Refrens Blong Kristin Wok Mo Laef Buk Blong Miting
7-13 DISEMBA
OL GUDGUDFALA SAMTING LONG BAEBOL | LEVITIKAS 10-11
“Lavem Jehova Moa i Bitim Famle”
it-1 pej 1174
No Gat Raet
Faea Mo Insens We Man i No Gat Raet Blong Mekem. Long Levitikas 10:1, Hibru tok ya zar (mo taem i tokbaot samting olsem woman, oli yusum tok ya za·rahʹ we prapa mining blong hem se narakaen), oli yusum blong tokbaot wan faea we tufala boe blong Eron, hemia Nadab mo Abihu, tufala i mekem mo givim long Jehova, be “tufala i no gat raet blong mekem olsem, from we [God] i no talem long tufala blong mekem,” ale Jehova i yusum faea blong kilim tufala i ded. (Le 10:2; Na 3:4; 26:61) Biaen, Jehova i talem long Eron se: “Yu wetem ol boe blong yu, yufala i no mas dring waen no eni narafala samting we i gat alkol long hem, taem yufala i kam insaed long tent blong miting, sipos no bambae yufala i ded. Hemia wan loa we ol jeneresen we oli kamaot biaen long yufala bambae oli mas folem oltaem. Hemia i blong mekem yufala i kasem save samting we i tabu mo samting we i no tabu, mo samting we i klin mo samting we i no klin, mo blong tijim ol laen blong Isrel long olgeta rul we Jehova i bin talemaot tru long Moses.” (Le 10:8-11) Tok ya i givim tingting se Nadab mo Abihu i bin drong nao tufala i no fraet blong mekem wan faea we God i no givim raet long tufala blong mekem, mo tufala i givim i go long Hem. Maet tufala i no gat raet blong mekem faea ya, from we i no stret taem o ples, o stret wei blong mekem faea ya, o maet oli yusum wan insens we ol samting we oli miksim blong wokem insens ya, oli no ol samting we Eksodas 30:34, 35 i tokbaot. Nomata se tufala i drong, hemia i no wan eskius from sin blong tufala.
w11 1/7 pej 31 haf 16
?Yu Yu Joen Wetem God Long Spel Blong Hem?
16 Brata blong Moses we nem blong hem Eron, i fesem hadtaem from tufala boe blong hem. Tufala boe ya, Nadab mo Abihu, tufala i bonem insens i go long Jehova, long wan fasin we Jehova i no glad long hem. Nao wantaem nomo, Jehova i mekem faea i kamaot long heven blong kilim tufala i ded. Yu traem tingbaot. Eron i mas harem nogud bitim mak. Hem i no moa save toktok wetem tufala, from we tufala i ded. Be i no hemia nomo. Moses i talem long Eron mo tu narafala boe blong hem, se Jehova i no wantem we trifala i harem nogud. Moses i talem se: “Yutrifala i no mas terem klos blong yutrifala [blong sore long tufala], mo yutrifala i mas komem hea blong yutrifala. Sipos yutrifala i mekem ol fasin ya blong sore, bambae yutrifala i ded from, mo Hae God bambae i kros long yumi evriwan.” (Lev. 10:1-6) Tingting we i stap insaed long ol vas ya i klia nomo. Yumi mas lavem Jehova moa, i bitim we yumi lavem ol famle blong yumi we oli no wantem obei long Hem.
Traem Faenem Ol Gudfala Samting Ya
w14 15/11 pej 20 haf 18
Yumi Mas Tabu Long Olgeta Samting
18 Sipos yumi wantem stap tabu, yumi mas stadi gud long Baebol, mo yumi mas mekem stret olsem we God i askem. God i kilim Nadab mo Abihu i ded from we tufala i ‘leftemap faea blong givim i go long Hae God be God i no talem long tufala, blong tufala i mekem olsem.’ Maet tufala i bin tekem strong dring tu, bifo we tufala i mekem samting ya. (Levitikas 10:1, 2) I gud yumi ridim wanem we God i talem long Eron biaen. (Ridim Levitikas 10:8-11.) ?Olsem wanem? ?Ol vas ya oli soemaot se yumi no mas tekem strong dring nating, bifo we yumi go long wan Kristin miting? Blong faenem ansa, yu traem tingbaot ol samting ya: Yumi no moa stap aninit long Loa we God i givim long Moses. (Rom 10:4) Tede, long sam kantri, ol brata oli tekem smol dring wetem kakae, bifo we oli go long miting. Long lafet blong Pasova bifo, oli yusum fo kap waen. Mo tu, taem Jisas i stanemap Kakae blong Masta, hem mo ol aposol blong hem oli dring waen we i saen blong blad blong hem. (Matiu 26:27) Be Baebol i talem klia se yumi no mas dring tumas mo yumi no mas drong. (1 Korin 6:10; 1 Timoti 3:8) Plante Kristin oli no save tekem strong dring nating, bifo we oli mekem wosip long Jehova, from we tingting blong olgeta i blokem olgeta. Be ol kantri oli defdefren. Bigfala samting, se yumi mas ‘waes gud blong makem ol samting we i blong God mo ol samting we yumi save yusum olbaot,’ i min se yumi naf blong save wanem fasin i tabu mo wanem fasin i no soemaot respek long God. Olsem nao, bambae yumi stap tabu mo yumi mekem Jehova i glad.
it-1 pej 111 haf 5
Ol Animol
Tabu ya we God i putum long saed blong ol animol se ol man oli no mas kakae, i go nomo long olgeta we oli stap aninit long Loa blong Moses, from se tok we i stap long Levitikas 11:8 i talem se: “Ol animol ya oli no klin blong yufala i kakae,” hemia i minim ol man Isrel. Taem sakrefaes blong ded blong Kraes Jisas i kanselem Loa, tabu ya tu i kansel, nao olgeta man oli save tingbaot se oli stap aninit long sem instraksen we God i givim long Noa afta long Bigfala Wota we i ron.—Kol 2:13-17; Je 9:3, 4.
14-20 DISEMBA
OL GUDGUDFALA SAMTING LONG BAEBOL | LEVITIKAS 12-13
“Loa Blong Leprosi i Tijim Yumi”
?I Blong Bifo Nomo o Man i Jes Faenemaot?
• Sikman i mas stap longwe long ol narafala man.
Folem Loa we God i givim long Moses, ol man we oli gat sik ya leprosi oli mas stap longwe long ol narafala man. Be ol dokta oli jes faenemaot samting ya 700 yia i pas, taem fulap man oli ded from ol strong sik we oli pas kwiktaem nomo i go long ol man. Mo loa ya i stret yet tede.—Levitikas japta 13 mo 14.
?Yu Yu Save?
Ol man Jiu bifo oli fraet long wan kaen leprosi we i stap kasem ol man. Rabis sik ya i save spolem ol nev blong bodi, mo i save kakae bodi blong man mo spolem blong olwe. Sik ya i no gat meresin blong hem. Be olgeta we oli kasem sik ya oli mas stap longwe long ol narafala man, mo oli mas givim woning long ol narawan se oli gat leprosi.—Levitikas 13:45, 46.
it-2 pej 238 haf 3
Leprosi
Long ol klos mo ol haos. Leprosi i save kasem ol klos tu we oli wokem long wul mo linen, mo ol samting we oli wokem long skin blong animol. Sik ya i save lus sipos oli wasemaot ol samting ya, mo i gat rod blong putum ol samting ya long kwarantin. Be sipos sik ya, we kala blong hem i yelo mo grin o i red, i stap yet, hemia i min se leprosi ya i moa nogud mo i save kilim man i ded, taswe oli mas bonem ol klos mo samting we sik ya i stap long hem. (Le 13:47-59) Sipos long wol blong wan haos i gat wan mak we i grin mo i yelo lelebet o i red long wol blong haos, mo i no stap antap nomo be i go dip insaed long wol blong haos, pris i mas putum haos ya long kwarantin. Maet bambae oli mas teremaot ol ston we nogud mak ya i stap long hem, mo oli mas skrasem insaed blong haos ya, mo oli tekem ol ston ya wetem plasta mo simen we oli skrasemaot long haos ya, oli go sakem long wan ples we i no klin aotsaed long taon. Sipos sik ya i kambak, pris i mas talemaot se haos ya i no klin, mo oli mas pulumdaon haos ya, mo oli go sakem evri timba, ston, plasta mo simen blong hem long wan ples we i no klin. Be sipos sik i no kambak long haos ya, oli mas mekem seremoni blong mekem haos ya i kam klin, nao biaen pris i jes talemaot se haos ya i klin. (Le 14:33-57) Ol man oli bin stap talem se leprosi we i stap spolem ol klos mo haos, hem i wan kaen mildiu o mold; be yumi no suagud long samting ya.
Traem Faenem Ol Gudfala Samting Ya
w04 15/5 pej 23 haf 1
Ol Bigfala Poen Long Buk Blong Levitikas
12:2, 5—?From wanem woman we i bonem pikinini i “no klin”? Fastaem, God i wokem samting blong man mo tabu haf blong woman blong tufala i save mekem pikinini we i stretgud olgeta. Be, from we olgeta man oli sinman, ol pikinini we oli bon oli no stretgud olgeta. Taem woman i bonem pikinini, mo taem hem i gat sik blong woman, mo taem wota blong man i kamaot long bodi blong hem, tufala i “no klin” blong smol taem, nao samting ya i mekem tufala i rimemba se tufala i sinman. (Levitikas 15:16-24; Ol Sam 51:5; Rom 5:12) Loa i talem se ol man Isrel oli mas mekem sam sakrefaes blong kam klin bakegen, mo samting ya i halpem olgeta blong luksave we oli nidim wan ransom sakrefaes blong tekemaot ol sin blong olgeta, mo blong oli save kam stretgud olgeta. Taswe, Loa i ‘olsem man we i lukaot long wan pikinini blong mekem hem i folemgud ol rul blong masta blong hem.’—Galesia 3:24.
?I Blong Bifo Nomo o Man i Jes Faenemaot?
• Dei blong sakomsaes.
Loa blong God i talem se oli mas mekem sakomsaes long pikinini boe long namba eit dei blong hem. (Levitikas 12:3) Long fas wik blong laef blong bebi, blad blong hem i no strong tumas, be afta long wik ya, blad i kam strong moa. Taswe, nating se ol man bifo oli no gat save olsem ol dokta tede, be oli wet kasem namba eit dei blong mekem sakomsaes. Hemia i mekem i gud long bebi.
21-27 DISEMBA
OL GUDGUDFALA SAMTING LONG BAEBOL | LEVITIKAS 14-15
“Man i Mas Klin Blong Mekem Klin Wosip”
it-1 pej 263
Swim
I gat plante risen we i mekem se ol man Isrel oli mas folem seremoni ya blong swim. Eniman i “no klin” sipos i kasem leprosi, o “doti wota” i ronaot long seks blong hem, o melek blong hem i sut, o sipos woman i kasem sikmun, o blad i ronaot long seks blong hem, o sipos man mo woman i mekem seks. Eniman we i no klin from ol samting ya, hem i mas swim. (Le 14:8, 9; 15:4-27) Sipos wan man i stap long wan tent wetem dedbodi blong wan man, o i tajem dedbodi ya, hem i “no klin,” mo hem i mas yusum wota blong mekem hem i kam klin bakegen. Sipos eniman i no wantem folem rul ya, oli “mas aotem hem long kongregesen, from we hem i mekem tabu ples blong Jehova i kam doti.” (Na 19:20) Taswe i stret nomo we Baebol i yusum fasin ya blong wasem samting, olsem pijatok blong stap klin long fes blong Jehova. (Sam 26:6; 73:13; Aes 1:16; Esi 16:9) Trutok we i kamaot long tok blong Jehova hem i olsem wota we i wasem yumi, hem i gat paoa blong mekem yumi klin.—Ef 5:26.
it-2 pej 372 haf 2
Sikmun
Sipos blad i ronaot long wan woman blong plante dei be i no stret taem blong sikmun blong hem, o sipos hem i “gat sikmun we i stap longtaem moa i bitim nomol taem blong hem,” long olgeta taem ya, hem i no klin. Mo evri samting we hem i slip long hem, o i tajem, oli no klin, mo eniman we i tajem ol samting ya, hem tu i no klin. Afta we blad ya i stop, hem i mas kaontem seven dei, biaen bambae hem i kam klin. Long namba 8 dei, woman ya i mas tekem tu sotleg o tu yang pijin olsem nawimba, mo bae hem i go givim long Jehova, wan olsem wan ofring blong sin mo narafala olsem ofring we i bon fulwan.—Le 15:19-30; Yu luk CLEAN, CLEANNESS.
it-1 pej 1133
Holi Ples
2. Tent blong miting mo biaen, tempol. Ful ples ya, wetem yad blong tabenakel mo yad blong tempol, oli wan holi ples. (Eks 38:24; 2Kr 29:5; Wok 21:28) Ol impoten samting we oli stap long yad, hemia olta blong sakrefaes mo kopa besin. Tufala samting ya oli holi. Ol man we oli gotru long seremoni blong kam klin, olgeta nomo oli naf blong go insaed long yad blong tabenakel long enitaem. Sem mak, i no gat man i save go insaed long yad blong tempol sipos hem i no klin. Eksampol, wan woman we i no klin, i no save tajem eni samting we i tabu, o kam insaed long holi ples. (Le 12:2-4) I klia se sipos ol man Isrel oli gohed olsem we oli no klin, hemia i olsem we oli mekem tabenakel i no moa klin. (Le 15:31) Taem olgeta we oli bin kasem leprosi, oli karem ofring blong olgeta i kam blong oli save kam klin bakegen, oli mas stop long get blong yad nomo. (Le 14:11) Man we i no klin i no save kakae sakrefaes blong pis long tabenakel o long tempol, sipos no bambae hem i ded.—Le 7:20, 21.
Traem Faenem Ol Gudfala Samting Ya
it-1 pej 665 haf 5
Sora
Taem oli putumap ol pris long Isrel, God i talem long Moses blong i tekem sam blad blong man sipsip we i blong putumap man i kam pris, mo i putum long ples we i sofsof long raet saed sora blong Eron mo evri boe blong hem, blong soem se ol samting we oli stap hapen i mas afektem ol samting we oli lesin long hem, wok we oli mekem, mo fasin blong olgeta blong wokbaot. (Le 8:22-24) Long sem fasin, long saed blong man we i kam klin from leprosi, Loa i talem se pris i mas tekem sam blad blong man sipsip we i blong ofring blong sin, wetem sam oel we oli givim, mo i putum long ples we i sofsof long raet saed sora blong man we fastaem i gat leprosi. (Le 14:14, 17, 25, 28) Yumi luk wan samting we i klosap sem mak long man we i wantem gohed olwe blong wok slef blong masta blong hem. Taem samting ya i hapen, oli tekem slef ya i go long pos blong doa, nao masta blong hem i mas tekem wan tul blong stikim sora, mo i stikim sora blong slef ya i gotru. Saen ya we oli mekem long pat blong bodi we i blong lesin, i soemaot klia se slef ya i wantem tumas blong stap wetem masta blong hem mo gohed blong obei long hem.—Eks 21:5, 6.
g 1/06 pej 14, bokis
Mold—!Fren Mo Enemi!
?MOLD LONG TAEM BLONG BAEBOL?
Baebol i tokbaot se “sik ya leprosi i spolem wan haos,” we hemia bilding stret. (Levitikas 14:34-48) Ol man oli stap talem se samting ya, we oli kolem tu se “leprosi we i moa nogud,” hem i wan kaen mildiu o mold, be yumi no suagud long samting ya. Nomata se i olsem wanem, Loa blong God i talem long ol ona blong haos se oli mas tekemaot ol ston we sik ya i stap long hem, oli mas skrasemaot fulwan insaed blong haos ya, mo sakemaot olgeta doti samting ya long wan ples we i no klin, aotsaed long taon. Sipos sik ya i kambak, bambae oli talemaot se ful haos ya i no klin, oli pulumdaon, mo oli sakemaot. Instraksen blong Jehova we i klia gud we i tokbaot gud evri samting long saed blong sik ya, i soemaot se Jehova i lavem tumas ol man blong hem mo i kea long helt blong olgeta.
28 DISEMBA–3 JENUWARE
OL GUDGUDFALA SAMTING LONG BAEBOL | LEVITIKAS 16-17
“Dei Blong Atonmen”
Samting We Yumi Lanem Long Buk Blong Levitikas
4 Ridim Levitikas 16:12, 13. Traem tingbaot ol samting we i hapen long Dei Blong Stretem Sin: Hae pris i go insaed long haos tapolen blong God. I gat tri taem we hae pris i mas go insaed long Rum ya we i Tabu we i Tabu, mo hemia faswan taem. Long wan han, hem i holem insens we i gat gudfala smel, mo long nara han hem i holem wan sensa we oli wokem long gol. Sensa ya i fulap long sakol faea. Nao hem i go stanap long fored blong kaliko we i blokem Rum we i Tabu we i Tabu. Wetem bigfala respek, hem i go insaed mo i stanap long fored blong bokis ya we i Saen blong Promes blong God. !Long taem ya i olsem we hem i stanap long fored blong Jehova God! Ale hem i kafsaedem insens sloslo i go long sakol faea, mo rum ya i fulap long gudfala smel. Biaen hem i go insaed bakegen mo i karem blad blong animol blong tekemaot sin. Makem se hem i bonem insens bifo we hem i givim blad blong animol i go long God.
Samting We Yumi Lanem Long Buk Blong Levitikas
5 ?Insens we hae pris i bonem long Dei Blong Stretem Sin i tijim yumi long wanem? Baebol i soemaot se ol prea we ol gudfala man blong Jehova oli mekem i olsem insens. (Sam. 141:2; Rev. 5:8) Tingbaot se hae pris i gat bigfala respek taem hem i karem insens i kam long fored blong Jehova. Long sem fasin, taem yumi prea i go long Jehova, i gud blong prea wetem bigfala respek. Yumi glad tumas se God ya we i wokem heven mo wol i letem yumi i kam klosap long hem, olsem wan pikinini we i kam klosap long papa blong hem. (Jem. 4:8) !Hem i wantem se yumi fren wetem hem! (Sam. 25:14) Yumi glad tumas long blesing ya, taswe yumi no wantem mekem hem i harem nogud.
Samting We Yumi Lanem Long Buk Blong Levitikas
6 Tingbaot se hae pris i mas bonem insens bifo we hem i mekem sakrefaes. Long rod ya, hem i mekem Jehova i glad long hem, bifo we hem i mekem sakrefaes. ?Yumi lanem wanem? Taem Jisas i stap long wol, bifo we hem i ded blong sevem ol man, hem i mas mekem wan samting we i impoten moa. ?Wanem samting? Long ful laef blong hem long wol ya, hem i holemstrong long Jehova, blong mekem se Jehova i save glad long sakrefaes blong hem. Long rod ya, hem i stap pruvum se i impoten blong mekem laef blong yumi i laenap wetem samting we Jehova i wantem. Mo tu, hem i pruvum se rul blong Papa blong hem i stret.
Traem Faenem Ol Gudfala Samting Ya
it-1 pej 226 haf 3
Asasel
Olsem aposol Pol i eksplenem, taem Jisas i givim laef blong hem we i stret gud olgeta olsem wan sakrefaes blong sin blong ol man, hem i mekem moa i bitim samting we “blad blong bul mo blad blong nani” i mekem. (Heb 10:4, 11, 12) Taswe, hem i olsem wan nani we i tekem fol blong yumi, “i karem ol sik blong yumi,” mo hem nao we “oli sperem hem from ol rong blong yumi.” (Aes 53:4, 5; Mt 8:17; 1Pi 2:24) Hem i “karem” ol sin blong evriwan we oli soemaot se oli bilif long valiu blong sakrefaes blong hem. Hem i soemaot rod we God i yusum blong mekem sin i go lus blong olwe. Long ol rod ya, nani ya “blong Asasel” i pija blong sakrefaes blong Jisas Kraes.
w14 15/11 pej 12 haf 10
?From Wanem Yumi Mas Tabu?
10 Ridim Levitikas 17:10. Jehova i givim loa long ol man Isrel se oli no mas kakae blad. Mo Jehova i talem long ol Kristin tu se oli no mas kakae blad, nating se blad blong anamol no blad blong man. (Ol Wok 15:28, 29) I krangke nomo blong mekem wan samting we Jehova i agensem, nao hem i putumaot yumi long kongregesen blong hem. Yumi lavem Jehova mo yumi wantem obei long hem. Nating sipos yumi mas ded, be bambae yumi no brekem loa blong hem, taem ol man we oli no save hem mo oli no kea long loa blong hem, oli traem fosem yumi blong tekem blad. Yumi save se samfala bambae oli jikim yumi, be yumi obei long God nomo. (Jud 17, 18) ?Wanem i save givhan long yumi blong yumi no kakae blad mo yumi no letem dokta i putum blad long yumi?—Dutronome 12:23.