Refrens Blong Kristin Wok Mo Laef Buk Blong Miting
13-19 EPREL
OL GUDGUDFALA SAMTING LONG BAEBOL | JENESIS 31
“Jekob Mo Laban i Mekem Wan Promes Blong Pis”
it-1 pej 883 haf 1
Galehed
Afta we tufala i stretem problem blong tufala mo mekem pis, Jekob mo Laban i mekem wan promes blong pis bitwin tufala. Folem promes ya, Jekob i stanemap wan bigfala ston mo i talem long ol man blong hem blong oli wokem wan hip blong ol ston, we maet i luk olsem wan tebol, from we biaen oli kakae antap long hem blong makem promes ya. Nao, Laban i putum nem blong hip ston ya long lanwis Arameik (Siria) se “Jegara Sahaduta,” be Jekob i putum nem blong hip ya long lanwis Hibru se “Galehed,” we i gat sem mining. Laban i talem se: “Hif blong ol ston ya [Hib., gal] bambae i witnes [Hib., ʽedh] blong yumi long promes blong yumi.” (Je 31:44-48) Hip blong ol ston ya (mo bigfala ston) i stap olsem wan witnes long ol man we oli stap pas. I olsem we vas 49 i talem, “Mispa [we long Hibru i minim “Wajtaoa”],” i blong soemaot se Jekob mo Laban tufala i agri blong holemtaet pis bitwin tufala mo tu long ol famle blong tufala. (Je 31:50-53) Long ol taem we i kam biaen, ol man oli folem fasin ya blong yusum ol ston olsem wan witnes.—Jos 4:4-7; 24:25-27.
it-2 pej 1172
Wajtaoa
Jekob i stanemap wan hip blong ol ston mo i putum nem blong hem se “Galehed” (we i minim “Hip we i Witnes”) mo “Wajtaoa.” Mo Laban i talem se: “Prea blong mi, we Hae God bambae i stap wajem yumi, taem yumi no stap wanples.” (Je 31:45-49) Ol hip blong ol ston ya i soemaot se Jehova i stap wajem Jekob mo Laban blong luk se tufala i stap holem promes blong pis bitwin tufala.
Traem Faenem Ol Gudfala Samting Ya
it-2 pej 1087-1088
Wan Aedol (Teraphim)
Ol man blong digim graon oli faenemaot se long Mesopotamia mo ol ples klosap, i gat ol aedol (teraphim) i stap we i soemaot se man we i gat ol aedol ya, hem i gat raet long ol samting blong famle. Long wan flat ston we oli faenem long taon ya Nuzi, i se samtaem, man blong wan woman i save go long kot blong klemem ol samting we oli blong palika blong hem we i ded. (Ancient Near Eastern Texts, edited by J. Pritchard, 1974, pej 219, 220, mo futnot 51) Taswe maet Rejel i plan blong tekem ol aedol (teraphim) ya blong soemaot kruked fasin we papa blong hem i mekem long hasban blong hem, Jekob. (Skelem wetem Je 31:14-16.) From we ol aedol (teraphim) ya oli save givim raet long wan man blong kasem ol samting, maet hemia nao from wanem Laban i wantem tumas blong karembak olgeta, mo i singaot ol man blong hem blong oli biaenem Jekob blong seven dei nao oli kasem hem. (Je 31:19-30) Jekob i no save nating samting ya we Rejel i mekem (Je 31:32), mo neva hem i traem blong yusum ol aedol (teraphim) ya blong klemem ol samting blong ol pikinini blong Laban. Jekob i no gat eni bisnes wetem ol aedol. Mo tu Jekob i mas sakemaot ol aedol (teraphim) ya wetem ol god blong ol narafala kantri taem hem i berem olgeta aninit long bigfala tri we i stap klosap long Sekem.—Je 35:1-4.
w13 15/3 pej 21 haf 8
Jehova i Olsem hom Blong Yumi
8 Taem Jekob i kasem Haran, angkel blong hem Laban, i glad tumas mo i tekem hem i go long haos blong hem. Biaen hem i givim tufala gel blong hem, Lea mo Rejel, blong tufala i kam woman blong Jekob. Be taem ol yia oli pas, Laban i stat blong mekem i no stret long Jekob, mo i jenisim fasin blong makem pei blong hem ten taem. (Jen. 31:41, 42) Nating se i olsem, Jekob i stanap strong from we hem i trastem se Jehova bambae i lukaot gud long hem. Ale Jehova i blesem hem. Taem Jekob i gobak long Kenan, hem i gat “plante sipsip mo plante nani blong hem, mo plante man slef mo plante woman slef blong hem, mo plante kamel mo plante dongki tu.” (Jen. 30:43) Jekob i tinghae bigwan long samting we Jehova i mekem, ale hem i prea se: “Fasin blong yu, oltaem yu stap lavem mi tumas, mo oltaem yu stap holem promes blong yu long mi. Mi mi no wan gudfala man, mi man blong wok blong yu nomo, mo i no stret blong yu stap mekem i gud tumas long mi olsem. Taem mi krosem Jodan Reva ya bifo, mi go, mi stap holem stik nomo blong wokbaot, be naoia mi stap kambak we mi gat tufala kampani ya blong ol man wetem ol narafala samting ya blong mi.”—Jen. 32:10.
20-26 EPREL
OL GUDGUDFALA SAMTING LONG BAEBOL | JENESIS 32-33
“?Yu Stap Resling Blong Kasem Blesing?”
w03 15/8 pej 25 haf 3
?Yu Yu Stap Traehad Blong Faenem Jehova?
Baebol i givim eksampol blong plante man we oli yusum ful paoa blong olgeta blong faenem Jehova. Wan man olsem, hemia Jekob. Hem i resling ful naet go kasem brok delaet wetem wan enjel blong God we i jenisim bodi blong hem i kam olsem man. From samting ya, Jekob i kasem nem ya Isrel (Man blong faet agens long God) from we hem i “faet agens” long God, we narafala mining blong hem se hem i no wantem lego, hem i yusum ful paoa blong hem, no i gat strong tingting blong faet. Enjel ya i blesem Jekob from bigfala traehad blong hem.—Jenesis 32:24-30.
it-2 pej 190
Leg i nogud
Leg blong Jekob i nogud. Taem Jekob i gat samples long 97 yia, hem i bin resling wetem wan enjel blong Jehova wan ful naet. Hem i gat strong tingting blong no lego enjel ya gogo kasem we enjel ya i givim wan blesing long hem. Taem we tufala i stap faet, enjel ya i faetem Jekob long ples we leg blong hem i joen long bodi blong hem, mo joen blong hem i kamaot. Taswe from samting ya Jekob i stap wokbaot nogud. (Je 32:24-32; Ho 12:2-4) Biaen enjel ya i letem Jekob i save se hem i stap “faet agens long God [enjel blong God], mo agens long man tu, mo [hem] i win,” be hemia i no rili minim se hem i winim wan strongfala enjel blong God. Hem i plan blong God blong letem Jekob i faet wetem enjel, blong Jekob i pruvum se hem i rili wantem kasem ol blesing blong God.
it-1 pej 1228
Isrel
1. God i givim nem ya long Jekob taem hem i gat samwe long 97 yia. Hemia long naet we Jekob i go blong krosem Jabok Reva blong go mitim brata blong hem Esao, long ples ya hem i bin faet strong wetem wan enjel. From traehad we Jekob i mekem blong faet strong, God i blesem hem taem i jenisim nem blong hem i kam Isrel. Blong tingbaot taem ya bakegen, Jekob i putum nem blong ples ya se Peniel o Penuel. (Je 32:22-31; yu luk JACOB No. 1.) Samtaem biaen, Jehova i singaot hem long nem ya taem hem i stap long Betel, mo stat long taem ya kasem we hem i ded, ol man oli stap singaot hem se Isrel. (Je 35:10, 15; 50:2; 1Kr 1:34) Mo i bitim 2,500 taem we Baebol i yusum nem ya Isrel, blong tokbaot ol laen blong Jekob olsem wan nesen.—Eks 5:1, 2.
Traem Faenem Ol Gudfala Samting Ya
w10 1/6 pej 25-26 haf 10-11
Fasin Blong Toktok Gud Long Ol Man i Mekem Se Yumi Fren Gud Tugeta
10 Fasin blong toktok gud long ol narafala mo storian oltaem tugeta i save mekem se pis i stap, mo i save givhan blong holem pis wetem ol man. Mo tu, sipos yu mekem wan gudfala samting long narafala blong traem fren moa wetem hem, hemia i save mekem i isi moa blong yutufala i storian gud tugeta. Sipos yu nao yu faswan blong mekem samting we i kaen long narafala from we yu rili wantem halpem hem, samting ya i save mekem se hem i no fraet blong storian wetem yu. Maet yu save lukaot janis blong givhan long narafala ya, maet hat blong yu i pusum yu blong givim wan smol presen long hem, no yu save singaot hem i kam long haos blong yu. Gudfala fasin ya blong yu i save “hivimap sakol we i red we i red” long hem, i min se, i save pulum hem blong soemaot ol gudfala fasin blong hem. Nao bambae i moa isi blong tokbaot evri samting mo stretem enikaen trabol we i kamaot.—Rom 12:20, 21, NW.
11 Long taem bifo, Jekob i kasem save olsem wanem ol gudfala fasin oli save pulum narafala. Brata blong hem we tufala i twin, nem blong hem Esao, hem i kros we i kros long Jekob. Ale, Jekob i ronwe from we hem i fraet se Esao bambae i kilim hem i ded. Plante yia biaen, Jekob i kambak. Taem Esao i harem nius se hem i stap kambak, hem i tekem 400 man wetem hem, nao oli go blong mitim Jekob. Jekob i prea long Jehova blong i halpem hem. Biaen hem i sanem plante buluk, sipsip, mo narafala animol oli go long Esao, olsem presen. Presen ya i mekem se Esao i no moa kros. Nao taem tufala i mitim tufala, Esao i ron i go long Jekob, i sakem han blong hem i goraon long hem, mo i holem hem strong.—Jen. 27:41-44; 32:6, 11, 13-15; 33:4, 10.
it-1 pej 980
God i God Blong Isrel
Jekob i karem nem ya Isrel, afta we hem i resling wetem wan enjel blong Jehova long Peniel. Mo afta we hem i mitim Esau mo tufala i mekem pis, hem i stap long Sukot mo biaen i go long Sekem. Hem i pem wan graon long ples ya we i blong ol pikinini blong Hamoro, mo i stanemap haos tapolen blong hem long ples ya. (Je 32:24-30; 33:1-4, 17-19) “Nao long ples ya hem i wokem wan olta, mo i putum nem blong hem se El Elohe Isrel, we i min se ‘God i God blong Isrel.’” (Je 33:20) Taem Jekob i talemaot niufala nem blong hem Isrel long olta ya, hem i soemaot se hem i akseptem mo i glad long nem ya, mo i glad long God we i lukaotgud long hem blong gobak long Promes Lan. Tok ya i kamaot wan taem nomo long Baebol.
27 EPREL–3 MEI
OL GUDGUDFALA SAMTING LONG BAEBOL | JENESIS 34-35
“Nogud Frut i Kamaot Taem Yu Joen Wetem Ol Rabis Fren”
Sekem Taon We i Stap Long Medel Blong Tu Hil
?Wanem tingting blong ol yangfala man blong taon ya taem oli luk wan yangfala gel i stap kam long taon blong olgeta oltaem—mo ating i stap kam hem wan nomo? Boe blong wan jif, ‘i luk gel ya nao i tekem hem, i fosem hem blong slip wetem hem.’ ?From wanem Daena i folem rod ya we i denja tumas, nao i joen wetem ol man Kenan we oli gat nogud fasin? ?Hemia from we hem i harem se i nidim kampani blong ol narafala gel we oli gat sem yia olsem hem? ?Hem i gat sem fasin olsem sam long ol brata blong hem, we oli stronghed mo oli wantem bos long prapa laef blong olgeta? Ridim stori long Jenesis, mo traem kasem save long filing blong Jekob mo Lea. Ating tingting blong tufala i trabol tumas mo tufala i sem bigwan, from trabol we i kamaot long bisnes ya we gel blong tufala i stap wokbaot i go long taon blong Sekem.—Jenesis 34:1-31; 49:5-7; mo tu, lukluk Wajtaoa blong Jun 15, 1985, pej 31.
“No Moa Mekem Fasin Nogud Wetem [Man No] Woman”
14 Be Sekem i mekem samting we olgeta man Kenan oli mekem taem i wantem slip wetem wan gel. Daena i traem blong blokem boe ya, be Sekem i “tekem hem” mo i “fosem hem blong slip wetem hem.” I luk olsem we biaen Sekem ‘i laekem Daena tumas,’ be hemia i no jenisim samting we hem i bin mekem long Daena. (Jenesis 34:1-4) Mo i no Daena nomo we i harem nogud from samting ya. Trabol we i kamaot from we Daena i jusum ol nogud fren, i spolem gudnem blong famle blong hem mo i mekem bigfala sem long olgeta.—Jenesis 34:7, 25-31; Galesia 6:7, 8.
w09 1/9 pej 21 haf 1-2
Taem Wan Man i Mekem Yu Kros
Plante taem, taem problem i kasem ol man, oli kros mo oli wantem givimbak rabis fasin long narafala, from oli wantem harem gud. Eksampol, Baebol i talemaot se taem ol boe blong Jekob oli harem nius se man Kenan ya Sekem i fosem sista blong olgeta blong slip wetem hem, “oli harem nogud tumas, mo oli kros tumas tu.” (Jenesis 34:1-7) Blong stretem problem ya, tufala boe blong Jekob i plan blong kilim Sekem mo ol man blong hem. Simeon mo Livae i trikim ol man long taon ya, mo oli kilim evri man i ded, mo Sekem tu i ded.—Jenesis 34:13-27.
?Olsem wanem? ?Faet ya i stretem problem? Taem Jekob i harem samting we tufala boe blong hem i mekem, hem i tok long tufala, i se: “Tufala. Yutufala i mekem wan bigfala trabol long mi ya. Naoia, ol laen blong Kenan, . . . bambae oli no moa laekem mi, bambae oli agens long mi ya. Be yumi no plante nating. Sipos olgeta ya oli joen wanples, nao oli kam blong mekem faet long yumi, bambae yumi evriwan i lus ya.” (Jenesis 34:30) Samting we i bin hapen i no stretem problem ya. Naoia famle blong Jekob i mas lukaot se ol narafala man oli no kam spolem olgeta. Blong blokem trabol ya, maet God i talem long Jekob blong oli kamaot mo go long Betel.—Jenesis 35:1, 5.
Traem Faenem Ol Gudfala Samting Ya
it-1 pej 600 haf 4
Debora
1. Hem i lukaotem Rebeka taem hem i smol. Taem Rebeka i lego haos blong papa blong hem Betuel blong muv i go long Palestaen mo maredem Aesak, Debora i folem hem. (Je 24:59) Afta long ol yia we hem i stap wetem famle blong Aesak, hem i kam stap wetem famle blong Jekob maet afta we Rebeka i ded. Maet samples 125 yia afta we Rebeka i maredem Aesak, Debora i ded mo oli berem hem aninit long stamba blong wan oktri long Betel. Nem blong tri ya (Alonbakut, we i minim “Oktri Ya Long Ples Blong Krae”) i soemaot se Jekob mo ol famle blong hem oli lavem Debora tumas.—Je 35:8.
Kwestin
?Olsem wanem? Long taem blong ol man Isrel bifo, ?laen we i go kasem Mesaea i kamaot oltaem long raet blong fasbon?
Plante taem yumi gat tingting olsem. I luk olsem se tingting ya i stret long tok we i stap long Hibrus 12:16. Vas ya i se Esao i “ting nating long ol samting we oli tabu” mo “i salem [i go long Jekob] raet blong hem olsem fasbon blong kasem wan kakae nomo.” Hemia i soemaot se taem Jekob i kasem ‘raet olsem fasbon,’ hem i joen tu long laen blong Mesaea.—Mat. 1:2, 16; Luk 3:23, 34.
Be, taem yumi stadi long ol stori blong Baebol, yumi luk se wan man i no nid blong stap olsem fasbon blong i joen long laen blong Mesaea. Traem luk sam long ol pruf ya:
Long ol pikinini boe blong Jekob (Isrel), fasbon blong hem we Lea i bonem hem i Ruben. Biaen, fasbon pikinini boe blong Jekob we Rejel i bonem hem i Josef. Taem Ruben i mekem trabol, raet blong fasbon we hem i gat i go long Josef. (Jen. 29:31-35; 30:22-25; 35:22-26; 49:22-26; 1 Kr. 5:1, 2) Be laen blong Mesaea i no kamaot long laen blong Ruben mo Josef. Laen blong Mesaea i kamaot long Juda, we hem i namba fo pikinini boe blong Jekob we Lea i bonem.—Jen. 49:10.