Afta we Adam mo Iv i aot long garen blong Iden, tufala i gat plante pikinini. Fas boe blong tufala, Ken, i kam man blong wokem garen, mo seken boe, Ebel, i man blong lukaot long sipsip.

Wan dei, Ken mo Ebel tufala i givim presen i go long Jehova. Jehova i glad long presen we Ebel i givim, be i no glad long presen we Ken i givim. Samting ya i mekem se Ken i kros tumas. Jehova i givim woning long Ken, se kros i save lidim hem blong i mekem wan nogud samting. Be Ken i no wantem lesin.

Nao Ken i girap, i talem long Ebel se: “Yu kam yumitu go long garen.” Taem tufala nomo i stap long garen, Ken i kilim brata blong hem i ded. ?Jehova i mekem wanem? Hem i panisim Ken, i sanem hem i go longwe long famle blong hem. Ken i no moa save kambak.

?Yumi lanem wanem? Maet yumi kam kros sipos ol samting oli no hapen olsem we yumi wantem. Be sipos yumi harem se yumi stap kam kros tumas, no sipos narafala i givim woning long yumi from, yumi mas stopem fasin ya kwiktaem. Yumi no mas letem kros i lidim yumi.

From we Ebel i lavem Jehova mo i mekem i stret, Jehova i neva fogetem hem. Bambae hem i mekem Ebel i laef bakegen taem hem i mekem wol i kam paradaes.

Sloslo, i gat plante man long wol. Bighaf blong olgeta oli nogud. Mo sam enjel long heven tu oli kam nogud. Oli aot long ples blong olgeta mo oli kamdaon long wol. ?Yu save from wanem oli mekem olsem? Oli wantem tekem bodi olsem ol man, blong oli save mared long ol woman.

Ol enjel ya oli gat pikinini wetem ol woman long wol. Ol pikinini ya oli gruap oli kam ol bigbigfala man. Oli raf mo oli kilim ol man. Jehova i no save letem nogud fasin ya i gohed. Ale hem i tingbaot blong mekem bigfala ren i foldaon blong spolem ol rabis man ya.

Be i gat wan man we fasin blong hem i gud mo i lavem Jehova, nem blong hem Noa. Hem i gat woman blong hem mo tri pikinini boe, Sem, Ham, mo Jafet, mo trifala boe ya tu oli gat woman blong olgeta. Jehova i talem long Noa se hem i mas bildim wan bigfala sip, blong hem mo famle blong hem oli save go insaed long hem taem bigfala wota i ron. Sip ya i olsem wan bigfala bokis we i save flot. Jehova i talem se Noa i mas tekem ol anamol oli go insaed long sip, blong olgeta tu oli save laef.

Kwiktaem nomo, Noa i stat blong wokem sip ya. Hem mo famle blong hem oli tekem samwe long 50 yia blong bildim. Oli bildim i stret olsem Jehova i talem. Long sem taem ya, Noa i givim woning long ol man se bigfala wota bambae i ron. Be i no gat wan man i lesin.

Stret taem i kam blong go insaed long sip. Long nekis stori, bambae yumi luk wanem i hapen.