1, 2. ?Ol eria elda oli luksave wanem samting long kongregesen?

KLOSAP eria elda i finisim miting blong hem wetem ol elda. Hem i lukluk olgeta, mo i soemaot se hem i lavem olgeta from ol hadwok we oli stap mekem. Samfala long olgeta oli olfala, i olsem se hem i save singaot papa long olgeta. Be i gat wan impoten samting we hem i luk mo i mekem hem i wari. Hem i askem long olgeta se: “Ol brata, ?yufala i mekem wanem blong trenem ol narafala blong oli mekem moa wok long kongregesen?” Tok ya i mekem olgeta oli tingbaot se, long laswan visit blong eria elda, hem i askem olgeta blong oli tekem taem blong trenem ol narafala. Nao wan elda i ansa se: “Mifala i mekem smol nomo.” Mo ol narafala elda tu oli agri.

² Sipos yu yu wan elda, maet yu tu yu talem wan ansa olsem. Ol eria elda oli luksave se plante elda, oli mas spenem moa taem blong trenem ol yangfala mo ol olfala brata, blong oli lukaot long kongregesen. Be, samtaem i no isi. ?From wanem?

3. (1) ?Baebol i soemaot olsem wanem se i impoten blong trenem narafala? ?From wanem yumi evriwan i mas glad blong lanem ol save ya? (Yu luk futnot.) (2) ?Wanem i mekem se maet i had long sam elda blong oli trenem narafala?

³ Sipos yu yu wan elda, yu save se i impoten blong tekem taem blong trenem ol brata.a Mo yu save se i nidim moa brata blong oli givhan long ol kongregesen blong oli stap strong naoia, mo blong sapotem ol niufala kongregesen long fiuja. (Ridim Aesea 60:22.) Baebol i talem se yu mas “tijim ol narafala.” (Ridim 2 Timoti 2:2.) Be maet i no isi blong mekem samting ya. From we yu mas wok mo lukaot long famle blong yu. Mo tu, yu mas lukaot long nid blong kongregesen, mo ol narafala impoten samting. Taswe, from we i gat plante wok blong mekem, i gud yumi tokbaot from wanem i impoten blong yu trenem ol narafala.

YU TRENEM NARAFALA KWIKTAEM

4. ?From wanem samtaem ol elda oli slo blong trenem ol narafala brata?

⁴ ?From wanem maet i had blong spenem taem, blong trenem ol brata long kongregesen? Maet samfala oli gat tingting ya se: ‘Ol narafala wok blong kongregesen nao oli impoten, mo mi mas mekem kwiktaem. Sipos mi no trenem ol narafala brata naoia, bambae ol wok blong kongregesen oli save gohed gud nomo.’ ?Be tingting ya i stret? Maet i tru se yu nidim blong mekem ol narafala wok long kongregesen kwiktaem, be sipos yu stap slo blong trenem ol brata, hemia i save spolem kongregesen.

5, 6. (1) ?Yumi lanem wanem long pijatok blong wan draeva blong trak mo olsem wanem hem i lukaotgud long trak blong hem? (2) ?Olsem wanem pijatok ya i givhan long wok blong trenem narafala long kongregesen?

⁵ Yu traem tingbaot. Wan draeva i save se blong sevesem wan trak, hem i mas jenisim oel blong trak ya. Be maet hem i ting se i moa impoten blong stap fulumap bensin, from we sipos hem i no mekem, bambae trak i no ron. Mo tu maet hem i ting se, sipos hem i bisi tumas, hem i save jenisim oel afta nomo. From we bambae trak i gohed yet blong ron. Be hemia i denja tumas. Sipos man blong trak i no jenisim oel, long stret taem we hem i mas mekem, bambae i no longtaem trak blong hem i nogud. Biaen bambae hem i spenem bigfala mane blong fiksimap trak ya. ?Yumi lanem wanem long pijatok ya?

⁶ Ol elda oli mas kwik blong mekem ol wok blong kongregesen we oli impoten moa. Sipos no, kongregesen bambae i safa from. Ol elda oli olsem draeva blong trak, we oltaem hem i mas fulumap bensin blong mekem trak i ron. Hemia i min se, oli mas “jusumaot ol samting we oli moa impoten” blong mekem se kongregesen i no safa. (Filipae 1:10, NW) Be sam elda maet oli bisi oltaem wetem sam impoten wok, gogo oli nogat taem blong trenem ol narafala. Hemia i olsem we yu no fulumap oel long wan trak. Sipos ol elda oli slo blong trenem ol brata, bambae i no moa gat naf brata blong mekem wok long kongregesen taem i gat nid.

7. ?Yumi mas gat wanem tingting long ol elda we oli tekem taem blong trenem narafala?

⁷ Yu no mas gat tingting ya se wok blong trenem narafala i no impoten. Ol elda we oli tingbaot fiuja blong kongregesen, mo oli tekem taem blong trenem narafala, oli waes mo ol brata mo sista oli tinghae long olgeta. (Ridim 1 Pita 4:10.) ?Hemia i givhan long kongregesen olsem wanem?

YU YUSUMGUD TAEM WE YU GAT

8. (1) ?From wanem ol elda oli mas trenem ol narafala? (2) Ol elda we oli muv i go long wan narafala kantri blong prij, ?oli gat wanem impoten wok blong mekem? (Yu luk bokis ya “Wan Impoten Wok.”)

⁸ Ol elda we oli stap longtaem long trutok, oli mas kasemsave se oli stap kam olfala, mo bambae oli no moa naf blong mekem ol wok olsem we oli stap mekem naoia. (Maeka 6:8) Mo tu ol elda oli mas save se, trabol “ we oli no tingbaot i save kasem olgeta enitaem nomo,” nao maet oli no save mekem ol wok blong olgeta long kongregesen. (Prija 9:11, 12, NW; Jemes 4:13, 14) Taswe, ol elda we oli lavem ol man blong Jehova, mo oli kea long olgeta, oli wok had blong tijim ol yangfala brata long ol wok we oli bin mekem long kongregesen plante yia finis.—Ridim Ol Sam 71:17, 18.

9. ?Wanem samting long fiuja we i mekem se i impoten blong trenem narafala?

⁹ Yumi tinghae tu long ol elda we oli trenem ol narafala, from we ol traehad blong olgeta bambae i givhan blong mekem kongregesen i stanap strong. Trening ya i mekem se ol brata oli rere blong givhan long kongregesen blong i joen gud oltaem, mo blong gat strong bilif. Hemia i impoten naioa long ol lasdei ya, mo i impoten tu long taem blong bigfala trabol. (Esikel 38:10-12; Maeka 5:5, 6) Taswe, ol gudfala elda, oltaem yufala i mas tekem taem blong trenem ol narafala. Yufala i stat tede.

10. ?Wan elda i mas mekem wanem blong hem i gat taem blong trenem narafala?

¹⁰ Mifala i save se yufala ol elda, yufala i folem wan program we i mekem yufala i bisi gud long ol wok blong kongregesen. Taswe, i moa gud we yufala i yusum sam long ol taem ya long program blong yufala, blong trenem ol narafala. (Prija 3:1, NW) Sipos yufala i mekem olsem, hemia i soemaot se yufala i stap yusum gud taem blong yufala, mo tu hemia bambae i givhan long kongregesen long fiuja.

YU MEKEM WAN PLAN WE I STERT

11. (1) Nating se ol elda oli stap long ol defdefren ples, ?wanem i soemaot se ol advaes we oli givim oli gud? (2) Folem Ol Proveb 15:22, ?from wanem i impoten we yumi tokbaot tingting blong ol narafala elda?

¹¹ I no longtaem i pas, oli askem kwestin long sam elda we oli trenem gud ol brata blong mekem ol wok long kongregesen.b Olgeta elda ya oli givim sem advaes nomo, nating se oli stap long ol defdefren ples. ?Hemia i soemaot wanem? Hemia i soemaot se ol trening we oli kamaot long Baebol, oli wok gud blong ‘tijim ol man blong kongregesen long evri ples.’ (1 Korin 4:17) Taswe long stadi ya mo long nekis stadi, bambae yumi tokbaot sam samting we ol elda ya oli mekem. (Ol Proveb 15:22) Ol elda oli olsem ol tija, mo ol brata we oli kasem trening oli olsem ol studen.

12. ?Wan tija i mas mekem wanem, mo from wanem?

¹² Fastaem, wan tija i mas mekem wan plan. ?From wanem i impoten? Olsem wan man blong wokem garen, we i mekem rere graon blong planem ol sid. Wan tija i mas rerem hat blong studen fastaem, bifo we hem i tijim studen long wan niufala samting. Taswe, ?wan tija i save mekem wanem blong givhan long studen? Hem i save folem eksampol blong profet Samuel, wan tija blong bifo we i gat gudhan blong tijim narafala.

13-15. (1) ?Jehova i talem long profet Samuel blong mekem wanem? (2) ?Samuel i mekem wanem blong rerem Sol from niufala wok blong hem? (Yu luk pija long stat blong stadi ya.) (3) ?From wanem i impoten we tede ol elda oli tingbaot stori blong Samuel?

¹³ Bitim 3,000 yia bifo, Jehova i talem long olfala profet Samuel se: “Tumora long taem olsemia, bambae mi mi sanem wan man long laen blong Benjamin, blong i kam luk yu. Bambae yu yu mas kafsaedem oel i go long hed blong hem blong makemaot hem, se hem bambae i kam king blong yufala.” (1 Samuel 9:15, 16) Samuel i kasemsave se bambae hem i no moa lidim neson blong Isrel. Mo Jehova i wantem se hem i makemaot wan man blong i kam lida blong ol man Isrel. Taswe, Samuel i mekem wan plan blong rerem man ya, from niufala wok we bambae hem i mekem.

¹⁴ Long nekis dei profet Samuel i mitim Sol, mo Jehova i talem long Samuel se: “Hemia nao man ya.” Stret long taem ya, Samuel i mekem samting we hem i plan blong mekem. Hem i mekem se hem i save gat janis blong storian gud wetem Sol. Samuel i singaot Sol mo wan wokman blong hem blong tufala i kam kakae wetem hem. Hem i putum tufala i sidaon long spesel jea, mo i givim beswan mit long tufala. Samuel i talem se: “Yu gohed, yu kakae. Mi mi jusumaot mit ya blong yu yu kakae tede.” Afta we oli kakae, Samuel i singaot Sol blong tufala i go long haos blong hem. Tufala i glad blong storian gud tugeta, taem tufala i stap wokbaot i go long haos blong Samuel. Taem tufala i kasem haos blong Samuel, tufala i go antap long ruf blong haos ya, mo Samuel i gohed blong toktok wetem Sol. Long nekis dei, Samuel i kafsaedem oel long hed blong Sol, mo i kis long hem, mo i givim sam moa advaes long hem. Biaen, Sol i gobak, mo i rere from nekis samting we bambae i hapen.—1 Samuel 9:17-27; 10:1.

¹⁵ Samuel i makemaot Sol blong i lidim ol man Isrel. I tru, hemia i defren olgeta long fasin ya, blong trenem wan brata blong i kam wan elda no wan man blong givhan. Nating se i olsem, ol elda oli save lanem plante samting long rod we Samuel i folem blong rerem hat blong Sol. I gud yumi tokbaot tu long ol rod ya.

OLI GLAD BLONG TIJIM NARAFALA MO OLI FREN GUD

16. (1) ?Samuel i harem olsem wanem taem ol man Isrel oli askem hem blong gat wan king? (2) ?Samuel i mekem wanem taem Jehova i askem hem blong putumap Sol i kam king?

¹⁶ Yu glad nomo blong mekem, mo yu no wet longtaem. Samuel i no glad taem hem i harem we ol man Isrel, oli askem hem blong putumap wan king blong olgeta. Hem i no wantem mekem samting we ol man Isrel oli askem. (1 Samuel 8:4-8) Be Jehova i talem tri taem long hem se, hem i mas lesin long ol man ya. (1 Samuel 8:7, 9, 22) Nating se Samuel i gat wan tingting olsem, be hem i no jalus, mo i no kam kros long man we bambae i tekem ples blong hem. Taem Jehova i askem hem blong putumap Sol i kam king, hem i no wet longtaem. Hem i glad nomo blong obei long Jehova, i no from we hem i mas mekem, be from we hem i lavem Jehova.

17. ?Tede ol elda oli folem eksampol blong Samuel olsem wanem? ?Wanem samting we i mekem ol elda oli glad?

¹⁷ Tede i gat plante elda we oli stap longtaem long trutok. Olgeta oli folem eksampol blong Samuel, blong trenem ol brata long fasin we i soemaot se oli lavem olgeta. (1 Pita 5:2) Ol elda ya, oli glad nomo blong tijim ol narafala, mo oli no fraet blong serem ol wok we oli mekem long kongregesen, wetem ol brata we oli kasem trening. Oli luk ol brata ya, olsem wan spesel presen, we oli save ‘wok wetem olgeta,’ blong lukaotgud long kongregesen. (2 Korin 1:24; Hibrus 13:16) Ol elda ya, oli glad blong luk we ol brata oli yusumgud ol save we oli kasem, blong givhan long ol man blong Jehova.—Ol Wok 20:35.

18, 19. ?Wan elda i save mekem wanem bifo we hem i trenem wan brata? ?From wanem i impoten blong mekem olsem?

¹⁸ Yu tijim narafala mo yu fren gud wetem hem. Long faswan taem we profet Samuel i mitim Sol, maet hem i save kafsaedem oel long hed blong Sol blong makemaot hem wantaem nomo. Ale Sol i save kam niufala king blong ol man Isrel. Be profet i no mekem olsem, from we Sol i no rere yet blong lidim ol man blong God. Taswe, Samuel i mekem wan plan fastaem. Olsem nao, hem i save rerem hat blong Sol from niufala wok we bambae hem i mekem. Bifo we Samuel i makemaot Sol olsem king, hem i singaot Sol mo tufala i kakae tugeta, tufala wokbaot mo storian gud tugeta, mo tufala i spel tugeta. Samuel i wet blong makemaot niufala king ya, long stret taem blong hem.

¹⁹ Long taem blong yumi tede, i sem mak. Bifo we wan elda i trenem wan brata, fastaem hem i mas traehad blong fren gud wetem brata ya. I gat ol defdefren rod we wan elda i save folem blong mekem wan brata we i stap tren, i harem gud. Be hemia i dipen long laef blong brata ya, mo kalja blong hem. Taswe, sipos yu wan elda we yu gat plante wok blong mekem, i impoten we yu mekem plan blong spenem taem wetem brata we bambae yu trenem hem. Olsem nao, bambae hem i kasem save se yu tinghae long hem. (Ridim Rom 12:10.) I sua se ol brata we oli kasem trening, bambae oli glad bigwan from lav mo trening we ol elda oli givim long olgeta.

20, 21. (1) ?Wan gudfala tija hem i olsem wanem? (2) ?Long nekis stadi bambae yumi tokbaot wanem?

²⁰ Wan gudfala tija, hem i no jes laekem blong trenem narafala, be hem i lavem man we hem i trenem. (Skelem wetem Jon 5:20.) ?From wanem hemia i impoten? From we sipos wan studen i haremsave se yu kea long hem, bambae hem i glad blong kasem trening we yu givim long hem. Taswe ol elda, taem yufala i trenem ol narafala, i impoten we yufala i fren gud wetem olgeta, mo yufala i tijimgud olgeta.—Ol Proveb 17:17; Jon 15:15.

²¹ Wan elda i save stat blong trenem wan studen, afta we hem i rerem hat blong studen ya. ?Wanem ol rod we wan elda i save yusum blong trenem narafala? Long nekis stadi bambae yumi tokbaot samting ya.

1. (1) ?Ol man blong God bifo oli kasemsave long wanem, taem oli kasem trening? ?Olsem wanem hemia i sem mak tede? (2) ?Long stadi ya bambae yumi tokbaot ansa blong wanem kwestin?

OL MAN blong God oli kasemsave se gudfala frut bambae i kamaot taem oli kasem trening. Eksampol, Ebram i singaot ol man blong hem oli kam wanples we “hem i trenem olgeta finis,” blong oli go sevem Lot. (Jenesis 14:14-16, NW) Ol man blong singsing long taem blong King Deved, “oli tren gud” blong singsing presem Jehova. (1 Kronikel 25:7) Tede, yumi stap faet agensem Setan mo wol blong hem. (Efesas 6:11-13) Mo tu, yumi wok had blong presem Jehova, taem yumi tokbaot nem blong hem long ol narafala. (Hibrus13:15, 16) Taswe, olsem ol man blong God bifo, sipos yumi wantem se ol wok blong yumi oli gat gudfala frut, yumi mas tren. Long kongregesen, Jehova i givim wok long ol elda blong oli trenem ol narafala. (2 Timoti 2:2) ?Wanem ol rod we sam elda oli yusum blong trenem ol brata, blong oli nafgud blong lukaot long ol man blong Jehova?

GIVHAN LONG OLGETA WE OLI LAN BLONG OLI LAVEM JEHOVA MOA

2. Bifo we wan elda i trenem wan brata, ?hem i mas mekem wanem? ?From wanem hem i mekem olsem?

² Wan elda, hem i olsem wan man blong wokem garen. Bifo we hem i planem ol sid, maet hem i mas putum sam gudfala samting long graon blong mekem ol sid ya, oli gru gud mo oli kam strong. Long sem fasin, bifo we wan elda i trenem wan brata blong mekem ol wok long kongregesen, maet elda ya i save tokbaot sam rul blong Baebol wetem brata ya. Hemia bambae i givhan long brata ya blong hem i rere blong mekem ol samting we hem i lanem.—1 Timoti 4:6.

3. (1) ?Olsem wanem wan elda i save yusum Mak 12:29, 30, blong storian wetem wan brata we i kasem trening? (2) ?Olsem wanem prea blong wan elda i save gat paoa long brata we i kasem trening?

³ Hem i impoten blong kasemsave olsem wanem trutok i gat paoa, long tingting mo long filing blong wan brata we i kasem trening. Blong mekem olsem, yu save askem hem blong i tokbaot olsem wanem promes we hem i mekem, blong givim laef blong hem long Jehova, i givhan long hem blong mekem ol desisen long laef. Kwestin ya, i save pulum yutufala blong tokbaot olsem wanem yumi save mekem wok blong Jehova wetem fulhat blong yumi. (Ridim Mak 12:29, 30.) Long en blong storian blong yutufala, maet yu save prea mo askem Jehova blong i givim tabu spirit long brata ya we i kasem trening. Taem hem i harem se yu tingbaot hem long prea blong yu, hemia bambae i leftemap tingting blong hem blong wantem mekem moa wok.

4. (1) Yu tokbaot sam stori blong Baebol we oli save givhan long wan brata we i stap tren, blong hem i save gohed gud. (2) ?Wanem mak we ol elda oli mas gat, taem oli trenem narafala?

⁴ Taem yu stat blong trenem wan brata, i gud we yu tokbaot ol stori blong Baebol wetem hem. Olsem nao, bambae hem i kasemsave from wanem hem i mas givhan long narafala, mo narafala i save trastem hem mo hem i mas gat tingting daon. (1 King 19:19-21; Nehemaea 7:2; 13:13; Ol Wok 18:24-26) Brata we i kasem trening, hem i mas luk ol fasin ya olsem we oli impoten. Hemia i sem mak long ol gudfala samting we man i yusum long garen blong mekem kakae i gru gud. Ol fasin ya, bambae oli givhan long brata ya blong hem i gohed gud kwiktaem. Brata Jean-Claude, we i wan elda long Franis i talem se: “Mak we mi wantem kasem taem mi trenem wan brata, hemia blong givhan long hem blong mekem ol desisen we oli stanap long ol rul blong Baebol. Taem mitufala i ridim wan vas long Baebol, mi lukaot janis blong ‘openem ae’ blong brata ya, blong hem i luksave ‘ol gudgudfala samting’ we oli stap long Tok blong God.” (Sam 119:18) ?Wanem sam narafala rod we oli save mekem wan brata we i stap tren, i kam strong moa?

TOKBAOT OL MAK MO GIVIM OL RISEN

5. (1) ?From wanem i impoten blong askem ol mak blong brata we i stap kasem trening? (2) ?From wanem ol elda oli mas trenem ol brata taem oli yangfala nomo? (Yu luk futnot.)

⁵ Yu askem long brata we yu trenem hem, blong hem i talemaot ol mak we hem i wantem kasem long wok blong Jehova. Sipos hem i no putum wan mak yet, i gud yu givhan long hem, blong putum wan mak we bambae hem i naf blong kasem. Yu mas soemaot se yu glad, taem yu tokbaot wan mak we yu bin putum. Mo olsem wanem yu glad, taem yu kasem mak ya. Hemia wan rod we i isi, be rod ya i save wok gud. Brata Victor we i wan paenia, mo hem i wan elda long Afrika, i talem se: “Taem mi yangfala, wan elda i askem sam kwestin long mi, blong save ol mak blong mi. Ol kwestin ya oli givhan long mi blong mi gat strong tingting long wok blong prij.” Ol elda we oli stap longtaem long trutok, oli talem se i impoten blong trenem ol brata taem oli yangfala nomo. Yu save givim sam wok long kongregesen, we i stret long yia blong olgeta. Sipos yu trenem ol brata taem oli yangfala, hemia i save givhan long olgeta blong tingbaot oltaem, ol mak we oli wantem kasem, nating sipos oli stap kam bigwan mo i gat plante samting we oli traem pulum tingting blong olgeta.—Ridim Ol Sam 71:5, 17.a

6. ?Jisas i mekem wanem taem hem i trenem narafala?

⁶ Taem yu leftemap tingting blong wan brata blong mekem wan wok, yu mas talem risen from wanem i impoten blong mekemgud wok ya, i bitim we yu talem nomo wanem wok we hem i mas mekem. Jisas we i Bigfala Tija, hem i talem long ol aposol blong hem blong oli prij. Be fastaem, hem i talem risen from wanem oli mas obei. Hem i talem se: “God i givim olgeta paoa long mi, long olgeta samting long heven mo long wol. Nao from samting ya, yufala i mas go long ol man long olgeta ples long wol, blong pulum olgeta oli kam man blong mi.” (Matiu 28:18, 19) ?Olsem wanem yu save folem fasin blong Jisas taem yu trenem narafala?

7, 8. (1) ?Olsem wanem ol elda tede oli save folem fasin blong Jisas blong trenem narafala? (2) ?From wanem i impoten blong talem ol gudfala toktok long wan brata we i mekem wok? (3) ?Wanem sam rod we oli save givhan long ol elda, taem oli trenem ol brata? (Yu luk bokis ya, “?Olsem Wanem Blong Trenem Ol Narafala?”)

⁷ Taem yu askem wan brata blong mekem wan wok long haos kingdom, i gud yu yusum Baebol blong eksplenem long hem, from wanem wok ya i impoten. Olsem nao, yu stap tijim hem blong mekem ol samting folem ol rul blong Baebol, be i no from wan rul we man i talem. Yu traem tingbaot. Sipos yu askem wan brata blong klinim rod we i kam insaed long doa blong Haos Kingdom, maet yu save soem vas blong Taetas 2:10. Mo yu eksplenem, olsem wanem wok blong hem bambae i mekem ol man oli glad blong lesin long mesej blong Kingdom. Mo tu, yu askem brata ya blong tingbaot ol olfala brata mo sista, mo olsem wanem wok blong hem, i save givhan long olgeta. Wan storian olsem, i save givhan long wan brata we i kasem trening, blong hem i no tingbaot ol rul nomo, be hem i mas tingbaot ol man. Mo taem hem i luk we ol brata mo sista oli glad long gudfala wok blong hem, bambae hem i harem gud from we hem i mekem wok blong givhan long olgeta.

⁸ Mo tu, yu mas talem ol gudfala toktok long wan brata we yu askem hem blong mekem wan wok. ?From wanem i impoten blong mekem olsem? From we ol gudfala toktok, oli save givhan long hem blong kamgud moa, long wok we hem i stap mekem. Hem i sem mak long wan tri we i nidim wota, blong mekem hem i gru gud mo i kam strong.—Skelem wetem Matiu 3:17.

WAN NARAFALA SAMTING WE I HAD

9. (1) ?Wanem i mekem se i had blong ol elda long ol rij kantri, oli trenem ol yangfala brata? (2) ?From wanem sam yangfala brata oli no putum wok blong Jehova fasples long laef blong olgeta?

⁹ Ol elda we oli stap long ol kantri we oli rij, oli luk se i had blong leftemap tingting blong ol brata we oli gat 20 kasem 30 yia, blong oli mekem moa wok long kongregesen. Ol elda we oli stap longtaem long trutok, mo oli blong samwe 20 defren kantri, oli talem sam risen from wanem sam yangfala brata oli no glad blong mekem ol wok long kongregesen. Bighaf blong ol elda ya oli talem se, taem ol brata oli yangfala nomo, papa mo mama blong olgeta, oli no leftemap tingting blong olgeta blong putum ol mak, long wok blong Jehova. Mo taem sam yangfala brata oli wantem putum ol mak, be ol papa mo mama blong olgeta, oli leftemap tingting blong olgeta blong go long yunivesiti no blong kasem wan gudfala wok. Taswe wok blong Jehova, i neva stap fasples long laef blong olgeta.—Matiu 10:24.

10, 11. (1) ?Wan elda i save mekem wanem blong givhan long wan brata blong jenisim tingting blong hem? (2) ?Wanem sam vas blong Baebol we wan elda i save yusum blong givhan long wan brata? ?From wanem i impoten blong mekem olsem? (Yu luk futnot.)

¹⁰ Yu mas gat longfala tingting, mo yu mas traehad blong givhan long wan brata we i no glad blong mekem moa wok long kongregesen. Olsem nao, bambae hem i save jenisim tingting blong hem, mo glad blong mekem moa wok. Mo samting ya i save hapen. Yu traem tingbaot. Sipos wan man blong wokem garen, hem i wantem se tri we hem i planem i gru stret, hem i mas stretem stamba blong tri ya sloslo, gogo tri ya i gru stret. Long sem fasin, yu save givhan sloslo long wan brata, blong i luksave se hem i mas jenisim tingting blong hem, mo glad blong mekem moa wok long kongregesen. ?Be olsem wanem blong mekem samting ya?

¹¹ Yu tekem taem blong storian wetem brata ya. Yu givhan long hem blong i luksave se kongregesen i nidim hem. Biaen, i gud yu letem taem i pas, mo afta yutufala i storian bakegen, mo yu yusum Baebol blong givhan long hem, blong tingbaot promes we hem i mekem blong givim laef blong hem i go long Jehova. (Prija 5:4; Aesea 6:8; Matiu 6:24, 33; Luk 9:57-62; 1 Korin 15:58; 2 Korin 5:15; 13:5) Yu traem askem sam kwestin we oli save mekem hem i tingting. Maet yu save askem se: ‘?Yu yu promes blong mekem wanem taem yu givim laef blong yu long Jehova? ?Yu ting se Jehova i harem olsem wanem taem yu tekem baptaes?’ (Ol Proveb 27:11) ‘?Setan i harem olsem wanem?’ (1 Pita 5:8) Ol vas olsem oli save gat bigfala paoa, mo oli save tajem hat blong wan brata.—Ridim Hibru 4:12.b

OL BRATA WE OLI KASEM TRENING, OLI MAS HOLEMSTRONG

12, 13. (1) ?Elisa i gat wanem fasin, taem profet i askem hem blong givhan long hem? (2) ?Olsem wanem Jehova i blesem Elisa from strong tingting we hem i gat?

¹² !Ol yangfala brata, kongregesen i nidim yufala! ?Wanem ol fasin we oli save givhan long yufala blong mekemgud wok blong Jehova? Blong faenem ansa, i gud yumi tokbaot sam samting we oli hapen long laef blong Elisa, wan man long taem bifo we hem tu i kasem trening.

¹³ Samwe 3,000 yia bifo, profet Elaeja i askem yangfala Elisa, blong i kam givhan long hem. Wantaem nomo Elisa i glad, mo hem i gat strong tingting blong mekemgud ol wok we oli daon. (2 King 3:11) Elaeja i trenem Elisa blong klosap sikis yia. Biaen, klosap long taem we Elaeja i finisim wok blong hem long Isrel, hem i talem long Elisa blong i no moa givhan long hem. Be Elisa i talem tri taem se: “Bambae mi no save livim yu.” Hem i gat strong tingting blong stap wetem tija blong hem, mo hem i trastem Elaeja mo i mekemgud wok blong hem. Yes, Jehova i blesem Elisa, taem hem letem we Elisa i luk waelwin i tekemaot Elaeja.—2 King 2:1-12.

14. (1) ?Olsem wanem ol brata we oli kasem trening tede, oli save folem fasin blong Elisa? (2) ?From wanem i impoten we wan brata, i gat strong tingting blong mekemgud wok blong hem?

¹⁴ Sipos yu wan brata we yu kasem trening, ?olsem wanem yu save folem fasin blong Elisa? Yu mas rere blong mekem eni wok, nating sipos hem i wan wok we i daon. Yu mas tingbaot se tija blong yu, hem i olsem fren blong yu. Yu talem tangkiu long hem from trening we hem i givim long yu, mo yu soemaot long hem se yu wantem gohed blong lanem moa samting. Samting we i moa impoten se, yu mas gat strong tingting blong mekemgud wok blong yu. ?From wanem i impoten? From we taem yu soemaot se yu gat strong tingting mo ol narafala oli trastem yu, bambae ol elda oli sua fulwan se, Jehova i wantem we yu mekem moa wok long kongregesen.—Ol Sam 101:6; ridim 2 Timoti 2:2.

RESPEKTEM OL ELDA WE OLI STAP LONGTAEM LONG TRUTOK

15, 16. (1) ?Wanem ol samting we Elisa i mekem, blong soemaot se hem i respektem tija blong hem? (Yu luk pija long stat blong stadi ya.) (2) ?From wanem ol narafala profet oli trastem Elisa?

¹⁵ Stori blong Elisa i soemaot tu se, tede i impoten we ol brata oli respektem ol elda we oli stap longtaem long trutok. Afta we Elaeja mo Elisa tufala i go visitim wan grup blong ol profet long Jeriko, tufala i kam long Jodan Reva. Nao, “Profet Elaeja i tekemaot kot blong hem, i rolemap, i kilim wota ya long hem, mo wantaem nomo, wota ya i seraot long tu haf.” Mo tufala i wokbaot long drae graon i go kasem narasaed, mo taem ‘tufala i stap wokbaot i go, tufala i gohed blong storian.’ Elisa i lesin gud long evri samting we tija blong hem i talem, mo hem i gohed blong lanem ol samting ya. Elisa i neva gat tingting ya se, hem i save evri samting. Biaen, taem waelwin i tekemaot Elaeja i go, Elisa i gobak long Jodan Reva. Long ples ya, hem i kilim wota ya wetem kot blong Elaeja mo i talem se: “Hae God. Yu yu God blong Profet Elaeja. !Plis yu kam givhan long mi!” Mo wantaem nomo, wota ya i seraot long tu haf.—2 King 2:8-14.

¹⁶ ?Yu yu makem se faswan merikel we Elisa i mekem, i sem mak long laswan merikel we Elaeja i mekem? ?Hemia i tijim yumi long wanem? Elisa i no gat tingting ya se, naoia we hem i profet, hem i mas mekem wan samting we defren long samting we Elaeja i mekem. Defren olgeta, hem i mekem ol samting, olsem we Elaeja i mekem. Elisa i soemaot se hem i respektem tija blong hem, mo hemia i givhan long ol narafala profet blong oli trastem hem. (2 King 2:15) Elisa i mekem wok blong profet blong 60 yia, mo Jehova i givim paoa long hem blong mekem plante moa merikel, i bitim Elaeja. ?Stori ya i tijim ol brata we oli kasem trening, long wanem samting?

17. (1) ?Olsem wanem ol brata we oli kasem trening, oli save folem fasin blong Elisa? (2) Long stret taem, ?olsem wanem Jehova i save yusum ol studen we oli holemstrong?

¹⁷ Taem yu kasem moa wok long kongregesen, yu no mas gat tingting ya blong mekem samting long wan fasin we i defren olgeta, long wanem we oli mekem bifo. Yu mas tingbaot se, ol jenis we oli kamaot long kongregesen, oli folem nid blong kongregesen, no oli kamaot folem samting we ogenaesesen blong Jehova i talem. Taswe, yu no mas mekem ol jenis long kongregesen, folem prapa tingting blong yu. Elisa i gohed blong folemgud ol samting we Elaeja i talem long hem, hemia i givhan long ol narafala profet blong oli trastem hem mo hem i soemaot se hem i respektem tija blong hem. Long sem fasin, sipos yu gohed blong folemgud ol advaes blong Baebol we tija blong yu i talem, mo yu soemaot se yu respektem ol elda we oli stap longtaem long trutok, bambae ol brata mo sista oli trastem yu. (Ridim 1 Korin 4:17.) Taem yu gat moa ekspiriens, bambae yu mekem ol jenis we oli givhan long kongregesen blong folem ogenaesesen blong Jehova, we oltaem hem i stap muv i go fored. Mo maet long stret taem blong hem, Jehova bambae i givhan long yu blong mekem moa wok, i bitim wok we ol tija blong yu oli mekem, sem mak olsem we hem i givhan long Elisa blong mekem.—Jon 14:12.

18. ?From wanem i impoten blong trenem ol brata long kongregesen?

¹⁸ Mifala i sua se, ol save we oli kamaot long stadi ya, mo long las stadi, bambae oli givhan long ol elda blong oli makemaot wan taem blong trenem ol brata. Mo mifala i prea se, bambae i gat plante moa brata we bambae oli glad blong kasem ol trening, mo oli yusum ol save we oli kasem, blong lukaot long ol man blong Jehova. Hemia bambae i mekem olgeta kongregesen raon long wol oli kam strong moa. Mo bambae oli givhan long yumi wanwan, blong gohed blong stanap strong long nambawan taem we i stap long fored blong yumi.