Wan Buk We i Save Givhan Long Mared
WAN WOMAN NEM BLONG HEM LESLIE, we i stap long Louisiana, Amerika, i toktok wetem wan woman blong Tulane Yunivesiti. Woman ya i telefon long Leslie blong talem se, long Tulane mo long wan narafala yunivesiti bakegen, oli stap mekem wan stadi long ol man mo woman we oli jes mared long Louisiana.
Leslie i agri blong joen long stadi ya, ale woman ya i sanem wan pepa long hem. Leslie i ansarem ol kwestin long pepa ya, mo i sanem i gobak wetem buk ya Spesel Rod Blong Mekem Famle i Hapi. Hem i eksplenem se hem wetem man blong hem, tufala i Witnes blong Jeova, mo se tufala i bin ridim buk ya tugeta bifo we tufala i mared.
Sam wik biaen, daerekta blong stadi ya i raetem wan leta long Leslie, i se: “Mifala i glad sipos ol man mo woman olsem yu mo man blong yu, oli tijim mifala wanem samting i save mekem wan gudfala mared we i stap longtaem. Wan bigfala samting se, yutufala i gruap long tu defren kaen laef mo ples. Plante taem, samting ya nao i mekem trabol insaed long mared. Be yutufala i reregud fastaem from mared, antap moa, yutufala i ridim smol buk ya we yu sanem i kam. Samting ya i mekem se yutufala i rere blong winim enikaen trabol we i kamaot. Mo tu, samting we i impoten moa se, yutufala i strong long skul blong yutufala. Yutufala i laki blong gat wan strong bilif mo yutufala i save dipen long God blong givhan long mared blong yutufala.
“Mi mi putum buk ya we yu bin sanem i kam, i stap long tebol blong mi. Mi stap soem long ol studen blong mi we oli wantem mared mo oli askem advaes long saed ya. Mi mi neva luk buk ya bifo, hem i nambawan tumas.”
Ating buk ya i save givhan long yu tu. Blong kasem buk ya, plis fulumap haf we i stap daon long pej ya mo sanem i kam long wan adres long pej 5. Bambae yu kasem gudfala advaes blong givhan long yu blong winim ol trabol long mared, mo mekem famle blong yu i glad olsem Bigman we i Wokem yumi i wantem.
□ Plis sanem buk ya long mi Spesel Rod Blong Mekem Famle i Hapi.
□ Plis, mi mi wantem se wan man i kam luk mi blong mekem Baebol stadi wetem mi we mi no pem.