LESEN 39
Tingting Blong God Long Saed Blong Blad
Blad i rili impoten. Sipos yumi nogat blad, yumi no save laef. God i wokem yumi, taswe hem i gat raet blong talem olsem wanem yumi save yusum blad. ?Hem i talem wanem long saed blong blad? ?Yumi save kakae blad o tekem blad transfusen? ?Mo olsem wanem yu save mekem ol gudfala desisen?
1. ?Wanem tingting blong Jehova long saed blong blad?
Long taem blong Baebol, Jehova i talem long ol man blong hem se: “Blad i laef blong evri laef samting, from we laef i stap long blad.” (Levitikas 17:14) Long lukluk blong Jehova, blad i representem laef. Mo from we laef i wan presen we i kam long God mo i tabu, blad tu i tabu.
2. ?God i givim wanem loa long saed blong blad?
Jehova i givim oda long ol man blong hem bifo se oli no mas kakae blad. Afta we Kristin kongregesen i stat, Hem i ripitim oda ya bakegen. (Ridim Jenesis 9:4 mo Levitikas 17:10.) Hed kampani i talem long ol Kristin se “yufala i no mas kakae blad.”—Ridim Ol Wok 15:28, 29.
?No kakae blad i minim wanem? Sipos dokta i talem se yu no mas dring alkol, i sua se bambae yu no dring. ?Be olsem wanem, bambae yu kakae ol kakae we i gat alkol long hem o yu stikim alkol i go insaed long bodi blong yu? Nogat. Long sem fasin, taem God i talem se yumi no mas kakae blad hemia i minim se yumi no mas dring blad, kakae mit blong animol we blad blong hem i no ronaot, o kakae eni kakae we oli putum blad long hem.
?Be olsem wanem long ol tritmen we i gat blad long hem? I klia se sam tritmen i brekem loa blong God. Eksampol, yusum blad transfusen o eni haf blong blad, olsem red sel, waet sel, pletlet mo plasma. Be sam tritmen, Baebol i no talem stret se oli brekem loa blong God. Eksampol, tritmen we i gat ol fraksen o smosmol haf blong red sel, waet sel, pletlet mo plasma long hem. Mo tu, i gat sam tritmen we dokta i yusum prapa blad blong sik man ya bakegen. Long ol tritmen olsem, yumi wanwan i mas mekem prapa desisen blong yumi.a—Galesia 6:5.
DIGIM MOA
Faenemaot olsem wanem blong mekem ol gudfala desisen long saed blong ol tritmen we yu save tekem.
3. Jusum ol tritmen we i mekem Jehova i glad
?Olsem wanem yu save jusum ol tritmen we i laenap wetem tingting blong God? Plei VIDEO, mo tokbaot from wanem i impoten blong folem ol rod ya.
Prea from waes.—Jemes 1:5.
Mekem risej blong faenem ol rul long Baebol we yu save folem.—Ol Proveb 13:16.
Faenemaot ol tritmen we oli save mekem long ples blong yu.
Savegud ol tritmen we yu no save akseptem.
Meksua se desisen blong yu i no spolem tingting blong yu long fes blong God.—Ol Wok 24:16.b
Tingbaot se hasban, waef, elda o Baebol tija blong yu, i no save mekem desisen blong yu, from we i stap long wanwan man blong jus.—Rom 14:12.
Raetemdaon desisen blong yu blong ol narafala oli save.
4. Ol Witnes blong Jehova oli wantem beswan tritmen
I posibol blong obei long loa blong God long saed blong blad mo stil kasem ol gudfala tritmen we i nogat blad long hem. Plei VIDEO.
Ridim Taetas 3:2, mo tokbaot kwestin ya:
?From wanem yumi mas gat respek mo toktok long kwaet fasin, taem yumi toktok wetem ol dokta?
No akseptem |
Kristin i save jusum |
|---|---|
A. Blad plasma |
Ol fraksen blong plasma |
B. Waet sel |
Ol fraksen blong waet sel |
C. Pletlet |
Ol fraksen blong pletlet |
D. Red sel |
Ol fraksen blong red sel |
5. Taem oli yusum ol fraksen blong blad
I gat fo stamba samting insaed long blad, hemia red sel, waet sel, pletlet, mo plasma. Insaed long ol fofala haf ya i gat ol smosmol samting bakegen we oli kolem ol fraksen o ol smosmol haf.c Oli yusum sam long ol fraksen ya long ol meresin blong blokem ol sik o blong stopem blad blong i no ronaot.
Sipos wan Kristin i wantem akseptem ol fraksen, hem i mas mekem desisen blong hem folem tingting we hem i trenem folem Baebol. Maet samfala oli jusum blong no tekem ol tritmen we i gat ol fraksen long hem. Be sam narafala, maet tingting we oli trenem folem Baebol i letem olgeta blong oli akseptem.
Taem yu wantem mekem desisen blong yu, tingbaot kwestin ya:
?Olsem wanem mi save eksplenem desisen blong mi long saed blong blad long dokta?
MAET MAN I ASKEM SE: “?From wanem i rong blong tekem blad transfusen?”
?Wanem tingting blong yu?
SAMARI
Jehova i wantem se yumi luk blad olsem wan samting we i tabu.
Tingtingbak
?From wanem Jehova i luk blad se i tabu?
?Olsem wanem yumi save se loa blong God se yumi no mas kakae blad, i minim blad transfusen tu?
?Olsem wanem yu save mekem wan gudfala desisen long saed blong ol tritmen we i joen wetem blad?
FAENEMAOT
?Yu mas tingbaot wanem bifo we yu akseptem tritmen we oli yusum prapa blad blong yu?
?Yu mas tingbaot wanem sipos yu wantem tekem ol fraksen blong blad o nogat?
?Wanem i pulum wan dokta blong i bilif se tingting we God i gat long saed blong blad i stret?
Luk olsem wanem ol elda long Komiti Blong Toktok Wetem Dokta oli halpem ol brata mo sista.
c Sam dokta oli luk ol fo stamba haf blong blad ya olsem ol fraksen. Taswe, yu mas eksplenem klia long dokta desisen ya se yu no wantem akseptem blad transfusen, o transfusen blong red sel, waet sel, pletlet, mo plasma.