Evri yia, plante yangfala blong ol Witnes blong Jehova oli baptaes. ?Yu yu stap tingbaot blong baptaes? Sipos yes, fastaem yu mas kasem save long mining blong givim laef long Jehova mo baptaes.

• ?Baptaes i minim wanem?

• ?Givim laef long Jehova i minim wanem?

• ?From wanem baptaes i impoten?

• Sam yangfala oli talem wanem

• Ol giaman tingting mo trutok

?Baptaes i minim wanem?

Baptaes we Baebol i tokbaot i min se yu draon fulwan long wota, oli no jes saksakem wota long hed blong yu, mo baptaes i soemaot wan impoten samting.

• Taem yu draon fulwan long wota, yu soemaot klia long olgeta man se bambae yu no moa laef blong mekem samting we yu nomo yu wantem.

• Taem yu kamaot long wota, yu soemaot se yu statem wan niufala laef blong mekem samting we God i glad long hem.

Taem yu baptaes yu soemaot long ol man we yu agri se Jehova i gat raet blong talem samting we i stret mo i no stret, mo yu soemaot promes blong yu se yu jus blong mekem samting we hem i wantem.

Blong tingbaot: ?From wanem yu wantem promes long fored blong ol man se bambae yu obei long Jehova long ful laef blong yu?—Luk 1 Jon 4:19 mo Revelesen 4:11.

?Givim laef long Jehova i minim wanem?

Bifo we yu baptaes, yu mas givim laef blong yu i go long Jehova. ?Olsem wanem yu mekem samting ya?

Yu mekem wan prea blong promes long Jehova se bambae yu wosipim hem olwe, mo bambae yu mekem samting we hem i wantem, nomata wanem samting i hapen o wanem samting ol narafala oli jusum blong mekem.

Baptaes i soemaot long ol man samting we yu wan yu promes long Jehova. Yu stap talem long ol narafala se yu no moa bos long laef blong yu, be naoia laef blong yu i blong Jehova.—Matiu 16:24.

Blong tingbaot: ?From wanem laef blong yu i kamgud moa taem yu givim i go long Jehova? Luk Aesea 48:17, 18 mo Hibru 11:6.

?From wanem baptaes i impoten?

Jisas i talem se ol disaepol blong hem oli mas baptaes. (Matiu 28:19, 20) Taswe, tede tu ol Kristin oli mas baptaes. Blong talem stret, Baebol i talem se yumi mas baptaes blong God i save sevem yumi.—1 Pita 3:21.

Be risen blong baptaes i mas from we yu lavem Jehova mo yu laekem blong stap olsem fren blong hem. Yu mas gat sem tingting olsem man blong raetem Sam ya se: “?Bambae mi givim wanem long Jehova olsem pei, blong ol gudfala samting we hem i bin mekem long mi? . . . bambae mi singaot long nem blong Jehova. . . . Bambae mi mekem olgeta samting we mi promes long Jehova.”—Ol Sam 116:12-14.

Blong tingbaot: ?Wanem gudfala samting we Jehova i mekem blong yu, mo olsem wanem yu save givim samting long hem olsem pei? Luk Dutronome 10:12, 13 mo Rom 12:1.

Sipos yu stap folem ol rul blong Baebol mo yu stap traehad blong fren gud wetem God, ating yu stap tingbaot blong baptaes. ?Olsem wanem blong save sipos yu rere blong baptaes?a

Long atikol ya

• ?Mi mas kasem hamas save?

• ?Mi mas mekem wanem?

• Sam yangfala oli talem wanem

?Mi mas kasem hamas save?

Blong rere blong baptaes, i no nid blong lanem baehat plante save, olsem ol studen oli mekem blong pasem eksam long skul. Be yu mas “yusum gud tingting” blong yu blong bildimap bilif se ol tijing blong Baebol oli tru. (Rom 12:1) Eksampol:

• ?Yu yu bilif se God i stap mo i stret we yu wosipim hem?

  Baebol i talem se: “Man we i wantem kam klosap long God, hem i mas bilif we God i stap, mo we hem bambae i givim pei long ol man we oli stap traehad blong faenem hem.”—Hibru 11:6.

  Askem se: ‘?From wanem mi mi bilif long God?’ (Hibru 3:4) ‘?From wanem i stret blong wosipim hem?’—Revelesen 4:11.

  ?Yu nidim help? Yu luk “?Kriesen o Evolusen?—Pat 1: ?From Wanem i Stret Blong Bilif Long God?”

• ?Yu yu bilif se ol tok blong Baebol i kamaot long God?

  Baebol i talem se: “Olgeta tok blong Baebol oli kamaot long God fastaem, mo oli stret gud blong tijim man, blong stretem man, blong stretem olgeta samting, mo blong stretem man folem stret fasin.”—2 Timoti 3:16.

  Askem se: ‘?From wanem mi bilif se Baebol i no wan buk we i talemaot tingting blong ol man nomo?’—Aesea 46:10; 1 Tesalonaeka 2:13.

  ?Yu nidim help? Yu luk “?Olsem Wanem Baebol i Save Givhan Long Mi?—Haf 1: Kasem Ol Gudfala Samting Long Baebol.”

• ?Yu yu bilif se Jehova i stap yusum Kristin kongregesen blong mekem wok blong hem?

  Baebol i talem se: “Tru long kongregesen mo tru long Kraes Jisas, i gud yumi givim glori long [God] gogo i no save finis.”—Efesas 3:21.

  Askem se: ‘?Mi tingbaot ol save blong Baebol we mi lanem long ol Kristin miting, olsem samting we i kamaot long ol man o long Jehova?’ (Matiu 24:45) ‘?Mi mi stap go long miting taem papa mo mama i no save go (sipos tufala i letem yu)?’—Hibru 10:24, 25.

  ?Yu nidim help? Yu luk “?From Wanem i Gud Blong Go Long Ol Miting Long Haos Kingdom?”

?Mi mas mekem wanem?

I no nid blong yu stret gud olgeta blong baptaes. Be yu mas soemaot se yu rili wantem ‘tanem baksaed long samting we i nogud, mo mekem samting we i gud.’ (Ol Sam 34:14) Eksampol:

• ?Yu yu stap folem ol fasin we Jehova i laekem long laef blong yu?

  Baebol i talem se: “Yufala i mas gohed blong mekem se tingting blong yufala we i save stikim yufala, i stap klin oltaem.”—1 Pita 3:16.

  Askem se: ‘?Olsem wanem mi soemaot se mi “yusum tingting” blong mi, mo ‘mi trenem tingting blong mi blong luksave samting we i stret mo samting we i rong’?’ (Hibru 5:14) ‘?Mi save tingbaot sam taem we mi no bin letem ol nara yangfala oli pulum mi blong mekem samting we i rong? ?Mi mi jusum ol fren we oli pulum mi blong mekem gudfala fasin?’—Ol Proveb 13:20.

  ?Yu nidim help? Yu luk “?Olsem Wanem Blong Trenem Tingting Blong Mi We i Save Stikim Mi?”

• ?Yu yu kasem save se yu mas talemaot long Jehova from wanem ol aksen blong yu oli olsem?

  Baebol i talem se: “Yumi wanwan i mas talemaot olgeta fasin blong yumi long God.”—Rom 14:12.

  Askem se: ‘?Mi mi stap giaman long mi wan mo ol narafala?’ (Hibru 13:18) ‘?Mi mi talemaot ol mastik blong mi, o mi haedem olgeta, o mi blemem narafala from?’—Ol Proveb 28:13.

  ?Yu nidim help? Yu luk “?Olsem Wanem Blong Dil Wetem Ol Mastik Blong Mi?”

• ?Yu stap gohed blong fren gud wetem Jehova?

  Baebol i talem se: “Yufala i mas kam klosap long God, nao hem bambae i kam klosap long yufala.”—Jemes 4:8.

  Askem se: ‘?Mi stap mekem wanem blong kam klosap long Jehova?’ Eksampol: ‘?Mi mi ridim Baebol evri dei?’ (Ol Sam 1:1, 2) ‘?Mi mi prea oltaem?’ (1 Tesalonaeka 5:17) ‘?Mi mi stap tokbaot evri samting wetem Jehova long ol prea blong mi? ?Ol fren blong mi, oli fren blong Jehova?’—Ol Sam 15:1, 4.

  ?Yu nidim help? Yu luk “?Olsem Wanem Baebol i Save Givhan Long Mi?—Haf 2: Laekem Blong Ridim Baebol” mo “?From Wanem Mi Mas Prea?”

TRAEM HEMIA: Blong givhan long yu blong rere blong baptaes, ridim japta 37 blong buk ya Questions Young People Ask—Answers That Work, Volium 2 (Inglis). Makem gud ol save long pepa blong fulumap, long pej 308 mo 309.

?Yu yu fraet blong givim laef blong yu long Jehova mo baptaes? Sipos yes, atikol ya bambae i givhan long yu blong winim fraet ya.

Long atikol ya

• ?Olsem wanem sipos mi mekem wan bigfala mastik afta we mi baptaes?

• ?Olsem wanem sipos mi fraet se mi no save mekem ol wok we i joen wetem baptaes?

• ?Olsem wanem sipos mi harem se mi no gud inaf blong mekem wok blong Jehova?

• Sam yangfala oli talem wanem

?Olsem wanem sipos mi mekem wan bigfala mastik afta we mi baptaes?

?From wanem yu wari?: Maet yu save wan we kongregesen i putumaot hem from we hem i mekem bigfala sin. (1 Korin 5:11-13) Mo maet yu wari se sem samting bambae i hapen long yu.

“Fastaem, taem mi tingbaot baptaes, mi fraet se bambae mi mekem wan bigfala mastik afta we mi baptaes. Mo mi tingbaot olsem wanem papa mo mama blong mi bambae tufala i sem sipos samting ya i hapen.”—Rebeka.

Stamba vas: “I gud man nogud i lego ol fasin blong hem . . . I gud hem i gobak long Jehova, hem bambae i gat sore long hem, yes, long God blong yumi, from we bambae hem i fogif long wan fasin we i bigwan.”—Aesea 55:7.

Tingbaot samting ya: I tru, kongregesen i putumaot man we i mekem bigfala sin mo i no tanem tingting blong hem, be Jehova i sore long man we i mekem tingting blong hem i stap daon, i tanem tingting blong hem, mo i stretem rod blong hem.—Ol Sam 103:13, 14; 2 Korin 7:11.

Mo tu, samting we i tru se: Nating se yu no stret gud olgeta, be God i save givhan long yu blong yu naf blong winim ol samting we oli pulum yu. (1 Korin 10:13) Traem tingbaot, yu nomo yu jusum ol aksen blong yu, i no narafala.

“Fastaem mi fraet se bambae mi mekem wan bigfala mastik afta we mi baptaes. Be biaen, mi luksave se sipos mi no baptaes, hemia wan bigfala mastik tu. Mi luksave se mi no mas letem fraet blong ol samting we oli save hapen long fiuja, i blokem mi blong mekem samting we i stret naoia.”—Karen.

Stamba poen: Yu save jus blong blokem ol bigfala sin, olsem bighaf blong ol man blong Jehova oli mekem.—Filipae 2:12.

Samting blong halpem yu moa: Yu luk haf ya “?Olsem Wanem Mi Save Blokem Ol Traem?”

?Olsem wanem sipos mi fraet se mi no save mekem ol wok we i joen wetem baptaes?

?From wanem yu wari?: Maet yu save sam yangfala we oli bin go longwe long ol famle mo ol fren blong olgeta blong mekem moa long wok blong Jehova, mo maet yu wari se evriwan bambae oli ekspektem yu tu blong mekem olsem.

“Baptaes i openem rod blong wan Kristin i save kasem ol spesel wok, be samfala oli no rere yet, o maet sam samting long laef blong olgeta i blokem olgeta.”—Mari.

Stamba vas: “I gud man i jekem wok we hem nomo i mekem, blong faenemaot se wok ya i olsem wanem. Olsem nao, hem i save glad from wok we hem nomo i mekem, be i no from we hem i skelem wok blong hem wetem wok blong narafala.”—Galesia 6:4.

Tingbaot samting ya: I nogud yu skelem yu wetem narafala, be i moagud yu putum tingting blong yu i stap strong long ol tok long Mak 12:30 se: “Yu mas lavem Jehova we i God blong yu, long olgeta hat blong yu.”

Makem se yu mas mekem wok blong Jehova long olgeta hat blong yu, be i no hat blong narafala. Sipos yu rili lavem Jehova, bambae yu lukaot rod blong givim bes blong yu long hem.

“I tru se baptaes i wan bigfala samting, be i no wan hevi baden. Sipos yu stap joen oltaem wetem ol gudfala fren, bambae oli givhan long yu. Taem yu gohed sloslo blong mekem moa long wok blong Jehova, bambae yu glad moa. Be sipos yu no baptaes, bambae yu spolem yu wan bakegen.”—Julia.

Stamba poen: Yu mas wantem blong talem tangkiu from lav we Jehova i soemaot long yu. Hemia bambae i pulum yu blong givim bes blong yu long hem.—1 Jon 4:19.

Samting blong halpem yu moa: Yu luk haf ya “?Mi Mekem Gud Ol Wok We i Stap Long Han Blong Mi?”

?Olsem wanem sipos mi harem se mi no gud inaf blong mekem wok blong Jehova?

?From wanem yu wari?: !Jehova i Hae King blong heven mo wol, be yumi ol man yumi nating nomo! Maet samtaem yu stap tingbaot se, ‘Ating Jehova i no iven save se mi stap.’

“Mi mi wari se maet mi stap fren wetem Jehova nomo from we papa mo mama blong mi i Witnes blong Jehova, be i no from we Jehova i pulum mi wan.”—Natali.

Stamba vas: “I no gat man i save kam long mi sipos Papa we i sanem mi mi kam, hem i no pulum hem i kam.”—Jon 6:44.

Tingbaot samting ya: From we yu stap tingbaot blong baptaes, maet hemia i soemaot se Jehova i stap pulum yu blong yu kam klosap moa long hem. ?Yu no wantem mekem wan samting blong soemaot se yu glad?

Tingbaot tu se Jehova nomo i jusum hu bambae hem i pulum, be i no yu o narafala. Mo Tok blong hem i promes se sipos ‘yu kam klosap long God, hem bambae i kam klosap long yu.’—Jemes 4:8.

“Yu gat save long saed blong Jehova mo hem i pulum yu finis, hemia i soemaot se hem i lavem yu. Taswe, taem yu ting se yu no gud inaf blong mekem wok blong hem, i gud blong rimaenem yu wan se hem i no gat tingting olsem. Mo oltaem tingting blong Jehova i stret.”—Selina.

Stamba poen: Sipos yu kasem ol mak we Baebol i putum long saed blong baptaes, yu yu naf blong wosipim Jehova. Mo i stret nomo we hem i kasem wosip blong yu.—Revelesen 4:11.

Samting blong halpem yu moa: Yu luk haf ya “?From Wanem Mi Mas Prea?”