Smoltaem afta we Jisas i baptaes, hem i stat blong prij, se: ‘Kingdom blong God i kam klosap finis.’ Ol disaepol oli folem hem i go long ol defdefren ples long Galili mo Judia. Taem Jisas i gobak long Nasaret, hem i go long haos prea, i openem buk blong Aesea, mo i ridimaot se: ‘Jehova i givim tabu spirit long mi blong mi talemaot gud nius.’ ?Tok ya i minim wanem? I min se bigfala risen from wanem Jisas i kasem tabu spirit, hemia blong talemaot gud nius, nating se ol man oli wantem tumas we hem i mekem merikel. Biaen, hem i talem se: ‘Tede profet tok ya i kamtru.’

Jisas i wokbaot i go long Si Blong Galili. Nao hem i singaot fo man blong pulum fis, i se: ‘Yufala i biaen long mi, mo bae mi mekem yufala i kam man blong pulum man.’ Wantaem nomo, Pita, Andru, Jemes, mo Jon oli lego wok blong olgeta mo oli folem hem. Oli wokbaot olbaot long Galili blong talemaot Kingdom blong Jehova. Oli prij long ol haos prea, ples blong maket, mo long rod, mo plante man oli biaen long olgeta. Nius blong Jisas i goaot long olgeta ples, go kasem Siria.

Biaen, Jisas i givim paoa long sam man blong hem blong oli mekem sikman i kam gud bakegen, mo ronemaot ol rabis spirit long ol man. Sam narafala oli folem hem i go long ol taon mo ol vilej we hem i prij long olgeta. Plante woman we oli obei long God, olsem Meri Magdala, Joana, Susana, mo sam narafala, oli mekem plante samting blong givhan long Jisas mo ol man blong hem.

Afta we Jisas i trenem ol disaepol blong hem, hem i sanem olgeta oli go prij. Long ol ples long Galili, i gat plante man oli kam disaepol mo oli baptaes. From we oli plante tumas, Jisas i tokbaot olgeta olsem wan garen we kakae blong hem i rere finis, i se: ‘Yufala i mas prea blong Jehova i sanem sam moa man oli kam blong karem kakae.’ Biaen, hem i sanem 70 disaepol oli go tutu, blong oli prij long ol ples long Judia. Oli tijim enikaen man long saed blong Kingdom. Taem oli kambak, oli glad tumas blong talemaot long Jisas ol samting we i hapen. Setan i no save mekem wan samting blong stopem wok blong prij.

Jisas i wantem se ol man blong hem oli mas gohed long impoten wok ya afta we hem i gobak long heven. Hem i talem se: ‘Yufala i mas go talemaot gud nius long olgeta ples long wol, yufala i mas tijim ol man blong oli save Tok blong God, mo baptaesem olgeta.’

Jisas i kam long wol blong talemaot gud nius blong Kingdom blong God. Jehova i givim tabu spirit long Jisas blong hem i save mekem ol merikel, blong soemaot samting we bambae hem i mekem taem hem i kam King. Long evri ples we Jisas i go long hem, ol sikman oli kam long hem, mo hem i hilim enikaen sik. Hem i mekem se blaenman i save lukluk, man we sora i fas i save harem samting, mo man we i no save wokbaot, i save wokbaot bakegen, mo hem i ronemaot rabis spirit long plante man. Sipos oli tajem en blong klos blong hem nomo, sik blong olgeta i save finis. Long evri ples we Jisas i go long hem, ol man oli stap folem hem. Be hem i neva talem long olgeta blong oli gowe, nating se samtaem hem i wantem stap hem wan.

Wan taem, oli karem wan man we haf bodi blong hem i ded i go long haos we Jisas i stap long hem. Be oli no save go insaed from i gat fulap man. Ale, oli tekemaot smol haf blong ruf blong haos, mo oli slakem sikman ya we i stap slip long wan bed, i godaon long Jisas. Nao Jisas i talem long man ya se: ‘Yu girap, yu wokbaot.’ Taem hem i stanap, ol man oli sapraes tumas.

Long wan narafala taem, Jisas i stap wokbaot i go long wan vilej, nao ten man we oli gat leprosi, oli singaot se: ‘!Jisas, yu givhan long mifala!’ Long taem ya, man we i gat leprosi i no save go klosap long ol narafala man. Ale, Jisas i talem long olgeta blong oli go long tempol. Hemia from we Loa i talem se, taem man we i gat leprosi i kam gud, hem i mas go long tempol. Ale oli wokbaot i go, nao sik blong olgeta i finis. Wan long olgeta i kambak, i talem tangkiu long Jisas, mo i presem God. Long ol ten man ya, i gat wan nomo we i kambak blong talem tangkiu long Jisas.

Wan woman we hem i sik blong 12 yia, i wantem tumas blong kam gud bakegen. Ale, hem i kam biaen long Jisas mo i tajem en blong klos blong hem. Wantaem nomo, sik blong hem i finis. Nao Jisas i askem se: “?Hu i tajem mi?” Woman ya i fraet tumas, be hem i talemaot se hem nao i tajem Jisas. Nao Jisas i toktok kaen long hem se: ‘Dota blong mi, yu go, yu no moa wari bakegen.’

Wan haeman, Jaeras, i askem strong long Jisas se: ‘!Plis, yu kam long haos blong mi! Smol gel blong mi i sik tumas.’ Be taem Jisas i stap wokbaot i go, gel ya i ded. Taem hem i kasem haos blong Jaeras, hem i talem long ol man we oli stap krae se: ‘Yufala i no krae, gel ya i stap slip nomo.’ Nao hem i holem han blong gel ya, i se: “!Smol gel, yu girap!” Wantaem nomo gel ya i girap. Nao Jisas i talem long papa mo mama blong hem blong tufala i givim sam kakae long hem. !Yu traem tingbaot bigfala glad we tufala i gat!