Taoa Blong Babel

Afta we Bigfala Wota i ron, ol pikinini blong Noa oli gat plante pikinini bakegen. Ol famle blong olgeta oli kam plante we i plante, nao oli go stap long olgeta ples blong wol, olsem we Jehova i talem fastaem.

Be sam long olgeta oli no obei long Jehova. Oli talem se: ‘Yumi wokem wan bigfala taon mo yumi go stap long hem. Mo yumi mekem wan taoa we i hae we i hae, i go kasem heven. Nao bambae yumi leftemap nem blong yumi.’

Jehova i no glad long samting ya, ale hem i stopem wok ya. ?Olsem wanem hem i mekem samting ya? Hem i mekem se, wantaem nomo, ol man oli stat toktok defdefren lanwis. Oli no moa kasem save long olgeta, nao wok i stop. Nem blong taon ya we oli stat blong wokem, hemia Babel o Babilon, we i min se “Paspas.” Ol man oli seseraot, mo oli go stap long ol defdefren ples long wol. Be oli gohed nomo blong mekem ol nogud samting. ?Olsem wanem? ?I gat sam man we oli lavem Jehova? Bambae yumi luk long nekis stori.