i godaon, blong i kam traem ol man laswan. Long en blong 1,000 yia, olgeta man long wol bambae oli kam stretgud olgeta, sem mak olsem Adam mo Iv bifo we tufala i mekem sin. Naoia bambae oli save gat wan laef we i stretgud olgeta. Olgeta we oli stanap strong long laswan traem we Setan i mekem taem hem i kamaot long bigfala hol ya we i godaon we i godaon, bambae oli save haremgud blong laef olwe.—Re 20:4-10.
it-2 pej 189-190
Lek Blong Faea
Tok ya i kamaot nomo long buk blong Revelesen mo hem i wan pijatok. Baebol hem wan i eksplenem mo i givim mining blong pijatok ya se: “Lek blong faea ya i minim seken ded.”—Re 20:14; 21:8.
Ol refrens long buk blong Revelesen oli tokbaot klia pija blong lek blong faea ya. Buk blong Revelesen i talem se oli slingim ded i go insaed long lek blong faea. (Re 19:20; 20:14) Ded i no olsem wan samting we i save bon long faea. Antap moa, Revelesen i tokbaot se oli slingim Devel Setan, we hem i wan spirit man, i go long lek blong faea. Taswe, lek blong faea ya i no wan trufala faea, from we bambae i no save bonem wan spirit man.—Re 20:10; skelem wetem Eks 3:2 mo Ja 13:20.
From we lek blong faea i minim “seken ded” mo Revelesen 20:14 se oli slingim “ded mo Beregraon” i go insaed long hem, hemia i soemaot klia se lek ya i no minim ded we man i kasem tru long Adam (Ro 5:12), o i no minim tu Hades (Seol). Taswe, lek blong faea ya i mas pijarem wan nara kaen ded, wan kaen ded we man i no save laef bakegen, from we i no gat wan ples we i tokbaot se “lek” ya bambae i givimbak ol samting we oli stap insaed long hem, olsem ded blong Adam mo Hades (Seol). (Re 20:13) Taswe, ol man we oli no raetem nem blong olgeta long “buk blong laef,” from we oli agensem hae rul blong God mo oli no wantem tanem tingting, bambae oli sakem olgeta i go insaed long lek blong faea, we i minim lus blong olwe, o seken ded.—Re 20:15.