Halpem Ol Man Long Fulwol Blong Oli Save Rid Mo Raet

Agostinho blong Brasil i talem se: “Mi gruap long wan plantesen longwe long taon. Mi lego skul blong mi save wok mo givhan long famle.” Agostinho i lanem blong rid mo raet taem hem i gat 33 yia. Hem i talem se: “Taem mi lanem blong rid mo raet, mi tinghae moa long mi wan, mi no moa sem.”

Agostinho i wan nomo long plante man (bitim 250,000) we ol Witnes blong Jehova oli tijim olgeta long ol 70 yia we i pas, blong oli save rid mo raet. ?From wanem ol Witnes blong Jehova oli mekem ol kos olsem? ?Wanem gudfala frut i kamaot from?

I Had Blong Lanem Samting Taem Yu No Save Rid Mo Raet

Long 1935, ol Witnes blong Jehova oli stap prij long 115 kantri. Blong prij long ol man we oli toktok ol defren lanwis, ol misinari oli plei sam rikoding blong ol Baebol tok long lanwis blong ol man ya, mo samtaem oli givim ol buk long lanwis blong olgeta. Plante man oli intres long Baebol, be plante oli slo blong lanem samting from we oli no save rid mo raet.

I had blong man we i no save ridim Baebol hem wan, i lanem blong folem ol tok blong Baebol. (Josua 1:8; Ol Sam 1:2, 3) Mo tu, i had blong hem i mekem ol wok we ol tru Kristin oli mas mekem. I had blong ol papa mo mama we oli no save rid, oli tijim ol pikinini blong olgeta. (Dutronome 6:6, 7) Mo i had blong ol niufala Witnes we oli no save rid, oli yusum Baebol blong tijim ol narafala.

Kos Blong Tijim Ol Man Blong Rid Mo Raet

Long ol yia afta long 1940 mo 1950, Nathan H. Knorr mo Milton G. Henschel, we tufala i lukaot long wok blong ol Witnes blong Jehova long taem ya, tufala i go long plante kantri blong putumap ol plan blong prij. Long ol kantri we plante man oli no save rid mo raet, tufala i askem long ol branj ofis blong oli mekem ol klas long ol kongregesen, blong tijim ol man blong oli save rid mo raet.

Ol branj ofis oli givim advaes long ol kongregesen olsem wanem blong mekem ol klas ya. Long sam kantri, gavman i stanemap sam kos finis. Sam fasin blong tij mo sam buk we oli yusum oli givhan long ol Witnes. Wan ples we oli mekem olsem, hemia Brasil. Gavman i sanem ol buk mo sam narafala samting long branj ofis, ale branj ofis i sanem olgeta oli go long ol kongregesen. Long sam narafala kantri, ol Witnes oli folem prapa plan blong olgeta blong mekem kos ya.

Kos ya i blong evriwan, ol man mo ol woman, ol yangfala mo ol olfala. Oli save lanem blong rid long prapa lanwis blong olgeta, nating se long sam kongregesen, i mas gat plante klas long ol defren lanwis.

I Gat Gudfala Frut i Kamaot

?Wanem gudfala frut i kamaot? Wan Witnes long Meksiko i talem se: “Naoia mi kasem save long Baebol, mo ol tok blong hem i tajem hat blong mi. Mi save storian gud wetem ol neba, mo mi tokbaot Baebol wetem plante moa man.”

Be kos blong tijim ol man blong rid mo raet i no givhan nomo long ol man blong oli kasem save long Baebol. Aesak blong Burundi i talem se: “Taem mi lanem blong rid mo raet, hemia i givhan long mi blong mi lanem wok ya blong bildim haos tu. Naoia mi foman blong ol bigfala projek blong bildim ol haos.”

Jesusa blong Peru i gat 49 yia taem hem i lanem blong rid mo raet. Hem i talem se: “Blong lukaot gud long haos mo famle, mi mas naf blong ridim ol praes mo ol nem blong evri samting long maket. Bifo, i had blong mi kasem save. Naoia, mi no moa fraet blong go long stoa blong pem ol samting we famle i nidim.”

Long ol yia we i pas, ol haeman blong gavman long plante kantri oli talem ol gudfala toktok long ol Witnes blong Jehova, from wok blong olgeta blong tijim ol man blong rid mo raet. Tede, ol Witnes blong Jehova oli gohed blong mekem kos ya blong rid mo raet, mo oli yusum ol buk mo ol fasin blong tij we oli kam gud moa long ol yia we i pas. Mo tu, oli wokem klosap 224 milian buklet long 720 lanwis, blong givhan long ol man we oli no save rid mo raet mo olgeta we oli no skul gud.a