Hedgavman blong Rom, Sisa Ogastas, i mekem wan loa se olgeta man Jiu oli mas gobak long taon we oli bon long hem, blong rejistarem nem blong olgeta. Ale, Josef mo Meri i go long Betlehem, we i ples blong famle blong Josef. Klosap nao, Meri bambae i bonem pikinini blong hem.

Taem tufala i kasem Betlehem, i no moa gat rum blong tufala i slip long hem, ale tufala i go stap long wan haos blong ol animol. Long ples ya, Meri i bonem Jisas. Hem i kavremap hem long kaliko, nao i putum hem i stap slip long wan bokis we ol man oli putum gras long hem blong ol animol oli kakae.

Klosap long Betlehem, i gat sam man blong lukaot long sipsip, we oli stap afsaed wetem ol sipsip blong olgeta. Wantaem nomo, wan enjel i kamtru long olgeta mo Jehova i mekem bigfala laet i saen raonabaot long olgeta. Nao olgeta oli fraet tumas, be enjel ya i talem se: ‘Yufala i no fraet, mi mi kam blong talemaot wan gud nius long yufala. Tede, Mesaea i bon long Betlehem.’ Nao wantaem nomo, oli luk plante enjel long skae, we oli joen blong talem se: ‘Presem God long heven, mo long wol ya, bae i gat pis.’ Nao ol enjel ya oli lus bakegen. ?Ol man blong lukaot long sipsip oli mekem wanem?

Oli talem se: ‘Yumi go long Betlehem.’ Ale, oli hariap, oli go faenem Josef mo Meri long haos blong ol animol wetem bebi blong tufala.

Ol man oli sapraes tumas taem oli harem ol tok we enjel i talem long ol man blong lukaot long sipsip. Meri i tingting gud long ol tok ya, hem i no save fogetem. Ol man blong lukaot long sipsip, oli gobak long ol sipsip blong olgeta, mo oli talem tangkiu long Jehova from ol samting we oli harem mo oli luk.

Ol man we oli stap long wan kantri klosap long Isrel, long saed i go long is, oli bilif se ol sta oli save lidim gud olgeta. Wan naet, sam long olgeta oli luk wan sta i saen we i saen mo i stap muv, nao oli folem. Sta ya i lidim olgeta i go long Jerusalem. Nao oli askem long ol man se: ‘?Wehem pikinini ya we bae i kam king blong ol man Jiu? Mifala i kam blong ona long hem.’

Taem Herod we i king blong Jerusalem i harem nius blong wan niufala king, tingting blong hem i trabol, nao i askem long ol jif pris se: ‘?King ya i bon long weples?’ Oli ansa se: ‘Ol profet oli talem se bae hem i bon long Betlehem.’ Ale, Herod i singaot ol man ya we oli kam long is mo i talem long olgeta se: ‘Yufala i go lukaotem pikinini ya long Betlehem, mo taem yufala i faenem hem, yufala i kam talem long mi, blong mi save go ona long hem.’ Be hem i stap giaman nomo.

Sta ya i muv bakegen, nao ol man ya oli folem i go kasem Betlehem. Sta ya i stop stret antap long haos we oli faenem Jisas long hem, wetem mama blong hem, Meri. Oli bodaon long hem mo oli givim gol long hem, wetem frangkinsens mo mir. ?Olsem wanem? ?Jehova nao i sanem ol man ya blong oli go faenem Jisas? Nogat.

Long naet ya, Jehova i talem long Josef long wan drim se: ‘Herod i wantem kilim Jisas i ded. Yu tekem smol pikinini ya mo mama blong hem, yufala i ronwe i go long Ijip. Yufala i mas stap long ples ya gogo kasem we mi talem se i sef blong yufala i kambak.’ Wantaem nomo, Josef wetem famle blong hem oli go long Ijip.

Jehova i talem long ol man blong lukluk ol sta se, oli no mas gobak long Herod. Taem Herod i luk se oli no kambak, hem i kros we i kros. Ale, hem i givim oda blong oli kilim i ded ol boe long Betlehem we oli gat sem yia olsem Jisas. Be Jisas i stap sef long Ijip.

Biaen Herod i ded, nao Jehova i talem long Josef se: ‘Naoia yu save gobak long Isrel.’ Ale Josef, Meri, mo Jisas, trifala i go stap long taon ya, Nasaret.