Long draetaem, Jehova i talem long Elaejah se: ‘Yu girap, yu go long taon ya Jarefat. Wan wido long ples ya bae i givim kakae long yu.’ Taem Elaejah i kam klosap long get blong taon ya, hem i luk wan wido we i stap pikimap faeawud. Hem i askem long woman ya blong i givim smol wota long hem. Taem hem i go blong karem wota, Elaejah i singaot long hem se: ‘Plis, yu karem smol bred tu i kam.’ Be wido ya i talem se: ‘Mi no gat bred blong givim long yu. Mi mi gat smol flaoa mo oel nomo blong wokem wan smol bred blong mi mo boe blong mi.’ Elaejah i talem long hem se: ‘Jehova i promes se sipos yu wokem wan bred blong mi, flaoa mo oel blong yu bae i stap kasem en blong draetaem, bae i no save finis.’

Ale, wido ya i go long haos blong hem mo i wokem wan bred blong profet blong Jehova. Stret olsem Jehova i promes, hem mo boe blong hem tufala i gat naf kakae go kasem we ren i kam. Flaoa mo oel blong hem i no finis.

Biaen, wan samting we i nogud tumas i hapen. Smol boe blong wido ya i sik mo i ded. Wido ya i krae long Elaejah blong i givhan long hem. Elaejah i tekemaot boe ya long han blong mama blong hem, i karem hem i go long wan rum antap long ruf blong haos. Hem i putum boe ya long bed, nao i prea se: ‘Jehova, plis yu mekem pikinini ya i laef bakegen.’ ?Yu save from wanem samting ya we Elaejah i askem, i narakaen? From we, bifo long taem ya i no gat wan man we i laef bakegen. Mo tu, wido ya mo boe blong hem, tufala i no man Isrel.

!Boe ya i stat blong pulum win, nao i laef bakegen! Elaejah i talem long wido ya se: ‘!Yu luk! Boe blong yu i laef bakegen.’ Woman ya i glad we i glad, mo i talem long Elaejah se: ‘Naoia mi save se yu rili wan man blong God. Yu yu stap talemaot ol tok ya nomo we Jehova i givim long yu.’

Taem King Ehab i stanap long windo blong haos blong hem long Jisrehel, hem i save luk plantesen blong grep blong wan man, nem blong hem Nabot. Ehab i wantem plantesen ya, ale hem i talem long Nabot se bambae hem i pemaot. Be Nabot i no wantem salem, from we Loa blong Jehova i talem se pikinini i no mas salem graon we papa blong hem i givim long hem. ?Olsem wanem? ?Ehab i respektem Nabot from we i mekem samting we i stret? Nogat. Ehab i kros tumas. Hem i harem nogud, ale i go long rum blong hem mo i no wantem kakae.

Kwin Jesebel, woman blong Ehab, i wan rabis woman. Hem i girap i talem long Ehab se: ‘!Yu yu king blong Isrel! !Yu save kasem eni samting we yu wantem! !Mi bae mi givim plantesen ya long yu!’ Nao Jesebel i raetem leta i go long ol lida blong taon ya, i giaman se Nabot i tok nogud long God, mo i talem se oli mas stonem hem i ded. Ol lida ya oli mekem samting we hem i talem, nao Jesebel i talem long Ehab se: ‘Nabot i ded finis. !Yu go tekem plantesen ya!’

I no Nabot nomo we Jesebel i kilim i ded. Hem i kilim plante narafala man tu we oli lavem Jehova. Hem i wosipim ol aedol mo i mekem plante narafala nogud fasin. Jehova i luk ol rabis samting we hem i mekem. ?Hem i mekem wanem long Jesebel?

Afta we Ehab i ded, i no longtaem pikinini blong hem Jehoram i kam king. Nao Jehova i sanem wan man, nem blong hem Jehu, blong i panisim Jesebel mo famle blong hem.

Jehu i jam long kat blong hem i go long Jisrehel, ples ya we Jesebel i stap long hem. Nao Jehoram i kam long kat blong hem blong mitim Jehu, mo i askem long hem se: ‘?Yu kam long pis o olsem wanem?’ Jehu i talem se: ‘?Olsem wanem i save gat pis? !Mama blong yu, Jesebel, i stap mekem ol rabis fasin yet!’ Jehoram i traem blong tanem kat blong hem blong ronwe. Be Jehu i tekem bonara blong hem, i pulum strong, mo i lego wan ara we i kasem gud Jehoram, ale Jehoram i ded.

Nao Jehu i go long haos blong Jesebel. Taem Jesebel i harem nius se hem i stap kam, hem i girap, i pentem ae blong hem mo i flasem gud hea blong hem, nao i stanap long windo blong wan rum antap long haos blong hem, i stap lukluk i godaon. Taem Jehu i kamtru, Jesebel i sakem ol rabis tok long hem. Nao Jehu i singaot ol man blong wok we oli stanap klosap long Jesebel, i se: ‘!Sakem woman ya i kamdaon!’ Nao oli sakem hem i godaon long graon, mo i ded.

Afta, Jehu i kilim 70 boe blong Ehab i ded. Hemia i finisim wosip blong Bal long kantri ya. ?Yu kasem save se Jehova i save evri samting, mo long stret taem, bambae hem i panisim ol man we oli mekem ol nogud fasin?