Refrens Blong Kristin Wok Mo Laef Buk Blong Miting
4-10 JULAE
OL SAS SAMTING LONG BAEBOL | 2 SAMUEL 18-19
“Folem Eksampol Blong Basilae Blong Gat Tingting Daon”
Basilae i Luksave Samting We Hem i No Naf Blong Mekem
I klia se Deved i glad tumas long samting we Basilae i bin mekem blong halpem hem. I luk olsem king i no jes wantem givim long hem ol samting we hem i nidim. Basilae i wan rijman, mo hem i no nidim blong man i givim samting long hem. Maet Deved i wantem se hem i kam stap long haos blong king from we hem i wan olfala man we i gat ol gudfala fasin. Bambae i wan ona blong Basilae i stap long haos blong king mo haremgud blong frengud wetem king.
Basilae i Luksave Samting We Hem i No Naf Blong Mekem
Maet wan risen from wanem Basilae i mekem desisen ya, hemia from we hem i olfala mo hem i luksave se hem i no moa naf blong mekem sam samting. Maet Basilae i harem se bambae hem i no moa save laef longtaem. (Ol Sam 90:10) Hem i bin mekem ol samting we hem i naf blong mekem blong sapotem Deved, be hem i luksave tu se i gat sam samting we hem i no moa save mekem from we hem i olfala. Basilae i no letem tingting ya blong gat haenem mo posisen i blokem hem blong luksave limit blong hem. Absalom i wantem tumas blong kasem haenem, be Basilae i gat tingting daon mo i luksave samting we hem i no naf blong mekem.—Ol Proveb 11:2.
Basilae i Luksave Samting We Hem i No Naf Blong Mekem
Stori blong Basilae i tijim yumi se yumi mas gat stret tingting. Be long semtaem, yumi no mas traem talem no long wan privilej we yumi kasem, o yumi no traehad blong mekem moa long wok blong Jehova from yumi wantem gat wan kwaet laef, o ting se yumi no naf blong gat sam responsabiliti. God i save givim paoa mo waes long yumi sipos yumi dipen long hem.—Filipae 4:13; Jemes 4:17; 1 Pita 4:11.
Mo tu, yumi mas luksave limit blong yumi. Eksampol, maet wan brata i bisi finis wetem plante wok long saed blong spirit. Hem i luksave se sipos hem i akseptem sam moa privilej, bambae hem i no moa mekem gud ol narafala wok we Baebol i talem, olsem blong givim samting we famle blong hem i nidim. Long taem olsem, hem i mas gat stret tingting mo luksave samting we hem i no naf blong mekem mo talem no long sam privilej.—Filipae 4:5; 1 Timoti 5:8.
Ol Gudgudfala Samting
‘Resis Go Kasem En’
19 Sipos yu gat wan trabol olsem mo yu harem se ol narafala oli no kasem save, maet eksampol blong Mefiboset i leftemap tingting blong yu. (2 Saml. 4:4) Hem i handikap, mo tu, King Deved i gat rong tingting mo i mekem i no stret long hem. Be Mefiboset i no letem tingting blong hem i foldaon. Hem i glad long ol gudfala samting long laef blong hem, mo hem i tingbaot olsem wanem Deved i kaen long hem bifo. (2 Saml. 9:6-10) Taswe taem Deved i mekem i nogud long hem, hem i gat stret tingting. Hem i no kam kros mo i no blemem Jehova. Hem i tingbaot nomo samting we hem i save mekem blong sapotem king ya we Jehova i putumap. (2 Saml. 16:1-4; 19:24-30) Jehova i meksua se ol man oli raetemdaon gudfala stori blong Mefiboset long Baebol, blong i givhan long yumi.—Rom 15:4.
11-17 JULAE
OL SAS SAMTING LONG BAEBOL | 2 SAMUEL 20-21
“Jehova i God Blong Jastis”
it-1 932 ¶1
Gibeon
Blong plante yia, ol man Gibeon oli gohed blong stap laef nating se King Sol i traem blong finisim olgeta. Be ol man Gibeon oli wet wetem longfala tingting blong Jehova stretem nogud fasin ya. Mo Jehova i mekem samting ya taem hem i mekem we kakae i sot blong tri yia long taem we Deved i rul. Afta we Deved i askem tingting blong Jehova mo i faenemaot samting we Sol i mekem, Deved i askem long ol man Gibeon se hem i mas mekem wanem blong mekem atonmen. Ol man Gibeon oli talem long hem se “silva mo gol bambae i no naf blong stretem samting” ya, from we folem Loa, oli no save akseptem ransom from laef blong wan man we i mas ded. (Na 35:30, 31) Mo tu, oli luksave se oli no save kilim wan man i ded sipos oli no gat raet blong mekem. Taswe, Deved i no save mekem eni samting kasem we hem mekem samting we oli askem, blong i givim ol seven “boe” blong Sol i go long han blong olgeta. Sol wetem olgeta famle blong hem oli gat fol from blad blong ol man Gibeon, nating se Sol nao i tekem lid blong kilim olgeta man Gibeon, be “ol boe” blong hem tu oli joen wetem hem blong kilim ol man Gibeon. (2Sa 21:1-9) Long situesen ya, ol pikinini ya oli no ded from ol sin blong ol papa blong olgeta, (Du 24:16) be i laenap wetem wanem we loa i talem se: “Sipos hem i tekemaot laef blong narafala, yu mas tekemaot laef blong hem tu.”—Du 19:21.
Ol Gudgudfala Samting
Ol Elda Oli Wok Wetem Yumi Blong Mekem Yumi Glad
14 Olgeta man blong Jehova raon long wol oli gohed blong mekem wok blong hem, nating se Setan mo ol narafala man oli mekem i had long olgeta. Sam long yumi i kasem ol bigfala trabol, be yumi trastem Jehova fulwan, mo yumi gat paoa blong winim ol trabol ya, olsem Deved we i gat paoa blong kilim Golaeat. Be i gat sam taem we yumi harem se yumi no gat paoa blong faet agensem wol blong Setan. Long taem olsem, i isi nomo blong tingting blong yumi i foldaon. Be maet wan elda i luksave se yumi harem nogud mo hem i givhan long yumi long stret taem. Biaen, yumi harem se yumi glad blong gohed blong mekem wok blong Jehova. Plante long yumi i kasem help olsem. Wan paenia sista we i gat bitim 60 yia, i talem se: “I bin gat wan taem we mi no harem gud, mo wok blong prij i mekem mi taed. Wan elda i luksave se mi no gat paoa, ale hem i kam toktok long mi. Hem i yusum sam gudfala vas blong Baebol blong storian wetem mi. Mi folem advaes blong hem mo samting ya i mekem i gud long mi.” Sista ya i gohed i talem se: “!Mi harem gud tumas blong tingbaot se elda ya i lavem mi mo i luksave se mi nidim help!” Yes, i nambawan tumas blong tingbaot se ol elda oli kea long yumi, mo oli rere oltaem blong givhan long yumi, olsem Abisae we i rere blong givhan long Deved.
18-24 JULAE
OL SAS SAMTING LONG BAEBOL | 2 SAMUEL 22
“Lukluk i Go Long Jehova Blong i Halpem Yu”
cl 19 ¶11
?Yu Save “Kam Klosap Long God”?
11 Yumi glad blong ridim se God i gat ‘paoa blong mekem ol samting blong sapraes.’ (Aesea 40:26) Mo i naes blong ridim olsem wanem God i tekem ol man Isrel i gotru long Red Si, mo i lukaot gud long nesen ya long draeples blong 40 yia. Yu save pijarem wota we i seraot long tu haf, mo nesen ya we maet i gat 3,000,000 man long hem, oli stap wokbaot long drae graon nomo mo wota blong Red Si i stanap stret nomo olsem wan stonwol long tufala saed. (Eksodas 14:21; 15:8) Yu save luk klia pruf se God i stap lukaot gud long ol man blong hem long draeples. Hem i mekem wota i kamaot long ston, i givim kakae long olgeta we i olsem ol waet sid we oli folfoldaon long graon. (Eksodas 16:31; Namba 20:11) Jehova i no soemaot nomo se hem i gat paoa, be hem i yusum paoa blong hem blong givhan long ol man blong hem. Ating yumi glad tumas blong save se yumi stap prea i go long God ya we “i ples blong haed blong yumi mo i paoa blong yumi, mo long taem blong trabol, yumi save kasem help long hem kwiktaem.”—Ol Sam 46:1.
“Man We i Stap Tru Long Yu Bambae Yu Yu Stap Tru Long Hem Tu”
Yumi traem lukluk gud long ol tok blong Deved. Hibru tok we oli tanem i kam “stap tru” i save minim “lav mo kaengud fasin.” Fasin ya blong stap tru i stanap long lav. Lav i pulum Jehova blong fasgud long olgeta we oli stap tru oltaem long hem.
Makem tu se blong stap tru, hemia i no wan filing, mo i no wan samting we i stap long tingting blong man nomo. Be i gat wok i go wetem. Jehova i mekem samting blong soemaot se hem i stap tru long ol man. Ol samting we oli hapen long laef blong Deved, oli mekem hem i luksave samting ya. Taem Deved i kasem ol bigbigfala trabol, Jehova i mekem sam samting blong givhan long hem, i protektem mo i lidim hem. Deved i talem tangkiu long Jehova mo i talem se Hem nomo i ‘tekemaot hem long han blong ol narafala enemi blong hem.’—2 Samuel 22:1.
?Ol tok blong Deved oli save givhan long yumi olsem wanem? Jehova i no save jenis mo i no save jenisim tingting blong hem. (Jemes 1:17) Jehova i no stap brekem ol rul we hem nomo i putumap, mo hem i stap holem olgeta promes we hem i mekem. Long wan narafala Sam, Deved i raetem se: “Jehova . . . bambae i no save lego olgeta we oli stap tru long hem.”—Ol Sam 37:28, NW.
Ol Gudgudfala Samting
Yumi Mas Wokem Fasin Ya Blong Stap Daon
7 Deved i luksave se tingting blong Jehova i stap daon, nao samting ya i gat bigfala paoa long hem. Hem i singsing long Jehova, se: “Hae God. Yu yu stap blokemgud mi, yu stap sevem mi. Fasin blong yu we yu stap givhan long mi [“we tingting blong yu i stap daon,” NW], hem i stap leftemap nem blong mi.” (2 Saml. 22:36) Deved i mekem ol bigbigfala wok long Isrel. Be hem i save se hem i naf blong mekem ol wok ya nomo, from we Jehova i glad blong lukluk hem mo givhan long hem. Jehova i mekem olsem from we tingting blong hem i stap daon. (Sam 113:5-7) Samting ya i sem mak long yumi. Ol gudfala fasin mo save we yumi gat, mo ol spesel wok we yumi mekem, Jehova nomo i givim long yumi. (1 Kor. 4:7) Taem Jisas i talem se man we i stap daon i “hae moa,” hem i min se Jehova i save yusum hem moa blong mekem wok blong hem. (Luk 9:48) Yumi traem tingbaot samting ya moa.
25-31 JULAE
OL SAS SAMTING LONG BAEBOL | 2 SAMUEL 23-24
“?Presen We Yu Givim i Wan Sakrefaes?”
it-1 146
Aravnaha
I luk olsem se Aravnaha i glad blong givim fri nomo wan ples, wetem ol animol, mo ol wud blong yusum long sakrefaes, be Deved i harem se hem i mas pem ol samting ya. Seken Samuel 24:24 i soemaot se Deved i pem ples blong klinim wit mo ol animol ya long 50 silva sekel. Be 1 Kronikel 21:25 i talem se Deved i pem ol samting ya long 600 gol sekel. Man we i raetem Seken Samuel i tokbaot nomo praes blong ples we olta i stap long hem mo ol samting we oli yusum blong mekem sakrefaes, mo i luk olsem se praes ya we hem i tokbaot i joen nomo wetem ol samting ya. Be man we i raetem 1 Kronikel hem i tokbaot ol samting we i joen wetem wok we oli mekem biaen, blong bildim tempol, mo praes blong ol samting we oli yusum long wok ya. (1Kr 22:1-6; 2Kr 3:1) From we eria blong tempol ya i bigwan, i luk olsem se 600 gol sekel i praes blong bigfala eria ya, be i no praes blong ol smol haf blong olta ya we Deved i bildim fastaem.
Trutok We i Stap Long Loa i Tijim Yumi
8 Wan man Isrel i save mekem sakrefaes long Jehova long gladhat blong hem, from we hem i wantem soemaot long Jehova we hem i glad long samting we Jehova i mekem. Hem i save mekem sakrefaes we i blong bonem i bon evriwan, blong askem Jehova blong i glad long hem. Long taem olsem, ating i isi blong hem i jusum animol we i beswan. Hem i glad blong givim animol ya long Jehova. Tede, yumi no nid blong mekem ol sakrefaes we Loa blong Moses i tokbaot. Be yumi mekem sam narafala sakrefaes long Jehova. Yumi yusum taem, paoa, mo mane blong yumi long wok blong Jehova. Aposol Pol i talem se yumi mas “talemaot” ol promes blong God we yumi putum tingting blong yumi i stap long hem. Mo yumi mas ‘mekem ol gudfala fasin, mo yumi givgivhan long yumi.’ Hemia ol sakrefaes we oli mekem God i glad tumas. (Hib. 13:15, 16) Tingting we yumi gat long wok blong Jehova mo fasin blong yumi blong mekem wok ya, i soemaot sipos yumi glad long ol samting we Jehova i givim long yumi, no nogat. Olsem ol man Isrel, yumi mas tingbaot se yumi gat wanem tingting long wok blong God mo from wanem yumi mekem wok blong hem.
Ol Gudgudfala Samting
Ol Bigfala Poen Long Buk Blong Seken Samuel
23:15-17. Deved i gat bigfala respek long loa we God i givim long saed blong laef mo blad, mekem se long taem ya, hem i no wantem mekem wan samting we i luk olsem se bambae i agensem loa ya. Yumi mas wokem sem fasin olsem long saed blong olgeta loa blong God.
1-7 OGIS
OL SAS SAMTING LONG BAEBOL | 1 KING 1-2
“?Yu Yu Lanem Samting From Ol Mastik Blong Yu?”
it-2 987 ¶4
Solomon
Taem Adonaejah mo ol man blong hem oli harem saon blong miusik long Gihon, we i no longwe tumas, mo oli harem ol man oli singaot se: “King Solomon, i gud yu stap longtaem,” olgeta oli fraet mo oli konfius. Solomon i mekem wan saen blong pis blong makem rul blong hem, taem hem i no wantem kilim Adonaejah we i traem blong tekem ples blong hem blong rul. Sipos i bin hapen se Adonaejah i kam king, Solomon bambae i lusum laef blong hem. Be Adonaejah i ronwe i go long tabu ples blong i haed, ale Solomon i sanem toktok i go blong oli tekem Adonaejah i kam long hem. Hem i talem se Adonaejah i save gohed blong stap laef, sipos oli no faenem se hem i mekem wan nogud samting, biaen Solomon i sanem hem i gobak long haos blong hem.—1Ki 1:41-53.
Ol Bigfala Poen Long Buk Blong Fas King
1:49-53; 2:13-25—?Solomon i fogivim Adonia finis, ale from wanem biaen hem i girap i kilim Adonia i ded? Adonia i askem Batseba blong i go askem King Solomon se i givim Abisag blong i kam woman blong hem. Batseba i no luksave trik blong Adonia, be Solomon i kasem tingting we Adonia i gat taem hem i askem woman ya. Deved i no bin slip wetem naesfala woman ya Abisag, be long lukluk blong ol man, Abisag hem i olsem woman blong Deved stret. Folem kastom blong ol man long taem ya, taem Deved i ded, woman ya bambae i go long han blong man we i gat raet blong kam king long ples blong Deved. Taswe, maet Adonia i ting se sipos hem i tekem Abisag i kam woman blong hem, bambae hem i gat janis bakegen blong kasem paoa blong king long ples blong Solomon. From we Solomon i kasem save se hemia wan trik we Adonia i wokem blong kasem paoa olsem king, ale Solomon i karemaot fogif ya we hem i bin putum long Adonia mo i kilim hem i ded.
Ol Gudgudfala Samting
Ol Bigfala Poen Long Buk Blong Fas King
2:37, 41-46. !I rong olgeta blong ting se yumi save brekem loa blong Jehova mo no kasem panis! Olgeta we oli jusum blong lego rod ya ‘we i smol mo we i go kasem laef,’ bambae oli mas kasem nogud frut from desisen ya we oli tekem we i no waes nating.—Matiu 7:14.
8-14 OGIS
OL SAS SAMTING LONG BAEBOL | 1 KING 3-4
“Praes Blong Waestok”
?Yu Mas Folem Fasin Blong Hem No Yu Mas Lukaot Blong No Folem?
4 Taem Solomon i kam king, God i kamtru long hem long wan drim, mo i askem long hem wanem samting we hem i wantem. Solomon i talem se hem i wantem waes. Hem i save se hem i mas lanem plante moa samting. (Ridim 1 King 3:5-9.) God i glad we king i askem waes. Ale hem i ‘mekem Solomon i waes, blong i savegud ol fasin blong rul.’ Nating se Solomon i askem waes nomo, be God i mekem hem i ‘rij mo ol man oli ona long hem.’ (1 King 3:10-14) Jisas i talem se waes blong Solomon i bigwan tumas. Hem i talem se taem kwin blong Seba i harem nius blong bigfala waes blong Solomon, kwin ya i wokbaot longwe i kam blong luk Solomon mo blong harem waestok blong hem.—1 King 10:1, 4-9.
5 God i mekem merikel blong givim waes long Solomon. Tede, yumi save se God i no mekem merikel blong givim waes long yumi. Solomon i talem se “Hae God nomo i save mekem man i waes,” be hem i talem tu se yumi mas wok had blong kasem waes. Hem i se: “Yu mas lesin long ol waestok ya, mo yu mas traehad blong haremsave olgeta.” Solomon i talem tu se sipos yumi wantem kasem waes, yumi mas “askem strong long Hae God,” mo yumi mas “traehad,” olsem we yumi “traehad blong faenem” wan samting. (Prov. 2:1-6) Tru ya, hemia i min se yumi save kasem waes.
6 I gud yu askem se, ?Mi mi tinghevi long waes we i kamaot long God, olsem Solomon i mekem? Tingting blong plante man i stap long mane mo wok blong olgeta, hemia from we laef i had. Ol problem blong mane i mekem se samfala oli tekem desisen blong kasem hae edukesen, mo blong oli gohed moa long skul. ?Olsem wanem long yu mo famle blong yu? ?Ol desisen blong yu oli soemaot se yu “stap traehad blong faenem” waes blong God, olsem se i wan gudfala samting we man i berem? ?Yu ting se yu mas jenisim tingting we yu gat long mane mo edukesen, blong yu wok had moa blong kasem waes blong God? Waes we yumi kasem bambae i mekem i gud long yumi gogo i no save finis. Solomon i talem se: “Sipos yu harem tok blong [God], bambae yu save luksave ol fasin we i gud, mo yu save jajem ol man long stret fasin, mo yu save mekem i stret long olgeta man, mo bambae yu save olgeta samting we i stret blong yu mekem.”—Prov. 2:9.
Ol Gudgudfala Samting
Jehova i God Blong Ol Kontrak
15 Taem ol pikinini blong Ebraham oli kam wan nesen aninit long Loa, Jehova i blesem olgeta folem promes we hem i bin mekem long olfala Ebraham. Long 1473 B.K.T., Josua, we i tekem ples blong Moses, i lidim ol man Isrel oli go insaed long Kenan. Nao, oli seraotem graon blong kantri ya i go long ol wanwan laen blong Isrel. Samting ya i mekem promes blong Jehova i kamtru se bambae hem i givim graon ya long laen blong Ebraham. Taem Isrel i stap tru long Jehova, Hem i mekem promes blong hem i kamtru, se bambae oli winim ol faet agensem ol enemi blong olgeta. Samting ya i tru moa long taem we King Deved i rul. Namba tri haf blong kontrak blong Ebraham, i kamtru long taem blong pikinini blong Deved, hemia Solomon. “Juda mo Isrel oli kam plante, olsem sanbij klosap long solwota, mo oli stap kakae, dring mo haremgud tumas.”—1 King 4:20.
15-21 OGIS
OL SAS SAMTING LONG BAEBOL | 1 KING 5-6
“Lav We Oli Gat Long Jehova i Pusum Olgeta Blong Wok Strong”
?Yu Yu Save?
Ol man oli save gud se ol sida blong Lebanon oli save stap longtaem, oli naes, mo ol wud blong hem oli gat gudfala smel, be tu ol bebet oli no save spolem. From samting ya, Solomon i yusum ol beswan materiel blong wokem tempol. Tede, i gat smol fores nomo blong tri ya sida long Lebanon mo oli stap wanwan olbaot.
it-1 424
Sida
From we plante man oli yusum wud ya sida, i nidim plante taosen man blong wok blong katemdaon ol tri ya, transpotem olgeta i go long Taea o Saedon we i stap klosap long Mediterenian Si, fasem olgeta wanples, mo mekem oli flot long solwota, maet blong i go long Jopa. Biaen oli transpotem long menlan i go long Jerusalem. Hemia i folem wan kontrak we Solomon mo Hiram i bin mekem. (1Ki 5:6-18; 2Kr 2:3-10) From we oli sanem plante wud i go long Jerusalem, oli save talem se Solomon i mekem se “wud blong sida i kam plante olsem ol tri ya sikamo” long taem we hem i rul.—1Ki 10:27; skelem wetem Aes 9:9, 10.
it-2 1077 ¶1
Tempol
Blong oganaesem wok, Solomon i jusumaot 30,000 man Isrel, mo long wan manis hem i sanem 10,000 man oli go long Lebanon. Oli stap long Lebanon blong wan manis, nao biaen oli kambak long haos blong olgeta mo oli stap tu manis. (1Ki 5:13, 14) Hem i jusumaot 70,000 “man blong ol narafala kantri” we oli stap long Isrel blong oli karem ol samting, mo 80,000 man blong katem ston. (1Ki 5:15; 9:20, 21; 2Kr 2:2) Mo Solomon i putumap 550 foman blong oli lukaot long ol man blong wok mo maet 3,300 man blong oli givhan long olgeta. (1Ki 5:16; 9:22, 23) I luk olsem se long olgeta ya, i gat 250 we oli man Isrel mo 3,600 oli “man blong ol narafala kantri” we oli stap long Isrel.—2Kr 2:17, 18.
Ol Gudgudfala Samting
g12 Julae p.21, bokis
Baebol—Ol Profet Tok Blong Hem Oli Kamtru Haf 1
KAONTEM STRET OL YIA
Taem yumi ridim 1 King 6:1, yumi luksave se Baebol i kaontem stret ol yia. Vas ya i tokbaot taem we Solomon, king blong Isrel, i stat blong wokem haos blong God long Jerusalem, i se: “Long namba fo handred eiti yia [479 yia i pas finis] biaen long taem ya we ol olfala bubu blong yumi bifo oli kamaot long Ijip, long namba fo yia blong King Solomon we hem i rul long Isrel, long manis ya Sif we i seken manis blong yia ya, King Solomon i stat blong wokem haos blong Hae God.”
Folem ol yia we Baebol i talem, namba fo yia blong rul blong Solomon hemia 1034 B.K.T. Sipos yumi kaontem 479 yia, stat long 1034 B.K.T. i gobak biaen, yumi kasem yia 1513 B.K.T. Long yia ya nao, ol man Isrel oli kamaot long Ijip.
22-28 OGIS
OL SAS SAMTING LONG BAEBOL | 1 KING 7
“?Yumi Save Lanem Wanem Long Tufala Bigfala Pos Blong Tempol?”
“Bambae Yu Digim Kopa Long Ol Bigfala Hil”
King Solomon i yusum plante kopa blong flasem tempol long Jerusalem. Plante long ol kopa ya, papa blong hem Deved i karem taem hem i winim ol man Siria long faet. (1 Kronikel 18:6-8) “Si” we oli wokem long kopa, hemia bigfala besin we ol pris oli yusum blong swim long hem, i save holem 66,000 lita blong wota mo maet hevi blong hem i save kasem 30 tan. (1 King 7:23-26, 44-46) Mo i gat tu bigfala pos we oli wokem long kopa we i stanap long fored blong tempol. Longfala blong tufala pos ya i 8 meta mo antap long tufala pos ya, oli wokem tu hed we hae blong tufala i 2.2 meta. Tufala pos ya i tik olsem 7.5 sentimeta, mo hol we i stap insaed long tufala i bigwan olsem 1.7 meta. (1 King 7:15, 16; 2 Kronikel 4:17) Yumi sapraes blong luk amaon blong kopa we oli yusum blong mekem ol samting ya.
it-1 348
Boas, II
Tufala bigfala pos long kopa we i stanap long rum long fored blong tempol blong Solomon, wan we i fes i go long not oli singaot se Boas, we maet i minim “Long Paoa.” Mo hemia we i fes i go long saot oli singaot se Jakin, we i minim “I Gud [Jehova] i Mekem Hem i Kam Strong.” So taem wan man i stanap long saed we i fesem Is mo i ridim stat long raet i go long lef, bambae hem i ridim se: ‘I gud [Jehova] i mekem [tempol] i kam strong long paoa.’—1Ki 7:15-21.
Ol Gudgudfala Samting
it-1 263
Swim
Olgeta we oli wosipim Jehova long fasin we i tabu mo i klin, oli mas stap klin long bodi. Yumi luksave samting ya from arenjmen we oli mekem long tabenakel mo biaen long ol wok we oli mekem long tempol. Long taem we oli putumap Hae Pris Eron mo ol boe blong hem, olgeta oli mas swim bifo we oli werem ol spesel klos blong olgeta. (Eks 29:4-9; 40:12-15; Le 8:6, 7) Blong wasem han mo leg blong olgeta, ol pris oli yusum wota we i stap long besin ya long kopa long yad blong tabenakel, mo long tempol blong Solomon, oli yusum wota we i stap long bigfala Si. (Eks 30:18-21; 40:30-32; 2Kr 4:2-6) Long Dei Blong Atonmen, hae pris i mas swim tu taem. (Le 16:4, 23, 24) Olgeta we oli karem nani blong Asasel, ol haf pat blong animol blong sakrefaes, mo red kao we oli sakrefaesem finis, i go aotsaed long kamp, oli mas swim blong mekem oli klin mo wasem ol klos blong olgeta bifo we oli kam insaed long kamp.—Le 16:26-28; Na 19:2-10.
29 OGIS–4 SEPTEMBA
OL SAS SAMTING LONG BAEBOL | 1 KING 8
“Solomon i Gat Tingting Daon Mo i Prea Long Fulhat”
Stadi Baebol Blong Mekem Ol Prea Blong Yu Oli Kam Gud Moa
9 Prea i mas kamaot long hat blong yu sipos yu wantem se God i harem yu. Long 1 King japta 8, Solomon i prea wetem fulhat blong hem long fored blong ol man we oli kam wanples long Jerusalem blong openem haos blong Jehova, long yia 1026 B.K.T. Taem oli putum bokis ya we i saen blong Promes blong Hae God i go insaed long Rum ya we i Tabu we i Tabu, mo klaod i fulumap haos blong God, Solomon i presem God.
10 I gud yu stadi long prea blong Solomon mo luk olsem wanem hem i tokbaot hat blong man. Solomon i talem se Jehova nomo i save hat blong man. (1 King 8:38, 39, NW) Semfala prea ya i soem se man we i ‘tanem tingting blong hem tru’ from ol sin blong hem, i save kambak long God. Sipos ol enemi oli tekem ol man blong God oli go kalabus long narafala kantri, be hat blong olgeta i stap fulwan long Jehova, hem bambae i harem prea blong olgeta. (1 King 8:48, 58, 61, NW) From samting ya, i gud we ol prea blong yu oli kamaot long hat blong yu.
Yumi Onagud Long God Mo Leftemap Han Blong Yumi Blong Prea Long Hem
7 Nating se yumi stap prea long fored blong ol narafala no yumi nomo, yumi mas tingbaot wan impoten rul blong Baebol we i talem se yumi mas soem tingting daon taem yumi prea. (2 Kronikel 7:13, 14) King Solomon i soem tingting daon long prea we hem i mekem long fored blong ol narafala, taem oli dediketem tempol blong Jehova long Jerusalem. Solomon i jes finisim wan bilding we i naes moa i bitim ol narafala bilding long wol. Be, wetem tingting daon, hem i prea se: “Wol ya i smol tumas. ?Bambae yu save kam stap long hem olsem wanem? Heven i bigfala we i bigfala, be olgeta ples long hem oli no naf long yu. !Haos ya we mi mi wokem blong yu i smol we i smol, i no naf nating long yu!”—1 King 8:27.
8 Olsem Solomon, yumi mas gat tingting daon taem yumi stap prea long fored blong ol narafala. Yumi save soem tingting daon long voes blong yumi, be yumi mas lukaot se voes blong yumi i no soem se yumi strong long saed blong spirit. Taem yumi prea wetem tingting daon, yumi no toktok wetem voes we i bigwan tumas, blong leftemap yumi no blong soem filing bitim mak. Ol prea we man i mekem wetem tingting daon oli pulum tingting blong ol narafala i go long Man ya we yumi stap prea long hem, be i no long man we i stap mekem prea. (Matiu 6:5) Yumi save soem tingting daon tu long ol samting we yumi tokbaot long prea. Sipos yumi prea wetem tingting daon, bambae yumi no soem se yumi stap givim oda long God blong folem prapa tingting blong yumi. Be, bambae yumi askem Jehova blong wok folem tabu tingting blong hem. Man blong raetem Ol Sam i soem stret eksampol long saed ya, taem hem i prea se: “Hae God. Plis yu sevem mifala. Plis yu mekem mifala i win.”—Ol Sam 118:25; Luk 18:9-14.
Ol Gudgudfala Samting
it-1 1060 ¶4
Heven
Solomon, man ya we i bildim tempol long Jerusalem, i talem se, “heven, yes heven we i antap olgeta, hem i bigwan we i bigwan” be i no naf long God. (1Ki 8:27) From we Jehova i wokem heven, hem i hae moa long olgeta samting, mo “nem blong hem nomo i hae olgeta, man i no save kasem. Paoa blong hem olsem king i hae i bitim wol mo heven.” (Sam 148:13) Jehova i mesarem heven olsem we man i openem han blong hem blong mesarem wan samting, stat long bigfala fingga blong hem kasem smol fingga blong hem. (Aes 40:12) Toktok we Solomon i talem i no minim se God i no gat wan ples blong stap long hem. Mo i no minim se hem i stap long evri ples mo long evri samting. Blong pruvum ol tok ya, Solomon i talem tu se Jehova i ‘stap long ples blong hem,’ we hemia heven we i ples blong ol spirit man, i stap lesin i kamdaon.—1Ki 8:30, 39.