Bighaf blong ol man Isrel oli gobak long Jerusalem 70 yia finis, be sam oli stap yet long ol defdefren ples we Pesia i rul long olgeta. Wan long olgeta ya, hemia pris Esra, we i stap tijim ol man long Loa blong Jehova. Esra i harem nius se ol man long Jerusalem oli no stap folem Loa, nao hem i wantem gobak blong givhan long olgeta. King Ataksekses blong Pesia i talem long Esra se: ‘God i givim waes long yu blong yu save tijim ol man long Loa blong hem. Yu go, mo yu tekem eni man we i wantem go wetem yu.’ Ale Esra i singaot ol man we oli wantem gobak long Jerusalem wetem hem. Oli prea long Jehova blong i lukaot gud long olgeta long rod. Nao oli wokbaot i go.

Fo manis biaen, oli kasem Jerusalem. Ol prins blong taon ya oli talem long Esra se: ‘Ol man oli no obei long Jehova, oli stap tekem ol woman we oli wosipim ol giaman god.’ ?Esra i mekem wanem? Esra i nildaon long fored blong ol man, i prea se: ‘Jehova, yu mekem plante samting long mifala, be mifala i mekem sin agens long yu.’ Ol man oli tanem tingting blong olgeta, be oli nidim yet blong stretem sam samting. Esra i jusumaot sam elda mo jaj blong oli lukluk long ol problem ya. Oli gohed tri manis blong sanemaot olgeta we oli no wosipim Jehova.

Twelef yia biaen, Esra i singaot ol man oli kam long bigfala open ples long taon, blong hem i ridimaot Loa blong God long olgeta. Long taem ya, oli wokem bakegen stonwol blong Jerusalem finis. Taem Esra i openem buk blong Loa, ol man oli stanap. Nao hem i presem Jehova, mo evriwan oli leftemap han blong olgeta i go antap, blong soemaot se oli agri. Oli lesin gud taem Esra i ridimaot Loa ya mo i eksplenem. Oli luksave se oli gowe long Jehova bakegen, oli harem nogud, mo oli krae we oli krae. Long nekis dei, Esra i ridimaot Loa ya bakegen. Oli kasem save se taem blong mekem Lafet Blong Ol Wansaed Haos i klosap. Wantaem nomo, oli rerem ol samting blong lafet ya.

Long ol seven dei blong lafet ya, ol man oli glad we oli glad, mo oli talem tangkiu long Jehova from we garen i karem fulap kakae. Stat long taem blong Josua, i no gat wan Lafet Blong Ol Wansaed Haos we i olsem. Afta long lafet ya, ol man oli joen wanples, nao oli prea se: ‘Jehova, yu bin tekemaot mifala long ples we mifala i wok slef long hem, yu givim kakae long mifala long draeples, mo yu lidim mifala i kam long gudfala kantri ya. Be plante taem mifala i no obei long yu. Yu sanem ol profet blong oli givim woning long mifala, be mifala i no lesin. Nating se i olsem, yu no lego mifala. Yu holem promes we yu mekem wetem Ebraham. Naoia mifala i promes se bae mifala i obei long yu.’ Nao oli raetemdaon promes ya, mo ol lida, ol Livaet, mo ol pris, oli saenem.

Yumi tingting bak long taem ya bifo we oli wokem bakegen stonwol blong Jerusalem. Nehemaea i wan man Isrel we i stap long taon ya Susan long Pesia, mo hem i wok blong King Ataksekses. Nao brata blong Nehemaea i aot long Juda i kam, mo i talem sam nius we i nogud, se: ‘Ol man we oli gobak long Jerusalem oli no stap sef, from we bigfala stonwol mo ol bigbigfala get we ol man Babilon oli spolem, oli stap sem mak yet.’ Nehemaea i harem nogud tumas. Hem i wantem gobak long Jerusalem, ale hem i prea se king bambae i letem hem i go.

Biaen, king i luk we Nehemaea i harem nogud. Ale, hem i askem se: ‘?Nehemaea, from wanem fes blong yu i nogud olsem? ?Wanem i mekem yu yu harem nogud?’ Nehemaea i talem se: ‘Mi harem nogud tumas from bigfala taon blong mi i brobrok nogud.’ King i askem se: ‘?Mi save mekem wanem blong givhan long yu?’ Kwiktaem nomo, Nehemaea i prea long tingting blong hem. Afta, hem i talem se: ‘Plis, yu letem mi mi gobak long Jerusalem blong wokem gud bakegen bigfala stonwol blong hem.’ King Ataksekses i talem long Nehemaea se hem i save go, mo i meksua se Nehemaea i stap sef long longfala rod blong hem. Mo tu, hem i mekem Nehemaea i kam hed gavman long Juda, mo i givim timba long hem blong i wokem gud bakegen ol get blong taon ya.

Taem Nehemaea i kamtru long Jerusalem, hem i goraon long taon ya blong lukluk bigfala stonwol blong hem. Afta, hem i singaot ol pris mo ol haeman, mo i talem long olgeta se: ‘!Olgeta, hemia i nogud ya! Yumi mas wokem gud stonwol ya bakegen.’ Ol man oli glad, ale oli stat blong wok.

Be sam enemi blong ol man Isrel oli jikim olgeta se: ‘!Smol dog nomo i naf blong brekemdaon stonwol ya!’ Be ol man blong wok oli no wantem save, oli gohed nomo. Sloslo, stonwol ya i go antap, mo oli wokem i strong we i strong.

Ol enemi oli mekem plan blong kam long ol defdefren saed blong Jerusalem blong mekem ol man oli sek, nao bambae i isi blong oli winim olgeta. Taem ol man oli harem nius ya, oli fraet we oli fraet. Be Nehemaea i talem se: ‘Yufala i no fraet. Jehova i stap wetem yumi.’ Ale, hem i putum sam man blong oli gad mo blokem ol enemi.

Oli finisim stonwol mo ol bigfala get long 52 dei nomo. Nehemaea i singaot ol Livaet oli kam long Jerusalem blong oli mekem bigfala stonwol ya i tabu, i blong God. Hem i seraotem olgeta oli go long tu grup blong singsing. Oli klaem long ol step klosap long Get blong Springwota, blong go antap long stonwol. Nao wan grup i pas long lefsaed mo wan grup i pas long raetsaed. Oli blu long trampet, oli plei simbol mo hap, mo oli singsing blong presem Jehova. Esra i joen long wan grup, mo Nehemaea i joen long narafala grup, nao oli maj i goraon long taon gogo, oli mit long haos blong God. Ol man, ol woman, mo ol pikinini, olgeta evriwan oli mekem sakrefaes i go long Jehova mo oli mekem lafet. Oli glad we oli glad, mo ol man we oli stap longwe oli save harem bigfala glad ya blong olgeta.