Pijin Ya i Save Gud Rod Blong Hem

OL MAN oli sek long fasin blong pijin ya bar-tailed godwit. Hem i wan pijin blong solwota we i luk lelebet olsem nambilak, be maot blong hem i longfala moa. Pijin ya i stap flae 11,000 kilometa evri yia blong go long narafala kantri. Trip ya i save tekem moa long eit dei.

Tingbaot: Ol man we oli stadi long ol pijin, oli ting se pijin ya i gat wan samting olsem kampas long hed blong hem. Nao paoa blong magnet we i stap kamaot long medel blong wol blong yumi, i pulum pijin ya i go long stret rod blong hem. Mo tu, maet long dei, pijin ya i lukluk san blong i save rod blong hem, mo long naet, hem i lukluk ol sta. I luk olsem se pijin ya i harem save ol bigfala win we oli stap kam, nao hem i faenem ol win ya mo oli karem hem i go long rod blong hem. Be ol bigman blong stadi oli no save evri samting yet, we i mekem se pijin ya i save mekem longfala trip ya. Bob Gill we i stadi long ol laef samting, i talem se: “Mi mi stadi long ol pijin ya 20 yia finis, be mi no kasem save long olgeta yet.”

?Wanem Tingting Blong Yu? ?Fasin blong pijin ya blong save gud rod blong hem, i kamaot olsem nomo? ?No yu ting se i gat wan Man we i wokem hem olsem?