Kingdom Nius No. 37

Wan Mesej We i Go Long Olgeta Man Long Wol

!Klosap Nao Ol Giaman Skul Oli Lus!

▪ ?Wanem ya ol giaman skul?

▪ ?Bambae oli lus olsem wanem?

▪ ?From samting ya yu mas mekem wanem naoia?

?Wanem ya ol giaman skul?

?Yu yu harem nogud from ol trabol we ol man oli mekem long nem blong jos? ?Taem yu luk we ol man blong skul oli mekem faet, oli joen long ol rabis wok blong ol teroris, mo oli gat kruked fasin, samting ya i mekem yu yu harem nogud from we yu save se ol fasin ya oli no stret? ?From wanem i luk olsem se skul nao i stamba blong plante trabol?

I no evri skul we oli stamba blong ol trabol ya, be hemia ol giaman skul nomo. Jisas Kraes i wan haeman blong jos we ol man oli tinghae long hem. Hem i talem se ol giaman skul oli pulum ol man blong mekem ol rabis fasin olsem we wan “rabis tri, hem i save karem rabis frut nomo.” (Matiu 7:15-17) ?Ol giaman skul oli karem wanem frut?

Ol Giaman Skul Oli . . .

▪ JOEN LONG FAET MO POLITIK: Niuspepa ya Asiaweek i talem se: “Long Esia mo ol narafala ples, ol lida blong skul we oli wantem kasem hae posisen oli no kea nating long ol man. Oli yusum jos olsem wan rod blong pulum ol man blong mekem samting we olgeta nomo oli wantem.” From samting ya, niuspepa ya i givim woning se: “I gat denja i stap se bambae ol man blong wol ya oli go krangke.” Wan bigfala lida blong skul long Yunaeted Stet i talem se: “Yufala i mas kilim i ded ol teroris blong oli stop blong kilim man i ded.” Lida ya i talem olsem wanem blong mekem samting ya, i se: “Kilim olgeta teroris ya evriwan, oli ded long nem blong Masta.” Defren olgeta, Baebol i talem se: “Man we i stap talem se ‘Mi mi laekem God tumas,’ be i nogud long brata blong hem, i agensem hem, hem i man blong giaman nomo.” (1 Jon 4:20, Nyutesteman wetem Ol Sam long Bislama) Jisas tu i talem se: “Yufala i mas lavem ol enemi blong yufala.” (Matiu 5:44) ?Yu yu save tingbaot hamas skul we ol memba blong olgeta oli joen long faet?

▪ TIJIM OL GIAMAN TIJING: Plante skul oli tijim se sol no spirit i wan haf blong bodi blong man we man i no save luk mo we i gohed blong laef afta we man i ded. Plante long ol skul ya oli yusum tijing ya blong askem mane long ol memba blong jos blong olgeta. Oli mekem olsem taem oli talem long ol memba ya blong pem olgeta blong prea from ol sol we oli go laef samples. Be, Baebol i tijim wan samting we i defren long tijing ya. “Ol man we oli laef yet oli save se bambae oli ded, be ol man we oli ded finis oli no moa save wan samting.” (Prija 9:5) Jisas i tijim se ol dedman bambae oli laef bakegen long ded. ?Sipos man i gat wan sol we i no save ded samtaem, yu ting se bambae i nidim blong mekem ol dedman oli laef bakegen olsem we Jisas i tijim? (Jon 11:11-25) ?Skul blong yu i tijim se taem man i ded, spirit no sol blong hem i aot long hem blong go laef samples?

▪ AGRI LONG OL NOGUD FASIN LONG SAED BLONG SEKS: Long sam kantri, sam skul oli putumap ol man we oli slip wetem man mo ol woman we oli slip wetem woman blong oli kam ol pris. Oli askem tu blong gavman i agri long fasin ya we man i mared wetem man bakegen mo woman i mared wetem woman bakegen. Mo tu, ol skul we oli tok agensem ol nogud fasin long saed blong seks, oli letem nomo ol man oli stap lida nating se oli mekem nogud fasin long saed blong seks wetem ol pikinini. ?Baebol i tijim wanem long saed ya? Baebol i talem klia se: “Yufala i mas tingting gud long samting ya. Yufala i mas save se man we i stap ronem woman, mo man we i stap prea long ol narafala god, . . . man we i stap slip wetem woman blong narafala man mo woman we i stap mekem i krangke wetem narafala man, mo man we i stap slip wetem man, mo woman we i stap slip wetem woman, . . . bambae oli no save go insaed samtaem long niufala wol ya we God i king long hem.” (1 Korin 6:9, 10) ?Yu yu save ol skul we oli faenem ekskius blong letem fasin nogud long saed blong seks i gohed nomo?

?Wanem fiuja blong ol skul we oli karem ol rabis frut? Jisas i givim woning ya se: “Tri we i no karem gudfala frut, bambae man i katemaot, i sakem i go long faea.” (Matiu 7:19) !Yes, ol giaman skul bambae oli lus olgeta! ?Be, olsem wanem mo wetaem bambae samting ya i hapen? Ansa blong kwestin ya i stap long wan vison long buk blong Revelesen japta 17 mo 18. Vison ya i soemaot samting we bambae i kamtru.

?Bambae ol giaman skul oli lus olsem wanem?

Traem tingbaot. Wan woman blong rod i stap sidaon long baksaed blong wan anamol we i mekem man i fraet. Anamol ya i gat seven hed mo ten hon. (Revelesen 17:1-4) ?Woman ya i pija blong hu? Hem i gat paoa long ‘olgeta king long wol.’ Woman ya i putum wan klos we i pepol, hem i yusum insens, mo hem i rij we i rij. Mo tu, from fasin blong hem blong wokem posen, hem i “trikim ol man blong olgeta kantri.” (Revelesen 17:18; 18:12, 13, 23) Baebol i halpem yumi blong kasem save se woman blong rod ya hemia wan ogenaesesen blong ol skul blong evri ples long wol. Yes, woman ya i no pija blong wan skul nomo, be hem i pija blong olgeta skul we oli karem rabis frut.

Wael anamol ya we woman ya i sidaon long hem, i pija blong olgeta politik paoa blong wol.a (Revelesen 17:10-13) Ol giaman skul oli sidaon long baksaed blong anamol ya we hemia politik, mo oli gat paoa long ol desisen mo ol plan blong hem.

Be i no longtaem, wan bigfala samting blong sapraes bambae i kamaot. “Ol ten hon blong anamol ya, we yu luk, bambae oli no laekem woman ya nating, oli agensem hem. Bambae oli tekemaot olgeta samting we hem i gat, mo bambae oli livim hem i stap we i neked nomo. Mo bambae oli kakae ol mit blong bodi blong hem, nao bambae oli bonem hem long faea blong spolem hem olgeta.” (Revelesen 17:16) !Wantaem nomo, olgeta politik paoa blong wol bambae oli agensem ol giaman skul mo bambae oli spolemgud olgeta! ?Wanem i pusum ol politik paoa blong tekem aksen ya? Buk blong Revelesen long Baebol i givim ansa ya se: “God i putum long tingting blong olgeta, blong oli mekem olsem we hem i wantem.” (Revelesen 17:17) Yes, God bambae i spolem ol giaman skul from ol nogud samting we oli mekem long nem blong Hem. Long fasin we i stret nomo, bambae God i tekem aksen, mo i yusum ol politik paoa we woman ya i frengud wetem olgeta, blong kilim woman ya i ded.

?Yu mas mekem wanem sipos yu no wantem kasem panis ya we God bambae i givim long ol giaman skul? Enjel blong God i talem se: “Ol man blong mi, yufala i kam. Yufala i kamaot long hem.” (Revelesen 18:4) !Taswe, naoia i taem blong kamaot long ol giaman skul! ?Be olsem wanem? ?Hemia i minim se bambae yu no moa bilif long God? No, i no minim olsem, from we fiuja blong olgeta we oli no bilif long God tu i nogud. (2 Tesalonaeka 1:6-9) Wan ples nomo blong ronwe i go long hem mo stap sef, hemia long trufala skul? Olsem wanem yu save luksave trufala skul?

?Olsem Wanem Blong luksave trufala skul?

?Wanem gudfala frut we trufala skul i mas karem?—Matiu 7:17.

Trufala Skul i . . .

▪ SOEMAOT LAV: Ol trufala man blong God oli “no man blong wol ya,” oli no seraot from kala blong skin no kalja blong olgeta, be oli soemaot we ‘oli lavlavem olgeta.’ (Jon 13:35; 17:16; Ol Wok 10:34, 35) Oli no kilim man i ded. Defren olgeta, oli rere blong lusum laef blong olgeta blong sevem ol Kristin brata sista blong olgeta.—1 Jon 3:16.

▪ TRASTEM TOK BLONG GOD: Trufala skul i no tijim ol “kastom” mo ol “tingting blong man.” Defren olgeta, ol tijing blong trufala skul oli stanap long Tok blong God, Baebol. (Matiu 15:6-9) ?From wanem? From we “olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin.”—2 Timoti 3:16.

▪ MEKEM FAMLE I STAP STRONG MO I LEFTEMAP OL FASIN WE OLI STRET: Trufala skul i trenem ol hasban blong ‘lavem ol waef blong olgeta olsem prapa bodi blong olgeta,’ i halpem ol waef blong oli soemaot ‘dip respek long ol hasban blong olgeta,’ mo i tijim ol pikinini blong oli ‘obei long ol papa mo mama blong olgeta.’ (Efesas 5:28, 33; 6:1) Antap long samting ya, olgeta we oli holem wok insaed long kongregesen oli mas soemaot gudfala eksampol long saed blong tingting mo fasin.—1 Timoti 3:1-10.

?I gat wan skul we i soemaot ol fasin ya? Buk ya Holocaust Politics, we oli prentem long 2001, i talem se: “Sipos ol man oli folem ol tijing mo ol fasin we ol Witnes blong Jeova oli stap tijim mo soemaot, bambae i no gat rabis wok blong ol Nasi long Wol Wo Tu mo bambae i no gat fasin ya tu blong kilim i ded wan ful laen blong man, we i mekem plante man i safa long fulwol.”

Yes, long 235 kantri, ol Witnes blong Jeova oli no talemaot nomo ol rul blong Baebol long ol man be oli mekem ol rul ya oli wok tu long laef blong olgeta. Mifala i leftemap tingting blong yu blong askem long ol Witnes blong Jeova blong oli halpem yu blong yu kasem save wanem we God i wantem yu blong mekem. Long rod ya, yu save wosipim God long fasin we Hem i wantem. Naoia i taem blong tekem aksin. Yu no mas tektaem. !En blong ol giaman skul i klosap!—Sefanaea 2:2, 3.

□ Plis sanem smol buk ya long mi, ?Wanem Samting We God i Wantem Yumi Blong Mekem?

□ Plis kam luk mi blong mekem wan fri Baebol stadi wetem mi.

[Futnot]

[Tok blong pija long pej 3]

“Ol man blong mi, yufala i kam. Yufala i kamaot long hem”

[Tok blong pija long pej 3]

Ol giaman skul oli gat paoa long “olgeta king blong wol”