!God i wantem we yumi laef olwe long paradaes long wol! Long paradaes ya bambae i gat pis mo glad.

Maet yu ting se: ‘?Samting ya i save kamtru olsem wanem?’ Baebol i talem se Kingdom blong God bambae i mekem i kamtru. God i wantem se ol man oli save long Kingdom ya mo long ol samting we hem i wantem mekem blong yumi.—Sam 37:11, 29; Aesea 9:7.

God i wantem we yumi gat wan gudfala laef.

Wan gudfala papa i wantem we pikinini blong hem i gat gudfala laef. Long sem fasin, Papa blong yumi long heven i wantem we yumi gat wan gudfala laef mo yumi glad olwe. (Aesea 48:17, 18) Hem i promes se ‘man we i stap mekem ol samting we Hem i wantem, bambae i no save lus samtaem.’—1 Jon 2:17.

God i wantem we yumi folem ol rod we hem i jusumaot.

Baebol i talem se God i wantem “tijim yumi long ol fasin we hem i wantem,” nao bambae yumi save “folem ol rod we hem i jusumaot.” (Aesea 2:2, 3) Hem i mekem se plante man oli joen olsem wan kampani nomo “blong oli holem nem blong hem.” Oli talemaot samting we God i wantem long ol man long olgeta ples long wol.—Ol Wok 15:14.

God i wantem we yumi joen gud blong mekem wosip long hem.

Taem ol man oli wosipim tru God ya Jehova oli no seraot, be oli joen gud from we oli lavlavem olgeta. (Jon 13:35) Long olgeta ples long wol, ol man mo woman oli stap lanem blong joen gud naoia blong mekem wok blong God. ?Hu i stap tijim olgeta? I gud yu ridim buk ya blong faenemaot ansa blong kwestin ya.

?Yu yu save sam Witnes blong Jehova? Maet yu storian finis wetem wan Witnes. Maet i gat wan Witnes i stap klosap long haos blong yu, no i wok wetem yu, no i skul wetem yu. ?Ol Witnes oli wanem kaen man? ?From wanem oli talemaot bilif blong olgeta long ol man?

Oli olsem ol narafala man nomo. Ol Witnes oli kamaot long ol defren kaen laef, oli no gat haenem, mo oli no go long wan spesel skul. Sam long olgeta, fastaem oli stap go long wan narafala jos, sam oli no bilif long God nating. Be olgeta evriwan oli spenem taem blong stadi gud long ol tijing blong Baebol, nao oli kam Witnes blong Jehova. (Ol Wok 17:11) Olgeta ya oli luk se samting we oli lanem i tru, ale olgeta wanwan oli mekem desisen blong wosipim tru God ya Jehova.

Stadi blong Baebol i mekem laef blong olgeta i kam gud moa. Olsem ol narafala man, ol Witnes tu oli kasem ol trabol, mo oli gat ol slak fasin. Be oli traehad evri dei blong folem ol advaes blong Baebol long laef blong olgeta. Samting ya i mekem se laef blong olgeta i kam gud moa. (Ol Sam 128:1, 2) Hemia nao wan risen from wanem oli wantem talemaot long ol narafala, ol gudfala samting we oli lanem long Baebol.

Oli traehad blong folem ol fasin we God i laekem. Ol fasin ya we Baebol i tokbaot oli givhan long ol Witnes blong oli harem gud long laef, mo blong oli gat respek long ol narafala. Baebol i tijim olgeta se oli no mas giaman, mo oli no mas stil, mo oli mas kaen long ol narafala. Tijing ya i mekem se oli kam ol gudfala man we oli wok strong, famle blong olgeta i joen gud, mo laef blong olgeta i klin. Ol Witnes oli save gud se “God i stap mekem i sem mak nomo long olgeta man.” Taswe, oli no seraot from kala blong skin mo from ol defdefren tingting blong politik. Oli olsem wan famle nomo long fulwol. Nating se olgeta wanwan oli olsem ol narafala man, be grup blong olgeta i defren long ol narafala grup long wol.—Ol Wok 4:13; 10:34, 35.

• ?Long wanem fasin ol Witnes blong Jehova oli sem mak long ol narafala man?

• ?Wanem ol gudfala fasin we ol Witnes oli lanem taem oli stadi Baebol?

Plante man oli ting se Witnes blong Jehova i nem blong wan niufala skul. Be bitim 2,700 yia bifo, wan man blong raetem Baebol i talem se ol man blong tru God oli “witnes” blong hem. (Aesea 43:10-12) Bifo long yia 1931, ol man oli singaot ol Witnes se ol Baebol Studen. ?From wanem oli tekem nem ya Witnes blong Jehova?

Nem ya i talemaot God blong ol Witnes. Plante man blong tanem ol tok blong Baebol i go long narafala lanwis, oli tekemaot nem blong God, Jehova, mo oli putum Masta, no God, no Hae God long ples blong hem. Be nem ya Jehova i stap plante taosen taem long ol olfala hanraet blong Baebol. Wan long ol taem ya, hemia taem God i talemaot long Moses se prapa nem blong hem, Jehova. Mo hem i talem se: “Nem ya blong mi bambae i stap we i stap, we bambae i no save lus samtaem.” (Eksodas 3:15) Nem ya i makemaot Jehova se hem i defren long ol giaman god. Mifala i harem gud tumas blong holem tabu nem ya blong God.

Nem ya i talemaot wok blong ol Witnes. Stat long stret man ya Ebel, i gat plante man we oli Witnes blong Jehova, i min se oli talemaot we oli bilif long Jehova. I gat Noa, mo Ebraham, mo Moses, mo Deved, mo ol narafala ‘witnes we oli plante we plante.’ (Hibrus 11:4 kasem 12:1) Long kot, wan man we i talemaot se narafala man i no mekem rong, hem i wan witnes. Long sem fasin, ol Witnes blong Jehova oli gat strong tingting blong talemaot se God blong olgeta i tru.

Taem oli tekem nem ya, oli folem Jisas. Baebol i talem se Jisas i ‘wan tru witnes blong God, we i no save tanem tok blong hem.’ (Revelesen 3:14) Jisas i ‘talemaot nem blong God,’ mo taem hem i tokbaot God, hem i “talemaot ol tok we i tru.” (Jon 17:6; 18:37) Taswe, ol man we oli rili man blong Jisas, oli mas karem nem blong Jehova mo oli mas talemaot nem ya. Ol Witnes blong Jehova oli stap traehad blong mekem samting ya.

• ?From wanem ol Baebol Studen oli tekem nem ya Witnes blong Jehova?

• ?Jehova i gat ol Witnes blong hem long wol ya, stat wetaem?

• ?Hu ya nambawan Witnes blong Jehova?