LESEN 10
Ol Miting Blong Ol Witnes Blong Jehova Oli Save Halpem Yu
?I hapen finis we wan man i bin invaetem yu blong go long wan miting blong ol Witnes? Sipos no yet, ating yu fraet blong go. Maet yu stap ting se: ‘?Miting ya i olsem wanem? ?From wanem hem i impoten? ?From wanem mi mas go?’ Long lesen ya, bambae yu lanem se fasin blong joen wetem ol narafala i save halpem yu mo pulum yu i kam klosap long God.
1. ?Wanem impoten risen blong joen long ol miting?
Makem risen we wan man long Baebol i talem: “Bambae mi presem Jehova long bigfala kongregesen.” (Ol Sam 26:12) Long sem fasin, ol Witnes blong Jehova oli glad tumas taem oli joen tugeta long ol miting. Evri wik, long fulwol oli joen tugeta blong singsing, prea, mo presem God. Mo evri yia, wanwan taem oli wosip tugeta long wan bigfala grup.
2. ?Bambae yu lanem wanem long ol miting ya?
Long ol miting, mifala i fokas moa long Baebol, mifala i ‘eksplenem klia Loa mo talemaot mining blong hem.’ (Ridim Nehemaea 8:8.) Sipos yu kam, bambae yu kasemsave moa long Jehova mo ol gudfala fasin blong hem. Taem yu kasemsave moa long lav blong hem, bambae yu kam klosap moa long hem. Bambae yu faenemaot tu se hem i save halpem yu blong gat wan gudfala laef.—Aesea 48:17, 18.
3. ?Olsem wanem ol narafala long miting oli save halpem yu?
Jehova i se yumi mas “stap tingbaot yumi, blong yumi givgivhan long yumi blong yumi lavem ol narafala, mo blong yumi mekem ol gudfala wok. Yumi no mas les blong kam wanples long ol miting blong yumi.” (Hibru 10:24, 25) Long ol miting, bambae yu mitim ol man we oli rili kea long evriwan, mo olsem yu, oli wantem lanem moa long saed blong God. Bambae yu harem ol gudfala tingting we oli serem. (Ridim Rom 1:11, 12.) Taem yu storian wetem sam we oli singel mo sam we oli mared, bambae yu luk se oli hapi nating se oli gat ol problem. !Hemia sam nomo long ol risen we Jehova i wantem se yumi joen oltaem long ol miting!
DIGIM MOA
Faenemaot se ol miting blong ol Witnes blong Jehova i olsem wanem, mo from wanem i gud blong traehad blong kam long ol miting ya.
4. Ol miting blong ol Witnes blong Jehova
Ol fas Kristin bifo oli mit tugeta oltaem blong wosipim Jehova. (Rom 16:3-5) Ridim Kolosi 3:16, mo tokbaot kwestin ya:
?Olsem wanem ol Kristin bifo oli wosipim Jehova?
Tede, ol Witnes oli joen tugeta oltaem long ples blong wosip blong olgeta. Blong luk se miting blong olgeta i olsem wanem, plei VIDEO. Biaen, lukluk pija blong wan miting blong kongregesen, mo tokbaot ol kwestin ya:
?Wanem i stap hapen long Haos Kingdom, we i sem mak long samting we yu ridim long Kolosi 3:16?
Long video ya o long pija, ?yu yu laekem wanem long saed blong miting?
Ridim 2 Korin 9:7, mo tokbaot kwestin ya:
?From wanem ol man oli no pem blong kam long ol miting blong ol Witnes?
Wetem tija blong yu, yutufala i tokbaot sam samting we bambae i kamaot long miting blong wik ya.
?Wanem haf blong miting we yu luk se bambae i givhan long yu?
?Yu yu save?
Long jw.org, yu save faenemaot ples mo taem blong ol miting long olgeta ples long wol.
Long ol miting, i gat ol tok, ol pleplei, mo ol video. Ol miting oli stat mo oli finis wetem singsing mo prea
Long sam program blong miting, ol man oli save givim komen
Evriwan i welkam—ol famle, olgeta we oli singel, ol olfala, mo ol pikinini
Ol miting oli fri. Ol Witnes oli no askem fi blong entrens, o pasem plet blong kleksin
5. I nidim traehad blong joen long ol miting
Tingbaot eksampol blong famle blong Jisas. Evri yia, blong go long lafet long Jerusalem, oli mas wokbaot samwe 100 km long ol hil, stat long Nasaret i go. Ridim Luk 2:39-42, mo tokbaot ol kwestin ya:
?Yu ting se i hadwok blong travel i go long Jerusalem?
?From wanem maet yu tu yu mas traehad blong kam long ol miting?
?Yu ting se i gud blong kam long ol miting, nating se i hadwok? ?From wanem yu ansa olsem?
Baebol i talem se fasin ya blong joen tugeta blong wosip, i impoten tumas. Ridim Hibru 10:24, 25, mo tokbaot kwestin ya:
?From wanem yumi mas kam long ol miting oltaem?
SAM MAN OLI SE: “Yu no nid blong joen wetem ol narafala. Sipos yu stadi Baebol long haos, hemia i naf.”
?Wanem vas o eksampol long Baebol, i soem samting we Jehova i wantem?
SAMARI
Taem yu kam long ol miting, hemia bambae i halpem yu blong yu kasemsave moa long Jehova, i mekem yu fren moa wetem Hem, mo yu wosipim Hem wetem ol narafala.
Tingtingbak
?From wanem Jehova i enkarejem yumi blong joen tugeta long ol miting?
?Bambae yu lanem wanem long miting blong ol Witnes?
?Yu ting se ol miting oli save givhan long yu long sam moa samting?
FAENEMAOT
?Olsem wanem sipos yu fraet blong kam long wan miting? Luk wan man we fastaem i filim olsem, be naoia i laekem ol miting.
Mitufala i No Save Fogetem Gudfala Fasin Blong Ol Brata Mo Sista (4:16)
Luk wan yang man we i enjoem ol miting mo samting we hem i mekem blong gohed blong kam long ol miting.
Faenemaot filing we ol narafala oli gat long saed blong ol miting.
“?From Wanem i Gud Blong Go Long Ol Miting Long Haos Kingdom?” (Web atikol)
Faenemaot olsem wanem wan memba blong gang i jenisim laef blong hem, afta we i kam long wan miting blong ol Witnes.
“I Never Went Anywhere Without My Gun” (Wajtaoa, 1 Julae 2014)