Haf 11
Faondesen Blong Nufala Wol i Stat Naoia
1, 2. ?Taem ol profet tok blong Baebol oli stap kamtru, wanem i stap hapen long fored blong yumi?
WANEM bakegen we i gud hemia we faondesen blong nyufala wol blong God i stat naoia, taem we olfala wol blong Setan i stap godaon. Long fes blong yumi, God i stap hivimap ol man blong evri nesen mo i stap trenem olgeta olsem faondesen blong wan nyu kampani blong man blong wol we i no longtaem bambae i tekem ples blong wol ya we i no joengud nating. Long Baebol, long 2 Pita 3:13, nyu kampani ya blong man oli kolem “nyufala wol.”
2 Profet tok blong Baebol i talem olsem tu: “Long laswan haf blong ol dei [taem we yumi stap long hem naoia] . . . , plante pipol bambae oli go, mo oli talem se: ‘Yufala i kam, blong yumi go antap long bigfala hil blong Jeova [tru wosip blong hem] . . . Mo hem bambae i tijim yumi long ol fasin blong hem, mo bambae yumi wokbaot long ol rod blong hem.’ ”—Aesea 2:2-3.
3. (a) ?Hu i stap mekem profet tok blong Aesea i kamtru? (b) ?Olsem wanem las buk blong Baebol i tokbaot samting ya?
3 Profet tok ya i stap kamtru naoia long olgeta we oli joen long ‘ol fasin blong God mo oli wokbaot long ol rod blong hem.’ Las buk blong Baebol i tokbaot kampani ya blong man we i kamaot long olgeta ples long wol we oli gat pis mo lav olsem “wan bigfala hif blong man, . . . oli kamaot long olgeta kala mo long olgeta laen, mo long olgeta kantri, mo long olgeta lanwis,” we oli joen olsem ol brata nomo long olgeta ples long wol blong mekem wok blong God. Mo Baebol i talem tu se: “Hemia ol man ya we oli kasem bigfala trabol, we ol man oli spolem olgeta tumas, be naoia oli winim ol trabol ya finis.” Olsem nao, bambae oli laef tru long en blong fasin nogud blong naoia.—Revelesen 7:9, 14; Matyu 24:3.
Wan Tru Brata Raon Long Wol
4, 5. ?Olsem wanem ol Wetnes blong Jeova oli joen olsem wan brata long olgeta ples long wol?
4 Milyan blong ol Wetnes blong Jeova oli traehad blong folem ol loa blong God mo ol rod blong hem. Hop blong olgeta long laef ya we i no save finis i stap long nyufala wol blong God. Taem oli stap stretem laef blong olgeta evri dei blong obei long ol loa blong God, oli soemaot long hem se oli wantem fasgud long fasin blong hem blong rul naoia mo long nyufala wol tu. Long evri ples, oli no lukluk long kantri mo kala blong olgeta, oli obei long sem samting nomo—evri samting we God i givim long Tok blong Hem. Taswe olgeta oli wan tru brata raon long wol, wan kampani blong man blong wol we God i mekem.—Aesea 54:13; Matyu 22:37, 38; Jon 15:9, 14.
5 Ol Wetnes blong Jeova oli no ting se olgeta nomo oli stampa blong fasin blong olgeta blong joengud long olgeta ples long wol. Oli save we hemia i kamaot from paoa blong God, tabu speret, we i stap wok long ol man we oli fasgud long ol loa blong hem. (Ol Wok 5:29, 32; Galesia 5:22, 23) God i mekem samting ya. Olsem we Jisas i talem, “Samting ya we ol man oli no save mekem, God i save mekem.” (Luk 18:27) Taswe God ya we i mekem skae mo wol blong stap blong olwe, hem nao i save mekem kampani blong ol man blong nyufala wol blong oli stap blong olwe.
6. ?From wanem yumi save talem se ol Wetnes blong Jeova we oli joen olsem brata long olgeta ples long wol i olsem wan merikel blong tede?
6 Olsemia nao, fasin blong Jeova blong rulum nyufala wol, yumi save luk finis long wanem we hem i mekem long faondesen blong nyufala wol we naoia i stat. Mo wanem we Jeova i mekem long ol Wetnes blong hem, long wan fasin, i wan merikel blong tede. ?From wanem? From we hem i hivimap Ol Wetnes blong Jeova oli kam olsem wan famle nomo long olgeta ples blong wol, wan we i no save brokdaon from ol intres blong kantri, kala, no skul. Namba blong ol Wetnes i kasem sam milyan mo oli stap long 200 kantri, mo oli joen tugeta olsem wan nomo we oli no save seraot. Ol tru brata raon long wol ya, we i no gat narawan olsem long olgeta histri blong man, i tru we i wan merikel blong tede—God i mekem.—Aesea 43:10, 11, 21; Ol Wok 10:34, 35; Galesia 3:28.
Makemaot Ol Man Blong God
7. ?Olsem wanem Jisas i soemaot we ol man bambae oli luksave ol man blong hem?
7 ?Olsem wanem blong faenemaot hu nao ol man ya we God i yusum olsem faondesen blong nyufala wol blong hem? ?Hu nao i mekem ol tok blong Jisas long Jon 13:34, 35 i kamtru? Jisas i se: “Mi mi givim wan nyufala loa long yufala, se ‘Yufala i mas laeklaekem yufala.’ Olsem we mi mi laekem yufala, ale long sem fasin, yufala i mas laeklaekem yufala. Nao from we yufala i stap laeklaekem yufala, bambae olgeta man oli luksave se yufala i man blong mi.” Ol Wetnes blong Jeova oli bilivim ol tok ya blong Jisas mo oli folem olgeta. Olsem we Baebol i talem, se “yufala i mas stap laeklaekem yufala tumas.” (1 Pita 4:8) Olgeta ‘i mas tekem fasin blong lav, olsem we hem i klos blong olgeta, from we fasin ya i nambawan blong joenem ol man oli kam wan.’ (Kolosi 3:14, NW) Taswe lav blong ol brata i olsem “glu” we i joenem olgeta wanples long evri ples long wol.
8. ?Olsem wanem 1 Jon 3:10-12 i gohed blong makemaot ol man blong God?
8 Mo tu, 1 Jon 3:10-12 i talem se: “Fasin blong man i stap soemaot hu i pikinini blong God, mo hu i pikinini blong Setan. Man we i no mekem ol stret fasin, no we i no laekem brata blong hem, hem i no pikinini blong God, hem i pikinini blong Setan. Tok we yufala i harem taem gud nyus i kamtru long yufala fastaem i olsemia, i talem se yumi mas laeklaekem yumi. I nogud yumi olsem man ya Ken bifo. Hem i wan pikinini blong Setan, nao hem i kilim brata blong hem i ded.” Taswe, ol man blong God oli no save kilim man, oli brata nomo long olgeta ples blong wol.
Narafala Saen Blong Luksave
9, 10. (a) ?Wanem wok i soemaot ol man blong wok blong God long taem blong las dei? (b) ?Olsem wanem ol Wetnes blong Jeova oli mekem Matyu 24:14 i kamtru?
9 I gat wan narafala rod blong luksave ol man blong wok blong God. Long profet tok blong hem long saed blong en blong wol, Jisas i talem plante samting blong makemaot taem ya olsem las dei. (Lukluk Haf 9.) Wan stampa saen blong profet tok ya yumi save ridim long tok blong hem long Matyu 24:14: “Nao bambae ol man oli stap talemaot gud nyus ya se God i king blong olgeta man. Bambae oli talemaot long olgeta ples long wol, blong oli wetnes blong hem long fes blong olgeta man. Nao biaen, bambae Lasdei i save kam.”
10 ?Yumi luk we profet tok ya i kamtru? Yes. Taem ol las dei i stat long 1914, ol Wetnes blong Jeova oli prij long gud nyus blong Kingdom long olgeta ples long wol olsem Jisas i talem, hemia, long ol haos blong ol man. (Matyu 10:7, 12; Ol Wok 20:20) Plante milyan Wetnes oli go long ol man long evri nesen blong toktok long olgeta long saed blong nyufala wol. Samting ya i mekem se yu yu kasem buklet ya, from we wok we ol Wetnes blong Jeova oli mekem tu, i blong seremaot bilyan buk we oli prentem long saed blong Kingdom blong God. ?Yu yu save sam narafala man bakegen we oli stap talemaot gud nyus blong Kingdom long ol haos wanwan long olgeta ples long wol? Mo Mak 13:10 i soemaot se wok blong prij mo tij i mas gohed “fastaem” bifo we en i kam.
Ansa Long Namba Tu Bigfala Kwestin
11. ?Wanem bakegen ol Wetnes blong Jeova oli mekem i kamtru taem oli stap fasgud long ol rul blong God?
11 From we oli fasgud long ol loa blong God mo ol tijing blong hem, ol Wetnes blong Jeova oli mekem wan narafala samting i kamtru. Oli soemaot se Setan i man blong gyaman taem i talem se ol man oli no save stap strong long God sipos oli kasem traem, hemia ansa blong namba tu bigfala kwestin we i joen wetem fasin blong man blong holemstrong long God. (Job 2:1-5) Olsem wan kampani blong milyan man long olgeta nesen, ol Wetnes oli soemaot, olsem wan bodi, we oli strong blong folem rul blong God. Nating se olgeta oli no stret olgeta, oli holemstrong long saed blong God se hem i Hae King blong heven mo wol, oli no letem Setan i winim olgeta.
12. ?From bilif blong olgeta, ol Wetnes oli folem eksampel blong hu?
12 Tede, olgeta milyan Wetnes blong Jeova ya oli joenem tok blong olgeta wetem wan longfala laen blong ol narafala wetnes long taem bifo we oli soemaot se oli stanap strong long God. Sam long olgeta ya Ebel, Noa, Job, Ebraham, Sara, Aesak, Jekob, Debora, Rut, Deved, mo Daniel blong soemaot sam long olgeta nomo. (Hibrus, japta 11) Olsem Baebol i talem, olgeta ya oli olsem ol ‘wetnes blong God we oli stap raonabaot long yumi.’ (Hibrus 12:1) Olgeta ya mo ol narafala wetem ol disaepol blong Jisas oli holemstrong long God. Mo Jisas hem wan i soemaot wan gudfala eksampel taem hem i stanap strong olwe.
13. ?Wanem ol tok blong Jisas we oli tru long saed blong Setan?
13 Samting ya i pruvum se wanem we Jisas i talem long saed blong Setan long ol lida blong skul i tru: “Mi mi stap talemaot ol trutok ya nomo long yufala, we mi harem long God. Be yufala i wantem kilim mi mi ded. . . . Yufala i gat sem fasin nomo we papa blong yufala Setan, hem i gat. Mo oltaem yufala i wantem mekem ol samting ya we hem i wantem. Fasin blong hem we i stat fastaem, bifo olgeta, hem i man blong kilim man. Neva hem i laenap wetem olgeta we oli tok tru, from we i no gat trutok nating long hem. Taem we hem i stap gyaman, hem i stap mekem fasin blong hem nomo, from we hem i man blong gyaman, we i stampa blong ol gyaman toktok.”—Jon 8:40, 44.
?Wanem Jus Blong Yu?
14. ?Wanem i stap hapen long faondesen blong nyufala wol naoia?
14 Faondesen blong nyufala wol we God i statem naoia, hemia kampani blong ol Wetnes blong Jeova long olgeta ples long wol, hem i stap kam strong moa oltaem. Evri yia plante handred taosen man oli yusum fasin fri blong olgeta blong jus we i stanap long stret save, blong akseptem rul blong God. Olgeta i kam haf blong kampani blong man blong nyufala wol, we oli holemstrong long saed blong God se hem i Hae King long olgeta ples long wol mo heven, mo oli soemaot se Setan i man blong gyaman.
15. ?Wanem wok blong seraot ol man we Jisas i stap mekem long taem blong yumi?
15 Taem oli jusum rul blong God, oli soemaot se oli naf blong stap long “raet saed” blong Jisas taem hem i seraotem “ol sipsip” long “ol nani.” Long pro fet tok blong hem long saed blong ol las dei, Jisas i talem se: “Olgeta man blong wol bambae oli kam stanap long fes blong mi, mo mi bambae mi seraot olgeta, olsem we man blong lukaot long sipsip i save seraot ol sipsip blong hem long ol nani blong hem. Bambae mi putum ol sipsip oli stap long raet saed blong mi, mo ol nani oli stap long lef saed blong mi.” Ol sipsip oli ol man we oli gat fasin daon we oli joen wetem mo sapotem ol brata blong Kraes, we oli fasgud long rul blong God. Ol nani oli ol man we fasin blong olgeta i strong we oli agensem ol brata blong Kraes mo oli no mekem wan samting blong sapotem rul blong God. ?Wanem frut i kamaot from? Jisas i talem se: “Olgeta ya [ol nani] bambae oli go blong kasem panis ya we i no save finis. Be ol stret man ya [ol sipsip] bambae oli go blong kasem laef ya we i no save finis.”—Matyu 25:31-46.
16. ?Bambae yu mekem wanem blong laef long Paradaes we bambae i kamtru?
16 !I tru, God i kea long yumi! I no longtaem bambae hem i mekem wol ya i kam wan paradaes. ?Yu yu wantem stap long Paradaes ya? Sipos i olsem, blong soemaot se yu laekem ol samting we Jeova i stap givim, yu mas save moa long hem mo mekem ol samting we yu lanem i wok. “Yufala i mas lukaot Jeova taem yufala i gat jans yet blong faenem hem. Yufala i mas singaot long hem taem hem i stap kolosap yet long yufala. Man nogud i mas lego rod we hem i stap folem, mo rabis man i mas lego ol nogud tingting blong hem. I gud hem i kambak long Jeova we bambae i gat sore long hem, mo long God blong yumi, from we bambae hem i save fogivim hem olgeta.”—Aesea 55:6, 7.
17. ?From wanem yumi no mas tekem taem tumas blong jusum hu yumi mas wosip long hem?
17 I nogud blong tekem taem tumas. En blong olfala fasin ya i kolosap. Baebol i talem se: “I nogud yufala i stap laekem ol fasin blong wol mo ol samting we oli stap long hem. Bambae yufala i no mekem olsem. Man we i laekem tumas ol fasin blong wol, hem i no save laekem Papa blong yumi. . . . Mo wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem i stap we bambae i no save lus samtaem.”—1 Jon 2:15-17.
18. ?Wanem bambae i givhan long yu blong holem strong tingting blong stap laef long nambawan nyufala wol blong God long fyuja?
18 Ol man blong God oli stap kasem trening naoia blong kasem laef we i no save finis long nyufala wol. Oli stap lanem ol samting long saed blong speret mo ol narafala save tu we oli nidim blong mekem wan paradaes. Mifala i askem strong long yu blong jusum God olsem Rula blong yu mo sapotem wok ya we i save sevem laef blong ol man, we i stap goraon long olgeta ples long wol tede. Stadi Baebol wetem ol Wetnes blong Jeova, mo bambae yu save God ya we hem i rili kea long yu mo we bambae i finisim trabol. Long rod ya yu tu yu save kam haf blong faondesen blong nyufala wol. Ale yu save holem strong tingting blong mekem God i glad mo blong stap laef foreva long nambawan nyufala wol ya long fyuja.
[Tok blong pija long pej 31]
Ol Wetnes blong Jeova oli joen olsem wan tru brata raon long wol
[Tok blong pija long pej 32]
Faondesen blong nyufala wol blong God i stat naoia