Ol Witnes Blong Jehova Long Niusilan ?Oli Ol Kristin We Oli Gat Pis Mo Onagud Long God?

Long 21 Oktoba 1940, gavman blong Niusilan i talemaot se oganaesesen blong ol Witnes blong Jehova i denja long ol man. Nating se nius ya i mekem se ol Witnes blong Jehova oli kasem hadtaem, be tingting blong olgeta i no foldaon. Oli gohed nomo blong joen wanples blong mekem wosip, nating se polis i save kam arestem olgeta.

Andy Clarke i no wan Witnes long taem ya, be waef blong hem Meri i wan Witnes. Andy i luk se Meri i gohed blong joen long ol miting nating se hem i kasem trabol. Andy i fraet se bambae oli arestem Meri taem hem i stap long miting. Taswe, Andy i stat blong go wetem Meri long ol miting, hem i se: “!Sipos oli arestem yu, bae oli mas arestem mi tu!” Stat long taem ya, Andy i no mestem wan miting wetem waef blong hem. Biaen, Andy i baptaes blong kam wan Witnes. Strong tingting we Meri i gat long taem ya we gavman i agensem ol Witnes, i sem mak long plante narafala Witnes long Niusilan long Wol Wo Tu.

Oli Gohed Nating Se Oli Stap Kalabus

Wan dei, polis i arestem John Murray we i gat 78 yia, taem hem i stap go long ol haos blong storian wetem ol man long Baebol. Kot i talem se hem i stap joen long wan oganaesesen we i agensem gavman. Plante narafala Witnes tu oli pas long kot. Samfala oli faen, sam oli go long prisen blong tri manis.

Ol Witnes oli no wantem joen long ami, from we oli lanem long Baebol se i no stret blong mekem olsem. (Aesea 2:4) From samting ya, oli kasem hadtaem. From we ol Witnes oli no wantem tren blong faet long Wol Wo Tu, gavman i sanem samwe long 80 oli go long ol kamp we oli olsem kalabus. Nating se oli mekem i nogud long olgeta, mo ples i kolkol bitim mak, be ol brata ya oli glad blong gohed blong wosipim Jehova.

Kwiktaem nomo, ol Witnes long ol kamp ya oli mekem plan blong ol miting mo wok blong prij. Oli wok olsem wan kongregesen, oli gat ol miting mo oli go prij long ol narafala prisena. Long sam kamp, oli letem ol Witnes oli mekem asembli sipos i gat wan gad i stap. Sam prisena oli lanem trutok blong Baebol mo oli baptaes long ol kamp ya.

Brus i lasbon boe blong Meri mo Andy we yumi tokbaot finis. Taem Brus i stap long kamp, hem i luk se hemia wan janis blong kasem save moa long God mo Baebol. Hem i talem se: “I olsem we mi stap go long skul, from we mi save storian mo askem kwestin long ol brata we oli stap longtaem long trutok, nao long rod ya, mi lanem plante niufala samting.”

Long yia 1944, gavman i tokbaot se bambae i letem samfala long ol kamp ya oli gofri. Be ami i no wantem, from we i talem se sipos ol Witnes oli gofri, bambae oli tokbaot bilif blong olgeta long ol narafala. Wan ripot i talem se: “Sipos yumi gohed blong holem olgeta oli stap kalabus, maet hemia i kontrolem olgeta smol, be bambae i no jenisim olgeta.”

Oli No Denja

Taem gavman i putum tabu long wok blong ol Witnes blong Jehova, hemia i mekem se sam man oli wantem save moa long ol Witnes. Sloslo, plante oli kasem save se ol Witnes blong Jehova oli no denja long ol man. Oli luk se ol Witnes oli ol Kristin we oli stap long pis, mo oli no spolem ol narafala. From samting ya, namba blong ol Witnes long Niusilan i go antap. !Long 1939, i gat 320 Witnes, be long 1945 i gat 536!

Sam haeman we oli gat stret tingting, oli luksave se i no stret blong putum tabu long ol Witnes blong Jehova. Wan jaj i sakemaot kot kes blong wan brata we oli arestem hem taem hem i stap prij, i talem se hemia i no wan samting blong pas long kot from. Hem i se: “Folem save we mi mi gat long loa, mi bilif se i no stret nating blong talem se wan man we i stap givimaot ol Baebol i brekem loa.”

Long en blong wo, gavman i tekemaot tabu long ol Witnes, nao oli gohed wetem tingting we i strong moa bitim bifo, blong halpem ol man blong kasem save long Kingdom blong God. Long 1945, branj ofis i raetem leta i go long ol kongregesen long Niusilan, i talem se: “I gud yumi waes, yumi toktok kaen, mo yumi soemaot fasin fren long evriwan. Yumi no rao wetem olgeta. Yumi mas tingbaot se ol man we yumi mitim olgeta oli bilif wetem fulhat blong olgeta, long ol tijing blong skul blong olgeta, mo oli traehad blong folem ol tijing ya. . . . Plante long olgeta oli ‘ol sipsip’ blong Masta, we yumi mas lidim olgeta oli go long Jehova mo kingdom blong hem.”

Tede, ol Witnes blong Jehova oli gohed blong tokbaot Baebol wetem ol man we oli laef long Niusilan mo ol turis tu. !Wan dei, wan grup blong 4 Witnes long Turangi, oli toktok wetem 67 man we oli kam long 17 kantri!

I klia se ol man Niusilan oli luksave se ol Witnes blong Jehova oli ol Kristin we oli gat pis, oli onagud long God, mo oli tinghae long trutok blong Baebol. Evri yia, plante handred man oli baptaes blong kam ol Witnes blong Jehova. Long 2019, i gat bitim 14,000 Witnes we oli glad blong gohed long wok blong Jehova long kantri ya long saot.