Long yia 30 K.T., taem ol tri oli stap putum flaoa, Jisas i wokbaot i go long Jerusalem. Plante man oli kam long taon ya blong mekem lafet blong Pasova. Long lafet ya, oli bonem ol animol blong mekem sakrefaes long tempol. Samfala oli karem ol animol ya oli kam wetem olgeta, be sam oli pem long Jerusalem.

Taem Jisas i go long tempol, hem i luk we ol man oli stap salem ol animol blong winim mane. ?Hem i mekem wanem? Hem i tekem sam rop mo i mekem wan wip long hem. Nao hem i ronemaot ol sipsip mo ol buluk long tempol, mo i kafsaedem ol tebol blong ol man we oli stap jenisim mane, i sakem ol mane blong olgeta i go olbaot. Jisas i talem long ol man we oli stap salem ol pijin se: ‘!Yufala i tekem ol samting ya i go aotsaed! !Yufala i no mekem haos blong Papa blong mi i kam ples blong mekem bisnes!’

Ol man oli sapraes long samting we Jisas i mekem. Ol disaepol blong hem oli tingbaot profet tok we i tokbaot Mesaea se: ‘Strong tingting we mi gat long haos blong Jehova bambae i olsem faea insaed long mi.’

Long yia 33 K.T., Jisas i ronemaot ol man ya bakegen long tempol. Hem i wantem se ol man oli mas respektem haos blong Papa blong hem.

Afta long lafet blong Pasova, Jisas mo ol disaepol blong hem oli gobak long Galili, be oli pastru long Sameria. Oli kam kasem wel blong Jekob we i klosap long taon ya Saeka. Jisas i sidaon long ples ya blong spel, mo ol disaepol oli go long taon blong pem kakae.

Nao wan woman i kam blong kasem wota long wel ya. Jisas i talem long hem se: “Yu givim smol wota long mi.” Woman ya i talem se: ‘Mi mi wan woman Sameria. Ol man Jiu oli no toktok long ol man Sameria. ?Olsem wanem yu toktok long mi?’ Jisas i talem se: ‘Sipos yu save se mi mi hu, bae yu askem wota long mi, nao mi bae mi givim wota blong laef long yu.’ Woman ya i askem se: ‘?Yu minim wanem? Yu no gat wan baket blong kasem wota.’ Jisas i talem se: ‘Man we i dring wota we mi mi givim, bae i no save tosta bakegen.’ Woman ya i talem se: “Masta, yu givim wota ya long mi.”

Biaen, Jisas i talem se: ‘Yu go singaot man blong yu i kam.’ Woman ya i se: ‘Mi mi no gat man.’ Jisas i se: ‘Yu talem tru. Yu yu mared faef taem finis, mo naoia yu stap wetem wan man we yu no mared long hem.’ Woman ya i talem se: ‘Mi luk se yu yu wan profet. Ol manples blong mi oli bilif se mifala i mas wosipim God antap long bigfala hil ya. Be ol man Jiu oli talem se Jerusalem nao i stret ples blong wosipim God. Mi ting se taem Mesaea i kam, bae hem i tijim yumi long stret rod blong mekem wosip.’ Nao Jisas i talem wan samting we hem i neva talemaot bifo, i se: ‘Mi nao mi Mesaea.’

Woman ya i hariap blong gobak long taon mo i talemaot se: ‘Mi ting se mi faenem Mesaea. Hem i save finis evri samting long saed blong mi. !Yufala i kam luk!’ Ale, oli folem hem i gobak long wel, mo oli lesin long ol tok blong Jisas.

Nao ol man Sameria oli askem long Jisas blong i stap long taon blong olgeta. Ale, hem i stap tu dei blong tijim olgeta, mo plante man oli bilif. Oli talem long woman Sameria ya, se: ‘Mifala i bilif se man ya bae i sevem ol man long wol.’