HAF 8
Taem i Gat Bigfala Trabol
‘Yufala i save harem gud, nating we naoia yufala i mas harem nogud from plante samting we oli stap kam blong traem yufala.’—1 Pita 1:6
Maet yu traehad blong mekem mared mo famle blong yu i hapi, be samting we yu no tingbaot i save kamaot enitaem, nao i hadwok blong famle i holemtaet glad. (Prija 9:11) God i lavem yumi tumas, taswe hem i stap givhan long yumi taem yumi kasem trabol olsem. Sipos yufala i folem ol advaes long Baebol, bambae yufala i save stanap strong, nating se trabol ya i bigwan tumas.
1 YUFALA I MAS TRASTEM JEHOVA
?BAEBOL I TALEM WANEM? “Yufala i mas putum ol trabol blong yufala long han blong hem, from we oltaem hem i stap tingbaot yufala.” (1 Pita 5:7) Yu mas tingbaot se God i no stamba blong ol trabol blong yufala. (Jemes 1:13) Sipos yufala i kam klosap long God, bambae hem i givhan long yufala long rod we i beswan. (Aesea 41:10) Baebol i talem se: “Yufala i talemaot ol trabol blong yufala long hem.”—Ol Sam 62:8.
Sipos evri dei yufala i ridim Baebol mo stadi long hem, bambae yufala i harem gud. Bambae yu harem save olsem wanem Jehova i stap ‘leftemap tingting blong ol man taem oli kasem trabol.’ (2 Korin 1:3, 4; Rom 15:4) Hem i promes blong givim ‘pis we i bigfala moa i bitim save blong yumi.’—Filipae 4:6, 7, 13.
?YU SAVE MEKEM WANEM?
Yu prea long Jehova blong i mekem tingting blong yu i kwaet mo i klia gud
Yu tingbaot ol defdefren rod we yu save folem blong traem winim trabol ya, nao yu jusum rod we i beswan
2 YU LUKAOT GUD LONG YU MO FAMLE BLONG YU
?BAEBOL I TALEM WANEM? ‘Ol man we oli gat gud hed, oltaem nomo oli wantem tumas blong lan, mo blong kasem save.’ (Ol Proveb 18:15) Fastaem, yu mas lukaot moa save long trabol ya we i kasem yu. Biaen yu faenemaot samting we evriwan long famle i nidim. Yu toktok wetem olgeta, mo yu lesin long olgeta.—Ol Proveb 20:5.
?Olsem wanem sipos wan long famle i ded? Yu no mas sem blong krae. Yu save tingbaot se ‘Jisas tu i krae’ taem fren blong hem i ded. (Jon 11:35; Prija 3:4) Mo tu, yu mas spel gud mo yu mas slip plante. (Prija 4:6) Olsem nao, bambae yu no harem nogud tumas.
?YU SAVE MEKEM WANEM?
Yu mas toktok oltaem wetem famle blong yu. Olsem nao, taem wan bigfala trabol i kasem famle, bambae oli no fraet blong kam toktok long yu
Yu toktok wetem samfala we oli bin kasem sem trabol
3 YU ASKEM LONG NARAFALA BLONG I GIVHAN
?BAEBOL I TALEM WANEM? ‘Fren blong yu, oltaem hem i stap soemaot we hem i lavem yu, mo i save givhan long yu long taem blong trabol.’ (Ol Proveb 17:17) Ol fren blong yu oli wantem givhan long yu, be maet oli no save samting we oli mas mekem. Taswe, yu mas talem long olgeta. (Ol Proveb 12:25) Mo tu, yu askem advaes long ol Kristin we oli save gud Baebol. Ol advaes ya i save givhan long yu.—Jemes 5:14.
Sipos yu joen oltaem wetem olgeta we oli bilif strong long Jehova mo ol promes blong hem, samting ya i save givhan tu long yu. Yu save harem gud tu sipos yu givhan long ol narafala we oli kasem trabol. Yu tokbaot Jehova mo ol promes blong hem, blong leftemap tingting blong olgeta. Oltaem yu mas givhan long ol narafala. Mo yu no mas stap yu wan, be yu mas joen wetem olgeta we oli lavem yu mo oli tingbaot yu.—Ol Proveb 18:1; 1 Korin 15:58.
?YU SAVE MEKEM WANEM?
Yu toktok long wan gudfala fren blong yu, mo yu letem hem i givhan long yu
Yu talem stret samting we yu nidim, mo yu tok tru