Samting We i Save Halpem Mo Protektem Ol Yangfala

TAEM wan gel we i yang tumas i gat bel, hem i harem nogud mo plante narafala oli harem nogud tu. Long evri ples blong wol, trabol ya i stap kamaot, mo hem i tajem laef blong yumi evriwan. Bigfala trabol ya i soemaot klia se i moagud blong folem loa blong God we i talem se: ‘Bambae yufala i no mekem fasin nogud wetem woman.’​—1 Korin 6:​18.

Be sam yangfala gel we oli kasem trabol ya, papa mama blong olgeta i bin tijimgud olgeta long ol rod blong God. Ol gel ya nomo oli jusum blong sakemaot ol gudfala tijing ya, oli joen long ol rabis fasin blong seks, nao i no longtaem oli gat bel. ?Taem samting ya i hapen, ol trufala Kristin oli mas mekem wanem? Sipos wan yangfala olsem i soemaot se hem i tanem tingting blong hem, papa mama blong hem mo olgeta long Kristin kongregesen oli mas soem lav long hem mo givhan long hem.

Tingbaot Nicole bakegen. Papa mama blong hem tufala i Witnes blong Jeova mo tufala i stap tijim hem long rod ya. Taswe, tufala i harem nogud tumas taem Nicole i gat bel. Be Nicole i rimemba se: “Ol Kristin fren oli stap kam long haos oltaem blong leftemap tingting blong mi blong stadi Baebol mo blong kam klosap long Jeova.”

Ol Witnes blong Jeova oli no agri long rabis fasin long saed blong seks. Be oli save se ol boe mo gel we oli mekem sin ya oli save “jenisim” fasin blong olgeta sipos oli folem ol tok blong Baebol. (Rom 12:2) Oli bilif fulwan se God i stap fogivim ol man we oli tanem tingting blong olgeta from sin. (Efesas 1:7) Oli luksave tu se pikinini we yangfala i bonem, hem i no mekem wan nogud samting. Taswe, oli no agensem pikinini ya be oli soem lav, sore mo kaen fasin long hem olsem oli mekem long ol narafala pikinini long kongregesen.​—Kolosi 3:​12.

Wan mama we i no gat man blong hem, i stat stadi Baebol wetem ol Witnes blong Jeova. Kwiktaem nomo hem i mekem ol bigfala jenis long laef blong hem folem ol tok blong Baebol. Hem i tokbaot fasin blong ol Witnes se: “Oli soem se oli rili intres long mi mo ol pikinini blong mi. Oli givim kakae mo klos long mifala mo oli givim mane tu taem mifala i nidim. Taem mi kam naf blong joen long wok blong prij, ol Witnes blong Jeova oli lukaot long pikinini blong mi blong mi save go prij. Oli mekem evri samting we oli save mekem blong halpem mi blong lavem Jeova.”

Protektem Yangfala

I moagud yet sipos yumi save halpem ol yangfala blong blokem bigfala trabol ya. Taswe, ol Witnes blong Jeova oli traehad blong gat lav mo kaen fasin insaed long ol famle blong olgeta. Blong pulum ol yangfala blong mekem stret fasin, ol Witnes oli no yusum ol tok blong mekem olgeta oli fraet, olsem we oli talem se sipos oli no mekem gudfala fasin, bambae oli kasem AIDS no bambae oli gat bel. Oli traehad blong tijim ol yangfala blong oli rili lavem Jeova God mo ol loa blong hem. (Ol Sam 119:97) Ol Witnes oli luk se ol pikinini oli nidim stret save long saed blong seks. Samting we i impoten moa, ol Witnes oli luksave se oli mas stat tijim pikinini long saed blong ol stret fasin blong Baebol taem hem i smol nomo. (2 Timoti 3:​15) Long Haos Kingdom blong ol Witnes blong Jeova, oli kasem tijing ya. Be ol papa mama we oli Witnes oli folem advaes tu blong stadi Baebol wetem ol pikinini blong olgeta wanwan. Blong givhan long olgeta, i gat ol gudfala buk olsem Ol Kwestin We Ol Yangfala Oli Askem​—Ol Ansa We Oli Wok Gud, we oli wokem blong givhan long ol papa mama blong tijim ol pikinini blong olgeta long ol gudfala fasin.a

Wol ya i fulap long ol rabis fasin. Taswe, taem yumi folem ol loa blong Baebol long saed blong stret fasin, i olsem we yumi stap swim agensem wan strong taed long solwota. Nating se i olsem, plante milian gel long wol we oli gat bel taem oli yang tumas, mo we oli harem nogud tumas from, oli no save kasem trabol ya sipos oli bin folem ol stret fasin blong Baebol.

[Futnot]

[Tok blong pija long pej 12]

Ol trufala Kristin oli soem kaen fasin mo kea long ol mama we oli no gat man blong olgeta