Tok Ya i Go Long Pablisa We i No Baptaes:

Ol papa mo mama, yufala i wantem halpem ol pikinini blong yufala blong oli lavem Jehova mo givim laef blong olgeta i go long hem. ?Olsem wanem yufala i save halpem olgeta blong oli rere blong baptaes? ?Wetaem oli rere blong tekem impoten step ya?

Jisas i talem long ol man blong hem se: “Yufala i mas go long ol man long olgeta nesen, yufala i pulum olgeta oli kam disaepol blong mi, mo yufala i baptaesem olgeta.” (Mat. 28:19) Folem vas ya, yumi mas kam wan disaepol fastaem blong yumi save baptaes. Disaepol i no minim nomo se yumi kasem save mo bilivim ol tijing blong Kraes, be yumi folem gud olgeta tu. Ol pikinini oli naf blong mekem samting ya.

Soemaot wan gudfala eksampol long ol pikinini blong yufala, mo putum ol tijing blong Jehova long hat blong olgeta. (Dut. 6:6-9) Blong mekem olsem, yusum ol save long buk ya !Enjoem Laef Olwe! Olsem nao, bambae oli lanem ol stamba trutok blong Baebol, mo olsem wanem blong tingting gud long olgeta mo folem long laef blong olgeta. Givhan long ol pikinini blong oli naf blong eksplenem bilif blong olgeta long prapa toktok blong olgeta. (1 Pita 3:15) Ol save mo ol tok we yufala i talem blong pulum olgeta, mo we oli kasem long prapa stadi blong olgeta, famle wosip, ol miting blong kongregesen, mo ol gudfala fren, bambae i givhan long olgeta blong oli gohed gud kasem baptaes mo afta long baptaes. Halpem olgeta blong tingbaot oltaem, olsem wanem oli save kam klosap moa long Jehova.

Ol Proveb 20:11 i talem se: “Nating se wan smol pikinini nomo, be ol aksen blong hem oli soemaot se hem i olsem wanem, oli save soemaot sipos ol fasin blong hem oli klin mo stret.” ?Wanem sam aksen we oli save soemaot se wan boe o gel i kam wan disaepol blong Jisas Kraes finis, mo i rere blong baptaes?

Wan pikinini we i stap gohed gud mo i wantem baptaes, i mas obei long papa mo mama blong hem. (Ol Wok 5:29; Kol. 3:20) Baebol i tokbaot Jisas taem hem i gat 12 yia, i se: “Hem i gohed blong putum hem i stap aninit long [papa mo mama blong hem].” (Luk 2:51) I tru, yufala i no mas ekspektem se pikinini blong yufala bambae i neva mestem. Be yangfala we i wantem baptaes bambae i traehad blong folem eksampol blong Jisas, nao evriwan bambae oli luksave se hem i glad blong stap aninit long papa mo mama blong hem.

Mo tu, bambae hem i soemaot se hem i wantem tumas blong lanem ol trutok blong Baebol. (Luk 2:46) ?Olsem wanem? ?Pikinini blong yufala i wantem go long ol miting, givim tok, mo ansa? (Sam 122:1) ?Hem i laekem blong ridim Baebol mo stadi hem wan?—Mat. 4:4.

Pikinini we i stap gohed gud mo i wantem baptaes, i stap traehad blong lukaot Kingdom fastaem long laef blong hem. (Mat. 6:33) Hem i luksave se hem i mas serem bilif blong hem wetem ol narafala. Hem i joen long ol defren haf blong minista wok, mo i no sem blong talemaot long tija mo ol pikinini long skul se hem i wan Witnes blong Jehova. Hem i tinghevi long ol tok we hem i mekem long Miting Blong Kristin Wok Mo Laef.

Mo tu, hem i no joen wetem ol rabis fren, from we hem i wantem stap klin long ol fasin blong hem. (Prov. 13:20; 1 Kor. 15:33) Hem i soemaot samting ya, long ol miusik we hem i jusum, ol muvi, ol program long televisen, ol video gem, mo fasin blong hem blong yusum Intenet.

Plante pikinini oli folem gudfala trening we papa mo mama blong olgeta i givim, oli bilif long trutok, mo oli kam naf blong baptaes taem oli yang nomo. Jehova bambae i blesem yufala taem yufala i givhan long ol pikinini blong yufala, blong oli kasem impoten mak ya long frensip blong olgeta wetem Jehova.

Tok Ya i Go Long Pablisa We i No Baptaes:

I wan bigfala blesing blong wok wetem kongregesen olsem wan pablisa we i no baptaes. I gud tumas we yu stap gohed gud long wok blong Jehova kam kasem naoia. Yu bin stadi long Tok blong God blong save gud Hem, mo yu bilif long ol promes blong hem.—Jon 17:3; Hib. 11:6.

Bifo we yu stadi wetem ol Witnes blong Jehova, maet yu bin joen long wan narafala jos, o maet yu no bin joen long wan jos nating. Maet yu bin mekem sam samting we oli no stret folem ol rul blong Baebol. Be naoia yu gat bilif, mo yu soemaot samting ya taem yu tanem tingting blong yu from ol sin, i min se yu harem nogud long ol nogud fasin we yu bin mekem bifo. Mo tu, yu tanraon, i min se yu sakemaot ol nogud fasin mo yu gat strong tingting blong mekem samting we i stret long fes blong God.—Wok 3:19.

Be maet yu no mekem ol rabis fasin o bigfala sin bifo, from we yu kasem tijing long ol tabu tok blong Baebol “stat taem yu bebi.” (2 Tim. 3:15) Yu lanem finis blong stanap strong taem ol fren mo ol narafala oli traem pulum yu blong mekem samting we Jehova i no laekem. Yu soemaot bilif taem yu sapotem tru wosip mo talemaot bilif blong yu long ol narafala. Yu kasem trening long wok blong prij. Ale, naoia yu mekem prapa desisen blong yu blong mekem wok blong Jehova olsem wan pablisa we i no baptaes.

Nomata se yu lanem trutok taem yu bigman finis o taem yu pikinini nomo, maet naoia yu stap tingbaot blong kasem tufala mak ya, hemia blong givim laef long Jehova mo baptaes. Yu givim laef blong yu long Jehova taem yu prea long hem, mo yu talemaot desisen blong yu blong wosipim hem nomo blong olwe. (Mat. 16:24) Blong soemaot se yu givim laef blong yu long Jehova, yu baptaes long wota. (Mat. 28:19, 20) Taem yu givim laef blong yu long Jehova mo yu baptaes, yu kam wan man blong Jehova God. !Hemia wan nambawan blesing!

Taem yu stadi Baebol, yu lanem se bambae yu kasem sam trabol. Traem tingbaot Jisas. Jes afta we hem i baptaes, ‘spirit i lidim hem i go long draeples, blong Devel i traem hem.’ (Mat. 4:1) Long sem fasin, taem yu baptaes olsem wan disaepol blong Kraes, yu tu yu save kasem sam trabol. (Jon 15:20) Ol trabol ya oli defdefren. Samtaem ol famle oli agensem yu. (Mat. 10:36) Maet ol fren long skul, ol fren long wok, o sam narafala we yu stap joen wetem olgeta bifo, oli jikim yu. Be oltaem yu mas tingbaot tok blong Jisas long Mak 10:29, 30 se: “Tru mi talem long yufala, man we i lego haos, o brata, o sista, o mama, o papa, o pikinini, o graon blong hem from mi mo from gud nius, bambae hem i kasem haos, brata, sista, mama, pikinini, mo graon 100 taem antap bakegen naoia, mo ol man bambae oli ronem mo kilim hem tu. Mo long sistem blong wol we i stap kam, bambae hem i kasem laef we i no save finis.” Taswe yu mas wok had oltaem blong stap klosap long Jehova mo obei long ol loa blong hem.

Taem yu wantem baptaes, yu mas talemaot long kodineta blong bodi blong ol elda. Ol elda bambae oli yusum ol kwestin we oli kam biaen, blong storian wetem yu mo blong luk sipos yu yu naf blong baptaes. I gud yu stat blong ridim ol kwestin ya yu wan, taem yu mekem prapa Baebol stadi blong yu.

Blong reregud from ol storian ya, ridim mo tingting gud long ol vas we oli stap. Maet yu wantem raetem sam smol not long buk ya o long wan narafala pepa. Yu save yusum ol not ya, mo buk ya tu, long taem we yu storian wetem ol elda. Sipos yu no kasem save long sam kwestin, yu no mas fraet blong askem long brata o sista we i mekem stadi blong yu, o yu askem long ol elda.

Taem yu storian wetem ol elda, i no nid blong yu givim wan longfala ansa long ol kwestin. I moagud yu givim wan isi, stret ansa, long prapa toktok blong yu. Mo tu, i gud yu tokbaot wan o tu vas blong Baebol we ansa i stanap long hem.

Sipos ol elda oli luk se yu no gat naf save yet long ol stamba tijing blong Baebol, bambae oli mekem plan wetem wan brata o sista, blong i givhan moa long yu. Olsem nao, bambae yu save eksplenem ol stret save blong Baebol long prapa toktok blong yu, nao bambae yu naf blong baptaes samtaem long fiuja.

[Tok ya i go long ol elda: Ol advaes mo ol kwestin blong storian wetem olgeta we oli wantem baptaes, oli stap long pej 54-59.]