Taem yu stadi Baebol wetem ol Witnes blong Jehova, yu kasem save long trutok. Ol save we yu kasem i halpem yu blong fren gud wetem God mo i givim hop long yu blong laef long paradaes long wol, aninit long Kingdom blong God. Bilif blong yu long Tok blong God i kam strong moa, mo yu kasem plante blesing taem yu joen long Kristin kongregesen. Yu kasem save tu olsem wanem Jehova i stap wok wetem ol man blong hem tede.—Sek. 8:23.

Naoia we yu rere blong baptaes, i gud yu storian wetem ol elda blong kongregesen long ol stamba bilif blong ol Kristin. (Hib. 6:1-3) Bambae Jehova i gohed blong blesem yu taem yu traehad blong save hem, mo bambae hem i givim nambawan blesing long yu long fiuja, olsem hem i promes finis.—Jon 17:3.

1. ?From wanem yu wantem baptaes?

2. ?Jehova hem i hu?

   • “Jehova nao i trufala God blong heven mo wol, mo i no gat wan narafala God bakegen.”—Dut. 4:39.

   • “Yu, we nem blong yu Jehova, yu nomo yu Hae God long fulwol.”—Sam 83:18.

3. ?From wanem i impoten blong yusum prapa nem blong God?

   • “Taswe, yufala i mas prea olsem: ‘Papa blong mifala long heven, plis yu mekem we nem blong yu i tabu.’”—Mat. 6:9.

   • “Olgeta man we oli singaot long nem blong Jehova, bambae oli sef.”—Rom 10:13.

4. ?Wanem sam tok we Baebol i yusum blong eksplenem Jehova?

   • “Jehova, God Ya We i Wokem wol stat long narasaed blong hem i go kasem narasaed, hem i God ya we i stap oltaem gogo i no save finis.”—Aes. 40:28.

   • “Papa blong mifala long heven.”—Mat. 6:9.

   • “God hem i lav.”—1 Jon 4:8.

5. ?Yu save givim wanem long Jehova God?

   • “Yu mas lavem Jehova we i God blong yu, long olgeta hat blong yu mo long olgeta sol blong yu mo long olgeta tingting blong yu mo long olgeta paoa blong yu.”—Mak 12:30.

   • “Yu mas mekem wosip long Jehova nomo we i God blong yu, mo yu mas mekem tabu wok blong hem nomo.”—Luk 4:8.

6. ?From wanem yu wantem holemstrong long Jehova?

   • “Boe blong mi, yu mas kam waes mo mekem hat blong mi i glad, olsem nao, mi save ansa long man ya we i stap tok nogud long mi.”—Prov. 27:11.

7. ?Yu yu stap prea long hu, mo tru long nem blong hu?

   • “Tru [mi Jisas] mi talem long yufala, sipos yufala i askem long Papa eni samting long nem blong mi, bambae hem i givim long yufala.”—Jon 16:23.

8. ?Wanem sam samting we yu save tokbaot long prea blong yu?

   • “Yufala i mas prea olsem: ‘Papa blong mifala long heven, plis yu mekem we nem blong yu i tabu. Yu mekem Kingdom blong yu i kam. Yu mekem wil blong yu i kamtru long wol ya olsem long heven. Plis yu givim bred long mifala tede, we i naf blong tede, mo yu fogivim ol kaon blong mifala, olsem we mifala i stap fogivim ol narafala we oli gat kaon long mifala. Mo yu no letem ol samting oli kam traem mifala, be yu tekemaot mifala long man ya we i rabis.’”—Mat. 6:9-13.

   • “Yumi save trastem hem, se nomata wanem samting yumi askem long hem, mo sipos i laenap wetem wil blong hem, hem i harem yumi.”—1 Jon 5:14.

9. ?From wanem Jehova i no lesin long prea blong sam man?

   • “Bambae oli singaot i go long Jehova from help, be bambae hem i no ansa long olgeta . . . from ol rabis wok blong olgeta.”—Maeka 3:4.

   • “Ae blong Jehova i stap long ol stret man, mo sora blong hem i stap lesin long olgeta taem oli prea strong i go long hem. Be Jehova i tanem fes blong hem long olgeta we oli stap mekem ol samting we i nogud.”—1 Pita 3:12.

10. ?Jisas Kraes hem i hu?

    • “Saemon Pita i ansa se: ‘Yu yu Kraes ya we i Pikinini blong God ya we i laef i stap.’”—Mat. 16:16.

11. ?From wanem Jisas i kamdaon long wol?

    • “Pikinini blong man i no kam blong ol man oli mekem minista wok blong givhan long hem, be hem i kam blong mekem minista wok blong givhan long olgeta mo blong givim laef blong hem olsem wan ransom, blong pembak plante man oli go fri.”—Mat. 20:28.

    • “Mi [Jisas] mi mas talemaot gud nius blong Kingdom blong God long ol narafala taon tu, from we hemia nao samting we God i sanem mi blong mi mekem.”—Luk 4:43.

12. ?Olsem wanem yu soemaot tangkiu from sakrefaes blong Jisas?

    • “Hem i ded long bihaf blong evri man, mekem se olgeta we oli laef, oli no moa laef blong mekem samting we olgeta nomo oli wantem, be blong mekem samting we man ya we i ded mo i laef bakegen, i wantem.”—2 Kor. 5:15.

13. ?Jisas i kasem wanem paoa?

    • “God i givim paoa long mi long olgeta samting long heven mo long wol.”—Mat. 28:18.

    • “God i leftemap hem, i givim wan posisen long hem we i hae, mo from we hem i kaen, hem i givim nem long hem we i hae moa long ol narafala nem.”—Fil. 2:9.

14. ?Yu yu bilif se Hed Kampani blong ol Witnes blong Jehova, hem i “gudfala slef we i waes” we Jisas i putumap?

    • “?Hu ya gudfala slef we i waes, we masta blong hem i putumap hem blong i lukaot long ol narafala man blong hem, blong givim kakae long olgeta long stret taem blong hem?”—Mat. 24:45.

15. ?Tabu spirit hem i wan man?

    • “Nao enjel ya i ansa long hem se: ‘Tabu spirit bambae i kam long yu, mo paoa blong Hae God bambae i kavremap yu olsem wan sado. From samting ya, bambae oli talem se pikinini ya we i bon, hem i tabu, i Pikinini blong God.’”—Luk 1:35.

    • “Sipos yufala ol man nogud, yufala i save givim ol gudfala presen long ol pikinini blong yufala, !be Papa blong yufala long heven, hem i save go moa, bambae hem i givim tabu spirit long olgeta we oli stap askem long hem!”—Luk 11:13.

16. ?Jehova i yusum tabu spirit blong hem blong mekem wanem?

    • “Jehova i mekem heven long tok blong hem nomo, mo from spirit blong maot blong hem, hem i mekem evri samting we i stap long hem.”—Sam 33:6.

    • “Taem tabu spirit i kam long yufala, bambae yufala i gat paoa nao yufala i witnes blong mi long . . . olgeta ples long wol.”—Wok 1:8.

    • “I no gat wan profet tok long Baebol we i kamaot from prapa tingting blong man nomo. I no gat wan taem we profet tok i kamaot from we man nomo i wantem. Taem tok blong profet i kamaot, ol profet oli talem, be tabu spirit i putum tok ya long tingting blong olgeta, nao oli talemaot tok we i kamaot long God.”—2 Pita 1:20, 21.

17. ?Wanem ya Kingdom blong God?

    • “God blong heven bambae i stanemap wan kingdom we bambae i neva foldaon. Mo kingdom ya bambae i no go long han blong wan narafala man. Bambae hem i smasem mo i finisim olgeta kingdom ya, mo hem nomo bambae i stanap olwe.”—Dan. 2:44.

18. ?Kingdom blong God bambae i givim wanem blesing long yu?

    • “Hem bambae i ravemaot wota blong ae blong olgeta, mo bambae i no moa gat man i ded, mo bambae man i no moa sore, mo bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”—Rev. 21:4.

19. ?Olsem wanem yu save se ol blesing blong Kingdom bambae oli kamtru i no longtaem?

    • “Ol disaepol oli kam long hem, oli talem se: ‘Yu talem long mifala, ?ol samting ya bambae oli hapen wetaem? ?Mo wanem saen bambae i soemaot se yu stap, mo se hem i lashaf blong sistem blong wol ya?’ Jisas i ansa long olgeta i se: ‘. . . Bambae ol nesen oli faet agensem ol narafala nesen, mo ol kingdom oli faet agensem ol narafala kingdom. Mo olbaot long wol bambae kakae i sot mo graon i seksek. Mo ol man bambae oli talemaot gud nius ya blong Kingdom long olgeta ples long wol, blong oli witnes long olgeta nesen, nao biaen en bambae i kam.’”—Mat. 24:3, 4, 7, 14.

    • “Long ol las dei, laef bambae i strong tumas mo bambae i had blong winim ol trabol. Bambae ol man oli tingbaot olgeta nomo, oli laekem mane tumas, oli tok flas, tingting blong olgeta i go antap tumas, oli tok nogud long ol narafala, oli no obei long papa mo mama blong olgeta, oli no gat tangkiu, mo oli no holemstrong long ol narafala, oli no gat lav insaed long famle, oli no save agri long wan tingting, oli spolem nem blong narafala, oli no save bos long tingting, oli wael olgeta, mo oli no laekem ol gudfala fasin. Bambae oli putum ol fren blong olgeta long han blong ol enemi, oli stronghed, oli flas gogo tingting blong olgeta i go antap tumas, oli laekem ol samting we oli save harem gud long hem, bitim we oli lavem God. Long fes blong ol man, bambae oli mekem olsem se oli ona long God, be oli no wantem paoa blong hem long laef blong olgeta.”—2 Tim. 3:1-5.

20. ?Olsem wanem yu soemaot se Kingdom i impoten long yu?

    • “Yufala i mas gohed blong lukaot Kingdom mo stret fasin blong hem fastaem.”—Mat. 6:33.

    • “Jisas i talem long ol disaepol blong hem se: ‘Sipos eni man i wantem kam biaen long mi, hem i mas blokem ol samting we hem nomo i wantem mo i mas karem pos blong hem, mo hem i mas folem mi oltaem.’”—Mat. 16:24.

21. ?Hu ya Setan mo ol dimon blong hem?

    • “Yufala i kamaot long papa blong yufala Devel . . . Stat bifo olgeta, hem i man blong kilim man i ded.”—Jon 8:44.

    • “Oli slingim [bigfala algita ya] i kamdaon long wol . . . hem i snek ya blong bifo we oli singaot hem se Devel mo Setan, hem i stap lidim olgeta man long wol oli go krangke. Ol enjel blong hem tu, oli slingim olgeta oli kamdaon.”—Rev. 12:9.

22. ?Setan i putum wanem poen agensem Jehova mo olgeta we oli wosipim Hem?

    • “Woman ya i talem long snek ya se: ‘Mitufala i save kakae frut blong ol tri we oli stap long garen ya. Be tri ya nomo we i stap long medel blong garen ya, God i talem se: “Yutufala i no mas kakae frut blong hem, mo yutufala i no mas tajem, sipos no bambae yutufala i ded.”’ Be snek ya i talem long woman ya se: ‘Bambae yutufala i no ded. From we God i save se long dei ya we yutufala i kakae frut ya, ae blong yutufala bambae i open, mo bambae yutufala i kam olsem God, yutufala i save samting we i gud mo samting we i nogud.’”—Jen. 3:2-5.

    • “Setan i ansa long Jehova se: ‘Skin i pembak skin. Bambae man i lego evri samting we hem i gat blong sevem laef blong hem.’”—Job 2:4.

23. ?Olsem wanem yu save pruvum se ol tok blong Setan i giaman?

    • “Yu mekem wok blong [God] long fulhat blong yu.”—1 Kron. 28:9.

    • “!Go kasem we mi ded, bambae mi no lego fasin blong mi blong holemstrong long God!”—Job 27:5.

24. ?From wanem man i ded?

    • “Wan man nomo i mekem se sin i kam long wol, mo ded i kamaot from sin. Mo ded i kasem olgeta man from we olgeta evriwan oli mekem sin.”—Rom 5:12.

25. ?Ol dedman oli save samting?

    • “Ol man we oli laef yet oli save se bambae oli ded, be ol dedman oli no moa save wan samting nating.”—Pri. 9:5.

26. ?I gat wanem hop long saed blong ol man we oli ded?

    • “Ol man we oli stret wetem ol man we oli no stret bambae oli laef bakegen.”—Wok 24:15.

27. ?Hamas man oli go long heven blong rul wetem Jisas?

    • “Mi luk Smol Sipsip i stap stanap long Hil Ya Saeon, mo i gat 144,000 man oli stap wetem hem. Ol man ya oli gat nem blong hem wetem nem blong Papa blong hem long fored blong olgeta.”—Rev. 14:1.

Long stadi blong Baebol, yu kasem save long ol samting we Jehova i wantem yu blong mekem, mo olsem wanem blong folem ol stret fasin blong hem. Ating yu jenisim plante tingting mo fasin blong yu finis, blong mekem oli laenap wetem save ya. Yu gat strong tingting blong folem ol stret fasin blong Jehova, mo from samting ya, hem i save agri long wok we yu mekem olsem wan man blong talemaot gud nius.

Sipos yu tingting gud long ol kwestin we oli kam biaen, bambae yu holem ol stret fasin blong Jehova oli stap gud long tingting blong yu, mo bambae oli rimaenem yu long sam samting we yu save mekem, blong Jehova i glad long yu. Ol save ya bambae oli makem gud long tingting blong yu se, long evri samting we yu mekem, yu mas gat wan tingting we i klin long fes blong Jehova mo yu givim ona long hem.—2 Kor. 1:12; 1 Tim. 1:19; 1 Pita 3:16, 21.

Naoia we yu stadi longtaem lelebet, i sua se yu wantem tumas blong stap aninit long rul blong Jehova, mo joen long oganaesesen blong hem. Ol kwestin mo vas long haf ya bambae oli givhan long yu, blong yu save olsem wanem blong obei long plan blong Jehova long kongregesen, famle, mo long saed blong ol gavman blong wol. Bambae yu tinghae moa long plan blong Jehova blong tijim ol man blong hem, mo blong mekem bilif blong olgeta i strong. Wan rod we hem i yusum, hemia ol miting blong kongregesen. I gud yu go long ol miting ya mo joen fulwan long olgeta, olsem we yu naf blong mekem.

Mo tu, haf ya i soemaot se i impoten blong joen oltaem long wok ya blong talemaot gud nius blong Kingdom, mo givhan long ol narafala blong oli save Jehova mo ol samting we hem i stap mekem blong ol man. (Mat. 24:14; 28:19, 20) Mo haf ya bambae i pulum yu tu, blong yu tinghevi long promes we yu mekem blong givim laef blong yu long Jehova God mo baptaes. Yu save sua se Jehova i tinghae long samting we yu mekem, blong talem tangkiu long hem from kaen fasin we hem i soemaot long yu.

1. ?Wanem rul we ol Kristin oli folem long saed blong mared? Folem Baebol, ?wan risen nomo blong man mo woman i save divos, hem i wanem?

   • “?Yufala i no ridim se long stat, God i mekem wan man mo wan woman nomo? Mo hem i talem se: ‘From samting ya, man bambae i aot long papa mo mama blong hem, mo bambae hem i go joen wetem waef blong hem, mo bambae tufala i kam wan bodi nomo.’ Nao tufala i no moa tu, be wan bodi nomo. Taswe, samting we God i joenem, man i no mas seraotem . . . man we i divosem waef blong hem, we waef ya i no mekem enikaen doti fasin blong seks, nao man ya i go mared long narafala woman, hem i mekem adaltri.”—Mat. 19:4-6, 9.

2. ?From wanem man mo woman we i stap tugeta i mas mared folem loa blong gavman? Sipos yu mared finis, ?yu sua se oli bin rejistarem mared blong yu folem loa?

   • “Yu mas gohed blong talem bakegen long olgeta, se oli mas putum olgeta oli stap aninit long ol gavman mo ol haeman.”—Taet. 3:1.

   • “Evri man i mas tinghae long mared. Mo i no mas gat wan samting i mekem mared bed i doti, from we God bambae i jajem ol man we oli stap mekem enikaen doti fasin blong seks, mo olgeta we oli mekem adaltri.”—Hib. 13:4.

3. ?Wanem wok blong yu insaed long famle?

   • “Boe blong mi, yu lesin long papa blong yu taem i stretem yu, mo yu no mas sakemaot ol tijing blong mama blong yu.”—Prov. 1:8.

   • “Hasban i hed blong waef long hem stret olsem we Kraes i hed blong kongregesen . . . Ol hasban, yufala i mas gohed blong lavem waef blong yufala stret olsem we Kraes tu i lavem kongregesen.”—Efes. 5:23, 25.

   • “Ol papa. Yufala i no mas stap mekem ol pikinini blong yufala oli harem nogud gogo oli kam kros. Be yufala i mas gohed blong lukaot gud long olgeta, we yufala i stretem mo givim woning long olgeta folem tingting blong Jehova.”—Efes. 6:4.

   • “Yufala ol pikinini, yufala i mas obei long papa mo mama blong yufala long evri samting, from we Masta i glad long fasin ya.”—Kol. 3:20.

   • “Yufala ol waef, yufala i mas putum yufala i stap aninit long ol hasban blong yufala.”—1 Pita 3:1.

4. ?From wanem yumi mas respektem laef?

   • “[God] nomo i givim laef long olgeta man, mo i givim win we oli pulum, mo i givim olgeta samting. Hem nomo i mekem se yumi gat laef, yumi stap, mo yumi muvmuv.”—Wok 17:25, 28.

5. ?From wanem yumi no mas kilim man i ded? ?Mo from wanem yumi no mas kilim pikinini long bel?

   • “Sipos sam man oli stap faet nao oli kilim wan woman we i gat bel, . . . sipos wan i ded, narafala man tu i mas ded.”—Eks. 21:22, 23.

   • “Ae blong yu i luk mi finis, nating se bodi blong mi i jes stat blong gru, oli bin raetemdaon olgeta haf blong hem long buk blong yu wetem ol dei we oli mekem olgeta, hemia bifo we oli kamtru.”—Sam 139:16.

   • “[Jehova] i no laekem nating . . . fasin blong . . . kilim man i ded.”—Prov. 6:16, 17.

6. ?Wanem loa blong God long saed blong blad?

   • “Yufala i no mas kakae blad mo ol animol we oli jokem nek blong olgeta.”—Wok 15:29.

7. ?From wanem yumi mas lavem ol Kristin brata mo sista?

   • “Mi mi givim wan niufala komanmen long yufala, se yufala i mas lavlavem yufala. Olsem we mi lavem yufala, ale long sem fasin, yufala tu i mas lavlavem yufala. Sipos yufala i lavlavem yufala, bambae olgeta man oli save se yufala i disaepol blong mi.”—Jon 13:34, 35.

8. Sipos wan man o woman i gat wan sik we hem i save pasem i go long narafala mo hem i save ded from: (1) ?From wanem hem i no mas hagem o kisim narafala? (2) ?From wanem hem i no mas kros taem ol narafala oli no singaot hem i go long haos blong olgeta? (3) ?From wanem hem i mas go jekem blad blong hem, bifo we hem i stap fren wetem narafala blong mared? (4) ?From wanem hem i mas talemaot se hem i gat sik ya long kodineta blong ol elda, bifo we hem i baptaes?

   • “Yufala i no mas gat kaon long eni man, be yufala i gat wan kaon nomo, hemia blong yufala i lavlavem yufala. . . . ‘Yu mas lavem neba blong yu olsem we yu lavem yu wan.’ Man we i gat lav, hem i no save mekem i nogud long ol neba blong hem.”—Rom 13:8-10.

   • “Yufala i no mas tingbaot yufala nomo, be yufala i mas tingbaot ol narafala man tu.”—Fil. 2:4.

9. ?From wanem Jehova i talem se yumi mas fogivim narafala?

   • “Yufala i no mas hariap blong kros long yufala, mo yufala i mas glad blong fofogivim yufala nating sipos wan long yufala i gat risen blong komplen agens long narawan. Jehova i glad oltaem blong fogivim yufala, ale yufala tu i mas mekem sem mak.”—Kol. 3:13.

10. ?Yu mas mekem wanem sipos wan brata i ravem yu o i giaman blong spolem nem blong yu?

    • “Sipos brata blong yu i mekem sin, yu go luk hem mo taem yutufala nomo i stap, yu talemaot rong blong hem. Sipos hem i lesin long yu, yu yu givhan long brata blong yu blong i kambak. Be sipos hem i no lesin, yu tekem wan o tu narafala wetem yu, blong oli witnes blong yu. Nao evri samting i save stanap long ol toktok blong tu o tri witnes. Sipos hem i no lesin long olgeta, yu talemaot long kongregesen. Sipos hem i no lesin long kongregesen tu, yu mas mekem long hem olsem we hem i wan man blong narafala nesen o wan man blong tekem takis.”—Mat. 18:15-17.

11. ?Wanem tingting blong Jehova long ol sin ya?

    • ▪ Enikaen doti fasin blong seks

    • ▪ Wosipim aedol

    • ▪ Fasin blong homoseksuol

    • ▪ Stil

    • ▪ Plei laki

    • ▪ Drong

    • “Yufala i no mastik long samting ya. Olgeta we oli stap mekem enikaen doti fasin blong seks, mo olgeta we oli wosipim aedol, mo olgeta we oli mekem adaltri, mo ol man we oli glad nomo blong ol man bakegen oli mekem seks long olgeta, mo ol man we oli stap mekem seks wetem man bakegen, mo ol stilman, mo ol man we oli griri, mo ol man blong drong, mo ol man we oli stap tok nogud blong spolem nem blong narafala man, mo ol man we oli trikim narafala blong stilim olting blong hem, bambae oli no kasem Kingdom blong God.”—1 Kor. 6:9, 10.

12. Long saed blong enikaen doti fasin blong seks afsaed long mared, ?yu yu gat strong tingting blong mekem wanem?

    • “!Yufala i mas ronwe long enikaen doti fasin blong seks!”—1 Kor. 6:18.

13. ?From wanem yumi no mas tekem enikaen drag we dokta i no givim from wan sik, o narafala samting olsem we i gat paoa long tingting?

    • “Yufala i givim bodi blong yufala i go long God olsem wan sakrefaes we i laef mo i tabu, mo we God i glad long hem. Hemia wan tabu wok we yufala i mas yusum gud tingting blong yufala blong mekem. Yufala i stop blong letem sistem blong wol ya i jenisim fasin blong yufala, be yufala i mas jenisim tingting blong yufala blong yufala i jenis fulwan, olsem nao bambae yufala i save pruvum long yufala wan se wil blong God i gud, i stret gud, mo hem i glad long hem.”—Rom 12:1, 2.

14. ?Wanem sam wok blong ol rabis spirit we God i agensem?

    • “I no mas gat wan long yufala we i . . . stap faenemaot ol samting we oli haed, i mekem majik, i stap lukaot ol saen, i wan kleva, i stap mekem masing long narafala, i go luk man we i stap toktok wetem ol dedman, i talemaot fiuja, o i toktok wetem ol dedman.”—Dut. 18:10, 11.

15. Sipos wan man i mekem bigfala sin be hem i wantem fren gud bakegen wetem Jehova, ?hem i mas mekem wanem kwiktaem?

    • “Mi talemaot sin blong mi long yu. Mi mi no kavremap ol mastik blong mi. Mi talem se: ‘Bambae mi talemaot ol rong blong mi long Jehova.’”—Sam 32:5.

    • “?I gat wan long yufala we i sik? I gud hem i singaot ol elda blong kongregesen blong oli kam luk hem, mo i gud oli prea long hem, mo oli putum oel long hem long nem blong Jehova. Mo prea blong man we i bilif bambae i mekem sikman ya i gud bakegen, mo Jehova bambae i mekem hem i strong bakegen. Mo sipos hem i bin mekem sam sin, bambae God i fogivim hem.”—Jem. 5:14, 15.

16. Sipos yu save se wan Kristin brata o sista i mekem wan bigfala sin, ?yu mas mekem wanem?

    • “Sipos wan man i luk no i save long saed blong wan sin, hem i wan witnes. Sipos biaen hem i harem we oli singaot ol man blong oli kam witnes agensem man we i mekem sin ya, be hem i no kam talemaot, hem i mekem sin. Bambae hem i mas kasem panis.”—Lev. 5:1.

17. Sipos kongregesen i talemaot se wan man i no moa Witnes blong Jehova, ?yumi mas mekem olsem wanem long hem?

    • “Yufala i mas stop blong joen wetem wan man we i talem se hem i brata blong yumi, be i stap mekem enikaen doti fasin blong seks, o i griri, o i stap wosipim aedol, o i stap tok nogud long narafala, o i stap drong, o i stap stil, mo yufala i no mas kakae wetem man olsem.”—1 Kor. 5:11.

    • “Sipos wan man i kam long yufala, be hem i tijim yufala long ol samting we oli no laenap wetem samting we Kraes i tijim, yufala i no mas tekem hem i go insaed long haos blong yufala, mo yufala i no mas talem halo long hem.”—2 Jon 10.

18. ?From wanem yu mas jusum ol fren we oli lavem Jehova?

    • “Man we i stap wokbaot wetem man we i waes, bambae hem i kam waes, be man we i stap joen wetem man we i stupid, bambae hem i kasem trabol nomo.”—Prov. 13:20.

    • “Yufala i no mas letem ol narafala oli lidim yufala i go krangke. Ol rabis fren oli save spolem ol gudfala fasin.”—1 Kor. 15:33.

19. ?From wanem ol Witnes blong Jehova oli no joen long politik?

    • “Olgeta oli no man blong wol ya, olsem we mi tu [Jisas] mi no man blong wol ya.”—Jon 17:16.

20. ?From wanem yu mas obei long gavman?

    • “I gud evri man oli putum olgeta oli stap aninit long ol haeman we oli stap rul, from we i no gat wan haeman we i save stanap sipos God i no letem. Ol haeman ya we oli stap, oli holem ol defdefren posisen ya from we God i letem.”—Rom 13:1.

21. Sipos wan loa blong man i agensem loa blong God, ?bambae yu mekem wanem?

    • “Mifala i mas obei long God we i rula blong mifala, i bitim we mifala i obei long ol man.”—Wok 5:29.

22. Taem yu jusum wan wok, ?wanem ol vas we oli save givhan long yu blong yu no joen long wol?

    • “Bambae ol nesen oli no leftemap naef blong faet agensem narafala nesen, mo bambae oli no moa lanem blong faet.”—Maeka 4:3.

    • “Ol man blong mi, yufala i mas kamaot long hem [Bigfala Babilon] sipos yufala i no wantem joen wetem hem long sin blong hem, mo sipos yufala i no wantem kasem ol trabol we bambae hem i kasem.”—Rev. 18:4.

23. ?Bambae yu jusum wanem pleplei mo samting blong mekem blong spel, mo bambae yu sakemaot weswan?

    • “Jehova . . . i no laekem nating eni man we i laekem faet.”—Sam 11:5.

    • “Yufala i mas agensem ol samting we oli rabis, be yufala i holemstrong long ol samting we oli gud.”—Rom 12:9.

    • “Yufala i mas gohed blong tingting long olgeta samting we oli tru, olgeta samting we oli impoten, olgeta samting we oli stret, olgeta samting we oli klin, olgeta samting we i mekem man i gat lav, olgeta samting we i stret blong yumi leftemap, olgeta samting we oli gud, mo olgeta samting we God bambae i glad long olgeta.”—Fil. 4:8.

24. ?From wanem ol Witnes blong Jehova oli no joen wetem ol narafala skul blong mekem wosip?

    • “Yufala i no save gohed blong sidaon blong kakae long ‘tebol blong Jehova’ mo tu long tebol blong ol dimon.”—1 Kor. 10:21.

    • “Jehova i talem se: ‘Taswe yufala i mas kamaot long olgeta, yufala i mas stap yufala nomo mo olgeta oli mas stap olgeta nomo, mo yufala i no mas tajem ol samting we oli no klin,’ mo ‘mi bambae mi glad blong tekem yufala.’”—2 Kor. 6:17.

25. ?Wanem advaes i save givhan long yu blong luk sipos i stret blong joen long wan lafet?

    • “Oli go joen wetem ol man blong ol nesen mo oli tekem ol fasin blong olgeta. Oli gohed blong wosipim ol aedol blong olgeta, nao fasin ya i kam olsem wan trap blong olgeta.”—Sam 106:35, 36.

    • “Ol dedman oli no moa save wan samting.”—Pri. 9:5.

    • “Olgeta oli no man blong wol ya, olsem we mi tu mi no man blong wol ya.”—Jon 17:16.

    • “Longtaem finis nao yufala i stap mekem ol samting we ol man blong ol nesen oli wantem. Yufala i stap mekem nogud fasin we man i no sem blong mekem, mo yufala i wantem tumas ol samting we oli nogud, mo yufala i dring bitim mak, mo yufala i mekem ol rabis lafet, mo yufala i stap mekem ol lafet blong dring, mo yufala i stap brekem loa taem yufala i wosipim ol aedol. Naoia i naf.”—1 Pita 4:3.

26. ?Wanem ol lafet blong betde we Baebol i tokbaot? ?Yu ting se i stret blong joen long lafet blong betde?

    • “Long namba 3 dei, hem i betde blong Fero. Nao Fero i mekem wan bigfala lafet blong olgeta man blong wok blong hem. Nao long fes blong ol man blong hem, hem i tekemaot bos blong karem dring mo bos blong bred long kalabus. Nao hem i mekem se bos blong karem dring i kasembak wok blong hem . . . Be Fero i hangem bos blong bred.”—Jen. 40:20-22.

    • “Long lafet blong betde blong Herod, gel blong Herodias i kam danis long fes blong olgeta we oli stap, mo Herod i glad tumas, nao hem i mekem wan strong promes long gel ya se bambae hem i givim eni samting we hem i askem. Nao, mama blong gel ya i talem long hem blong i askem long king se: ‘Yu putum hed blong Jon Baptaes, long wan plet, mo yu givim long mi.’ Hem i sanem sam man oli go katemaot hed blong Jon long kalabus.”—Mat. 14:6-8, 10.

27. ?From wanem yu wantem folem advaes blong ol elda?

    • “Yufala i mas obei long olgeta we oli stap lidim yufala, mo yufala i mas stap aninit long olgeta, from we olgeta oli stap gohed blong lukaot gud long laef blong yufala, mo oli mas talemaot long God se oli holem wok ya olsem wanem. Olsem nao, oli save mekem wok ya wetem glad, be oli no pulum nogud win blong olgeta, from we samting ya i save spolem yufala.”—Hib. 13:17.

28. ?From wanem i impoten we yu mo famle blong yu i makemaot taem blong ridim mo stadi Baebol oltaem?

    • “Man olsem, hem i glad long loa blong Jehova, mo hem i stap ridim loa blong Hem long smol voes, long dei mo long naet. Bambae hem i olsem wan tri we oli planem long saed blong wota we i stap ron, wan tri we i stap karem frut long stret taem blong hem, mo ol lif blong hem oli no save slak. Mo evri samting we hem i mekem, bambae i go gud.”—Sam 1:2, 3.

29. ?From wanem yu laekem tumas blong joen mo ansa long ol miting?

    • “Bambae mi talemaot nem blong yu long ol brata blong mi, mo long medel blong kongregesen, bambae mi presem yu.”—Sam 22:22.

    • “I gud yumi stap tingbaot yumi, blong yumi givgivhan long yumi blong yumi lavem ol narafala, mo blong yumi mekem ol gudfala wok. Yumi no mas les blong kam wanples long ol miting blong yumi, olsem we samfala oli stap mekem. Oltaem yumi mas toktok gud blong leftemap tingting blong yumi. Mo yufala i mas mekem samting ya moa, taem yufala i luk we dei ya i stap kam klosap.”—Hib. 10:24, 25.

30. ?Jisas i givim wanem wok long yumi we i impoten tumas?

    • “Nao from samting ya, yufala i mas go long ol man long olgeta nesen, yufala i pulum olgeta oli kam disaepol blong mi, mo yufala i baptaesem olgeta . . . , yufala i tijim olgeta blong oli folem olgeta tok ya we mi mi talem finis long yufala.”—Mat. 28:19, 20.

31. Taem yumi givim presen mane blong sapotem wok blong Kingdom o halpem ol brata mo sista, ?Jehova i wantem se yumi givim wetem wanem tingting?

    • “Yu mas givim ol gudgudfala samting blong yu long Jehova blong ona long hem.”—Prov. 3:9.

    • “I gud olgeta man wanwan oli givim samting olsem we oli jusumaot finis long hat blong olgeta. I nogud oli givim samting long sore nomo, no oli harem olsem we narafala i fosem olgeta, from we God i lavem man we i glad blong givim samting.”—2 Kor. 9:7.

32. ?Ol Kristin oli save se bambae oli kasem wanem trabol?

    • “Olgeta we oli stap mekem stret fasin be ol man oli ronem mo kilim olgeta, oli glad from we Kingdom blong heven i blong olgeta. Yufala we ol man oli stap spolem nem blong yufala, mo oli stap ronem mo kilim yufala, mo oli stap giaman, oli stap talem enikaen rabis tok agens long yufala from we yufala i man blong mi, yufala i glad. Yufala i harem gud mo yufala i mas glad bitim mak, from we bigfala pei blong yufala i stap long heven. Ol profet bifo, ol man oli mekem i nogud long olgeta long sem fasin ya nomo.”—Mat. 5:10-12.

33. ?From wanem i wan ona blong baptaes olsem wan Witnes blong Jehova?

    • “Tok blong yu i mekem hat blong mi i glad mo i harem gud, from ol man oli stap singaotem mi long nem blong yu, O Jehova God.”—Jer. 15:16.