“Yu No Mas Karem Yok Wetem Wan Man We i No Gat Bilif”
OLSEM yu save luk long pija ya, wan kamel mo wan buluk tufala i wok wanples be i luk olsem we tufala i no harem gud. Yok ya we i joenem tufala tugeta i mekem we tufala i safa from we yok ya i blong tu anamol we i sem mak long saes mo paoa nomo. From we God i tingbaot laef blong ol anamol olsemia, hem i talem long ol man Isrel se: “Bambae yufala i no mas putum yok long buluk wetem dongki, blong tufala i wok wan ples blong digim graon.” (Dutronome 22:10) Rul ya i stret tu long wan buluk mo wan kamel.
Plante taem, wan fama bambae i no mekem i strong long ol anamol blong hem. Be sipos hem i no gat tufala buluk, mo hem i gat tu anamol we tufala i sem mak, ale hem i save putum yok long tufala anamol ya. I luk olsem se, hemia samting we fama ya we i laef long ol yia 1800 i traem mekem long pija ya. From we tufala anamol ya tufala i no sem mak long saes mo hevi blong tufala, i mekem se anamol ya we i slak smol i mas traehad blong muv long sem spid wetem narawan, mo anamol ya we i strong moa bambae i mas traehad moa blong pulum hevi samting ya.
Aposol Pol i yusum pijatok ya blong yok we i joenem tufala anamol tugeta, blong tijim wan impoten lesen long yumi. “Yu no mas karem yok wetem wan man we i no gat bilif, from we hem i no sem mak long yu. ?Olsem wanem stret fasin mo fasin blong brekem loa, tufala i save frengud? ?Mo olsem wanem delaet mo tudak, tufala i save stap wanples?” (2 Korin 6:14, NW) ?Olsem wanem wan Kristin i save karem yok wetem wan we i no stret long hem?
Wan rod hemia sipos wan Kristin i jus blong mared long wan man no wan woman we i gat ol defren bilif. Bambae i hadwok tumas long tufala we i mared blong joen gud tugeta mo blong agri long ol impoten bisnes long laef.
Taem Jeova i mekem faswan mared, hem i givim wan wok long waef se bambae hem i “givhan” long man blong hem. (Jenesis 2:18) Mo tu, tru long profet Malakae, God i tokbaot wan waef se hem i olsem “prapa fren” blong man. (Malakae 2:14, NW) Man we i Wokem yumi i wantem ol man mo woman we oli mared blong wok tugeta long saed blong spirit, blong serem ol hadtaem blong laef mo blong kasem ol gudgudfala samting tugeta.
Taem wan Kristin i mared long wan “man blong Masta” hem i soemaot se hem i gat respek long ol advaes blong Papa blong yumi long heven. (1 Korin 7:39) Samting ya i wan gudfala fandesen blong wan mared we i joen gud, we i save presem mo givim ona long God taem tufala tugeta i wosip long hem olsem we ‘tufala i trufala fren, we tufala i wok tugeta’ long wan fasin we i spesel.—Filipae 4:3.
[Foto Credit Line blong pija long pej 32]
Camel and ox: From the book La Tierra Santa, Volume 1, 1830