Wan naet, King Nebukadnesa i luk wan drim we i narakaen. Hem i wari tumas, nao i no save slip. Ale, hem i singaot ol man blong mekem majik, mo i talem se: ‘Yufala i traem talemaot mining blong drim blong mi.’ Oli talem se: ‘Ale, king, yu talemaot drim blong yu long mifala.’ Be Nebukadnesa i talem se: ‘!Nogat! Yufala nao i mas talemaot drim blong mi, sipos no, bae mi kilim yufala i ded.’ Oli talem bakegen se: ‘King. Sipos yu talemaot drim ya long mifala, bae mifala i talemaot mining blong hem.’ Be king i talem se: ‘!Yufala i wantem trikim mi! !Yufala i talemaot drim blong mi!’ Nao oli talem long king se: ‘I no gat wan man long wol we i save talemaot. Samting ya we yu askem, i had tumas.’

Nebukadnesa i kros we i kros, nao i talem se ol waes man oli mas ded. Hemia i min se Daniel, Sadrak, Mesak, mo Abednego tu, bambae oli ded. Ale, Daniel i askem long king blong i givim smol taem long hem. Nao hem mo trifala fren blong hem oli prea long Jehova blong i givhan long olgeta. ?Jehova i mekem wanem?

Jehova i mekem Daniel i luk wan vison, we i soemaot drim blong Nebukadnesa mo mining blong hem. Long nekis dei, Daniel i go luk wan man blong king, mo i talem se: ‘Yu no kilim ol waes man i ded. Mi mi save eksplenem drim blong king.’ Ale, man ya i tekem Daniel i go luk King Nebukadnesa. Daniel i talem long king se: ‘God i soemaot long yu samting we bae i hapen long fiuja. Hemia drim blong yu: Yu luk wan bigfala statiu i stanap long fes blong yu. Hed blong hem oli wokem long gol, jes mo tufala han blong hem oli wokem long silva, ples blong strap go kasem as blong hem oli wokem long bras. Tufala leg blong hem oli wokem long aean, mo tufala leg daon oli wokem long aean we i miks wetem red graon. I gat wan ston i kamaot antap long wan bigfala hil, nao i kam bangem tufala leg blong hem daon, i smasem tufala. Statiu ya i brokbrok, i kam paoda, mo win i karem i go. Ston ya i gru i kam wan bigfala hil we i kavremap evri ples long wol.’

Nao Daniel i talem se: ‘Hemia mining blong drim blong yu. Hed blong pija ya we i gol, hemia kingdom blong yu. Jes blong pija ya we i silva, hemia wan kingdom we bambae i rul biaen long yu. Afta, bae i gat wan narafala kingdom we i olsem kopa, mo i rul long olgeta ples long wol. Nekis kingdom bae i strong olsem aean. Mo laswan, hemia wan kingdom we bae i seraot. Sam haf bae oli strong olsem aean, mo sam oli no strong olsem red graon. Ston ya we i kam wan bigfala hil, hemia Kingdom blong God. Kingdom ya bae i smasem ol narafala kingdom, mo bae i rul gogo i no save finis.’

King Nebukadnesa i bodaon long Daniel mo i talem se: ‘God blong yu i soemaot mining blong drim ya long yu. I no gat wan narafala god we i olsem hem.’ Ale, Nebukadnesa i no kilim Daniel i ded, be i putumap hem i kam hed blong ol waes man, mo i kam rula blong provins blong Babilon. ?Yu luk olsem wanem Jehova i ansa long prea blong Daniel?

Afta we King Nebukadnesa i luk drim blong bigfala statiu ya, sam taem i pas, nao hem i wokem wan bigfala aedol long gol. Hem i stanemap long level ples long Dura, mo i singaot olgeta haeman wetem Sadrak, Mesak, mo Abednego, blong oli kam stanap long fored blong aedol ya. Nao king i talem se: ‘Taem yufala i harem saon blong ol trampet, ol hap, mo ol gita, yufala i mas bodaon mo wosipim aedol ya. !Man we i no bodaon bae mi sakem hem i go long bigfala faea we i hot we i hot!’ ?Olsem wanem? ?Trifala Hibru boe ya oli bodaon long aedol ya, o oli wosipim Jehova nomo?

Nao king i talem long ol man blong oli plei miusik. Wantaem nomo, ol man oli bodaon long aedol ya, be Sadrak, Mesak, mo Abednego i no bodaon. Sam man oli luk, nao oli talem long king se: ‘Trifala Hibru ya oli no wantem bodaon long aedol ya we yu yu stanemap.’ Ale King Nebukadnesa i singaot trifala i kam, mo i talem se: ‘Bae mi givim wan moa janis long yufala. Sipos yufala i no bodaon, bae mi sakem yufala i go long bigfala faea. I no gat wan god we i save sevem yufala.’ Trifala i ansa se: ‘I no nid blong yu givim wan moa janis long mifala. God blong mifala hem i naf blong sevem mifala. Be king, yu mas save se, nating sipos hem i sevem mifala o i no sevem mifala, bae mifala i no bodaon long aedol ya.’

King Nebukadnesa i kam kros bitim mak, nao i talem long ol man blong hem se: ‘!Yufala i mekem faea ya i seven taem moa hot i bitim oltaem!’ Mo hem i talem long ol soldia blong hem se: ‘!Fasem trifala, mo sakem trifala i go long bigfala faea ya!’ Taem ol soldia oli tekem trifala i go klosap long faea, ol soldia nao oli ded from we faea i hot tumas. Trifala Hibru ya oli foldaon i go long faea, be taem Nebukadnesa i luk, hem i sek se i gat fo man insaed long faea ya. Hem i fraet we i fraet, nao i askem long ol haeman blong hem se: ‘?Mi ting se yumi sakem tri man i go long faea, no? Be mi luk fo man oli stap wokbaot long medel blong faea. !Mo namba fo man i luk olsem wan enjel!’

Nebukadnesa i go klosap moa long faea, nao i singaot se: ‘!Yufala ol man blong wok blong God ya We i Hae Olgeta, yufala i kamaot!’ Taem Sadrak, Mesak, mo Abednego i kamaot, ol man oli sapraes tumas se faea i no bonem bodi, hea, mo klos blong trifala, mo i no gat smel blong faea nating long trifala.

Nebukadnesa i talem se: ‘!Yumi presem God blong Sadrak, Mesak mo Abednego! I no gat wan narafala god we i olsem hem. Hem i sanem wan enjel blong sevem trifala.’

?Olsem wanem? ?Yu yu olsem trifala Hibru ya? ?Yu gat strong tingting blong obei long Jehova nomata wanem samting i hapen?