Refrens Blong Kristin Wok Mo Laef Miting Wokbuk
7-13 MAJ
OL SAS SAMTING LONG BAEBOL | 1 SAMUEL 12-13
“Man We i Flas Bambae i Sem Bigwan”
Man We i Flas Bambae i Sem Bigwan
17 Maet i luk olsem se aksen ya blong Sol i stret nomo. Tru ya, ol man Filistia oli “meksavegud” ol man blong God nao oli “harem se oli no save win,” mo oli stat seksek from we i luk olsem se bambae oli lus evriwan. (1 Samuel 13:6, 7) I sua se, i no rong blong tekem aksen taem sam samting i kamaot we i nidim blong mekem olsem. Be, rimemba se Jehova i save samting we i stap long hat blong yumi mo hem i luksave ol tingting we oli pusum yumi blong mekem samting. (1 Samuel 16:7) Taswe, maet hem i luk sam samting long saed blong Sol, we oli no stap long stori ya blong Baebol. Eksampol, maet Jehova i luk se Sol i no gat longfala tingting from we hem i flas. Ating Sol i kros from we hem—we hem i king blong Isrel—i mas wet blong wan man we, long tingting blong hem, hem i wan olfala profet we i stap fogetem samting. Nating se i olsem wanem, Sol i ting se, from we Samuel i let, hem i gat raet blong mekem ol samting hem wan, mo hem i no tingbaot se hem i bin kasem advaes we i klia. ?Wanem risal blong samting ya? Samuel i no presem Sol from we hem i tekem desisen ya blong gohed fastaem blong mekem ol sakrefaes, nogat. Hem i tok agensem Sol, i se: “Olgeta ya bambae oli no save kam king biaen long yu [from we] yu yu no obei long tok blong Hae God.” (1 Samuel 13:13, 14) Long ples ya bakegen, fasin flas i lidim man i go kasem bigfala sem.
Jehova i Tinghae Long Yu Taem Yu Obei Long Hem
8 Stori blong Baebol long saed blong King Sol i makemgud se i impoten tumas blong obei. Taem Sol i jes kam king, hem i no tinghae tumas long hem wan. Hem i gat tingting daon, ‘hem i ting se hem i wan man nating nomo.’ Be sloslo, hem i kam flas long tingting blong hem mo i no moa holem stret tingting, ale hem i mekem plante nogud desisen. (1 Samuel 10:21, 22; 15:17) Wan taem, Sol i mas faet agensem ol man Filistia. Be Samuel i talem long Sol blong wet long hem, nao hem bambae i mekem sakrefaes i go long Jehova mo talem nekis samting we Sol i mas mekem. Be Samuel i no kam kwik ale ol man oli stat blong go wanwan. Taem Sol i luk samting ya, hem i “gohed i bonem sakrefaes ya we i blong bonem i bon evriwan.” Jehova i no glad long Sol. Taem Samuel i kamtru, king i mekem eskius from fasin blong hem blong no obei. Eskius blong hem se, from we Samuel i let, ‘hem i harem se hem i mas mekem sakrefaes ya’ blong mekem Jehova i glad. Long tingting blong King Sol, sakrefaes ya i moa impoten i bitim we hem i obei long oda we hem i kasem blong wet long Samuel blong kam mekem sakrefaes. Ale Samuel i talem long Sol se: “!King, fasin ya i krangke ya! Hae God i God blong yu, be yu yu brekem tok blong hem.” From we Sol i no obei long Jehova, hem i lusum posisen blong hem olsem king.—1 Samuel 10:8; 13:5-13.
Ol Gudgudfala Samting
?Bambae Yu Yu Folem Ol Tok Blong Jehova We Oli Lidim Yu Long Stret Rod?
15 Maet ol man Isrel oli ting se oli save trastem moa wan man we i king i bitim we oli save trastem Jehova. Sipos hemia nao tingting blong olgeta, sore tumas. Tingting ya i no tru nating. From we oli bilif long wan samting we i no tru, i isi long olgeta blong bilif long plante narafala samting we oli no tru, ol samting we oli kamaot long Setan. Ol man we oli king, oli pulum olgeta blong wosipim ol aedol. Ol man we oli wosipim ol aedol oli ting se oli save trastem ol god ya we oli wokem long wud mo long ston, from we oli save luk olgeta mo tajem olgeta. Ol man ya oli no trastem Jehova, God ya we i mekem olgeta samting, from we oli no save luk hem. Be aposol Pol i talem se ol aedol ya, oli “giaman god nomo.” (1 Kor. 8:4) Ol aedol ya oli no save lukluk, oli no save harem samting, mo oli no save mekem samting. Taswe, nating se man i save luk ol aedol mo tajem olgeta, i no waes nating blong wosipim olgeta from we oli no save givhan long man. Yes ol aedol oli ol samting we oli no tru, mo man we i trastem olgeta hem i save kasem bigfala trabol from.—Sam 115:4-8.
14-20 MAJ
OL SAS SAMTING LONG BAEBOL | 1 SAMUEL 14-15
“Fasin Obei i Gud Moa Bitim Sakrefaes”
Jehova i Tinghae Long Yu Taem Yu Obei Long Hem
4 From we Jehova i wokem olgeta samting, evri samting we yumi gat oli blong hem. ?Olsem wanem? ?I no moa gat wan samting we yumi save givim long hem? Si, yumi save givim wan samting we i sas tumas long tingting blong hem. ?Wanem samting ya? Ansa blong kwestin ya i stap long ol advaes ya: “Pikinini blong mi, yu yu mas kam waes. Sipos yu kam waes, bambae mi glad we mi glad, mo [“bambae mi save ansa long hemia we i stap jikim mi,” NW].” (Ol Proveb 27:11) Yumi givim samting long God taem yumi obei long hem. Nating se laef blong yumi wanwan i defdefren mo yumi kamaot long ol defren ples, be sipos yumi obei long God, yumi save givim ansa long Setan we i sakem rabis tok ya se ol man bambae oli no stap tru long God sipos oli kasem traem. !Hemia wan nambawan janis we yumi gat!
it-2 521 ¶2
Obei
I no gat wan narafala samting i save tekem ples blong fasin obei, taswe sipos yumi wantem mekem God i glad, yumi mas obei long hem. Olsem we Samuel i talem long King Sol: “Wanem nao we Jehova i glad moa long hem, ?blong man i givim ol ofring we i bon fulwan mo ol sakrefaes, o blong i obei long voes blong Jehova? !Yu luk! Fasin blong obei i gud moa bitim sakrefaes, mo man we i lesin i gud moa i bitim gris blong man sipsip.” (1Sa 15:22) Taem man i no obei, i olsem we hem i tanem baksaed long tok blong Jehova, i soemaot se hem i no bilif, i no trastem, o i no bilif long Baebol mo Man We i Stamba blong hem. Taswe man we i no obei, hem i sem mak long man we i stap talemaot fiuja o i mekem wosip long ol aedol. (1Sa 15:23; skelem wetem Ro 6:16.) Sipos wan man i talem se hem i stap obei, be ol aksen blong hem oli no soemaot samting ya, tok ya blong hem i nating nomo. Mo tu, hemia i soemaot se hem i no gat bilif, o i no gat respek long man ya we i givim ol instraksen blong hem i folem. (Mt 21:28-32) Olgeta we oli harem mo akseptem trutok blong God, be oli no mekem samting we oli harem, oli stap trikim olgeta wan nomo, mo oli no save kasem blesing. (Jem 1:22-25) Jisas i talem klia se olgeta we oli stap mekem ol semfala samting olsem ol man blong hem, be oli mekem long rod o wetem wan tingting we i no stret, bambae hem i tanem baksaed long olgeta mo bambae oli neva go insaed long Kingdom.—Mt 7:15-23.
Ol Gudgudfala Samting
it-1 493
Sore
Taem wan samting o wan man i pulum yu blong soem sore be i agensem tingting blong God, bigfala problem i save kamaot from. Hemia nao samting we i hapen long King Sol. Long taem we God i mekem jajmen blong hem i kamtru long ol man Amalek, we olgeta nao oli faswan man blong atakem ol man Isrel afta we oli aot long Ijip, Jehova i givim oda long Sol se hem i no mas sore long olgeta. Be from we Sol i fraet long ol man blong hem, hem i no obei fulwan long oda blong Jehova. Taswe Jehova i sakemaot Sol blong i no moa king. (1Sa 15:2-24) Taem man i tinghae long stret fasin blong Jehova mo i traehad blong holemstrong long Hem, hemia bambae i halpem hem blong i no mekem mastik olsem Sol, we biaen Jehova i no glad long hem.
21-27 MAJ
OL SAS SAMTING LONG BAEBOL | 1 SAMUEL 16-17
“Faet Ya i Blong Jehova”
Jehova “i Gat Paoa Blong Win Long Faet”
Deved i mekem tingting blong Sol i kwaet taem hem i tokbaot olsem wanem hem i kilim wan laeon mo bea. ?Hem i stap tokflas? Nogat. Deved i save hu i mekem hem i win. Hem i talem se: “Hae God i stap blokemgud mi, blong ol laeon mo bea oli no spolem mi. Hem i sevem mi plante taem finis, mo bambae hem i blokemgud mi bakegen blong man ya bambae i no spolem mi. !Bambae hem i sevem mi yet ya!” Sol i agri, mo hem i talem se: “Oraet, yu go. Prea blong mi we Hae God bambae i stap wetem yu.”—1 Samuel 17:37.
?Yu yu wantem gat bilif olsem Deved? Bilif blong Deved i no wan tingting nomo, no wan samting we hem i wantem nomo se i kamtru. Hem i bilif long God from we hem i gat save, mo i luk finis olsem wanem Jehova i givhan long hem. Hem i save se Jehova i lavem hem, i stap lukaot gud long hem, mo i holem ol promes blong hem. Sipos yumi wantem gat bilif olsem, yumi mas gohed blong kasem save long God ya we Baebol i tokbaot. Taem yumi folem ol save ya, yumi luk gudfala frut we i kamaot long laef blong yumi, nao bilif blong yumi i kam strong.—Hibrus 11:1.
Jehova “i Gat Paoa Blong Win Long Faet”
Tede, yumi sapraes yet long strong bilif we yangfala Deved i soemaot long ansa blong hem. Hem i talem long Golaeat se: “Yu yu kam blong faet long mi long tufala spia mo naef blong faet blong yu, be mi mi kam blong faet long yu long nem blong Hae God. Hem i God blong mifala, mo hem i gat olgeta paoa, be yu yu stap jikim . . . hem.” Deved i save se ol tul blong faet mo paoa we Golaeat i gat i no impoten. Golaeat i daonem Jehova God, mo Jehova bambae i panisim hem. Olsem Deved i talem, Jehova “i gat paoa blong win long faet.”—1 Samuel 17:45-47.
Deved i luk klia nomo se Golaeat i bigfala man mo i gat ol tul blong faet. Be Deved i no letem samting ya i mekem hem i fraet. Hem i no mekem olsem Sol mo ol ami blong hem we oli skelem olgeta wetem Golaeat. Be hem i skelem Golaeat wetem Jehova. Golaeat i longfala, klosap tri meta. Hem i longfala moa i bitim ol narafala man, be taem Deved i skelem hem wetem King blong heven mo wol, Jehova, hem i nating nomo. !Golaeat mo ol narafala man tu oli olsem smol bebet nomo! !Mo Jehova i rere blong spolem gud hem!
Jehova “i Gat Paoa Blong Win Long Faet”
Tede ol man blong God oli no moa mekem faet, taem ya i pas finis. (Matiu 26:52) Nating se i olsem, yumi mas folem bilif blong Deved. Olsem Deved, yumi mas bilif se Jehova i laef i stap, mo hem nomo i God ya we yumi mas wosipim mo fraet long hem. Samtaem yumi harem se ol problem blong yumi oli bigwan tumas, mo yumi smol nomo. Be ol problem oli nating nomo taem yumi skelem wetem bigfala paoa blong Jehova. Sipos yumi jusum Jehova se i God blong yumi, mo yumi bilif long hem olsem Deved i mekem, i no gat wan hadtaem, no wan problem we i bigwan tumas. !I no gat wan samting we paoa blong Jehova i no save winim!
Ol Gudgudfala Samting
it-2 871-872
Sol
Afta long samting ya mo afta long taem ya we oli makemaot Deved olsem fiuja king blong Isrel, spirit blong Jehova i aot long Sol. Stat long taem ya, “Jehova i mekem wan rabis spirit i mekem hem i fraet bitim mak.” Afta we spirit blong Jehova i aot long Sol, Jehova i letem wan rabis spirit i kam long hem, i tekemaot pis long tingting blong hem, mo i mekem hem i gat ol nogud filing mo tingting. From we Sol i no moa obei long Jehova, tingting mo hat blong hem i kam nogud, nao spirit blong God i no moa protektem hem. Be from we Jehova nao i letem “rabis spirit” o “rabis tingting” i tekem ples blong gudfala tingting blong Sol mo i mekem hem i fraet, yumi save talem se “rabis spirit” ya i kam long Jehova. Mo hemia nao from wanem ol man blong wok blong Sol oli talem se ‘God i letem rabis spirit’ i kam long hem. Folem tok blong wan man blong wok blong hem, Sol i askem blong Deved i kam plei miusik blong mekem hem i harem gud bakegen, taem “rabis spirit” ya i mekem hem i fraet bitim mak.—1Sa 16:14-23, fut.; 17:15.
28 MAJ–3 EPREL
OL SAS SAMTING LONG BAEBOL | 1 SAMUEL 18-19
“Gat Tingting Daon Taem Narafala i Presem Yu”
Dipen Long Spirit Blong God Blong Stanap Strong Taem Laef i Jenis
4 I no longtaem, yangfala boe ya we i stap lukaot long ol sipsip bambae i kam wan jampion long kantri blong hem. Oli singaot hem i go wok blong king mo i plei miusik blong king ya. Hem i kilim bigfala man ya Golaeat. Golaeat i wan strong man blong faet we ol soldia blong Isrel oli fraet tumas long hem, nating se oli ol gudfala man blong faet. Ale, oli putum Deved blong i lidim ol soldia blong king, hem i go mekem faet agensem ol man Filistia mo i win. Ol man oli laekem Deved tumas. Oli wokem sam singsing blong presem hem. Bifo long ol samting ya, taem wan advaesa blong King Sol i tokbaot yangfala Deved se “hem i save plei gud” long gita, hem i talem tu se Deved i ‘wan gudfala soldia we i no save fraet, fes blong hem i naes, mo hem i save toktok gud.’—1 Samuel 16:18; 17:23, 24, 45-51; 18:5-7.
Luksave Olsem Wanem Stret Man i Defren Long Rabis Man
6 Traem tingbaot Deved. Plante man oli leftemap hem from we hem i naes, i save singsing mo plei miusik, hem i strong, mo plante man oli tinghae long hem. Be Deved i no kam flas, olsem plante narafala man we oli olsem. Afta we hem i kilim Golaeat i ded, King Sol i talem se hem i save mared long gel blong hem. Be Deved i talem se: “King, mifala i no wan bigfala famle, mo mi mi no wan haeman. Mi no naf blong tekem dota blong yu.” (1 Samuel 18:18) ?Wanem i mekem se Deved i gat tingting daon olsem? Hem i save se ol gudfala fasin we hem i gat, ol samting we hem i gat gudhan blong mekem, mo haenem we hem i kasem, oli kamaot long God ya we i gat tingting daon, mo we i stap tingbaot hem. (Ol Sam 113:5-8) Deved i luksave se ol gudgudfala samting we hem i gat oli kamaot long Jehova nomo.—Skelem wetem 1 Korin 4:7.
7 Olsem Deved, ol man blong Jehova tede oli traehad blong gat tingting daon. Taem yumi tingbaot se Jehova, we i hae moa long olgeta samting long heven mo wol, i gat tingting daon, samting ya i tajem hat blong yumi. Taswe, yumi traehad blong folem advaes ya se: ‘Yufala i mas werem ol fasin ya olsem we oli klos blong yufala. Yufala i mas sore long ol man, kaen long olgeta, tingting blong yufala i mas stap daon, yufala i mas kwaet man, mo yufala i mas gat longfala tingting.’ (Kolosi 3:12) Yumi save tu se man we i gat lav, “hem i no tok flas mo tingting blong hem i no go antap.” (1 Korin 13:4) Taem ol narafala oli luk we yumi gat tingting daon, maet olgeta tu oli wantem save Jehova. Ol gudfala fasin blong Kristin waef i save pulum hasban blong hem we i no bilif, blong i wantem save Jehova. Long sem fasin, taem ol Kristin oli gat tingting daon, hemia i save pulum ol man blong oli wantem save God.—1 Pita 3:1.
Ol Gudgudfala Samting
it-2 695-696
Profet
Nating se spirit blong Jehova nao i makemaot ol profet, be hemia i no min se oltaem ol profet ya oli talemaot ol tok we i kamaot long Jehova. Sam samtaem nomo spirit blong God ‘i kam long olgeta,’ mo i soemaot ol mesej we oli mas talemaot. (Esi 11:4, 5; Maeka 3:8) Spirit ya i gat paoa long olgeta mo i pulum olgeta blong toktok. (1Sa 10:10; Jer 20:9; Am 3:8) Oli no mekem nomo ol samting we i narakaen, be oli soemaot filing blong olgeta tu taem oli toktok mo mekem ol samting blong sapraes. Maet hemia nao i eksplenem from wanem oli talem tok ya “mekem olsem ol profet.” (1Sa 10:6-11; 19:20-24; Jer 29:24-32; skelem wetem Wok 2:4, 12-17; 6:15; 7:55.) From we tingting blong olgeta i stap fulwan long wok we oli mas mekem, hemia i save gat paoa long fasin blong olgeta, mo maet oli save mekem sam samting we ol narafala oli luk se i narakaen, olsem profet ya we i kamtru long ol lida blong ol ami mo i makemaot Jehu blong i kam king. Stret long taem ya, taem oli luksave se hem i wan profet, oli akseptem mesej blong hem. (2Ki 9:1-13; skelem wetem Wok 26:24, 25.) Taem Sol i stap ronem Deved, hem i “mekem olsem ol profet,” hem i tekemaot ol klos blong hem mo i slip “neked long ples ya fuldei mo fulnaet,” long taem ya we Deved i ronwe. (1Sa 19:18–20:1) Hemia i no min se oltaem ol profet oli stap mekem fasin ya blong stap neked, from Baebol i soem samting we i defren olgeta. I gat tu narafala ples long Baebol we i tokbaot tu profet we tufala i neked from wan risen, hemia blong soemaot sam haf blong ol profet tok blong olgeta. (Aes 20:2-4; Maeka 1:8-11) Be long saed blong Sol, maet hem i mekem olsem blong soem se hem i jes wan man nomo o se hem i no moa werem klos blong king, se Jehova i tekemaot otoriti mo paoa long hem, o maet from sam narafala risen, be Baebol i no talem from wanem hem i neked.
4-10 EPREL
OL SAS SAMTING LONG BAEBOL | 1 SAMUEL 20-22
“?Olsem Wanem Blong Stap Olsem Wan Gudfala Fren?”
Frengud Wetem Ol Brata Mo Sista Bifo We En i Kam
18 Tede, ol brata mo sista oli fesem plante hadtaem. Plante oli stap long ples we i gat faet o i gat wan bigfala etkwek. Long taem olsem, maet yumi save tekem sam brata mo sista oli kam long haos blong yumi. Sipos no, maet yumi save givim sam mane long olgeta. Yumi evriwan i save askem long Jehova blong i givhan long ol brata mo sista ya. Taem yumi save se tingting blong wan brata o sista i foldaon, maet yumi no save wanem blong talem. Be yumi save mekem sam samting blong givhan. Yumi save spenem taem wetem hem. Yumi save lesin long hem mo soemaot sore. Mo yumi save tokbaot wan vas blong Baebol blong leftemap tingting blong hem. (Aes. 50:4) Impoten samting se yu stap wetem fren blong yu taem hem i nidim yu.—Ridim Ol Proveb 17:17
Wokbaot Folem Ol Tok Blong Jehova
7 God i wantem luk we taem yumi fren wetem narafala, narafala i save trastem yumi. (Prov. 17:17) Jonatan we i pikinini blong King Sol i gud fren wetem Deved. Taem Jonatan i harem se Deved i kilim Golaeat i ded, Jonatan “i laekem Deved we i laekem hem tumas, mo i stap lukaot gud long Deved olsem we i stap lukaot long hem nomo.” (1 Saml. 18:1, 3) Taem Jonatan i harem we Sol i wantem kilim Deved i ded, hem i go talemaot long Deved. Afta we Deved i ronwe, Jonatan i go mitim hem mo i mekem promes wetem hem se bambae tufala i fren gogo i no save finis. Klosap Sol i kilim Jonatan i ded taem hem i harem se Jonatan i bin toktok wetem Deved. Be Jonatan i mekem plan bakegen blong mitim Deved, nao tufala i mekem promes bakegen se fasin fren blong tufala i strong i stap. (1 Saml. 20:24-41) Laswan taem we Jonatan i luk Deved, hem i leftemap tingting blong Deved “i talemgud long hem we God i stap lukaot long hem.”—1 Saml. 23:16-18.
Long Wol Ya We i No Moa Gat Lav, Yumi Mas Holemtaet Fasin Fren Blong Yumi Wetem Narafala
11 Stap tru. Solomon i talem se: “Wan trufala fren i soemaot lav oltaem nomo, mo hem i olsem wan brata we i rere blong givhan long taem blong trabol.” (Prov. 17:17, NW) Taem Solomon i raetem ol tok ya, maet hem i stap tingbaot olsem wanem papa blong hem Deved i bin frengud wetem Jonatan. (1 Saml. 18:1) King Sol i wantem se pikinini blong hem, Jonatan, i rul long Isrel taem hem i ded. Be Jonatan i glad nomo we Jehova i jusum Deved blong hem i kam king. Jonatan i no olsem papa blong hem Sol, hem i no jalus long Deved. Hem i no harem nogud from we ol man oli presem Deved, mo hem i no bilivim ol giaman tok we Sol i sakem blong spolem nem blong Deved. (1 Saml. 20:24-34) ?Olsem wanem? ?Yumi olsem Jonatan? ?Yumi glad taem ol fren blong yumi oli kasem wan wok long kongregesen? ?Yumi leftemap tingting blong olgeta mo givhan long olgeta taem oli kasem ol traem? ?Taem yumi harem ol nogud toktok we i spolem fren blong yumi, yumi kwik blong bilif long ol toktok ya, no yumi stap tru long fren blong yumi mo yumi toktok blong sapotem hem, olsem Jonatan i mekem?
Ol Gudgudfala Samting
Ol Bigfala Poen Long Buk Blong Fas Samuel
21:12, 13. Jehova i wantem we yumi yusum tingting mo save blong yumi blong dil wetem ol hadtaem long laef blong yumi. Hem i givim Baebol long yumi blong tijim yumi blong gat waes, save, mo blong gat gudfala tingting. (Ol Proveb 1:4) Ol Kristin elda tu oli save givhan long yumi.
18-24 EPREL
OL SAS SAMTING LONG BAEBOL | 1 SAMUEL 23-24
“Wet Long Jehova Wetem Longfala Tingting”
Dipen Long Spirit Blong God Blong Stanap Strong Taem Laef i Jenis
8 Deved i no wantem givim kil long Sol. Hem i gat bilif mo longfala tingting, taswe hem i glad nomo blong livim bisnes ya i stap long han blong Jehova. Afta we king i goaot long hol blong ston ya, Deved i singaot i go long hem, i se: “!Hae God nomo bambae i jajem yumitu, se hu long yumitufala i rong! !Be prea blong mi we hem bambae i panisim yu from ol samting ya we yu stap mekem agens long mi, from we mi bambae mi no save mekem wan samting nating blong spolem yu!” (1 Samuel 24:12) Deved i save se Sol nao i rong. Be hem i no gat tingting blong givimbak. Hem i no tok nogud long Sol mo i no tokbaot Sol long ol narafala man se hem i nogud. Nogat. Long plante narafala taem bakegen, Deved i jusum blong no tekem aksen folem prapa tingting blong hem wan. Defren olgeta, hem i dipen long Jehova se hem nao bambae i stretem ol samting.—1 Samuel 25:32-34; 26:10, 11.
?Yu Yu Letem Ol Trabol i Spolem Laef Blong Yu?
Namba tri lesen we yumi lanem, se yumi no mas brekem wan loa blong Baebol blong traem stretem trabol long laef blong yumi, be yumi mas wet long Jehova nomo. Disaepol Jemes i raetem se: “Yufala i mas stanap strong olwe gogo kasem en blong rod, blong bambae yufala i stret gud, yufala i no sot long wan samting, mo yufala i gat olgeta samting blong Kristin laef blong yufala.” (Jemes 1:4) Yumi mas stanap strong “gogo kasem en blong rod,” hemia i min se yumi mas stanap strong go kasem we trabol blong yumi i finis, yumi no mas brekem wan loa blong Baebol blong traem finisim trabol ya hariap. Olsem nao, trabol ya we i traem bilif blong yumi, bambae i mekem bilif i kam strong moa, mo bambae i soemaot bigfala paoa we bilif ya i givim long yumi. Josef mo Deved tufala i gat fasin ya blong stanap strong longtaem. Tufala i no traem stretem trabol blong tufala long wan fasin we Jehova i no glad long hem. Tufala i wok strong blong haremgud long laef blong tufala, nating se trabol i stap. !Tufala i wet long Jehova, mo tru, Jehova i givim fulap blesing long tufala! Jehova i yusum tufala tugeta blong sevem mo lidim ol man blong hem.—Jenesis 41:39-41; 45:5; 2 Samuel 5:4, 5.
Yu tu, taem wan trabol i kasem yu, maet yu harem se i moagud blong folem wan rod we i no laenap wetem Baebol, blong traem stretem trabol ya. Olsem nao, maet yu harem nogud from we yu no faenem yet wan man no woman we yu save mared wetem hem. Sipos i olsem, yu no mas tingbaot blong brekem tok ya blong Jehova se yumi mas mared long “man blong Masta” nomo. (1 Korin 7:39) Maet yu gat trabol insaed long mared blong yu. I moagud we yutufala i wok tugeta blong traem winim hadtaem ya, i bitim we yutufala i letem spirit blong wol ya i pulum yutufala blong seraot mo divos. (Malakae 2:16; Efesas 5:21-23) Maet yu stap faenem i had blong lukaotgud long famle blong yu from we yu sot long mane. Sipos yu wet long Jehova, bambae yu no save mekem wan samting we i no stret no i agensem loa, blong yu kasem mane. (Ol Sam 37:25; Hibru 13:18) Yes, yumi evriwan i mas wok had blong haremgud long laef mo traehad blong mekem samting we Jehova bambae i blesem yumi from. Taem yumi stap folem rod ya, yumi mas gat strong tingting blong wet long Jehova blong stretem trabol blong yumi long rod we i beswan.—Maeka 7:7.
Ol Gudgudfala Samting
Yu No Letem Wan Samting i Tekemaot Praes Ya
11 Sipos yumi gat tru lav mo kaen fasin, bambae yumi no save jalus. Baebol i talem se: “Man we i gat lav, hem i gat longfala tingting mo i kaen . . . hem i no jalus.” (1 Korin 13:4) Blong yumi no kam jalus, yumi mas traem blong gat tingting blong Jehova long evri samting. Yumi mas tingbaot ol brata mo sista long kongregesen olsem ol memba blong wan bodi nomo. Baebol i talem se: “Sipos man i presem wan haf blong bodi, evri narafala haf oli glad wetem hem.” (1 Korin 12:16-18, 26) Sipos i gat wan gudfala samting i hapen long wan brata, bambae yumi no jalus be yumi glad. Traem tingbaot gudfala eksampol blong Jonatan, pikinini blong King Sol. Hem i no jalus taem hem i kasem save se i no hem we bambae i king, be Deved nomo. Hem i leftemap tingting blong Deved mo i sapotem hem. (1 Samuel 23:16-18) ?Olsem wanem? ?Yumi save gat lav mo kaen fasin olsem Jonatan?
25 EPREL–1 MEI
OL SAS SAMTING LONG BAEBOL | 1 SAMUEL 25-26
“Tingting Gud Bifo Yu Tekem Aksen”
ia 78 ¶10-12
Hem i Mekem Samting We i Waes
10 ?Ol soldia blong Deved oli mekem wanem long ol man blong lukaot long sipsip blong Nabal? I isi nomo blong oli stilim ol sipsip blong olgeta, be oli no mekem olsem. Defren olgeta, oli olsem wan bigfala stonwol we i protektem ol sipsip blong Nabal mo ol man blong wok blong hem. (Ridim 1 Samuel 25:15, 16.) Ol sipsip mo ol man blong lukaot long sipsip oli fesem plante denja. I gat ol wael animol, mo from we boda blong Isrel long saed i go long saot i stap klosap nomo, oltaem i gat ol stilman long ol ples ya.
11 I wan bigfala wok blong meksua se ol man ya oli gat kakae taem oli stap long draeples. So wan dei, Deved i sanem ten mesenja blong oli go askem help long Nabal. Deved i jusum wan taem we i waes. Hemia i taem blong katem hea blong ol sipsip, i wan taem blong lafet mo blong givim samting long gladhat. Mo tu, Deved i jusum gud ol toktok blong hem, mo i yusum ol tok we i kaen mo i soem respek. Antap moa hem i yusum tok olsem “boe blong yu Deved,” blong soemaot se hem i respektem Nabal we i olfala moa long hem. ?Be Nabal i mekem wanem?—1 Saml. 25:5-8.
12 !Hem i kros tumas! Wan yangfala man blong wok i talem long Abigel se, “hem i singaot strong mo i sakem ol rabis tok long olgeta.” Nabal i griri mo i stap komplen bigwan from mit, wota, mo bred blong hem. Hem i talem ol rabis tok long saed blong Deved mo i komperem hem olsem wan slef we i ronwe. Maet Nabal i gat sem tingting olsem Sol we i no laekem Deved nating. Tufala man ya i no gat sem lukluk olsem Jehova. God i lavem Deved mo i no luk hem olsem wan rabis slef, be olsem fiuja king blong Isrel.—1 Saml. 25:10, 11, 14.
ia 80 ¶18
Hem i Mekem Samting We i Waes
18 Abigel i tekem blem from samting we i hapen mo i askem Deved blong i fogivim hem. Hem i luksave se hasban blong hem i no gat hed, we hemia nao mining blong nem blong hem, mo i no nid blong Deved i westem taem long man olsem. Hem i soemaot se hem i trastem Deved olsem wan representetif blong Jehova, mo i luksave se Deved i stap faet long “ol faet blong Jehova.” Mo tu, hem i soemaot se hem i save promes ya blong Jehova blong putumap Deved i kam king, from we hem i talem se: “Jehova . . . i putumap yu olsem lida blong ol man Isrel.” Mo tu, hem i plis long Deved blong i no mekem eni samting we maet i save mekem hem i gat fol from blad blong narafala, o maet biaen i “rigret” from tingting blong hem i stap stikim hem. (Ridim 1 Samuel 25:24-31.) !Hemia ol naesfala toktok we oli kaen!
Ol Gudgudfala Samting
ia 80 ¶16
Hem i Mekem Samting We i Waes
16 ?Hemia i min se Abigel i rebel agensem hasban blong hem we i hed blong hem? Nogat. Nabal i mekem i no stret long man ya we Jehova i makemaot hem, mo fasin blong hem i save mekem we plante man long haos blong hem oli lusum laef blong olgeta. Sipos Abigel i no kwik blong tekem aksen, maet hem tu i save gat fol from samting we hasban blong hem i mekem. Taswe long situesen ya, Abigel i jusum blong putum hem i stap aninit long God i bitim we hem i stap aninit long hasban blong hem.