1. ?Ol profet tok blong Baebol oli soemaot wanem long yumi?

I NO longtaem, ?wanem bambae i hapen long ol man blong Jehova? Baebol i talem ol impoten samting we bambae oli hapen. Profet tok blong Daniel japta 11 i soemaot samting we sam bigfala gavman blong wol bambae oli mekem. Hem i tokbaot tu king we tufala i agensem tufala, hemia king blong not mo king blong saot. Bighaf blong profet tok ya i kamtru finis, taswe yumi save se lashaf blong hem tu bambae i kamtru.

2. Folem Jenesis 3:15 wetem Revelesen 11:7 mo 12:17, ?yumi mas tingbaot wanem, taem yumi stadi long profet tok blong Daniel?

² Blong kasem save long profet tok blong Daniel japta 11, yumi mas tingbaot se Daniel i tokbaot nomo ol king mo gavman we oli wantem spolem ol man blong God. Nating se ol man blong God oli no plante, be ol gavman ya oli agensem olgeta. ?From wanem? From we Setan mo rabis wol blong hem i gat wan tingting nomo, hemia blong spolem ol man blong Jehova mo Jisas. (Ridim Jenesis 3:15 mo Revelesen 11:7; 12:17.) Mo tu, mining blong profet tok blong Daniel i mas laenap wetem ol narafala profet tok long Baebol. Blong talem stret, yumi mas lukluk sam narafala profet tok, blong kasem stret mining blong profet tok blong Daniel.

3. ?Bambae yumi tokbaot wanem long stadi ya mo long nekis stadi?

³ Naoia, bambae yumi tokbaot Daniel 11:25-39. Bambae yumi faenemaot hu ya king blong not mo king blong saot long ol yia 1870 kasem 1991, mo from wanem i stret blong jenisim tingting blong yumi long mining blong wan haf blong profet tok ya. Long nekis stadi, bambae yumi tokbaot Daniel 11:40–12:1, mo olsem wanem profet tok ya i kamtru long ol yia 1991 go kasem Amagedon. Taem yumi mekem tufala stadi ya, i gud yu lukluk ol pej we taetol blong olgeta se, “Tufala King Ya Long Taem Blong En.” Be fastaem yumi mas faenemaot hu ya tufala king ya.

LUKSAVE HU I KING BLONG NOT MO KING BLONG SAOT

4. ?Wanem trifala samting we oli givhan long yumi blong luksave king blong not mo king blong saot?

⁴ Long taem bifo, “king blong not” i minim gavman we i rul long ol kantri long not blong Isrel, mo “king blong saot” i minim gavman we i rul long ol kantri long saot blong Isrel. ?From wanem yumi talem olsem? Tingbaot samting we enjel i talem long Daniel, i se: ‘Mi mi kam blong talemaot long yu wanem samting bambae i kamtru long ol man blong God long fiuja.’ (Dan. 10:14) Go kasem Pentekos long yia 33, ol man blong God hemia nesen blong Isrel. Be, afta long taem ya, Jehova i soemaot klia se ol disaepol blong Jisas oli ol man blong hem. Taswe plante haf blong profet tok blong Daniel japta 11 oli stret long ol disaepol blong Jisas, be i no long nesen blong Isrel. (Wok 2:1-4; Rom 9:6-8; Gal. 6:15, 16) Mo taem ol yia oli pas, ol defdefren gavman oli kam king blong not mo king blong saot. Be olgeta gavman ya evriwan oli mekem tri samting: Faswan, oli traem blong spolem ol man blong God. Namba tu, samting we oli mekem i soemaot se oli no laekem nating trufala God Jehova. Mo namba tri, tufala king ya i agensem tufala.

5. ?I gat king blong not mo king blong saot long ol yia 100 go kasem 1870? ?From wanem yu talem olsem?

⁵ Afta long yia 100, plante giaman Kristin oli haedem trutok blong Baebol mo oli karem ol narafala tijing oli kam insaed long kongregesen. Stat long taem ya go kasem yia 1870, i no gat wan grup we i joen olsem oganaesesen blong God long wol. Ol giaman Kristin oli kam plante olsem ol rabis gras, nao i had blong luksave ol trufala Kristin. (Mat. 13:36-43) ?From wanem yumi makem samting ya? From we i soemaot se i no gat wan gavman we i king blong not o king blong saot long ol yia 100 go kasem 1870. Long taem ya, i no gat wan grup blong ol man blong God long wol we tufala king ya i save agensem olgeta.b Be afta long yia 1870, king blong not mo king blong saot i kamaot bakegen. ?Olsem wanem yumi save samting ya?

6. ?Wetaem i gat wan grup blong ol man blong God bakegen long wol? Eksplenem.

⁶ Long yia 1870, ol man blong God oli stat blong wok olsem wan grup. Long yia ya, Brata Russell mo sam fren blong hem oli joen wanples blong stadi Baebol. Olgeta ya oli man blong karem tok blong God, we oli “mekemrere rod” blong Kingdom blong Mesaea. (Mal. 3:1) !Long taem ya, i gat wan grup blong ol man blong Jehova bakegen long wol! ?Olsem wanem? ?I gat sam gavman we oli agensem ol man blong God? Bambae yumi luk.

?HU I KING BLONG SAOT?

7. Go kasem las haf blong Wol Wo Wan, ?hu i king blong saot?

⁷ Long 1870, Inglan i rul long plante moa ples i bitim ol narafala kantri, mo ami blong hem tu i strong moa. Profet tok blong Daniel i talem se hem i olsem wan smol hon we i pusumaot tri narafala hon long hed blong wan animol. Tri narafala hon ya i minim Franis, Spen, mo Netalan. (Dan. 7:7, 8) Inglan i king blong saot go kasem las haf blong Wol Wo Wan. Long semtaem, Amerika i stap kam rij, mo i fren gud wetem Inglan.

8. ?Long stat blong ol las dei kam kasem naoia, hu i king blong saot?

⁸ Long Wol Wo Wan, Amerika mo Inglan i joen, mo paoa blong tufala i kam strong, nao tufala i kam bigfala politik paoa blong wol. Olsem Daniel i talem, king ya i hivimap ‘wan bigfala kampani blong ol soldia we oli strong tumas.’ (Dan. 11:25) Long ol las dei, Inglan mo Amerika tugeta i rul olsem king blong saot.c ?Be hu i king blong not?

KING BLONG NOT I KAMAOT BAKEGEN

9. ?Wetaem king blong not i kamaot bakegen, mo olsem wanem fas haf blong Daniel 11:25 i kamtru?

⁹ Long 1871, king blong not i kamaot bakegen. Hemia wan yia afta we Brata Russell mo ol fren blong hem oli mekem wan grup blong stadi Baebol. Long yia ya, plante ples we oli toktok sem lanwis oli joen, nao oli kam nesen blong Jemani. Long ol yia biaen, Jemani i rul long sam kantri long Afrika mo Pasifik, mo i traem blong kam strong moa i bitim Inglan. (Ridim Daniel 11:25, NWd) Sloslo, ami blong Jemani i kam strong, mo hem i gat plante sip blong faet, klosap sem mak long Inglan. Long Wol Wo Wan, Jemani i yusum bigfala paoa blong hem agensem ol enemi blong hem.

10. ?Olsem wanem Daniel 11:25b, 26 i kamtru?

¹⁰ Daniel i gohed blong talemaot samting we bambae i hapen long Jemani mo ami blong hem. Hem i talem se king blong not “i no save win.” ?From wanem? From we “bambae oli giaman long hem.” ?Hu bambae i giaman long hem? “Ol advaesa we oli klosap moa long hem.” (Dan. 11:25b, 26a, NW) Long taem blong Daniel, ol haeman long gavman oli “ol advaesa” blong king. Taswe, vas ya i stap tokbaot ol haeman long gavman blong Jemani, wetem ol kapten blong ami mo ol advaesa blong hedgavman, we oli givhan blong spolem king.e Profet tok i talem se king blong saot bambae ‘i kilim plante soldia’ blong king blong not, mo i “ronemaot ol narawan we bambae i no moa gat wan i stap.” (Dan. 11:26b) Folem profet tok ya, long Wol Wo Wan, oli “ronemaot” ami blong Jemani, mo oli ‘kilim plante soldia’ i ded. Long faet ya, plante moa man oli ded i bitim ol narafala faet bifo.

11. Folem Daniel 11:27-30, ?king blong not mo king blong saot i mekem wanem?

¹¹ Daniel 11:27, 28 i tokbaot samting we bambae i hapen bifo long Wol Wo Wan. Hem i talem se king blong not mo king blong saot bambae ‘i sidaon blong kakae long wan tebol nomo, mo tufala i stap giagiaman nomo long tufala.’ Hem i talem tu se ol samting we king blong not “i winim” bambae oli plante we i plante. Hemia nao samting we i hapen. Jemani mo Inglan i talem se tufala i wantem pis, be taem Wol Wo Wan i stat long 1914, i klia se tufala i stap giaman. Mo tu, long ol yia bifo long 1914, Jemani i kam rij, we i gat wan kantri nomo long wol i rij moa long hem. Nao Jemani i faet agensem king blong saot be hem i no win, olsem Daniel 11:29 mo fashaf blong vas 30 i talem.

TUFALA KING I AGENSEM OL MAN BLONG GOD

12. Long Wol Wo Wan, ?king blong not mo king blong saot i mekem wanem?

¹² Stat long yia 1914, tufala king ya i strong moa blong faet agensem tufala mo ol man blong God. Long Wol Wo Wan, gavman blong Jemani mo gavman blong Inglan, tufala tugeta i ronem mo kilim ol man blong God we oli no wantem joen long faet. Mo gavman blong Amerika i sakem ol brata we oli stap lidim wok blong prij, oli go long kalabus. Samting ya i mekem profet tok blong Revelesen 11:7-10 i kamtru.

13. Afta long 1930 mo long Wol Wo Tu, ?king blong not i mekem wanem?

¹³ Afta long yia 1930 mo speseli long Wol Wo Tu, king blong not i no gat sore nating long ol man blong God. Taem ol Nasi oli rulum Jemani, Hitler mo ol man blong hem oli putum tabu long wok blong ol man blong God. Oli kilim i ded plante handred man blong Jehova, mo oli putum plante taosen long ol rabis kalabus. Daniel i bin talemaot se bambae king blong not i “spolem haos blong God” mo i “blokem ol sakrefaes ya we ol man blong God oli stap mekem evri dei.” King blong not i “spolem haos blong God” taem hem i agensem ol tabu Kristin mo ol fren blong olgeta, mo i putum tabu long wok blong olgeta. Samting ya i “blokem ol sakrefaes” from we klosap wok blong prij i stop. (Dan. 11:30b, 31a) Hitler we i lida blong Jemani, i talem strong se bambae hem i kilimaot evri man blong God long Jemani.

WAN NIUFALA KING BLONG NOT

14. Afta long Wol Wo Tu, ?hu i kam king blong not? Eksplenem.

¹⁴ Afta long Wol Wo Tu, komunis gavman blong Soviet Yunionf i kam king blong not, mo i rul long plante ples we Jemani i rul long olgeta bifo. Olsem ol Nasi, Soviet Yunion i mekem i nogud long ol man blong God from we oli obei long God fastaem.

15. Long en blong Wol Wo Tu, ?king blong not i mekem wanem?

¹⁵ Revelesen 12:15-17 i tokbaot ol nogud samting we niufala king blong not (Soviet Yunion mo ol kantri we oli joen wetem hem) i mekem agensem ol man blong God long en blong Wol Wo Tu. Profet tok ya i talem se ol nogud samting ya oli olsem “wan reva.” Hemia i hapen taem king blong not i putum tabu long wok blong prij, mo i fosem plante taosen man blong Jehova blong oli go stap long Saebiria, wan ples we i had tumas. Taswe, long stat blong ol las dei kam kasem naoia, king blong not i gohed nomo blong agensem ol man blong God, be hem i no save stopem wok blong olgeta.g

16. ?Olsem wanem Soviet Yunion i mekem Daniel 11:37-39 i kamtru?

¹⁶ Ridim Daniel 11:37-39. Folem profet tok ya, king blong not i ‘no tingbaot ol god blong ol bubu blong hem.’ ?Olsem wanem samting ya i kamtru? Soviet Yunion i wantem finisim olgeta jos, taswe hem i traem blong mekem se oli no moa gat paoa long ol man. Bifo finis, long 1918, Soviet Yunion i stat blong mekem desisen se ol skul blong pikinini oli mas tijim se i no gat wan God. ?Olsem wanem king blong not i ‘ona long giaman god ya blong ol strong ples blong haed long taem blong faet’? Soviet Yunion i spenem bigfala mane blong mekem ami blong hem i strong mo i wokem ol rabis tul blong faet. !King blong not mo king blong saot i wokem naf tul blong faet blong kilim plante plante milian man i ded!

TUFALA KING YA I WOK TUGETA

17. ?Hu ya “rabis god ya we i spolem ol samting”?

¹⁷ Nating se tufala king ya i agensem tufala, be tufala i wok tugeta blong mekem wan impoten samting: Tufala i “putumap rabis god ya we i spolem ol samting.” (Dan. 11:31, NW) “Rabis god ya” hemia Yunaeted Nesen.

18. ?From wanem Yunaeted Nesen i “rabis god ya”?

¹⁸ Yunaeted Nesen i “rabis god ya” from we hem i talem se hem i save putum pis long wol, be hemia samting we Kingdom blong God nomo i save mekem. Mo rabis god ya Yunaeted Nesen bambae i “spolem ol samting” taem hem i agensem mo i spolem ol giaman skul.—Yu lukluk ol pej ya we taetol blong olgeta se, “Tufala King Ya Long Taem Blong En.”

?FROM WANEM YUMI NIDIM SAVE YA?

19-20. (1) ?From wanem yumi nidim save ya? (2) Long nekis stadi, ?bambae yumi ansarem wanem kwestin?

¹⁹ Yumi nidim save ya from we i soemaot se stat long 1870 go kasem 1991, profet tok blong Daniel long saed blong king blong not mo king blong saot i kamtru. Taswe yumi save bilif strong se las haf blong profet tok ya tu bambae i kamtru.

²⁰ Long 1991, Soviet Yunion i lusum paoa. Taswe, ?hu i king blong not tede? Nekis stadi bambae i ansarem kwestin ya.

1-2. ?Bambae yumi tokbaot wanem long stadi ya?

TEDE yumi gat moa pruf i bitim bifo, se yumi laef klosap long en blong ol las dei blong rabis wol ya. I no longtaem, Jehova mo Jisas bambae tufala i finisim ol gavman we oli agensem Kingdom blong God. Go kasem taem ya, king blong not mo king blong saot bambae tufala i gohed blong agensem tufala mo ol man blong God.

² Long stadi ya, bambae yumi tokbaot profet tok blong Daniel 11:40–12:1. Bambae yumi tokbaot hu ya king blong not tede, mo from wanem yumi save trastem Jehova blong i sevem yumi, nomata wanem samting i hapen.

NIUFALA KING BLONG NOT

3-4. ?Hu i king blong not tede? Eksplenem.

³ Afta we Soviet Yunion i lusum paoa long 1991, i gat sam samting we oli “givhan smol” long ol man blong God long ples ya. (Dan. 11:34) From samting ya, oli save prij, mo kwiktaem nomo namba blong ol pablisa i kasem plante taosen. Sloslo, Rasia mo ol kantri we oli joen wetem hem, oli kam king blong not. Olsem yumi tokbaot finis long fas stadi, i gat tri samting we i save mekem wan gavman i kam king blong not o king blong saot: (1) hem i traem blong spolem ol man blong God, (2) samting we hem i mekem i soemaot se hem i enemi blong Jehova mo ol man blong hem, mo (3) tufala king ya i agensem tufala.

⁴ Yumi save talem se Rasia mo ol kantri we oli joen wetem hem oli king blong not from we: (1) Oli agensem ol man blong God, oli putum tabu long wok blong prij, mo oli ronem mo kilim plante taosen brata mo sista we oli stap long ol kantri ya. (2) Ol samting we oli mekem i soemaot se oli no laekem nating Jehova mo ol man blong hem. (3) Oli stap traem blong winim king blong saot, hemia Inglan mo Amerika. Bambae yumi luk olsem wanem Rasia mo ol kantri we oli joen wetem hem oli kam king blong not.

TUFALA KING YA I GOHED BLONG FAET

5. ?Daniel 11:40-43 i tokbaot wanem taem, mo wanem bambae i hapen long taem ya?

⁵ Ridim Daniel 11:40-43. Ol vas ya oli tokbaot taem blong en. Oli soemaot se king blong not mo king blong saot bambae tufala i gohed nomo blong traem winim tufala. Profet tok ya i talem se long taem blong en, bambae tufala i “faet.”—Dan. 11:40.

6. ?Wanem i soemaot se tufala king ya i stap agensem tufala?

⁶ King blong not mo king blong saot, tufala i gohed blong traem winim tufala mo rulum wol. Traem tingbaot samting we i hapen afta long Wol Wo Tu: King blong not, hemia Soviet Yunion mo ol kantri we oli joen wetem hem, oli winim plante ples long Yurop. Taswe, king blong saot i stanemap wan oganaesesen, hemia NATO (North Atlantic Treaty Organization), blong pulum plante narafala kantri oli joen wetem hem blong faet. King blong not mo king blong saot i gohed blong spenem bigfala mane blong wokem plante moa tul blong faet. King blong not i givhan long ol enemi blong king blong saot long ol faet long Afrika, Esia, mo Latin Amerika. Long ol yia we oli jes pas, Rasia mo ol kantri we oli joen wetem hem, oli stap kasem moa paoa. Mo tufala king ya i yusum ol kompiuta tu blong faet. King blong saot i stap talem se king blong not i yusum ol program long kompiuta blong mekem hem i lusum mane, mo blong spolem gavman blong hem. Mo king blong not i talem sem samting long saed blong king blong saot. Mo tu, olsem Daniel i talem, king blong not i gohed blong agensem ol man blong God.—Dan. 11:41.

KING BLONG NOT I GO INSAED LONG ‘KANTRI WE I GUD TUMAS’

7. ?‘Kantri ya we i gud tumas’ i minim wanem?

⁷ Daniel 11:41 i talem se king blong not bambae i go insaed long ‘kantri we i gud tumas.’ ?Kantri ya i minim wanem? Long taem bifo, Isrel nao i ‘kantri we i gud we i gud, i winim ol narafala kantri long wol.’ (Esik. 20:6) Be samting we i mekem kantri ya i gud tumas, se ol man blong hem oli wosipim trufala God Jehova. Be stat long Pentekos long yia 33, “kantri ya” i no minim wan prapa ples, from we ol man blong Jehova oli stap long olgeta ples blong wol. Taswe, tede ‘kantri ya we i gud tumas’ i minim ol samting long laef blong ol man blong Jehova, olsem wosip we oli mekem long ol miting mo long wok blong prij.

8. ?Olsem wanem king blong not i go insaed long ‘kantri ya we i gud tumas’?

⁸ Long ol las dei, plante taem king blong not i go insaed long ‘kantri ya we i gud tumas.’ Taem Jemani i king blong not, hem i go insaed long ‘kantri ya’ taem hem i ronem mo kilim ol man blong God, speseli long Wol Wo Tu. Afta, taem Soviet Yunion i kam king blong not, hem tu i go insaed long ‘kantri ya we i gud tumas,’ taem hem i ronemaot ol man blong God oli go stap long Saebiria, wan ples we i had tumas.

9. I no longtaem i pas, ?olsem wanem Rasia mo ol kantri we oli joen wetem hem oli go insaed long ‘kantri ya we i gud tumas’?

⁹ I no longtaem i pas, Rasia mo ol kantri we oli joen wetem hem, olgeta tu oli go insaed long ‘kantri ya we i gud tumas.’ ?Olsem wanem oli mekem samting ya? Long 2017, Rasia i putum tabu long wok blong ol Witnes blong Jehova, mo i sakem sam brata mo sista oli go long kalabus. Mo tu, hem i putum tabu long ol buk blong yumi, wetem Niu Wol Translesen Baebol. Biaen, hem i klosem branj ofis long Rasia wetem sam Haos Kingdom mo Haos Asembli, mo i tekemaot olgeta long han blong yumi. From ol samting ya, long 2018, Hed Kampani i luksave se Rasia mo ol kantri we oli joen wetem hem, oli king blong not. Be ol man blong Jehova oli no mekem wan samting blong agensem o sakemaot ol gavman blong man, nating se ol gavman ya oli mekem i nogud tumas long olgeta. Mo oli folem advaes blong Baebol blong prea from “ol haeman,” speseli taem oli stap mekem ol desisen we oli afektem wosip blong yumi.—1 Tim. 2:1, 2.

?KING BLONG NOT BAMBAE I WINIM KING BLONG SAOT?

10. ?King blong not bambae i winim king blong saot? Eksplenem.

¹⁰ Profet tok blong Daniel 11:40-45 i talem plante samting long saed blong king blong not. ?Hemia i min se bambae hem i winim king blong saot? Nogat. King blong saot bambae “i laef” yet, taem Jehova mo Jisas i spolem ol gavman blong man long faet blong Amagedon. (Rev. 19:20) ?Olsem wanem yumi save samting ya? Traem tingbaot sam narafala profet tok long Daniel mo Revelesen.

11. ?Yumi lanem wanem long Daniel 2:43-45? (Yu luk pija long fran pej.)

¹¹ Ridim Daniel 2:43-45. Profet Daniel i tokbaot wan bigfala pija blong man we oli wokem ol haf blong bodi blong hem long ol defdefren samting. Ol haf ya oli minim ol gavman we oli rul long ol defdefren taem, long ol kantri we ol man blong God oli stap long olgeta. Tufala leg blong pija ya daon, we oli wokem long aean wetem red graon, i minim Inglan mo Amerika. Taswe, yumi lanem se Inglan mo Amerika bambae i stap rul yet, taem Kingdom blong God i smasem ol gavman blong man.

12. ?Namba seven hed blong wael animol i minim wanem, mo i gud blong makem wanem?

¹² Aposol Jon tu i tokbaot ol gavman blong wol, we ol man blong God oli stap aninit long rul blong olgeta. Long profet tok blong Jon, ol gavman ya oli olsem wan wael animol we i gat seven hed blong hem. Namba seven hed i minim Inglan mo Amerika. I gud blong makem se animol ya i gat seven hed nomo, i no gat wan narafala hed bakegen. Mo taem Kraes wetem ol ami blong hem long heven oli spolem animol ya, bambae namba seven hed ya i stap rul yet.b—Rev. 13:1, 2; 17:13, 14.

I NO LONGTAEM, ?KING BLONG NOT BAMBAE I MEKEM WANEM?

13-14. ?Hu ya ‘King Gogo blong kantri ya Magog’? ?Ating wanem nao i pulum hem blong i girap agensem ol man blong God?

¹³ Profet tok blong Esikel i tokbaot sam samting we bambae oli hapen jes bifo we king blong not mo king blong saot i lus. I luk olsem se ol profet tok blong Esikel 38:10-23; Daniel 2:43-45; 11:44–12:1; mo Revelesen 16:13-16, 21 oli stap tokbaot ol semfala samting we bambae oli hapen long semtaem. Sipos i olsem, ?wanem ol samting ya we bambae yumi luk?

¹⁴ Samtaem afta we bigfala trabol i stat, ol king blong “evri ples long wol” bambae oli joen olsem wan grup blong ol nesen. (Rev. 16:13, 14; 19:19) Baebol i kolem grup ya se ‘King Gogo [o Gog] blong kantri ya Magog.’ (Esik. 38:2) Bambae grup ya i girap agensem ol man blong God, blong traem spolem olgeta. ?From wanem oli mekem olsem? Aposol Jon i tokbaot ol bigbigfala ston blong aes we bambae oli folfoldaon long ol enemi blong God. Maet ol ston blong aes ya oli minim ol strong tok blong jajmen we ol man blong Jehova bambae oli talemaot. Ating samting ya nao bambae i pulum King Gogo blong i girap agensem ol man blong God, blong traem finisim olgeta.—Rev. 16:21.

15-16. (1) ?Maet Daniel 11:44, 45 i stap tokbaot wanem? (2) ?Wanem bambae i hapen long king blong not mo ol narafala nesen, hemia King Gogo blong kantri ya Magog?

¹⁵ Ridim Daniel 11:44, 45. Maet tufala vas ya i stap tokbaot ol strong tok blong jajmen we ol man blong Jehova bambae oli talemaot, mo taem ya we ol enemi blong God oli girap agensem ol man blong hem laswan. Daniel i talem se “bambae wan nius i kam long is mo long not” we i mekem king blong not i “kros tumas,” nao i go blong “kilim plante man i ded.” I luk olsem se “plante man” we vas ya i tokbaot, i minim ol man blong Jehova.c Maet Daniel i stap eksplenem samting we bambae i hapen, taem King Gogo i girap agensem ol man blong God.

¹⁶ Taem king blong not wetem ol narafala gavman blong wol oli girap agensem ol man blong God, oli mekem Jehova i kros tumas, nao faet blong Amagedon bambae i stat. (Rev. 16:14, 16) Long taem ya nao, king blong not wetem ol narafala nesen, hemia King Gogo blong kantri ya Magog, bambae i lus, mo “i no gat man blong givhan” long hem.—Dan. 11:45.

17. Long Daniel 12:1, ?hu ya “Mikael we i hae we i hae,” mo hem i mekem wanem?

¹⁷ Ridim Daniel 12:1. Vas ya i tokbaot moa, olsem wanem king blong not mo ol narafala gavman bambae oli lus, mo yumi stap laef. ?Vas ya i minim wanem? Mikael i minim King blong yumi we i stap rul, Jisas Kraes. Hem i “stap lukaot” long ol man blong God, stat long taem ya we Kingdom blong hem i stanap long heven long 1914. I no longtaem, bambae hem i “kamtru,” i min se bambae hem i tekem aksen blong spolem ol enemi blong hem long faet blong Amagedon. Faet ya bambae i finisim “taem blong trabol,” we Daniel i talem se i bigwan moa i bitim ol narafala trabol bifo. Profet tok blong Jon tu i talem se hemia taem blong “bigfala trabol.”—Rev. 6:2; 7:14.

?BAMBAE NEM BLONG YU I STAP LONG “BUK BLONG GOD”?

18. ?From wanem yumi no nid blong fraet long fiuja?

¹⁸ Daniel mo Revelesen tugeta i talem se Jehova mo Jisas bambae tufala i sevem ol man blong tufala long taem blong bigfala trabol. Taswe, yumi no nid blong fraet, nomata wanem samting i hapen. Daniel i talem se ol man we bambae oli sef, “oli gat nem blong olgeta long buk blong God.” (Dan. 12:1) ?Yumi mas mekem wanem blong nem blong yumi i stap long buk ya? Yumi mas soemaot klia se yumi bilif long Jisas we i Smol Sipsip blong God. (Jon 1:29) Yumi mas givim laef blong yumi i go long God mo baptaes. (1 Pita 3:21) Mo yumi mas mekem bes blong yumi blong halpem ol narafala blong oli kasem save long Jehova. Long rod ya, yumi soemaot se yumi sapotem Kingdom blong God.

19. ?Yumi mas mekem wanem naoia? ?From wanem?

¹⁹ Naoia i stret taem blong trastem Jehova fulwan wetem oganaesesen blong hem. Mo naoia i stret taem blong sapotem Kingdom blong God. Sipos yumi mekem olsem, bambae yumi stap laef taem Kingdom ya i spolem gud king blong not mo king blong saot.

Sam long ol profet tok ya oli kamtru long semtaem. Ol profet tok ya oli soemaot se yumi stap long “taem blong en.”—Dan. 12:4, NW.

• 

  

  Ol Vas Rev. 11:7; 12:13, 17; 13:1-8, 12

  Profet Tok “Wael anamol” i rulum ol man blong plante taosen yia. Long taem blong en, hem i kasem kil long namba seven hed blong hem, biaen hem i kam gud bakegen, mo “olgeta man long wol” oli folem hem. Setan i yusum wael animol ya blong “faet agensem ol narafala pikinini” blong woman.

  Hem i Kamtru Afta we Bigfala Wota i ron, ol gavman we oli agensem Jehova oli rul. Long Wol Wo Wan, Inglan i lusum paoa. Hem i kam strong bakegen taem hem i joen wetem Amerika. Long taem blong en, Setan i yusum olgeta gavman blong oli agensem ol man blong God.

• 

  Ol Vas Dan. 11:25-45

  Profet Tok Long taem blong en, king blong not mo king blong saot tufala i agensem tufala.

  Hem i Kamtru Jemani i faet agensem Inglan mo Amerika. Long 1945, Soviet Yunion mo ol kantri we oli joen wetem hem oli kam king blong not. Long 1991, Soviet Yunion i lusum paoa, mo biaen, Rasia mo ol kantri we oli joen wetem hem oli kam king blong not.

• 

  Ol Vas Aes. 61:1; Mal. 3:1; Luk 4:18

  Profet Tok Jehova i sanem “man blong karem tok” blong hem, blong i “mekemrere rod” blong Kingdom blong Mesaea mo “talemaot gud nius.”

  Hem i Kamtru Stat long yia 1870, Brata Russell mo ol fren blong hem oli stadi gud long Baebol blong faenemaot trutok. Long 1881, oli pulum ol man blong God blong oli prij. Oli printim ol magasin we oli talem se: “I Nidim 1,000 Man Blong Prij” mo “Tabu Spirit i Makemaot Man Blong i Prij.”

• 

  Ol Vas Mat. 13:24-30, 36-43

  Profet Tok Wan man i planem wit long garen blong hem, nao wan enemi i kam sakem sid blong rabis gras antap long hem. Taem oli stap gru, rabis gras i haedem wit. Long taem blong tekemaot kakae, ol man oli seraotem wit long ol rabis gras.

  Hem i Kamtru Stat long 1870, i kam klia se hu i trufala Kristin mo hu i giaman Kristin. Long taem blong en, ol trufala Kristin oli joen wanples mo seraot long ol giaman Kristin.

• 

  Ol Vas Dan. 2:31-33, 41-43

  Profet Tok I gat wan bigfala pija blong man we oli wokem long ol defdefren samting, mo tufala leg blong hem daon oli aean wetem red graon.

  Hem i Kamtru Red graon i minim ol rebel we oli stap aninit long rul blong Inglan mo Amerika be oli girap agensem gavman. Oli mekem se gavman ya we i strong olsem aean i no save yusum ful paoa blong hem.

• 

  

  Ol Vas Mat. 13:30; 24:14, 45; 28:19, 20

  Profet Tok Oli hivimap “ol wit” long “haos blong putumgud ol kakae,” mo “gudfala slef we i waes” i lukaot long “ol narafala man” blong God. Wok blong talemaot ‘gud nius blong Kingdom’ i stat “long olgeta ples long wol.”

  Hem i Kamtru Long 1919, Jisas i putumap gudfala slef ya blong i lukaot long ol man blong God. Afta long taem ya, ol Baebol Studen oli strong moa blong prij. Tede, ol Witnes blong Jehova oli stap prij long bitim 200 kantri, mo oli wokem ol buk long bitim 1,000 lanwis.

• 

  Ol Vas Dan. 12:11; Rev. 13:11, 14, 15

  Profet Tok Wael animol we i gat tu hon i lidim ol man blong oli wokem “pija blong wael anamol,” mo i “bloem win blong hem i go long pija ya.”

  Hem i Kamtru Inglan mo Amerika i statem Ligofnesen, mo biaen plante narafala kantri oli joen long hem. Long ol yia 1926-1933, king blong not tu i joen long Ligofnesen. Ol man oli ting se Ligofnesen i save putum pis long wol, mo biaen oli gat sem tingting long Yunaeted Nesen. Be hemia samting we Kingdom blong God nomo i save mekem.

• 

  

  Ol Vas Dan. 8:23, 24

  Profet Tok Wan king we ol man oli fraet long hem “i spolem plante samting.”

  Hem i Kamtru Inglan mo Amerika i spolem plante samting. Long Wol Wo Tu, Amerika i sakem tu bigfala bom long wan kantri we i enemi blong hem. I no gat wan taem bifo we ol tul blong faet oli spolem wan kantri olsem.

• 

  Ol Vas Dan. 11:31; Rev. 17:3, 7-11, 16

  Profet Tok “Wael animol we i red we i red” mo i gat ten hon blong hem, i kamaot long wan bigfala hol mo i kam namba eit king. Buk blong Daniel i tokbaot king ya olsem “rabis god ya we i spolem ol samting.”

  Hem i Kamtru Long Wol Wo Tu, Ligofnesen i lusum paoa, mo afta long faet ya, oli “putumap” Yunaeted Nesen. Olsem oli bin mekem long Ligofnesen, oli givim ona long Yunaeted Nesen we i stret blong givim long Kingdom blong God nomo. Yunaeted Nesen bambae i spolem ol giaman skul.

• 

  

  Ol Vas 1 Tes. 5:3; Rev. 17:16

  Profet Tok Ol nesen oli talemaot se “i gat pis mo seftaem,” nao “ol ten hon” blong “wael anamol ya” oli spolem “woman blong rod.” Afta, ol nesen oli lus.

  Hem i Kamtru Maet ol nesen oli talem se oli mekem wol i sef mo i gat pis. Nao ol kantri we oli joen long Yunaeted Nesen bambae oli spolem ol giaman skul. Hemia i statem taem blong bigfala trabol, we bambae i finis long Amagedon, taem wol blong Setan i lus.

• 

  Ol Vas Esik. 38:11, 14-17; Mat. 24:31

  Profet Tok King Gogo (o Gog) i kam insaed long kantri blong ol man blong God. Nao ol enjel oli hivimap ‘ol man we God i jusumaot olgeta.’

  Hem i Kamtru King blong not mo ol narafala gavman blong wol, bambae oli girap agensem ol man blong God. Afta we samting ya i stat, ol tabu Kristin we oli stap yet long wol bambae oli go long heven.

• 

  Ol Vas Esik. 38:18-23; Dan. 2:34, 35, 44, 45; Rev. 6:2; 16:14, 16; 17:14; 19:20

  Profet Tok “Man we i sidaon” long “waet hos” i “winim gud ol enemi blong hem,” taem hem i spolem Gog mo ol ami blong hem. Hem i sakem “wael anamol” i go long “bigfala lek blong faea,” mo wan ston i smasem bigfala pija blong man.

  Hem i Kamtru Jisas, we i King long Kingdom blong God, bambae i sevem ol man blong God. Hem wetem ol enjel mo ol 144,000 we oli rul wetem hem, bambae oli spolem gud grup blong ol nesen we oli girap agensem ol man blong God. Hemia nao en blong wol blong Setan.