Bigfala Hip Blong Ol Narafala Sipsip Oli Presem God Mo Kraes

1. ?Wan tok long bigfala asembli blong 1935, i mekem wanem long wan yang man?

WAN yangfala man i gat 18 yia taem hem i baptaes long 1926. Perens blong hem oli ol Baebol Studen, hemia nem blong ol Witnes Blong Jehova long taem ya. Tufala i gat tri boe mo tu gel, mo tufala i tijim olgeta blong oli wosipim Jehova God mo folem fasin blong Jisas Kraes. Evri yia, long Kakae Blong Masta, yang man ya i kakae bred mo i dring waen, sem mak long ol narafala Baebol Studen long taem ya. Be impoten tok ya “Bigfala Kampani,” i jenisim fulwan hop blong hem long saed blong fiuja. J. F. Rutherford i bin givim tok ya long 1935, long wan bigfala asembli long Washington, D.C., U.S.A. ?Oli lanem wanem long asembli ya?

2. ?Wanem niufala trutok we i kamaot long tok blong Brata Rutherford?

² Long tok ya, Brata Rutherford i eksplenem se hu olgeta we oli mekemap “bigfala kampani” (King James Version), o “bigfala hip blong ol man,” we Revelesen 7:9 i tokbaot. Go kasem taem ya, olgeta oli ting se ol man long “bigfala hip” ya, oli no fasgud oltaem long God, be bambae oli go long heven tu. Be Brata Rutherford i yusum ol vas blong Baebol, blong eksplenem se God i no jusum bigfala hip blong ol man, blong oli laef long heven, be olgeta oli ol narafala sipsip blong Kraes,b mo bambae oli gotru long “bigfala trabol” mo laef olwe long wol. (Rev. 7:14) Jisas i promes se: “Mi mi gat ol narafala sipsip we oli no blong yad ya. Olgeta ya tu, mi mas tekem olgeta oli kam, mo bambae oli lesin long voes blong mi, mo olgeta evriwan bambae oli kam wan grup nomo, mo wan man nomo bambae i lukaot long olgeta.” (Jon 10:16) Ol man ya we oli olsem ol sipsip, oli ol Witnes Blong Jehova we oli holemstrong long Hem, mo oli gat hop blong laef olwe long Paradaes long wol. (Mat. 25:31-33, 46) I gud yumi luk olsem wanem niufala save ya i jenisim laef blong plante man blong Jehova, wetem yang brata ya tu we i gat 18 yia.—Sam 97:11; Prov. 4:18.

WAN NIU SAVE WE I JENISIM LAEF BLONG PLANTE TAOSEN MAN

3-4. Long 1935, ?plante taosen man oli kasemsave wanem long saed blong hop blong olgeta, mo from wanem?

³ Wan gudfala samting i hapen long asembli ya, taem spika i askem long ol man se: “Yufala we i wantem laef olwe long wol, !plis yufala i stanap!” Wan man we i stap long taem ya i talem se, i gat samwe 20,000 man i stap, be bitim haf blong olgeta oli stanap. Biaen Brata Rutherford i talemaot se: “!Yufala i luk! !Hemia bigfala kampani!” Ale ol man we oli stap, oli singsingaot wetem glad. Olgeta we oli stanap, oli kasemsave se God i no jusum olgeta blong go laef long heven. Oli save se spirit blong God i no makemaot olgeta. Long nekis dei blong hem, 840 niu Witnes oli baptaes, mo bighaf blong olgeta oli blong narafala sipsip.

⁴ Afta long tok ya, yang man ya we yumi tokbaot hem finis, hem wetem plante taosen narafala, oli stop blong kakae bred mo dring waen long Kakae Blong Masta. Wetem tingting daon, wan brata i talemaot filing we hem mo plante narafala oli gat, i se: “Laswan taem we mi kakae bred mo dring waen long Memoriol, hemia long 1935. Mi kasemsave se Jehova i no putum hop ya blong laef long heven, long hat blong mi. Be mi gat hop blong laef long wol mo blong joen long wok ya blong mekem i kam wan paradaes.” (Rom 8:16, 17; 2 Kor. 1:21, 22) Stat long taem ya, bigfala hip blong man i gohed blong gru i kam plante, mo oli wokgud wetem smol haf blong ol tabu brata.c

5. ?Wanem tingting blong Jehova long olgeta we oli stop blong kakae bred mo dring waen?

⁵ ?Wanem tingting blong Jehova long olgeta ya we oli stop blong kakae bred mo dring waen long Memoriol, afta long 1935? ?Mo olsem wanem sipos tede, wan Witnes i kakae bred mo dring waen, be afta i kasemsave se tabu spirit i no makemaot hem? (1 Kor. 11:28) Sam oli kakae bred mo dring waen from we oli no suagud long hop blong olgeta. Be sipos oli luksave mastik blong olgeta, nao oli stop blong kakae bred mo dring waen, mo oli gohed blong mekem wok blong Jehova, i sua se Hem bambae i akseptem olgeta se oli blong narafala sipsip. Nomata se oli no moa kakae bred mo dring waen, oli stil gohed blong joen long Memoriol, from we oli glad tumas long samting we Jehova mo Jisas i mekem blong olgeta.

WAN HOP WE I SPESEL

6. ?Wanem oda we Jisas i givim long ol enjel?

⁶ Bigfala trabol i stap kam klosap, taswe i gud yumi lukluk bakegen long samting we Revelesen japta 7 i talem, long saed blong ol tabu Kristin mo bigfala hip blong ol narafala sipsip. Jisas i givim oda long ol enjel blong oli gohed blong holemtaet ol fo win blong trabol. Oli no mas lego ol win ya long wol, go kasem we olgeta tabu Kristin oli kasem mak blong stamp, minim se Jehova i apruvum olgeta. (Rev. 7:1-4) Presen we ol tabu brata oli kasem from we oli fasgud long God, hemia se oli kam king mo pris wetem Kraes long heven. (Rev. 20:6) Olgeta evriwan we oli pat blong famle blong God long heven, bambae oli wantem tumas blong luk taem ya we ol 144,000 tabu brata oli kasem presen blong olgeta long heven.

7. Folem Revelesen 7:9, 10, ?Jon i luk hu long vison, mo oli mekem wanem? (Yu luk pija long fran pej.)

⁷ Afta we Jon i tokbaot ol 144,000 king mo pris ya, hem i luk wan gudfala samting, hemia “wan bigfala hip blong ol man” we oli laef tru long Amagedon. Seken grup ya i defren long fas grup, hem i bigwan moa, mo yumi no save stret namba blong ol man long grup ya. (Ridim Revelesen 7:9, 10.) Oli “werem ol longfala waet klos,” hemia i soem se wol blong Setan i “no mekem [oli] doti,” mo oli holemstrong long God mo Kraes. (Jem. 1:27) Oli singaot bigwan se Jehova mo Jisas we i Smol Sipsip blong God, tufala i sevem olgeta. Mo long semtaem, oli holem han blong pamtri, we hemia i soem se oli glad blong luksave se Jisas i King ya we Jehova i putumap.—Skelem Jon 12:12, 13.

8. ?Revelesen 7:11, 12 i talem wanem long saed blong famle blong Jehova long heven?

⁸ Ridim Revelesen 7:11, 12. ?Wanem riaksen blong olgeta long heven? Jon i luk ful famle blong Jehova long heven we oli glad tumas, taem bigfala hip blong man i kamaot mo i presem God. Bambae famle blong Jehova long heven i glad tumas blong luk vison ya i kamtru, taem bigfala hip blong man i laef tru long bigfala trabol.

9. Folem Revelesen 7:13-15, ?olgeta long bigfala hip blong man oli stap mekem wanem naoia?

⁹ Ridim Revelesen 7:13-15. Jon i talem se bigfala hip blong ol man ya, oli “wasem klos blong olgeta finis long blad blong Smol Sipsip blong mekem oli kam waet.” Hemia i minim se tingting blong olgeta i klin mo God i luk olgeta se oli stret man. (Aes. 1:18) Olgeta oli ol Kristin we oli givim laef blong olgeta long God mo baptaes, oli bilif strong long sakrefaes blong Jisas, mo oli frengud wetem Jehova. (Jon 3:36; 1 Pita 3:21) Long rod ya, oli stret blong stanap long fored blong tron blong God, blong ‘mekem tabu wok blong hem long dei mo long naet’ long wol ya, we i yad blong tempol blong God long spirit. Naoia yet, oli wok strong blong talemaot Kingdom mo mekem disaepol, mo oli putum Kingdom i stap fasples.—Mat. 6:33; 24:14; 28:19, 20.

10. ?Bigfala hip blong man oli sua long wanem samting, mo bambae oli luk wanem promes i kamtru?

¹⁰ Bigfala hip blong man we oli laef tru long bigfala trabol, oli sua se God bambae i gohed blong kea long olgeta, from we God “we i stap sidaon long tron bambae i pulum tent blong hem antap long olgeta.” Long taem ya, promes ya we ol narafala sipsip oli wantem tumas blong luk, bambae i kamtru fulwan, hemia se “[God] bambae i ravemaot wota blong ae blong olgeta, mo bambae i no moa gat man i ded, mo bambae man i no moa sore, mo bambae i no moa gat man i krae, mo bambae man i no moa harem nogud long bodi blong hem.”—Rev. 21:3, 4.

11-12. (1) Olsem Revelesen 7:16, 17 i soem, ?wanem ol blesing we bigfala hip blong man bambae i kasem? (2) ?Ol narafala sipsip oli save mekem wanem long Memoriol, mo from wanem?

¹¹ Ridim Revelesen 7:16, 17. Sam man blong Jehova oli stap hanggri tumas naoia, from we oli gat problem long saed blong mane, o from i gat wo long kantri blong olgeta. Sam narafala oli stap long prisen from bilif blong olgeta. Be, bigfala hip blong man i glad tumas blong save se taem bambae oli laef tru long rabis sistem blong wol ya, oltaem bambae oli gat kakae blong bodi mo blong spirit. Taem bigfala trabol i kasem sistem blong wol blong Setan, bigfala hip blong man bambae i no kasem “hot blong” kros blong Jehova we bambae i kasem ol nesen. Afta we bigfala trabol i finis, Jisas bambae i lidim ol man we oli no ded long taem ya, i go long “springwota blong laef [we i no save finis].” Traem tingbaot: Bigfala hip blong man i gat wan hop we i spesel tumas. !Aot long plante bilian man, olgeta nao bambae oli neva save ded samtaem!—Jon 11:26.

¹² !Ol narafala sipsip oli gat wan nambawan hop, mo oli glad tumas long Jehova mo Jisas from hop ya! Jehova i no jusum olgeta blong go laef long heven, be nating se i olsem, Hem i luk se oli sas tumas long ae blong hem. Ol memba blong tugeta grup ya oli save presem God mo Kraes. Wan rod blong mekem olsem, hemia blong joen long Memoriol.

PRESEM GOD LONG FULHAT BLONG YU

13-14. ?From wanem evriwan i mas joen long Memoriol?

¹³ Long ol yia we oli jes pas, aot long 1,000 man we i joen long Memoriol, ating wan nomo long olgeta i kakae bred mo dring waen. Long plante kongregesen, i no gat man i kakae bred mo dring waen. Bighaf blong ol man we oli joen long Memoriol, oli gat hop blong laef long wol. ?Ale, from wanem oli joen long Kakae Blong Masta? Oli joen from sem risen ya we ol man oli gat, taem oli joen long mared blong wan fren blong olgeta. Hemia from we oli wantem soem lav mo sapot long kapol ya we i mared. Long sem fasin, olgeta long narafala sipsip, oli joen long Memoriol from we oli wantem soem lav mo sapot long Kraes mo ol tabu brata. Ol narafala sipsip oli joen tu blong soem tangkiu blong olgeta from sakrefaes blong Jisas, we i openem rod blong oli laef olwe long wol.

¹⁴ Wan nara impoten risen from wanem ol narafala sipsip oli joen long Memoriol, hemia blong obei long oda blong Jisas. Taem Jisas i stanemap spesel kakae ya wetem ol aposol blong hem, hem i talem long olgeta se: “Yufala i mas mekem samting ya oltaem blong tingbaot mi.” (1 Kor. 11:23-26) Taswe, taem sam long ol tabu brata oli laef yet long wol, ol nara sipsip bambae oli stil gohed blong joen long Memoriol. Blong talem stret, ol narafala sipsip oli stap invaetem evriwan blong oli joen long Memoriol wetem olgeta.

15. ?Olsem wanem yumi save presem God mo Kraes long Memoriol?

¹⁵ Long Memoriol, yumi gat janis blong presem God mo Kraes long ol singsing mo prea. Tok we bambae oli givim long yia ya, hemia “Soemaot Se Yu Tinghae Long Samting We God Mo Jisas i Bin Mekem Blong Yu.” Tok ya bambae i mekem se tangkiu blong yumi long Jehova mo Kraes, i kam bigwan moa. Taem oli stap pasem bred mo waen, yumi we yumi stap, yumi tingbaot blad mo bodi blong Jisas. Bambae yumi tingbaot se Jehova i letem Pikinini blong hem i ded long ples blong yumi, blong yumi save laef. (Mat. 20:28) Evriwan we oli lavem Papa blong yumi long heven mo Pikinini blong hem, bambae oli wantem joen long Memoriol.

TALEM TANGKIU LONG JEHOVA FROM HOP WE HEM I GIVIM LONG YU

16. ?Wanem sam samting we i sem mak long ol tabu brata mo ol narafala sipsip?

¹⁶ God i no tinghae moa long wan grup i bitim narawan. Tufala tugeta i sas long ae blong hem. Yes, hem i givim laef blong gudfala Pikinini blong hem, blong pemaot tugeta grup ya, hemia ol tabu brata mo ol narafala sipsip. Wan samting nomo we i defren long tufala grup ya, hemia hop blong tufala. Be tugeta grup ya i mas holemstrong long God mo Kraes. (Sam 31:23) Mo tingbaot se Jehova i save givim tabu spirit blong hem long yumi evriwan, folem nid blong yumi, nomata se yumi blong wanem grup.

17. ?Wanem samting we ol tabu Kristin oli wantem tumas?

¹⁷ Ol tabu Kristin oli no bon wetem hop ya blong laef long heven. God nao i putum hop ya long hat blong olgeta. Ale oli tingbaot hop ya, oli prea from, mo oli wantem tumas blong kasem presen blong olgeta long heven. Oli no naf blong tingbaot tu se spirit bodi blong olgeta bambae i olsem wanem. (Fil. 3:20, 21; 1 Jon 3:2) Nating se i olsem, oli wantem tumas blong mitim Jehova, Jisas, ol enjel, mo ol narafala tabu brata. Oli wantem tumas blong stap wetem olgeta long Kingdom blong heven.

18. ?Wanem samting we ol narafala sipsip oli wantem tumas?

¹⁸ Ol narafala sipsip oli tinghae long wan hop we plante man oli gat, hemia blong laef olwe long wol. (Pri. 3:11) Oli wantem tumas blong luk dei ya we oli save givhan blong mekem ful planet ya wol, i kam wan paradaes. Oli wantem tumas se dei i kam we oli save bildim haos blong olgeta, planem garen blong olgeta, mo gat ol pikinini we oli helti gud. (Aes. 65:21-23) Oli wantem tumas blong travel i go olbaot long wol, blong luk ol bigfala hil, ol forest, mo ol solwota, mo blong stadi long ol defdefren kriesen blong Jehova. Antap moa, oli glad tumas blong save se fasin fren blong olgeta wetem Jehova bambae i kam strong moa mo oli kam klosap moa long hem.

19. ?Memoriol i givim wanem janis long yumi evriwan, mo bambae i stap wetaem long yia ya?

¹⁹ Jehova i givim wan nambawan hop long evri man we oli givim laef blong olgeta i go long hem. (Jer. 29:11) Memoriol blong ded blong Kraes i givim wan bigfala janis long yumi evriwan, blong yumi presem God mo Kraes from samting we tufala i mekem blong yumi, nao yumi save haremgud long wan laef we i no gat en blong hem. I klia nomo se Memoriol i wan impoten miting we ol tru Kristin oli gat evri yia, blong mit tugeta. Bambae hem i stap long Sarede 27 Maj 2021, afta we san i godaon. Long yia ya, plante bambae oli fri blong joen long impoten taem ya. Sam narafala bambae oli joen, nating se i gat fasin agens. Samfala bambae oli gat jalens ya blong mekem Memoriol long prisen. Taem Jehova, Jisas, mo pat blong famle blong God long heven, oli stap lukluk, !i gud evri kongregesen, grup, mo man, oli enjoem wan gudfala Memoriol!