Gud Nius i Save Mekem i Gud Long Komuniti Blong Yu

LONG wol tede, plante man oli stap talem se ol rul blong Baebol oli no moa stret long laef blong naoia. Be i gud blong tingbaot toktok blong wan lida blong ol man Hindu long India, nem blong hem Mohandas K. Gandhi. Man ya i storian wetem Lord Irwin, we Kwin blong Inglan i bin putum hem blong rulum kantri blong India bifo. Lord Irwin i askem Gandhi wanem rod we hem i ting se bambae i save winim ol problem bitwin Briten mo India. Gandhi i talem wan tok we i defren olgeta long tingting we plante man oli gat tede. Hem i tekem wan Baebol, i openem i go long Matiu japta 5 mo i talem se: “Taem kantri blong yu mo kantri blong mi oli folem ol tijing we Kraes i givim long Bigfala Tok blong hem antap long Hil, yumi save winim olgeta trabol, i no long kantri blong yumitu nomo, be long ful wol.”

Long ol tijing ya, Jisas i talem se ol man oli mas tingbaot God long laef blong olgeta, oli mas gat tingting daon, oli mas man blong mekem pis, oli mas gat sore, mo oli mas man we oli laekem ol fasin we oli stret. Jisas i tok agensem fasin blong kilim man i ded, be i agensem fasin ya tu we man i holem kros. Hem i agensem fasin we man i stilim woman blong narafala, be i agensem ol doti tingting tu. Hem i tok agensem fasin blong divos from enikaen risen nomo, we divos ya i seraotem ol famle mo i spolem ol pikinini. Jisas i talem se: ‘Yufala i mas lavem ol man we oli no laekem yufala, yufala i mas givim samting long ol puaman, yufala i no mas jajem narafala long fasin we i no gat sore, mo yufala i mas mekem fasin we i gud long man olsem we yufala i wantem we oli mekem long yufala.’ Olgeta advaes ya we Jisas i talem, oli save givhan bigwan long laef blong man sipos oli folem. !Tru ya, moa we ol man long komuniti blong yu oli folem ol advaes ya, moa we laef long komuniti bambae i kamgud!

Ol Witnes blong Jeova oli stap traehad blong leftemap ol fasin ya long ples blong olgeta. Baebol i tijim olgeta blong oli tinghae long mared. Oli trenem pikinini blong olgeta folem ol stretfala rul blong God. Oli tinghevi long famle laef. Taem wanwan famle i joengud, samting ya i mekem komuniti tu i joengud, mo wanwan komuniti ya i save mekem wan ful kantri i joengud. Plante stori long histri oli soemaot finis se taem ol famle oli seraot mo rabis fasin i kam antap, samting ya i mekem ol gavman oli foldaon. Ol Witnes blong Jeova oli traehad bigwan blong halpem wanwan man mo famle blong folem ol rul blong Baebol, blong oli lego fasin blong mekem stronghed, fasin blong slip olbaot, mo fasin blong brekem loa. Ol nogud fasin ya bambae oli no moa plante tumas long komuniti sipos ol man oli traehad blong folem ol rul ya blong Baebol.

Wan problem we i stap spolem plante komuniti mo kantri tede, hemia fasin blong ting nogud mo jajem man we kala blong skin no kalja blong hem i defren long hemia blong yumi. Aposol Pita i talem se: “Mi mi luk we God i stap mekem i sem mak nomo long olgeta man. Hemia wan trutok ya. Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.” Mo Pol i raetem se: “Nao i no moa gat ol samting blong mekem yufala i seraot. I no moa gat we sam long yufala oli laen blong Isrel, sam oli no laen blong Isrel, sam oli slef, sam oli friman, sam oli man, sam oli woman, nogat. Yufala evriwan i joen long Jisas Kraes, nao from samting ya, yufala i kam wan nomo.” (Ol Wok 10:34, 35; Galesia 3:28) Ol Witnes blong Jeova oli agri wetem ol tok ya. Long hed ofis blong olgeta, long ol haos Betel blong olgeta, mo long ol kongregesen blong olgeta, ol man blong enikaen kala mo kalja oli laef tugeta mo oli wok wanples.

Long Afrika, i gat sam laen blong man we oli no save miks, oli no save joen tugeta. Be long ol ples ya, taem ol Witnes blong Jeova oli mekem ol asembli blong olgeta, ol man blong ol defdefren laen ya oli kakae tugeta, oli stap tugeta, mo oli wosip tugeta we oli joengud mo oli frengud. Ol man blong gavman long ol kantri ya oli sapraes taem oli luk samting ya. Wan niuspepa blong New York long Ogis 2, 1958 (we oli kolem Amsterdam News) i tokbaot fasin joengud we ol trufala Kristin oli tijim ol man long hem. Ol tok ya, wan man i raetem afta we hem i luk wan intenasnal asembli we i karem tugeta 250 taosen Witnes blong Jeova long New York City. Hem i raetem se:

“Ol blakman, ol waetman, ol man Esia, olgeta we oli rij no oli pua, we oli kamaot long ol defdefren kantri blong wol, be yu save luk we oli glad blong kam wanples mo i no gat wan samting i blokem olgeta blong joen wetem narafala . . . Ol Witnes ya oli kamaot long 120 kantri be oli laef tugeta, oli wosip tugeta, long pis nomo. Samting ya i soem long ol man Amerika se i isi nomo blong man i save joengud. . . . Asembli ya i wan nambawan eksampol blong soem olsem wanem ol man oli save wok mo laef tugeta.”

Yes, plante man maet oli talem se ol rul blong Baebol oli no stret long laef blong tede. ?Be olsem wanem? ?I gat nara samting we man i luk se i bin wokgud finis long laef blong olgeta no we bambae i wokgud yet? Nogat. Ol rul blong Baebol nomo oli rili save wokgud long komuniti naoia, mo ol rul ya nao we bambae oli joenem ol man blong ‘olgeta kala, kantri, mo laen’ long wol, oli kam aninit long Kingdom blong God.—Revelesen 7:9, 10.

[Tok blong makem poen long pej 23]

Ol man blong evri kala mo laen oli wok tugeta

[Tok blong makem poen long pej 24]

Ol rul blong Baebol oli wokgud tede. ?I gat nara samting we man i luk se i wokgud finis?