Bilif i Mekem Yumi Stanap Strong
BILIF i gat bigfala paoa. Taswe, taem Setan i wantem spolem yumi mo mekem se yumi no moa fren gud wetem Jehova, bilif i save “kilim faea we i laet long olgeta ara blong Man ya we i rabis.” (Efes. 6:16) Bilif i mekem se yumi save stanap strong taem yumi fesem ol problem we oli bigwan tumas, olsem ol bigbigfala hil. Jisas i talem long ol disaepol blong hem se: “Sipos bilif blong yufala i smol olsem sid blong mastad, bambae yufala i save talem long hil ya se: ‘Yu muvaot long ples ya, yu go longwe,’ mo hem bambae i muv i go.” (Mat. 17:20) From we bilif i save mekem se yumi fren moa wetem Jehova, i gud yumi tingbaot ol kwestin ya: ?Bilif hem i wanem? Sipos yumi tingbaot trutok olsem wan sas samting, ?olsem wanem hemia i save givhan long bilif? ?Olsem wanem blong mekem bilif i strong? ?Mo yumi mas bilif long hu?—Rom 4:3.
?BILIF HEM I WANEM?
Bilif i no minim nomo se yumi save samting we Baebol i talem, from we “ol rabis spirit tu oli bilif [se God i stap], mo oli stap seksek from.” (Jem. 2:19) Taswe ?bilif hem i wanem?
Yumi save se oltaem bambae i gat dei mo naet, long sem fasin, yumi trastem tok blong God se oltaem bambae i kamtru
Baebol i talem tu samting blong eksplenem bilif. Faswan: “Sipos yu gat bilif, bambae yu no gat tu tingting se samting we yu putum hop blong yu long hem, bambae i kamtru no nogat.” (Hib. 11:1a) Bilif i min se yu sua se evri samting we Jehova i talem i tru mo bambae i kamtru. Jehova i talem long ol man Isrel se: ‘Mi mi mekem promes finis wetem dei mo naet, se oltaem nomo, dei bambae i kam long stret taem blong hem, mo naet bambae i kam long stret taem blong hem. Mo long sem fasin, mi mekem promes wetem King Deved, se oltaem nomo, wan long olgeta we i stap kamaot biaen long hem bambae i kam king.’ (Jer. 33:20, 21) ?Yu yu fraet se wan dei san bambae i no moa girap mo godaon, nao i no moa gat dei mo naet? !Nogat! Yu sua se ol loa we God i stanemap bambae oli gohed blong mekem wol i tanem i goraon long san. Long sem fasin, yu sua se God bambae i mekem ol promes blong hem oli kamtru.—Aes. 55:10, 11; Mat. 5:18.
Sekenwan: Bilif i min se i gat klia pruf se “olgeta samting ya we yumi no save luk, be oli stap.” (Hib. 11:1b) Tingbaot sipos wan pikinini i askem long yu se: ‘?Olsem wanem yu save se i gat win?’ I tru, yu no save luk win, be bambae yu tokbaot samting we i pruvum se win i stap, olsem yumi stap pulum win, mo win i mekem ol han blong tri oli muvmuv. Pruf ya i givhan long pikinini blong i kasem save se win i stap, nating we hem i no save luk. Long sem fasin, bilif i stanap long klia pruf.—Rom 1:20.
TRUTOK I MAS STAP LONG HAT
From we bilif i stanap long pruf, man we i wantem gat bilif i mas kasem “stret save long trutok.” (1 Tim. 2:4) Be save ya i no naf. Aposol Pol i raetem se: “Hem i mas soemaot bilif we i kamaot long hat.” (Rom 10:10) I no naf blong save trutok nomo, be trutok i mas stap long hat. Samting ya nomo bambae i pusum yumi blong soemaot bilif, i min se folem trutok long laef blong yumi. (Jem. 2:20) Man we trutok i no stap long hat blong hem, i save luk pruf be i no bilivim, from we i wantem gohed blong folem prapa tingting blong hem, i no wantem jenis. (2 Pita 3:3, 4; Jud 18) Taswe, Baebol i tokbaot plante man long taem bifo, we oli luk ol merikel be oli no wokem bilif. (Nam. 14:11; Jon 12:37) Tabu spirit i wokem bilif long ol man we oli laekem trutok wetem fulhat blong olgeta.—Gal. 5:22; 2 Tes. 2:10, 11.
?OLSEM WANEM DEVED I WOKEM STRONG BILIF?
Wan man we i gat strong bilif, hemia King Deved. (Hib. 11:32, 33) Be i no evriwan long famle blong Deved we oli gat bilif. Traem tingbaot Eliab, bigfala brata blong Deved. Taem Deved i harem nogud from ol rabis tok we Golaeat i sakem, Eliab i tok long Deved. Hemia i soemaot se Eliab i no gat bilif. (1 Saml. 17:26-28) Yumi no bon wetem bilif, mo yumi no kasem bilif long papa mo mama blong yumi. Taswe Deved i gat bilif from we hem wan i fren gud wetem God.
Long Sam 27, Deved i soemaot olsem wanem hem i wokem strong bilif. (Vas 1) Hem i tingting dip long ol samting we i hapen finis long hem, mo olsem wanem Jehova i panisim ol enemi blong hem. (Vas 2, 3) Haos blong Jehova i impoten tumas long tingting blong Deved. (Vas 4) Hem i joen wetem ol narafala man blong wosipim God long haos blong hem. (Vas 6) Hem i prea long Jehova wetem fulhat blong hem. (Vas 7, 8) Mo tu, Deved i wantem kasem tijing long ol samting we Jehova i glad long hem. (Vas 11) Bilif i impoten tumas long Deved, taswe hem i askem se: “?Bambae mi mi olsem wanem sipos mi no gat bilif?”—Vas 13, NW.
?OLSEM WANEM BLONG MEKEM BILIF I STRONG?
Yu save gat bilif olsem Deved sipos yu folem ol tingting mo fasin we hem i tokbaot long Sam 27. Bilif i stanap long stret save, taswe sipos yu stadi Baebol oltaem mo ol buk we oli eksplenem Baebol, bambae i moa isi blong yu wokem fasin blong bilif we i frut blong tabu spirit. (Sam 1:2, 3) Taem yu stadi, tekem taem blong tingting dip tu. Sipos yu tingting dip, bambae yu glad moa long ol samting we Jehova i mekem, mo yu wantem talem tangkiu. Bambae yu wantem wosipim hem long ol miting, mo talemaot hop blong yu long ol narafala. Taem yu mekem samting ya, yu stap soemaot bilif. (Hib. 10:23-25) Mo tu, yu soemaot bilif taem yu neva lego fasin ya blong “prea.” (Luk 18:1-8) Yu mas “prea oltaem” long Jehova, mo trastem hem se ‘hem i stap tingbaot yu.’ (1 Tes. 5:17; 1 Pita 5:7) Bilif mo aksen i wok wanples. Bilif i pulum yu blong tekem aksen, mo taem yu tekem aksen, bilif i kam strong moa.—Jem. 2:22.
SOEMAOT BILIF LONG JISAS
Long naet bifo we Jisas i ded, hem i talem long ol disaepol se: “Yufala i mas soemaot se yufala i bilif long God, mo yufala i mas soemaot se yufala i bilif long mi tu.” (Jon 14:1) Taswe i no naf blong bilif long Jehova nomo, be yumi mas bilif long Jisas tu. ?Olsem wanem yu save soemaot bilif long Jisas? Bambae yumi tokbaot tri samting.
?Olsem wanem yumi soemaot bilif long Jisas?
Faswan: Yu mas tingbaot ransom sakrefaes blong Jisas olsem wan presen we God i givim long yu. Aposol Pol i talem se: “Laef ya we mi stap long hem naoia, mi mi gat from we mi bilif long Pikinini blong God we i lavem mi, nao i givim laef blong hem from mi.” (Gal. 2:20) Taem yu bilif strong se ransom i blong yu, yu soemaot bilif long Jisas. Hem i rod blong Jehova i fogivim ol sin blong yu, mo i mekem se yu gat hop blong kasem laef we i no save finis. Mo tu, ransom i bigwan moa i bitim ol narafala presen we oli soemaot se God i lavem yu. (Rom 8:32, 38, 39; Efes. 1:7) Sipos yu bilif se ransom i blong yu, bambae yu no stap daonem yu wan.—2 Tes. 2:16, 17.
Sekenwan: Tru long sakrefaes blong Jisas, yu save kam klosap long Jehova long prea. Yumi save prea long Jehova “we yumi no fraet blong toktok, blong hem i save sore long yumi mo i kaen long yumi long stret taem we yumi nidim help.” (Hib. 4:15, 16; 10:19-22) Prea i mekem tingting blong yumi i strong moa blong blokem ol samting we oli save mekem yumi sin.—Luk 22:40.
Namba tri: Yu mas obei long Jisas. Aposol Jon i raetem se: “Man we i soemaot se hem i bilif long Pikinini ya, bambae hem i gat laef we i no save finis. Be man we i no obei long Pikinini ya, bambae hem i no kasem laef ya, be kros blong God i stap long hem.” (Jon 3:36) Jon i talem se man we i soemaot bilif i defren olgeta long man we i no obei. Taswe, yu soemaot bilif long Jisas taem yu obei long hem. Yu obei long hem taem yu folem “loa blong Kraes,” hemia olgeta samting we hem i tijim mo talem. (Gal. 6:2) Mo tu, yu obei long Jisas taem yu folem advaes blong “gudfala slef we i waes.” (Mat. 24:45) Sipos yu mekem olsem, bambae yu naf blong stanap strong taem ol trabol we oli olsem bigfala hariken oli kasem yu.—Luk 6:47, 48.
‘YUSUM BILIF BLONG KAM STRONG MOA’
Wan man i krae long Jisas se: “!Mi mi bilif! !Be yu mekem bilif blong mi i kam strong moa!” (Mak 9:24) Man ya i gat smol bilif, be hem i luksave se i nidim moa. Bambae i gat sam taem long laef blong yumi evriwan, we yumi nidim moa bilif olsem man ya. Yumi mas mekem bilif i strong moa naoia. Olsem yumi tokbaot finis, yumi mekem bilif i strong moa, taem yumi stadi long Tok blong God mo tingting dip long hem. Hemia bambae i mekem se yumi glad moa long ol samting we Jehova i mekem blong yumi, mo yumi wantem talem tangkiu. Bilif blong yumi bambae i kam strong moa taem yumi joen wetem ol brata mo sista blong wosipim Jehova, talemaot hop blong yumi long ol narafala, mo prea oltaem. Mo tu, taem yumi wok blong mekem bilif blong yumi i strong, yumi kasem wan blesing we i bigwan tumas. Tok blong God i talem se: ‘Ol gudfala fren, yufala i mas yusum bilif ya blong mekem yufala i kam strong moa, blong yufala i gohed blong mekem ol samting we i save mekem God i lavem yufala.’—Jud 20, 21.