Stadi 35
Tok i Stret Long Wok Blong Prij
1-3. ?From wanem i gud blong lanem blong mekem tok blong yumi i stret long wok blong prij?
1 Bighaf blong wok blong yumi ol Kristin minista tede, hem i blong prij mo tijim Tok blong God long ol man we oli save smol nomo long saed blong Baebol. Sam long olgeta oli neva gat wan Baebol bifo; sam oli jes gat wan kopi long ples we oli stap putum buk long hem. Samting ya i min se, blong ol man ya oli kasemgud ol samting we yumi talem long olgeta, yumi mas mekem tok i stret long save blong olgeta. I no se yumi jenisim mesej ya, be yumi traehad blong talem long ol toktok we bambae oli save kasemsave long hem. Rili, fasin ya blong mekem tok i stret long man i wan traem long yumi blong luk sipos yumi kasemsave gud long tok blong yumi.
2 Blong mekem tok i stret i min se yumi jenisim smol blong i laenap wetem ol nyufala samting, blong mekem i stret. Hem i minim stretem wan samting blong yu no narafala i kasemgud. Stadi long poen ya blong mekem tok i stret long wok blong prij i mas makem nid ya blong mekem ol tok, long wok blong prij no eni narafala tok, oli isi mo blong ol man we oli lesin mo wan nyufala man we yumi mitim we i intres oli save kasemsave long hem. Taswe taem yu wok long poen ya long Tiokratik skul, oltaem yu mas tingbaot ol man we oli stap lesin olsem olgeta ya we bambae yu mitim long wok blong prij long ol haos wanwan.
3 Samting ya i no min se taem yu wok long poen ya, yu mas mekem olsem we yu prij long ol haos wanwan. Olgeta tok bambae oli folem sem fasin blong givim tok we i stap long ol advaes long program blong skul. Wanem i minim se, nating se yu yu mekem wanem kaen tok, ol poen we yu stap talem mo ol tok we yu yusum i mas olsem hemia we bambae yu yusum wetem ol man we yu mitim long wok blong prij. From we yumi toktok plante long wok blong prij, samting ya i mas givhan long yu blong luksave nid blong toktok long fasin we i isi, long wan mak we plante man we yumi stap mitim long wok blong prij oli save kasemsave long hem. Yu yu stap lan finis long poen ya long Stadi 21. Naoia yumi tokbaot fasin ya hem wan from we yumi mas gat fasin ya mo hem i impoten tumas.
4, 5. Eksplenem from wanem yumi mas mekem ol tok blong yumi i isi blong ol man oli kasemsave long hem.
4 Talem ol tok i klia long olgeta man. Yumi luksave se i impoten blong gat fasin ya taem yumi harem ol tok we sam brata oli stap yusum long minista wok long ol haos wanwan mo long ol nyufala stadi. Save blong yumi long Baebol i givim ol nyufala wod we plante man oli no save. Yumi yusum ol wod olsem “smol kampani we i stap yet,” “ol narafala sipsip,” mo sam narafala moa. Sipos yumi yusum ol wod ya long toktok blong yumi, plante taem olgeta ya we yumi stap toktok wetem olgeta long wok blong prij oli no save nating mining blong ol tok olsem. Yumi save yusum wan narafala tok we i kolosap sem mak blong mekem ol tok ya oli klia moa no yumi save eksplenem blong man i kasemsave long hem. Mo tu sipos yumi yusum ol tok olsem “Amageden” mo “Kingdom blong God i stanap” taem yumi toktok, oli no karem mining nating sipos yumi no eksplenem mining blong olgeta.
5 Taem yu wok long poen ya, man blong givim advaes long yu bambae i askem hem wan se, ?Bambae wan man we i no save trutok long Baebol i kasem save long poen ya no long tok ya? Bambae hem i no daonem yu from we yu yusum ol tiokratik tok ya. Ol tok ya oli haf blong ol tok blong yumi mo yumi wantem ol nyuwan we oli intres oli savegud ol tok ya. Be sipos yu yusum sam long ol tok ya, bambae man blong givim advaes i luk sipos yu eksplenem olgeta.
6-8. ?Taem yumi mekem rere tok blong yumi, from wanem yumi mas lukaotgud blong jusum ol stret poen?
6 Jusum ol stret poen. Ol poen we yu jusum blong yusum long wok blong prij bambae oli defren, sem mak olsem ol wod we yu yusum oli defren, dipen long wanem samting yu mekem. Hemia from we plante taem i gat sam samting we bambae yumi no jusum blong tokbaot wetem wan man we i jes intres. Long taem olsem, fasin blong jusum ol poen long tok i stap nomo long yu. Be, taem oli givim wan tok long yu blong mekem long skul, haf ya we bambae yu tokbaot oli jusum finis long yu. Wan samting nomo we yu save jusum se wanem poen i stap long tok ya. ?Yu mas mekem wanem?
7 Faswan samting, from we yu save yusum nomo ol poen ya we oli stap, yu mas jusum wan fasin we tok blong yu i save stanap long hem blong mekem se bambae yu save jusum plante moa poen we oli stret. Man blong givim advaes long yu bambae i intres long ol poen we yu jusum mo olsem wanem oli stret long fasin blong tok blong yu. Hemia from we yu yu soemaot, long poen ya we yu wok long hem, se ol defren haf long wok blong prij oli nidim ol defren kaen tok. Eksampel, yu no save yusum sem tok taem yu invaetem wan nyufala man we i intres blong i kam long miting olsem we bambae yu mekem taem yu prij long ol haos wanwan. Taswe, nating sipos tok blong yu i wan storeyan wetem wan man blong haos no hem i wan tok long platfom, makem klia long ol samting we yu talem mo long ol poen we yu jusum se wanem kaen man nao yu stap toktok long olgeta.
8 Blong luk sipos ol poen oli stret no no gat, man blong givim advaes long yu bambae i tingbaot stampa tingting biaen long tok blong yu. Taem yu visitim ol haos wanwan plante taem risen i blong tijim man mo pulum man blong haos blong i stadi moa. Taem yu mekem visit bakegen, stampa tingting biaen i blong bildimap intres we i stap mo, sipos yu naf, statem wan Baebol stadi. Sipos hem i wan tok we i kamaot afta long wan stadi, ale hem i blong pulum man blong haos i kam long wan miting no i blong pulum hem blong i joen long wok blong prij, mo ol samting olsem.
9, 10. ?Olsem wanem yumi luksave sipos ol poen we yumi jusum oli stret?
9 I tru, nating se hem i sem samting long wok blong prij, ol poen we yu jusum maet oli defren dipen long ol man we oli lesin long yu. Taswe yu mas tingbaot samting ya tu. Yu no mas tokbaot ol poen long tok blong yu we oli no stret long stampa tingting biaen long tok we yu givim.
10 From olgeta samting ya, yu mas jusum fasin blong tok blong yu bifo we yu mekem rere tok. Askem yu wan: ?Wanem stampa tingting long tok blong mi? ?Wanem ol poen we mi mi nidim blong mi mekem samting ya, mo olsem wanem ol poen ya oli mas jenis smol blong oli stret long tok ya? Afta we yu jusum ol samting ya, bambae i isi blong jusum ol stret poen mo talem long wan fasin we i save mekem tok i stret long wok blong prij.
11-13. ?From wanem i impoten blong soem olsem wanem ol poen long tok blong yu oli wok?
11 Soem olsem wanem blong mekem ol poen long tok oli wok. Soem olsem wanem ol poen long tok oli wok i min se yu soemaot klia mo i stret long man blong haos se ol poen ya oli gud long hem, olsem se hemia samting we hem i nidim no hem i save yusum. Long stat blong tok ya man ya blong haos i mas luksave se “samting ya i stret long mi.” Samting ya i impoten blong pulum tingting blong ol man we oli lesin. Be, blong kipim tingting blong olgeta i wekap, i impoten blong gohed blong stap mekem se tok i stret long ol man gogo kasem en blong tok ya.
12 Samting ya i go moa long fasin blong lukluk ol man we oli lesin mo halpem olgeta blong oli tingting. Naoia yu mas go moa mo mekem mining blong tok i stret long man blong haos. Mak blong yumi long wok blong prij i blong tijim ol man long ol trutok long Tok blong God mo halpem olgeta blong oli lanem rod blong kasem sef. Taswe, wetem waes mo kaen fasin, yu mas soemaot long man blong haos ol gudfala samting we oli save kamaot sipos hem i lesin mo mekem ol samting we yu talem.
13 Nating se poen long stadi ya i kamaot laswan, i no from we hem i no impoten olsem ol narafala. Hem i wan impoten poen mo neva yumi mas fogetem. Wok long hem, from we hem i impoten long wok blong prij. Yu no save holemtaet tingting blong man blong haos longtaem sipos hem i no luksave klia se wanem yu talem hem i impoten long laef blong hem.