Traem Lanem Sam Niufala Samting Taem Yu Stadi, Ridim Baebol, Mo Rerem Ol Miting

Bifo we yumi stadi long wan samting, i gud yumi askem se, ‘?Bambae mi lanem wanem?’ Nating se yumi tingbaot stret samting we yumi ting se bambae yumi lanem, be bambae yumi lanem sam niufala samting tu. ?Taswe, olsem wanem yumi save lanem sam niufala samting taem yumi stadi, ridim Baebol, mo rerem ol miting?

Prea from waes. Askem Jehova blong i halpem yu blong kasem save long samting we hem i wantem se yu lanem naoia. (Jem. 1:5) I nogud yu dipen nomo long ol save we yu gat finis.—Prov. 3:​5, 6.

Letem Tok blong God i gat paoa long laef blong yu. “Tok blong God i laef i stap.” (Hib. 4:12) Evri taem we yumi ridim “tok” blong God, hemia i save gat paoa long yumi. Be hem i save gat paoa long yumi nomo, sipos yumi luksave se yumi nidim we God i tijim yumi.

Glad long evri samting we i stap long tebol blong Jehova. Evri samting long saed blong spirit we yumi stap kasem, oli olsem “wan lafet blong ol gudfala kakae.” (Aes. 25:6) Yu no mas gat fasin ya we yu no wantem kakae ol “kakae” we yu ting se bambae yu no laekem. !Bambae yu kasem plante gudfala samting sipos yu tekem taem blong kakae evri samting we i stap long tebol blong Jehova!