“Mi Laekem Tumas Ol Spot Olsem Karate”

LAEF BLONG MI BIFO

Mi givim bigfala kil long man we mi praktis wetem hem. Mi no minim blong kikim hem long nus blong hem. Mi harem nogud, mo mi tingbaot sipos i stret blong gohed blong mekem ol spot olsem karate. ?From wanem mastik ya i mekem se mi kwestinim spot ya we mi laekem plante yia finis? Fastaem, bambae mi eksplenem olsem wanem mi joen long ol spot ya olsem karate.

Mi mi gruap klosap long taon ya Buffalo, long Niu Yok, Yunaeted Stet. Famle blong mifala i strong Katolik mo i hapi. Mi go long Katolik skul mo mi mekem smol wok long jos. Papa mo Mama i wantem se mi mo sista blong mi i gat wan gudfala laef. Taswe, sipos mi gat ol gudfala mak long skul, tufala i letem mi mi plei spot o wok haftaem, afta we skul i finis. From samting ya, mi lanem blong mekem i strong long mi wan, taem mi yangfala nomo.

Taem mi gat 17 yia, mi stat blong lanem ol spot olsem karate. Mi tren 3 aoa evri dei, 6 dei long wan wik, mo mi gohed olsem blong plante yia. Mo tu, mi spenem plante aoa evri wik blong tingbaot ol teknik mo muv we mi mas mekem, mo mi wajem ol video blong kamgud moa. Mi laekem blong kavremap ae blong mi taem mi praktis, nating se mi holem ol tul blong faet. Mi brekem wud o brikis taem mi kilim wan taem nomo wetem han blong mi. Mi kam wan nambawan man long spot ya mo mi winim ol trofi. Spot ya i kam impoten moa i bitim ol narafala samting long laef blong mi.

Mi ting se mi gat wan gudfala laef. Mi kasem ol hae mak long yunivesiti. Mi wok blong wan bigfala kompiuta kampani olsem wan enjinia. Mi kasem bigfala pei, mi pem wan haos, mo mi gat wan gelfren. I luk olsem se mi gat wan gudfala laef, be tingting blong mi i fasfas long plante kwestin long saed blong laef.

BAEBOL I JENISIM LAEF BLONG MI

Blong faenem ansa long ol kwestin ya, mi stat blong go long jos tu taem long wan wik, mo mi prea long God blong i givhan long mi. Wan dei, mi stap storian wetem fren blong mi, mo storian ya i jenisim laef blong mi. Mi askem long hem se: “?Yu stap tingbaot from wanem yumi laef?” Mo mi gohed se: “!I gat tumas trabol mo fulap nogud fasin!” Hem i talem long mi se hem i bin askem ol semfala kwestin ya, mo hem i faenem ansa blong olgeta long Baebol. Hem i givim wan buk we nem blong hem Yu Save Laef Foreva Long Paradaes Long Wol.a Hem i talem se hem i stap stadi Baebol wetem ol Witnes blong Jehova. Fastaem mi fraet, from mi ting se mi mas ridim ol buk blong skul blong mi nomo. Be mi wantem tumas blong faenem ansa blong ol kwestin blong mi, taswe mi mas ridim buk ya blong luk sipos ol tijing blong ol Witnes oli stret.

Mi sapraes blong faenemaot samting we Baebol i tijim. Mi lanem se fastaem God i wantem se ol man oli laef olwe long paradaes long wol, mo hem i no jenisim tingting blong hem. (Jenesis 1:28) Mi sapraes blong luk nem blong God, Jehova, long Baebol blong mi (King James Version), mo blong save se mi stap prea from nem ya, taem mi ripitim Lodsprea. (Ol Sam 83:18; Matiu 6:9) Mo tu, mi kasem save from wanem God i letem ol man oli stap safa blong smoltaem. !Evri samting we mi lanem oli klia long tingting blong mi! Mi glad we mi glad.

Mi no save fogetem fes miting blong ol Witnes blong Jehova we mi go long hem. Evriwan oli kam sekhan mo oli wantem save nem blong mi. I gat wan spesel pablik tok long saed blong ol prea we God i harem. Mi intres long topik ya from we mi stap prea long God blong i givhan long mi. Smoltaem biaen, mi go long Memoriol blong ded blong Jisas. Long ol miting ya, mi sapraes blong luk we ol pikinini tu oli folem ol vas long Baebol. Fastaem mi no save faenem ol vas, be ol Witnes oli halpem mi blong save olsem wanem blong yusum Baebol.

Taem mi stap go long ol miting, mi stat blong tinghae long ol gudfala tijing we ol Witnes oli givim. Mi lanem plante samting long ol miting, mo taem mi gobak long haos, mi haremgud tumas long tingting blong mi. I no longtaem ol Witnes oli askem long mi sipos mi wantem stadi Baebol wetem olgeta.

Mi luk se fasin blong ol Witnes blong Jehova i defren olgeta long samting we mi luk long jos blong mi. Ol Witnes oli joengud mo evriwan oli traehad blong mekem God i glad. Sloslo mi luksave se oli ol tru Kristin, from we oli gat lav ya we i makemaot ol tru Kristin.—Jon 13:35.

Taem mi gohed blong stadi, mi mekem plante jenis long laef blong mi blong folem ol rul blong Baebol. Be mi harem se mi no save lego ol spot olsem karate. Mi laekem tumas blong tren mo joen long ol kompetisin. Taem mi talemaot samting ya long Witnes we i mekem Baebol stadi blong mi, hem i talem long kaen fasin se: “Yu gohed nomo blong stadi, mi save se bae yu mekem stret desisen.” Hemia nao samting we mi nidim blong harem. Moa we mi stadi, moa we mi wantem mekem Jehova God i glad.

Olsem mi tokbaot long stat blong stori ya, mi mestem nao mi kikim nus blong man we mi stap praktis wetem hem. Long taem ya, tingting blong mi i jenis bigwan. Aksiden ya i mekem mi mi tingbaot sipos i oraet blong gohed long spot ya, mo long sem taem mi kam wan man blong Kraes we i gat pis wetem ol man. Mi lanem finis vas ya long Aesea 2:3, 4 we i talem se, olgeta we oli folem ol tok blong Jehova “bambae oli no moa lanem blong faet.” Mo tu, Jisas i tijim ol man se oli no mas faet, nating se narafala i mekem i no stret long olgeta. (Matiu 26:52) Taswe, mi lego spot ya we mi laekem tumas.

Afta long hemia, mi folem advaes ya blong Baebol we i talem se: “Yu mas trenem yu blong yu kasem mak ya, hemia blong yu fasgud long God.” (1 Timoti 4:7) Mi no moa spenem plante taem long ol spot olsem karate, be mi yusum taem ya blong kam klosap moa long God mo mekem wok blong hem. Gelfren blong mi i no agri long samting we mi stap lanem long Baebol, taswe mitufala i seraot. Long 24 Jenuware 1987, mi baptaes blong kam wan Witnes blong Jehova. Smoltaem biaen, mi stat blong prij fultaem, i min se mi volontia blong yusum taem blong mi blong tijim ol man long Baebol. Mi gohed blong mekem wok blong Jehova fultaem kam kasem naoia, mo mi spenem sam taem tu blong wok long wol hedkwota blong ol Witnes blong Jehova long Niu Yok, Yunaeted Stet.

LAEF BLONG MI NAOIA

Naoia we mi faenem trutok long saed blong God, mi luksave se hemia nao samting we bifo mi nidim long laef blong mi. Naoia mi no moa harem se mi emti. Be laef blong mi i gat mining, mi gat wan gudfala hop long fiuja, mo mi rili hapi. Mi haremgud yet blong eksasaes, be hemia i no moa impoten samting long laef blong mi. Samting we i moa impoten i blong mekem wok blong Jehova God.

Taem mi mekem ol spot olsem karate, oltaem mi stap wajem ol man raonabaot long mi, mo mi stap tingbaot samting we bambae mi mekem sipos wan man i atakem mi. Tede, mi stap wajem yet ol man raonabaot long mi, be from wan defren risen, hemia blong givhan long olgeta. Baebol i givhan long mi blong mi gat gladhat blong givim samting long narafala, mo blong mi kam wan gudfala hasban blong naesfala waef blong mi Brenda.

Fastaem mi laekem tumas ol spot olsem karate. Be naoia mi putum samting we i moa gud long ples blong olgeta. Ol tok ya blong Baebol i stret nomo, se: “Fasin ya blong trenem bodi, i save givhan long man blong smoltaem nomo. Be fasin blong fasgud long God, i save givhan long man long evri samting, from we hem i save mekem man i kasem olgeta blesing long laef naoia mo long fiuja tu.”—1 Timoti 4:8.