Wol Blong Yumi—?Wanem Fiuja Blong Hem?
Niuspepa blong Kanada (Globe and Mail) i talem se: “Plante taosen yia finis, ol man oli fraet long ol disasta olsem hariken mo graon i seksek. Oli talem se ol samting ya i ‘wok blong God.’ Be naoia, i gat denja blong ol disasta we oli moa nogud, mo we oli kamaot from ol ‘wok blong man.’” United Nations Environment Programme (UNEP) i mekem wan bigfala ripot we i talem se yumi mas tekem aksin blong blokem ol man we oli stap spolem wol blong yumi, bifo we i let tumas. Daerekta blong UNEP, Klaus Toepfer, i talem se: “Yumi naf naoia blong save olsem wanem ol samting we yumi mekem mo ol samting we yumi no mekem bambae oli gat paoa long wol blong yumi long yia 2032.”
Long yia 1972, UNEP i stat wok, mo kam kasem naoia, hem i mekem sam samting blong blokem ol fasin blong spolem wol ya. Niuspepa ya The Toronto Star i talem se, “win mo ol reva long Yurop mo Not Amerika oli kam klin moa, mo from we oli stap jekem ol faktri mo trak blong meksua se oli no sakem plante tumas posen smok i go long win, ale samting ya i givhan blong mekemgud bakegen sam haf blong bigfala klaod blong gas ozone we i stap raon long wol blong blokem hot blong san.” Mo tu, long sam kantri olsem Kanada, Finlan, Nowei, mo Yunaeted Stet, oli wokem sam plan blong mekem se ol man oli no spolem bus. Ol plan ya “oli stap givhan blong blokem trabol we i save kamaot taem ol man oli katemdaon plante tumas tri.” Nating se oli mekem ol wok ya finis, ripot blong UNEP i talem se fulap niufala bisnes mo faktri oli stap stanap blong winim mane, mo ol bigfala taon oli stap kavremap plante moa haf blong wol. Sipos oli no blokem samting ya, fulap anamol, pijin, flaoa mo tri bambae oli lus yet. Niuspepa ya Globe i talem se: “Samwe long stret haf blong ol reva blong wol oli kasem trabol, we sam oli doti mo sam oli stap kam drae. Ol 80 kantri we klosap stret haf (40 pesen) blong ol man blong wol oli stap long olgeta, oli no gat naf wota nating.”
Masta Toepfer i ting se “sipos yumi tekem aksin kwiktaem, bambae yumi save givhan bigwan.” Hem i go moa i se: “Yumi nidim wan gudfala plan . . . yumi nidim blong mekem ol gudfala projek . . . mo samting we yumi nidim moa, i blong talemaot klia ol plan blong yumi.” ?Be sipos ol lida blong wol oli no wantem tekem aksin blong sevem wol blong yumi, wanem bambae i hapen?
I gat wan Man we i “talemaot klia” ol plan blong hem finis, mo we bambae i “tekem aksin kwiktaem”—hemia Jeova God. Hem i talemaot se bambae hem i “spolem ol man ya we oli stap spolem wol.” (Revelesen 11:18) Mo tu, God i promes se bambae hem i mekem we ol laef samting long wol ya oli wokgud tugeta folem prapa rod blong olgeta. Ol drae ples bambae oli fulap long ol flaoa. (Aesea 35:1) Bambae kakae i fulap. Ol reva bambae oli klingud. (Ol Sam 72:16; 98:8) God i promes se bambae hem i blesem evri laef samting long wol ya.—Ol Sam 96:11, 12.
[Foto Credit Line blong pija long pej 31]
NASA photo