Jon i prij, i stap talemaot se: ‘I gat wan man i stap kam we i hae moa long mi.’ Taem Jisas i gat samwe long 30 yia, hem i aot long Galili i go long Jodan Reva, long ples we Jon i stap baptaesem ol man. Jisas i wantem se Jon i baptaesem hem, be Jon i talem se: ‘Mi nidim yu nao blong baptaesem mi. ?Weswe yu yu kam long mi?’ Be Jisas i talem se: ‘No, Jehova i wantem se yu yu baptaesem mi.’ Ale tufala i godaon long Jodan Reva, nao Jon i draonem Jisas fulwan long wota.

Taem Jisas i kamaot long wota, hem i stap prea. Wantaem nomo, skae i open mo tabu spirit i kamdaon long hem olsem wan sotleg. Nao voes blong Jehova i kamaot long heven, i se: “Yu yu pikinini blong mi. Mi mi lavem yu tumas, mo mi glad long yu.”

Taem tabu spirit i kamdaon long Jisas, hem i kam Kraes o Mesaea. Nao hem i statem wok ya we Jehova i sanem hem blong mekem.

Afta we Jisas i baptaes, hem i go long draeples blong 40 dei. Taem hem i kambak, hem i go luk Jon. Taem Jon i luk Jisas i stap wokbaot i kam, hem i talem se: ‘Hemia Smol Sipsip blong God, we bae i tekemaot sin blong ol man long wol.’ Jon i talem ol tok ya blong mekem ol man oli save se Jisas nao i Mesaea. ?Yu yu save samting we i hapen long Jisas taem hem i stap long draeples? Bambae yumi luk.

Afta we Jisas i baptaes, tabu spirit i lidim hem i go long draeples. Hem i no kakae blong 40 dei, mo hem i hanggri we i hanggri. Nao Setan i kam traem hem, i se: ‘Sipos i tru se yu yu Pikinini blong God, yu talem long ol ston ya blong oli kam bred.’ Be Jisas i yusum wan vas blong Baebol blong ansa, i se: ‘Baebol i talem se yu no save laef long kakae nomo. Yu mas lesin tu long olgeta tok we Jehova i talem.’

Biaen, Setan i traem Jisas bakegen, i se: ‘Sipos i tru se yu yu Pikinini blong God, yu go long haos blong God long ples we i hae moa, nao yu jam i godaon. Baebol i talem se, God bae i sanem ol enjel blong hem, blong oli holem yu.’ Be Jisas i yusum wan vas blong Baebol bakegen, i se: ‘Baebol i talem se yu no mas traem Jehova.’

Biaen bakegen, Setan i soemaot olgeta kantri blong wol long Jisas, wetem ol gudgudfala samting blong olgeta, mo i talem se: ‘Sipos yu mekem wan samting nomo blong wosipim mi, bae mi givim olgeta kantri ya long yu, wetem ol gudfala samting blong olgeta.’ Be Jisas i ansa se: ‘!Setan! !Yu gowe! Baebol i talem se yu mas wosipim Jehova nomo.’

Nao Setan i gowe, mo ol enjel oli kam givim kakae long Jisas. Stat long taem ya, Jisas i talemaot gud nius blong Kingdom. Hemia nao wok we hem i kam long wol ya blong mekem. Ol man oli laekem tumas ol tijing blong hem, mo oli folem hem i go long evri ples.