?Yu Yu Traehad Blong Kasem Ol Gudfala Mak Long Laef Blong Yu?

● ?Yu yu wantem kasem wanem mak long laef blong yu? ?Yu yu naf blong kasem ol mak ya, no maet yu stap tingting nomo long saed blong ol mak ya we yu yu no naf blong kasem? Wan man we i lukluk long laef blong ol man, i givim advaes ya se: “Laef ya blong yumi i blong nating nomo. I olsem we yumi stap resis olbaot nomo. I moa gud yumi stap glad long ol samting we yumi gat finis, i winim we oltaem yumi stap wantem sam samting moa.”—Prija 6:9.

“I gud blong yumi glad long ol samting we yumi gat finis” i minim ol samting we oli hapen long laef blong yumi, mo ol samting we yumi gat naoia. Yumi save se, i no rong we yumi traem blong mekem laef blong yumi i kam moa gud. Be, poen we Baebol i givim se, man we i waes i no traem blong kasem ol mak we oli olsem ol drim nomo. Maet ol mak long saed blong haenem, kasem ol sas samting, faenem wan gudfala woman no man blong mared wetem, mo blong gat gudfala helt.

Mo tu, ol man we oli kasem wan mak long saed blong ol sas samting, maet oli wantem moa yet. Baebol i talem klia se: “Sipos yu laekem mane tumas, nating we mane blong yu i plante olsem wanem, be neva yu save talem se yu harem gud, mane blong yu i naf. Mo sipos yu wantem tumas blong kam rijman, neva yu save kasem ol samting we yu yu wantem. Tingting ya i blong nating nomo.” (Prija 5:10) Be ol man we oli kasem waes we i kamaot long God, oli traem blong harem gud long “ol samting we [oli] gat finis.” Yes oli luksave trutok ya se: “Taem yumi bon i kam long wol ya, yumi no karem wan samting, mo taem yumi ded, bambae yumi no karem wan samting i go wetem yumi.”—1 Timoti 6:7.

Ol man oli kasem bigfala glad taem oli luksave se oli nidim ol samting long saed blong spirit. ?Yumi save mekem samting ya olsem wanem? Jisas i talem se: “Man i no save laef long kakae nomo. Evri tok we [Jehova] i talem, hemia nao samting blong mekem man i laef.” (Matiu 4:4) Ol impoten tok ya oli stap long Baebol mo yumi save kasem fri nomo.

Wan long ol tok ya, hemia long Ol Sam 37:4 we i talem se: “Yu mas luk long Hae God [“Jehova,” NW] blong i mekem yu yu glad, nao bambae hem i givim long yu ol samting we yu yu wantem tumas.” Jehova, God ya we i gat Olgeta Paoa, bambae hem i givim olgeta samting ya long ol gudfala man we oli wosipim hem olsem: gudfala helt, ol samting we yumi nidim long laef mo laef we i no save finis. (Luk 23:43, NW; Revelesen 21:3, 4) I gud yumi trastem ol tok ya, hemia i no wan drim.