Refrens Blong Kristin Wok Mo Laef Miting Wokbuk
2-8 JENUWARE
OL SAS SAMTING LONG BAEBOL | 2 KING 22-23
“?From Wanem Yumi Mas Gat Tingting Daon?”
Jehova i Glad Long Josaea From We Hem i Gat Tingting Daon
Ol man we oli fiksimap haos blong Jehova bakegen oli wok had, stat long eli moning. I sua se Josaea i talem tangkiu long Jehova from ol wokman ya oli stap karemaot ol nogud samting we sam long ol bubu blong hem oli bin mekem long haos blong God. Taem wok i stap gohed, Safan i kam blong talem wan ripot. ?Be wanem i stap long han blong hem? !Hem i stap karem wan rol blong pepa! Hem i eksplenem se Hae Pris Hilkia i faenem “Buk blong Loa blong Hae God, we i gat Loa i stap long hem we Hae God i bin givim long Moses bifo.” (2 Kronikel 34:12-18) Hemia wan nambawan samting ya we oli faenem—!i klia se hemia prapa buk blong Loa we Moses i bin raetem!
Josaea i intres tumas blong harem olgeta tok blong buk ya. Taem Safan i stap ridim, king ya i traem luk olsem wanem ol wanwan loa oli laenap wetem hem mo olgeta man. Hem i laekem moa olsem wanem buk ya i soemaot klia trufala wosip, mo i talemaot se sipos ol man oli joen long ol giaman skul, bambae oli save kasem panis mo go kalabus long defren kantri. Naoia Josaea i terem klos blong hem from hem i luksave se ol man oli no bin folem olgeta loa blong God nating. Mo hem i givim oda long Hilkia, Safan, mo ol narafala se: ‘Yufala i go faenemaot tingting blong Hae God long mining blong ol tok we i stap long buk ya. Hae God i kros tumas long yumi, from we ol bubu blong yumi oli no bin folem ol samting we buk ya i talem se oltaem, ol man blong hem oli mas mekem.’—2 King 22:11-13; 2 Kronikel 34:19-21.
Jehova i Glad Long Josaea From We Hem i Gat Tingting Daon
Ol man blong Josaea oli go long Jerusalem blong luk woman profet ya, Hulda, mo oli karem wan ripot i kambak wetem olgeta. Hulda i talemaot tok blong Jehova, mo hem i soemaot se, ol panis we oli stap insaed long buk ya we oli jes faenem, bambae oli kasem nesen ya from we i lego trufala wosip. Be Josaea bambae i no luk panis ya, from hem i gat tingtingdaon long fored blong Jehova God. Bambae oli berem hem long pis long beregraon wetem ol bubu blong hem.—2 King 22:14-20; 2 Kronikel 34:22-28.
Ol Gudgudfala Samting
Yu Save Win Nating Se Yu Gruap Long Wanem Famle
Ol samting we oli kamaot long laef blong Josaea taem hem i pikinini, oli nogud. Nating se i olsem, hem i gohed blong mekem wanem we i gud long ae blong Jehova. Plante gudfala frut i kamaot long rul blong hem taswe Baebol i talem se: “I stat bifo olgeta, i kam kasem taem ya, i no gat wan king nating we i olsem king ya. Hem i stap ona long Hae God long olgeta tingting blong hem, mo long olgeta paoa blong hem, mo long olgeta laef blong hem, mo i stap obei long olgeta loa we Hae God i givim long Moses. Mo biaen long hem tu, i no gat wan king olsem hem bakegen, kam kasem tede.”—2 King 23:19-25.
!Hemia i wan nambawan eksampol we Josaea i soem long olgeta we oli gotru long wan nogud laef taem oli pikinini yet! ?Yumi save lanem wanem long eksampol ya? ?Wanem i givhan long Josaea blong jusum mo folem stret rod?
9-15 JENUWARE
OL SAS SAMTING LONG BAEBOL | 2 KING 24-25
“Holemtaet Tingting Ya Se Taem i Sot”
!Dei Blong Jehova Blong Jajem Ol Man i Klosap!
2 Ol profet tok blong Sefanaea oli mekem tingting blong yangfala Josaea i strong moa blong finisim wosip blong ol aedol long Juda. Be wok we king i mekem blong finisim giaman wosip i no karemaot olgeta rabis fasin we ol man oli stap mekem. Mo i no stretem ol sin blong bubu blong hem, King Manase, we i “kilim plante man oli ded we oli no mekem samting we i rong . . . long Jerusalem.” (2 King 24:3, 4; 2 Kronikel 34:3) Taswe i sua se long taem ya dei blong Jehova bambae i mas kam blong jajem ol man ya.
Ol Bigfala Poen Long Buk Blong Jeremaea
Hemia yia 607 B.K.T. Jedekia i stap king blong 11 yia nao. King Nebukadnesa blong Babilon i raonem Jerusalem blong bitim 18 manis finis. Long namba naentin yia blong rul blong Nebukadnesa, long namba faef manis mo long namba seven dei blong manis ya, Nebusaradan we i komanda blong ol soldia blong king ‘i kam’ long Jerusalem. (2 King 25:8) Ating taem hem i stap long kamp blong olgeta afsaed long stonwol blong Jerusalem, Nebusaradan i luklukgud olsem wanem blong go insaed long taon. Hem i mekemgud ol plan blong olgeta. Tri dei biaen, long namba ten dei blong manis ya, hem i ‘kam insaed’ long Jerusalem. Mo “oli brekem bigfala stonwol blong taon ya.”—Jeremaea 52:12, 13.
Ol Gudgudfala Samting
Ol Bigfala Poen Long Buk Blong Seken King
24:3, 4. Jehova “i no save fogivim” ol man Juda from we Manase i kilim plante man oli ded. Jehova i luk blad blong ol gudfala man se i tabu. Yumi save sua se Jehova bambae i panisim ol man we oli kilim i ded ol gudfala man. Bambae hem i mekem olsem taem hem i spolem olgeta rabis man.—Ol Sam 37:9-11; 145:20.
16-22 JENUWARE
OL SAS SAMTING LONG BAEBOL | 1 KRONIKEL 1-3
“Baebol—Wan Buk Blong Trutok, Be i No Ol Kastom Stori”
?Adam Mo Iv i Trufala Man?
Tingbaot ol lis blong laen blong ol man Jiu, we oli stap long Fas Kronikel japta 1 kasem 9 mo long Gospel blong Luk japta 3. Faswan lis ya i blong 48 jeneresen mo sekenwan blong 75 jeneresen. Luk i raetemdaon laen we Jisas Kraes i kamaot long hem, mo long Kronikel i gat laen blong ol king mo pris long nesen blong Isrel. Long tufala lis ya, i gat nem blong ol impoten man olsem Solomon, Deved, Jekob, Aesak, Ebraham, Noa, mo Adam. Olgeta nem long tufala lis ya, oli ol trufala man, mo Adam i faswan long ol nem ya we hem tu i trufala man.
Noa Mo Bigfala Wota We i Ron—Hem i Wan Tru Stori, i No Wan Kastom Stori
Long tu ples we Baebol i talemaot laen blong ol man, nem blong Noa i stap. Samting ya i soemaot se Noa i wan trufala man. (1 Kronikel 1:4; Luk 3:36) Esra mo Luk nao i raetemdaon tufala laen ya. Tufala i bin traehad blong faenemaot plante save long saed ya. Luk i talemaot ol man long laen blong Jisas Kraes i gobak kasem Noa.
?Adam Mo Iv i Trufala Man?
Tingbaot wan tijing blong Baebol we plante man we oli strong long skul blong olgeta oli tinghae long hem, hemia ransom. Tijing ya se Jisas Kraes i givim laef blong hem we i stret gud olgeta olsem wan ransom blong sevem ol sinman. (Matiu 20:28; Jon 3:16) Ransom hemia wan samting we man i givim blong pemaot samting we i lus, mo i stret long praes blong samting ya we i lus. Taswe Baebol i talem se Jisas i “wan ransom we i stret gud.” (1 Timoti 2:6) ?Maet yumi askem se i stret gud long wanem? Baebol i ansa se: “Olgeta man we oli joen long Adam oli ded. Long sem fasin, olgeta man we oli joen long Kraes bambae oli laef bakegen.” (1 Korin 15:22) Laef we Jisas i givim olsem sakrefaes blong pemaot ol man we oli obei, i sem mak long laef blong Adam we i lus from sin we hem i mekem long Iden. (Rom 5:12) I klia se sipos Adam i no wan trufala man, ransom sakrefaes blong Kraes i no gat paoa nating.
Ol Gudgudfala Samting
it-1 911 ¶3-4
Laen
Nem Blong Ol Woman. Sam samtaem nomo, oli putum nem blong ol woman long lis blong ol laen, hemia ol impoten woman long histri. Jenesis 11:29, 30 i tokbaot Sarae (Sera), mo i klia se oli mekem olsem from we spesel Pikinini we God i promes blong sanem, bambae i kamaot long laen blong Sera, be i no kamaot long narafala waef blong Ebraham. Nem blong Milka i stap long japta ya tu, maet from we hem i bubu blong Rebeka, we i waef blong Aesak. Ale Rebeka i kamaot long famle blong Ebraham, from we Aesak i no mas tekem wan woman blong narafala nesen. (Je 22:20-23; 24:2-4) Jenesis 25:1 i tokbaot waef we Ebraham i tekem biaen, nem blong hem Ketura. Hemia i soemaot se afta we Sera i ded, Ebraham i mared bakegen, mo 40 yia afta we Jehova i givimbak paoa long hem blong mekem pikinini, hem i gat pikinini bakegen. (Ro 4:19; Je 24:67; 25:20) Mo tu, hemia i soemaot olsem wanem Midian mo sam narafala laen blong Arebia oli famle wetem Isrel.
Nem blong Lea, Rejel, sam narafala woman blong Jekob, wetem ol pikinini boe blong olgeta, oli stap tu. (Je 35:21-26) Hemia i givhan long yumi blong kasemsave ol samting we God i mekem long ol boe ya. Hemia sem risen from wanem yumi faenem nem blong sam narafala woman long lis blong ol laen. Taem pikinini i kasem graon tru long mama blong hem, nem blong woman ya i stap. (Na 26:33) I tru, Tamara, Rehab, mo Rut, trifala i spesel. Long saed blong ol woman ya, i gat wan spesel risen from wanem oli stap long laen blong Mesaea, Jisas Kraes. (Je 38; Ru 1:3-5; 4:13-15; Mt 1:1-5) I gat sam woman tu long lis blong ol nem long 1 Kronikel 2:35, 48, 49; 3:1-3, 5.
23-29 JENUWARE
OL SAS SAMTING LONG BAEBOL | 1 KRONIKEL 4-6
“?Ol Prea Blong Mi Oli Soemaot Wanem?”
“Man Blong Harem Ol Prea”
Jabes i wan man we i prea oltaem. Long stat blong prea blong hem, hem i plis long God blong i blesem hem. Afta, hem i askem tri samting we i soemaot se hem i gat bigfala bilif.
Fastaem, Jabes i askem se: “Yu givim bigfala graon long mi.” (Vas 10) Hem i no wan man we i griri mo i wantem samting blong narafala man. Be maet hem i askem samting ya blong i save gat moa graon, we plante moa man blong wosipim trufala God oli save stap long hem.
Nambatu samting we Jabes i askem, hemia se “han” blong God i stap wetem hem. Han blong God i wan pijatok we i minim paoa we hem i yusum blong halpem ol man blong hem. (1 Kronikel 29:12) Blong kasem samting we hem i wantem, Jabes i stap lukluk i go long God, we han blong hem i no sot blong givim samting we ol man blong bilif oli wantem.—Aesea 59:1.
Nambatri samting we Jabes i askem se: “Protektem mi long ol trabol.” Tok ya “blong oli no spolem mi” i save soemaot se Jabes i no prea blong ronwe long trabol, be blong hem i no harem nogud tumas long ol nogud samting we i hapen.
Prea blong Jabes i soemaot se hem i tingbaot tru wosip, mo i soemaot tu se hem i gat bilif mo i trastem Man blong harem ol prea. ?Olsem wanem? ?Jehova i ansa long ol prea ya? Ol las tok long stori ya, i soemaot se God i mekem samting we Jabes i askem.
Ol Gudgudfala Samting
Ol Bigfala Poen Long Buk Blong Fas Kronikel
5:10, 18-22. Taem King Sol i rul, ol laen blong Isrel we oli stap long is saed blong Jodan Reva oli winim ol Hegaraet long faet, nating se namba blong ol Hegaraet i bigwan moa. Oli save winim laen ya from we ol soldia blong Isrel oli trastem Jehova mo oli prea long hem blong i givhan long olgeta. I gud yumi trastem Jehova fulwan taem yumi stap mekem faet ya long saed blong spirit agensem ol enemi blong yumi we oli plante i bitim yumi.—Efesas 6:10-17.
30 JENUWARE–5 FEBRUARI
OL SAS SAMTING LONG BAEBOL | 1 KRONIKEL 7-9
“Jehova i Save Halpem Yu Blong Mekem Ol Wok We Oli Had”
Ol Bigfala Poen Long Buk Blong Fas Kronikel
9:26, 27. Wok ya we ol Livaet oli mekem blong gad long ol doa i wan impoten wok. Oli holem ol ki blong ol doa blong ol rum we oli tabu insaed long tempol. Oli mas ol man we ol narafala oli save trastem olgeta evri dei blong oli openem ol doa. Jehova i givim wan wok long yumi, hemia blong go luk ol man long ol teritori blong yumi mo halpem olgeta blong oli kam mekem wosip long Jehova. Yumi mas ol man we ol narafala oli save trastem yumi olsem ol Livaet ya we oli stap gad long ol doa.
w11 9/15 32 ¶7
Taem Yu Kasem Wan Wok We i Had, ?Yu Save Folem Fasin Blong Finehas?
Finehas i mekem bigfala wok long Isrel bifo. Be from we hem i no fraet, i gat fasin luksave, mo i dipen long God, hem i naf blong mekem ol wok ya. Mo Jehova i glad long fasin blong Finehas blong lukaot gud long kongregesen blong God. Samwe long 1,000 yia biaen, tabu spirit i pulum Esra blong raetem se: “Long taem ya bifo olgeta, Finehas, we papa blong hem Eleasara, hem i lida blong olgeta, mo Hae God i stap wetem hem.” (1 Kron. 9:20) I gud sipos samting ya i tru long olgeta man we oli lidim ol man blong God tede, mo long olgeta Kristin we oli holemstrong long hem.
Ol Gudgudfala Samting
!Yumi Singsing Blong Presem Jehova!
6 Yes, Jehova i talem long ol profet blong hem blong oli talem long ol man we oli wosipim hem, se oli mas singsing blong presem hem. Ol man blong singsing long laen blong ol pris oli no save mekem ol narafala wok, from we oli mas wokem ol singsing mo ating lanem olgeta tu.—1 Kron. 9:33.
6-12 FEBRUARI
OL SAS SAMTING LONG BAEBOL | 1 KRONIKEL 10-12
“Wokem Tingting Ya Blong Wantem Tumas Blong Mekem Wil Blong God”
“Plis Yu Tijim Mi Blong Mi Mekem Ol Samting We Yu Yu Wantem”
12 I gat wan moa samting we Deved i tijim yumi long hem. Hem i kasem save long ol tingting blong God we oli stap insaed long Loa, nao hem i letem ol tingting ya oli lidim hem taem hem i mekem desisen, mo long ol narafala samting long laef blong hem. Plante taem wan loa blong Jehova i save givhan long yumi blong yumi kasem save long tingting blong hem. Samting ya i hapen long Deved. Wan dei, Deved i talem se hem i wantem ‘dring wota we i kamaot long wel ya long doa blong stonwol blong taon ya’ Betlehem. Be ol man Filistia we oli enemi blong Isrel, oli holem taon ya i blong olgeta. Ale, trifala man blong Deved i go blong karem wota ya. Trifala i save lusum laef blong trifala. Taem trifala i karem wota i kam, Deved i no wantem dring. Hem i kafsaedem wota ya, “i givim i go long Hae God.” ?From wanem? Deved i talem se: “Mi no save dring wota ya. Sipos mi dring, bambae i olsem we mi dring blad blong trifala ya we i letem laef blong trifala blong go tekem i kam.”—1 Kron. 11:15-19.
13 Deved i save Loa ya se man i no mas kakae blad, be i mas kafsaedem i go long graon nomo. Hem i kasem save tu from wanem Loa i talem olsem. Hem i save se, “olgeta samting we i gat laef, be laef blong olgeta i stap long blad blong olgeta.” Be ol man blong Deved oli karem wota nomo i kam long hem, oli no karem blad. Taswe, ?Deved i no wantem dring wota ya from wanem? From we loa ya long blad i givhan long hem blong i luksave tingting blong Jehova. Hem i luksave se long tingting blong Jehova, blad i tabu. Trifala man blong hem i save ded taem trifala i go karem wota ya. Taswe Deved i no save dring. Hem i harem se sipos hem i dring, bambae hem i no gat respek long blad blong trifala, we i tabu. Ale hem i mekem desisen blong kafsaedem i go long graon.—Lev. 17:11; Dut. 12:23, 24.
Trenem Tingting Folem Ol Loa Mo Ol Stamba Trutok Blong Baebol
5 Sipos yumi wantem se ol loa blong God oli halpem yumi, i no naf blong ridim Baebol mo save ol loa ya nomo. Yumi mas lavem mo respektem olgeta tu. Baebol i talem se: “Fasin we i no stret, yufala i mas tanem baksaed long hem, be fasin we i stret, yufala i mas glad long hem.” (Amos 5:15) ?Be olsem wanem blong mekem? Yumi mas traehad blong gat tingting blong Jehova long evri samting. Traem tingbaot se, yu no stap slipgud, nao dokta i talem se yu mas kakae gud, mekem eksasaes, mo mekem sam jenis long laef blong yu. !Yu folem advaes blong hem, mo yu luk se i wok gud! Ating bambae yu glad tumas long advaes ya.
6 Long sem fasin, God i stanemap ol loa blong mekem laef blong yumi i kam gud moa, from we oli protektem yumi long ol rabis frut blong sin. Traem tingbaot: Baebol i talem se yumi no mas giaman, stil, mekem rabis fasin blong seks, faet, o mekem wok blong rabis spirit. (Ridim Ol Proveb 6:16-19; Revelesen 21:8) Sipos yumi obei mo yumi luk gudfala frut we i kamaot, bambae yumi lavem moa Jehova mo ol loa blong hem.
Ol Gudgudfala Samting
it-1 1058 ¶5-6
Hat
Mekem Wok Blong God Wetem “Fulhat Blong Yu.” Prapa hat blong yumi i mas fulwan blong i save wok gud, be hat we yumi stap tokbaot naoia i save hafhaf. Deved i prea se: “Yu mekem hat blong mi i kam wan nomo blong mi fraet long nem blong yu.” Hemia i soemaot se hat blong yumi i save hafhaf long saed blong ol samting we yumi laekem mo yumi fraet long hem. (Sam 86:11) Ol man olsem, “hat blong olgeta i no fulwan” blong wosipim God. (Sam 119:113; Re 3:16) Mo tu, wan man i save gat “tu hat,” i min se hem i traem mekem wok blong tu masta wantaem, o ol toktok blong hem i defren long tingting blong hem. (Sam 12:2, fut.; 1Kr 12:33) Jisas i tok strong agensem olgeta we oli gat tu tingting.—Mt 15:7, 8.
Man we i wantem mekem God i glad, hat blong hem i no mas hafhaf o i no mas gat tu hat, be hem i mas mekem wok blong God we hat blong hem i fulwan. (1Kr 28:9) Hemia i no isi from we hat i denja bitim mak mo i wantem mekem samting we i nogud. (Jer 17:9, 10; Je 8:21) Blong mekem se hat blong yumi i fulwan, yumi mas prea wetem fulhat blong yumi (Sam 119:145; Kra 3:41), stadi Baebol oltaem (Esr 7:10; Pro 15:28), joen oltaem long wok blong prij (skelem wetem Jer 20:9), mo joen wetem ol narafala we hat blong olgeta i fulwan long wok blong Jehova.—Skelem wetem 2Ki 10:15, 16.
13-19 FEBRUARI
OL SAS SAMTING LONG BAEBOL | 1 KRONIKEL 13-16
“Taem Yu Folem Rod We Jehova i Wantem, Yu Save Win”
?Yu Yu Stap Askem Se, “?Wehem Jehova?”?
12 King Deved i wantem karem Bokis we i saen blong promes blong God i go long Jerusalem. Bokis ya i bin kambak long Isrel bakegen, i bin stap plante yia long taon ya Kiriatsearim. Ale, Deved i miting wetem ol jif, mo i talem se ‘sipos Jehova i wantem, mo sipos ol man tu oli glad,’ bambae oli karem Bokis ya i go long Jerusalem. Be hem i no traehad blong faenemaot wanem we Jehova i wantem long saed ya. Sipos hem i bin faenemaot, oli no save karem Bokis ya long wan kat. God i bin talem klia se, ol Livaet long laen blong Kohat nomo oli mas karem Bokis ya long solda blong olgeta. Nating se oltaem Deved i stap prea long Jehova blong faenemaot rod blong Hem long plante samting, be long taem ya, hem i no faenemaot tingting blong Jehova stret. Ale, nogud frut i kamaot. Biaen, Deved i talem se: “God blong mifala, Jehova, i panisim mifala, from we mifala i no traehad blong faenemaot fasin we hem i bin talem long yumi blong folem oltaem.”—1 Kronikel 13:1-3; 15:11-13; Namba 4:4-6, 15; 7:1-9.
?Yu Yu Stap Askem Se, “?Wehem Jehova?”?
13 Biaen, ol Livaet oli tekemaot Bokis ya long haos blong Obededom, mo oli karem i go long Jerusalem. Nao oli singim wan singsing we Deved i bin wokem. Wan haf blong singsing ya i olsem wan woning we i kamaot stret long hat blong Deved, i se: “Yumi mas luk long Hae God blong hem i givhan long yumi, mo oltaem, yumi mas mekem wosip long hem. . . . Oltaem yumi mas tingbaot ol merikel we Hae God i mekem, mo ol rul blong hem we hem i givim blong jajem man.”—1 Kronikel 16:11, 12.
Ol Gudgudfala Samting
Yumi Wosipim Jehova, King Ya We i Rul Blong Olwe
14 Deved i karem tabu bokis blong kontrak i go long Jerusalem. Long taem ya, ol man Isrel oli glad tumas, mo ol Livaet oli singsing blong presem Jehova. Oli talem impoten toktok ya long 1 Kronikel 16:31 (NW) we i talem se: “Yufala i talemaot long ol man blong ol narafala kantri se, ‘!Jehova i kam King!’” ?Be olsem wanem Jehova we i King blong olwe finis, i kam King long taem ya? Jehova i kam King, taem hem i yusum paoa blong hem, no i jusum wan man blong i rul long nem blong hem. I impoten tumas blong kasem mining blong tok ya. Bifo we Deved i ded, Jehova i promes long hem se rul blong hem bambae i stap blong olwe. Hem i talem se: “Bambae mi mekem wan long ol pikinini blong yu i kam king, mo bambae mi stap lukaot gud long kingdom blong hem blong i stanap strong oltaem.” (2 Saml. 7:12, 13) Promes ya i kamtru bitim 1,000 yia biaen, taem “pikinini” ya we i kamaot biaen long Deved, i kamtru. ?Pikinini ya hem i hu, mo hem i kam King wetaem?
20-26 FEBRUARI
OL SAS SAMTING LONG BAEBOL | 1 KRONIKEL 17-19
“Stap Glad, Nating Se Yu Fesem Hadtaem”
Putum Tingting Blong Yu i Stap Long Ol Gudfala Samting We Oganaesesen Blong Jehova i Givim
DEVED i wan man Isrel we Hibru haf blong Baebol i tokbaot hem plante. Hem i wan man blong lukaot long sipsip, man blong plei miusik, hem i wan profet mo wan king. Deved i trastem Jehova God fulwan mo i frengud wetem Jehova. Samting ya i pulum hem blong wantem bildim wan haos blong God no wan tempol. Bambae haos ya i stap olsem stamba ples we ol man Isrel oli save go long hem blong mekem tru wosip. Deved i save se olgeta plan we oli stanemap long saed blong tempol ya mo ol wok insaed long hem bambae i givim glad mo blesing long ol man blong God. Taswe Deved i singsing se: “Olgeta man we yu stap jusumaot olgeta, mo yu stap tekem olgeta oli kam long tabu ples blong yu, oli save harem gud. Bambae mifala i harem gud long ol gudgudfala samting ya blong haos blong yu, bambae mifala i stap klosap nomo long yu long tabu haos ya blong yu.”—Ol Sam 65:4.
Kasem Glad Long Privilej We Yu Gat
11 Long sem fasin, yumi save kasem moa glad taem yumi wok had long eni wok we oli givim long yumi long wok blong Jehova. I gud yumi “prij oltaem” mo yumi joen fulwan long ol wok insaed long kongregesen. (Wok 18:5; Hib. 10:24, 25) Rerem gud ol miting blong yu, blong yu save givim ol gudfala ansa we i leftemap tingting blong narafala. Tinghevi long ol tok we yu kasem, blong mekem long ol miting. Sipos oli askem yu blong mekem wan wok long kongregesen, i gud yu mekem long stret taem mo long fasin we i stret. Yu no mas ting se wok we yu kasem i no impoten, nao yu no mekem gud wok ya. Traehad blong kam gud moa long wok we yu mekem. (Prov. 22:29) Sipos yu wok had long ol samting long saed blong spirit mo long ol wok we yu mas mekem, bambae yu fren gud wetem Jehova mo bambae yu glad moa. (Gal. 6:4) Mo tu bambae i isi blong glad wetem olgeta we oli kasem wan privilej we yu wantem tumas blong kasem.—Rom 12:15; Gal. 5:26.
Ol Gudgudfala Samting
w20.02 12, bokis
Yumi Lavem Tumas Papa Blong Yumi, Jehova
?Jehova i Stap Luk Mi?
Maet yu gat tingting se: ‘I gat plante bilian man long wol, taswe ating Jehova i no stap luk mi.’ I no yu nomo we i tingting olsem. King Deved i raetem se: “Hae God. Mi luk man se hem i samting nating nomo. I no stret blong yu lukluk long hem. I no stret nating blong yu tingbaot hem.” (Sam 144:3) Deved i gat strong tingting se Jehova i save gud hem. (1 Kron. 17:16-18) Mo Jehova i yusum Baebol mo oganaesesen blong hem, blong talem long yu tu se hem i luk bigfala lav we yu soemaot long hem. Tingbaot samting we Baebol i talem:
• Jehova i luk yu bifo we yu bon.—Sam 139:16.
• Jehova i save evri samting we i stap long hat mo tingting blong yu.—1 Kron. 28:9.
• Jehova i lesin long evri prea blong yu.—Sam 65:2.
• Ol aksen blong yu oli save mekem Jehova i glad.—Prov. 27:11.
• Jehova i pulum yu kam long hem.—Jon 6:44.
• Sipos yu ded, Jehova i save mekem yu laef bakegen, from we hem i save gud yu. Bambae hem i wokem wan niufala bodi mo tingting we i klosap sem mak long hemia we yu gat naoia. Bambae yu gat ol semfala fasin mo memori.—Jon 11:21-26, 39-44; Wok 24:15.
27 FEBRUARI–5 MAJ
OL SAS SAMTING LONG BAEBOL | 1 KRONIKEL 20-22
“Halpem Ol Yangfala Blong Oli Mekem Gudfala Wok”
‘Putum Ol Tok Ya Long Han Blong Ol Man We Yu Trastem’
8 Ridim 1 Kronikel 22:5. Maet Deved i gat tingting ya se Solomon i no naf blong lidim wan bigfala wok olsem. Haos tempol ya i mas “wan nambawan haos,” mo Solomon i “wan yang man nomo, mo i no mekem wan bigfala wok olsem yet.” Be Deved i save se Jehova bambae i givhan long Solomon blong mekem spesel wok ya. Ale Deved i mekem evri samting we hem i naf blong mekem, blong Solomon i rere from bigfala wok ya.
‘Putum Ol Tok Ya Long Han Blong Ol Man We Yu Trastem’
7 Maet Deved i harem nogud from we hem i wantem tumas blong wokem wan haos tempol blong Jehova. Be nating se i olsem, hem i sapotem wok ya we Solomon bambae i lidim. Hem i jusum ol man we bambae oli mekem ol defdefren wok, mo hem i hivimap aean, kopa, silva, gol, mo wud we bambae oli yusum blong wokem haos tempol ya. Hem i no wari sipos ol man bambae oli talem se Solomon nao i wokem haos tempol ya, mo i tru, sam yia biaen oli kolem haos ya se tempol blong Solomon. Be hem i leftemap tingting blong Solomon, se: “Pikinini blong mi, prea blong mi we Hae God ya bambae i stap wetem yu, mo bambae i givhan long yu blong yu save wokem haos ya blong hem, olsem we hem i promes.”—1 Kron. 22:11, 14-16.
Papa Mo Mama, Givhan Long Pikinini Blong i Save Baptaes
14 Ol elda tu oli save givhan long ol papa mo mama, taem oli leftemap tingting blong pikinini blong i kasem sam mak long wok blong Jehova. Wan sista i tingbaot taem ya we hem i gat sikis yia nomo, nao Brata Russell i toktok wetem hem, i se: “Mitufala i storian blong 15 minit, long ol mak we mi save kasem long wok blong Jehova.” ?Wanem frut i kamaot? !Sista ya i kam wan paenia, mo hem i mekem wok ya blong bitim 70 yia! Tru ya, ol gudfala toktok oli save gat paoa long ful laef blong yumi. (Ol Proveb 25:11) Ol elda oli save askem tu long ol papa mo mama mo pikinini, blong oli givhan long ol wok long Haos Kingdom. Mo oli save askem long pikinini blong i mekem sam wok we i stret long yia mo save blong hem.
15 ?Olsem wanem ol narafala long kongregesen oli save givhan? Oli save soemaot intres long pikinini. I gud oli traem luksave sam samting we pikinini i stap mekem blong kam klosap long Jehova. Maet hem i givim wan gudfala ansa o mekem wan pleplei long miting. Maet hem i prij long skul, o i stanap strong taem wan samting i traem hem. !Sipos i olsem, i gud yu talem ol gudfala toktok long hem! Yu save traehad blong storian long ol pikinini bifo mo afta long miting. Taem yu mekem olsem, oli glad mo oli harem se oli joen long “bigfala kongregesen.”—Ol Sam 35:18, NW.
Ol Gudgudfala Samting
Ol Bigfala Poen Long Buk Blong Fas Kronikel
21:13-15. Jehova i stopem enjel blong i no moa gohed blong spolem ol man long Jerusalem from we Jehova i gat filing long ol man blong hem we oli stap safa. Yes, ‘Jehova i gat sore.’