Jisas i prij wan yia haf, nao hem i mas mekem wan impoten desisen. ?Bambae hem i jusum hu blong oli wokbaot wetem hem oltaem? ?Bambae hem i trenem hu blong oli lidim Kristin kongregesen? Jisas i wantem we Jehova i givhan long hem blong mekem desisen ya. Ale hem i go antap long wan hil hem wan, mo i prea blong wan fulnaet. Long moning, Jisas i singaot ol disaepol blong hem oli kam, nao hem i jusumaot twelef aposol. ?Yu tingbaot nem blong olgeta? I gat Pita, Andru, Jemes, Jon, Filip, Batolomiu, Tomas, Matiu, Jemes we i pikinini blong Alfeas, Tadeas, Saemon, mo Judas Iskariot.

Ol 12 aposol ya oli stap wokbaot wetem Jisas. Be afta we hem i trenem olgeta, oli go prij olgeta nomo. Jehova i givim paoa long olgeta blong oli ronemaot rabis spirit mo mekem sikman i kam gud.

Jisas i singaotem ol 12 aposol ya se ol fren blong hem, mo hem i trastem olgeta. Ol Farisi oli ting se ol aposol ya oli no skul gud mo oli no gat nem. Be Jisas i no tingting olsem, hem i trenem olgeta blong oli naf blong mekem wok we hem i givim. Oli stap wetem Jisas long ol impoten taem long laef blong hem, olsem bifo we hem i ded mo afta we hem i laef bakegen. Plante long ol aposol ya oli blong Galili, olsem Jisas. Sam long olgeta oli mared.

Ol aposol oli sinman, taswe oli mekem sam mastik. Samtaem oli no tingting gud bifo we oli toktok, oli mekem sam nogud desisen, oli no gat longfala tingting, mo oli rao se hu long olgeta i hae moa. Be oli ol gudfala man we oli lavem Jehova. Olgeta nao oli ol faswan long Kristin kongregesen, we bambae oli mekem impoten wok afta we Jisas i lego olgeta.

Afta we Jisas i jusumaot ol 12 aposol, hem i kamdaon long bigfala hil mo i luk se plante man oli hivap wanples. Ol man ya oli kam long Galili, Judia, Taea, Saedon, Siria, mo ol ples narasaed long Jodan Reva. Oli karem ol sikman mo samfala we rabis spirit i stap long olgeta oli kam long Jisas, mo hem i mekem evriwan oli kam gud bakegen. Biaen, hem i sidaon mo i tokbaot samting we yumi mas mekem blong fren gud wetem God. Yumi mas luksave se yumi nidim Jehova mo yumi mas lavem hem. Yumi mas lavem ol narafala man tu, sipos no, yumi no save lavem God. Yumi mas kaen mo mekem i gud long olgeta man, nating se samfala oli enemi blong yumi.

Jisas i talem se: ‘I no naf blong lavem ol fren blong yu nomo. Be yu mas lavem ol enemi blong yu tu, mo yu mas fogivim olgeta wetem fulhat blong yu. Sipos wan man i kros long yu, i gud yu go kwik blong talem sore long hem. Yu mas mekem i gud long ol narafala, olsem we yu wantem se oli mekem long yu.’

Mo tu, Jisas i givim ol gudfala advaes long saed blong mane mo ol samting we yumi gat, i se: ‘I impoten moa blong fren wetem Jehova i bitim we yu gat plante mane. Wan stilman i save stilim mane blong yu, be i no save tekemaot fasin ya we yu fren gud wetem Jehova. Yu no mas wari se bambae yu kakae wanem, dring wanem, mo werem wanem klos. Yu traem luk ol pijin. Oltaem God i givim naf kakae long olgeta. Sipos yu wari tumas, hemia i no save ademap wan moa dei long laef blong yu. Yu mas tingbaot se Jehova i save samting we yu nidim.’

Ol man oli neva harem ol tok olsem bifo. Ol lida blong skul oli no tijim ol man long ol samting ya. ?From wanem Jisas i wan nambawan tija? From we evri samting we hem i tijim i kamaot long Jehova.