Yumi Wokbaot i Go Long Niusilan

SAMWE long 800 yia bifo, ol Maori oli krosem plante taosen kilometa blong solwota blong kasem Niusilan. Oli luk se kantri ya i defren olgeta long ol aelan blong Polinesia we oli kamaot long hem. I gat ol bigbigfala hil we plante long olgeta oli gat aes long saed blong olgeta, ol hot wota we i kamaot long graon, mo sno. Samwe long 500 yia afta, sam man Yurop oli mekem longfala trip ya i kam long Niusilan. Tede i gat tufala kalja i stap, hemia blong Polinesia mo waet man tu. Klosap olgeta man (90 pesen) oli stap long taon. Taon ya Wellington we i kapital, hem i stap klosap moa long saot blong wol i bitim ol narafala kapital long wol.

Nating se Niusilan i stap longwe long ol narafala kantri, be evri yia klosap tri milian turis oli kam long kantri ya. Yumi no sapraes long samting ya from we, kantri ya i naes tumas mo i gat plante defdefren samting we oli save luk.

I gat plante defdefren anamol we sam long olgeta oli narakaen, mo sam kaen pijin we oli no stap flae, oli plante moa i bitim ol narafala ples long wol. !I gat wan lised tu, nem blong hem tuatara, we i save laef kasem 100 yia! I gat sam anamol nomo we oli blong Niusilan stret, olsem sam kaen flaengfokis, mo sam bigfala anamol blong solwota, olsem welfis mo dolfin.

Klosap 120 yia finis, ol Witnes blong Jehova oli wok strong long Niusilan. Oli tijim ol man long Baebol long 19 lanwis. Sam long ol lanwis ya, hemia lanwis blong Niue, Rarotonga, Samoa, mo Tonga.