LESEN 37
Samting We Baebol i Talem Long Saed Blong Wok Mo Mane
?Samtaem yu stap wari long saed blong wok mo mane? I had blong kasem ol samting we yumi nidim, mo long semtaem mekem wok blong Jehova olsem we hem i wantem. Baebol i givim ol advaes we oli save halpem yumi.
1. ?Baebol i talem wanem long saed blong wok?
God i wantem se yumi enjoem wok blong yumi. Baebol i talem se: “I no gat wan samting we i gud moa i bitim we man . . . i harem gud long ol samting we hem i wok had from.” (Prija 2:24) Jehova i gat fasin ya blong wok had, taswe taem yumi wok had, hem i glad long yumi mo yumi tu yumi haremgud.
Wok i impoten, be yumi no mas letem wok ya i kam impoten moa i bitim wosip blong yumi. (Jon 6:27) Taem yumi mekem wok blong Jehova i kam impoten moa long laef blong yumi, bambae hem i givim ol samting we yumi nidim.
2. ?Wanem stret tingting we yumi mas gat long saed blong mane?
Nating we Baebol i talem se “mane i protektem man,” be hem i givim woning tu se, mane nomo i no save mekem man i hapi. (Prija 7:12) Taswe, Baebol i leftemap tingting blong yumi blong no laekem mane, be “sipos [yumi] gat wanem samting, be [yumi] mas harem gud long hem.” (Ridim Hibru 13:5.) Taem yumi stap glad long samting we yumi gat, bambae yumi no wari mo traehad blong wantem kasem moa samting mo yumi no save mekem ol kaon olbaot. (Ol Proveb 22:7) Mo yumi no foldaon long ol denja blong plei laki, mo joen long ol skim blong kam rij hariap.
3. ?Olsem wanem yumi save yusum mane blong halpem ol narafala?
Jehova i wan God we i glad blong givim samting, mo yumi folem fasin ya blong hem taem yumi “glad blong givim samting long narafala, mo [yumi] rere blong serem ol samting blong [yumi].” (1 Timoti 6:18) Yumi rere blong yusum mane blong yumi blong sapotem kongregesen, mo halpem ol narafala we oli gat nid, speseli long olgeta we oli wosip wetem yumi. Jehova i intres moa long tingting we i pusum yumi blong givhan, i bitim hamas mane we yumi givim. Taem yumi givim samting wetem fulhat blong yumi bambae yumi glad mo Jehova tu bambae i glad.—Ridim Ol Wok 20:35.
DIGIM MOA
Faenemaot ol gudfala samting we yumi save kasem taem yumi putum wok long prapa ples blong hem mo yumi glad long samting we yumi gat.
4. Ona long Jehova taem yu wok
Frensip we yumi gat wetem Jehova i sud pulum yumi blong mekem ol gudfala wok. Plei VIDEO, mo tokbaot ol kwestin we i stap.
?Wanem ol gudfala fasin blong Jason long ples blong wok we yu laekem?
?Jason i mekem wanem blong putum wok long prapa ples blong hem?
Ridim Kolosi 3:23, 24, mo tokbaot kwestin ya:
?Yumi mas gat wanem tingting long saed blong wok? ?From wanem?
Wok i impoten. Be yumi no mas letem wok i kam impoten moa i bitim wosip blong yumi
5. I gud yumi glad long ol samting we yumi gat
Tede plante man oli traem evri rod blong kasem moa mane. Be Baebol i givim wan advaes we i defren. Ridim 1 Timoti 6:6-8, mo tokbaot kwestin ya:
?Baebol i leftemap tingting blong yumi blong mekem wanem?
Nating se yumi gat smol samting nomo, be yumi stil save glad. Plei VIDEO, mo tokbaot kwestin ya.
Nating se famle ya i nogat plante mane, ?wanem i mekem se oli stil glad?
?Be olsem wanem sipos yumi gat plante samting, be yumi stil wantem moa? Jisas i talem wan pijatok long saed blong denja ya. Ridim Luk 12:15-21, mo tokbaot kwestin ya:
?Yu lanem wanem long pijatok blong Jisas?—Luk vas 15.
Ridim Ol Proveb 10:22 mo skelem wetem 1 Timoti 6:10. Biaen tokbaot ol kwestin ya:
Long tingting blong yu, wanem i moa impoten, ?blong stap olsem fren blong Jehova o gat plante mane? ?From wanem?
?Wanem ol problem we oli save kamaot sipos yumi gohed blong ronem mane?
6. Jehova bambae i lukaot long ol nid blong yumi
Ol problem long saed blong wok mo mane i save traem bilif blong yumi. Plei VIDEO blong luk olsem wanem yumi save dil wetem ol problem olsem, mo tokbaot ol kwestin ya.
Long video ya, ?wanem ol jalens we brata i fesem?
?Hem i mekem wanem blong dil wetem ol problem ya?
Ridim Matiu 6:25-34, mo tokbaot kwestin ya:
?Jehova i mekem wanem blong olgeta we oli putum hem long fasples?
SAM MAN OLI SE: “Mi bisi tumas long wok, mi no save joen long ol miting.”
?Wanem vas i pruvum se taem yu putum wosip blong Jehova long fasples, hemia i gud moa?
SAMARI
Wok mo mane oli impoten, be oli no mas blokem yumi blong wosipim Jehova.
Tingtingbak
?Wanem i save givhan long yu blong gat stret tingting long saed blong wok?
?Sipos yu glad long ol samting we yu gat, hemia bambae i halpem yu olsem wanem?
?Olsem wanem yu save soemaot se yu trastem promes blong Jehova blong lukaot long ol man blong hem?
FAENEMAOT
Faenemaot sipos Baebol i talem se mane i nogud.
“?I Tru Se Mane i Stamba Blong Olgeta Fasin Nogud?” (Web atikol)
Faenemaot olsem wanem yumi save givim samting long fasin we God i glad long hem.
“?Baebol i Talem Wanem Long Saed Blong Givim Samting?” (Web atikol)
?Plei laki i oraet nomo?
Faenemaot olsem wanem wan man we i stap plei laki mo i stap stil, i jenisim laef blong hem.
“I Was Passionate About Racehorses” (Wajtaoa, 1 Novemba 2011)